طريقة تنظيف البوتوغاز

المقادير

• سيترس
• خل التفاح
• كربونات الصوديوم او خل ابيض
• ملمع الالمنيوم
• سائل الجلي للتلييف

الخطوات

هلا اول شي بشيل روس الغاز وبحطهم بوعاء بلاستيك وبحط غمرتهم مي سخنة بتغلي وبحط معلقتين خل ومعلقة كربونات ،وبصيروا يفوروا وعملية الفوران بتشيل كل الدهون والزيوت المتراكمة او القهوة الجافة او بقايا الطبيخ .وبتركهم نص ساعة

بشيل الشبك وصينية الفرن وبرشهم بالسيترس وبليفهم باسفنجة وسلكة وسائل جلي وبشطفهم وبتركهم ينشفوا وكذلك مناصب روس الغاز بنظفهم بنفس الطريقة .

بشيل قطعة المعدن اللي تحت الشفاط وبرشها بسيترس وبفرشاية اسنان قديمة بفرشيها منيح وبشطفها بمي سخنة حتى تنظف تماما ،

برش خل ع سطح الغاز وكربونات وعلى غطا الغاز الزجاجي حتى تفور ويحلحل كل الدهون واي شي ناشف ع الغاز وبفرشاية اسنان بنظف عيون الغاز منيح

بعدين بليف السطح بسائل جلي وبمسحه بفوطة مبلولة وبعدين فوطة ناشفة وبعدين بلمع السطح بالايزي اللي هو ملمع الزجاج . وكذلك غطا الغاز

والفرن من جوا بليفه بليفة عليها خل وكربونات وبنظف الفرن منيح وبمسحه بفوطة مبلولة وبعدين ناشفه وبعدين بلمعه بملمع الزجاج وكذلك باب الفرن بنظفهبالسلكة وسائل الجلي وبشطفه بالمي وبس تتصفى المي بلمعه بالايزي

وكذلك زجاج الشفاط تلييف بالسلكة وبعدين فوطة مبلولة وفوطة ناشفة وبعدين تلميع

بزيح الغاز من مكانه حتى انظف مكان الغاز منيح وبليف جوانب خزانات المطبخ اللي بكون الغاز بينهم وبمسحهم بفوطة مبلولة وبعدها ناشفة وبعدها تلميع .وبليف البلاط ورا الغاز والارض وبشطفهم بالمي وبقشط الارض بالقشاطة

طبعا جوانب الغاز نفس الشي بليفهم بسائل الجلي ومي سخنة وبشطفهم بالمي وبنشفهم .

وبنظف المجلى وبشطف المطبخ

وسلامة تسلمكم

#طريقة تنظيف البوتوغاز …ام نضال