ورق دوالي
ورق دوالي
المقادير
- نص كيلو ورق دوالي
- نص كيلو رز تايجر
- ملعقتين صلصة بندورة
- ملعقة دبس رمان
- باكيت ماجي
- سنين ثوم أو حسب الرغبة
- نعنع ناشف
- فلفل اسود وملح
- فنجان زيت زيتون
الخطوات
السلام عليكم صبايا زاكي ، الدوالي او ورق العنب طبخة كثير زاكية وأغلب ستات البيوت بعشقوها وانا وحدة منهن واكيد الكل بعرف كيف بتنعمل الدوالي بس حبيت اشاركم اليوم طريقتي بالدوالي وبتمنى تعجبكم
بسم الله نبدأ….
أولاً بنسلق ورق العنب ونحطه ع جنب
وبننقع الرز بمي ساخنة ، بس ينتقع الرز بنغسلو مزبوط ونحطو بمصفاية عشان يتصفى من المي وبعد هيك بنحطه بوعاء مناسب ونحط فوقه الفلفل الاسود والصلصة والثوم المهروس ودبس الرمان وجزء من النعنع الناشف والملح وبحمي الزيت شوي وبضيفله باكيت الماجي وباقي النعنع الناشف وبس يذوب الماجي بضيف الزيت عالرز وبخلطهن منيح
ملاحظة (أنا هون ماضفت لحمة مع الرز لأني مابحبها جوا الدوالي بحب اضيف دجاج تحت الدوالي او ريش لحمة او ليّة بلدية) وبالتالي بترجع لست البيت اذا بتحب اللحمة المفرومة بتضيفها للرز
بس اخلط الحشوة ببلش لف وبس اكمل اذا بدي احط دجاج بعد ماانضفه بقلي او بشوحه حتى يتغير لونه وبعد هيك بحطو بقاع الطنجرة ، وبحط شرحات بصل وأحياناً بطاطا وليمونه مقطعه شرحات اذا كان الليمون اصفر اما اذا كان اخضر مابحط لأنه بعطي مرورة للدوالي
برتب الدوالي بالطنجرة وعند الطبخ بضيف ماء ساخن معه باكيت ماجي وملح مابغرقها بحط لحد مستوى الدوالي وبس تغلي عشر دقايق بوطي للغاز وبغطيها وبتركها ع مهلها تستوي ، بتفقدها من وقت لآخر عشان اذا بحاجة لمي اضيف و قبل مااطفي الغاز بعشر دقايق بضيف عصير ليمون مخلوط بملعقة دبس رمان وشوية زيت زيتون ، تقريباً بدها من ساعة ونص لساعتين حتى تستوي وبس تستوي اتركيها ربع ساعة قبل ماتقدميها
ملاحظة ( اذا بتحبي تطبخي كوسا مع الدوالي بنفس الطنجرة حطيها فوق الدوالي مو تحتها لأنه الكوسا بسرعه بتستوي وعشان الدوالي مايلون عالكوسا وبتضلها محافظة ع لونها الاخضر )
وصحتين وهنا للجميع
