منزلة الباتنجان سلسة وصفاتي المشكله 3
منزلة الباتنجان سلسة وصفاتي المشكله 3
المقادير
- دجاج ( استخدمت صدور الدجاج)
- حبتين باتنجان وسط
- كمية من البندوره المفرومه او المعصوره
- 1بكيت صلصة البندوره
- ملح
- فلفل اسود
- بهارات دجاج
- معلقة سكر
- زيت ذره
- ثوم مهروس كميته حسب الرغبه
- أرز ابيض للتقديم
الخطوات
يسعد مساكم …اليوم بقدملكم طريقة منزلة الباتنجان
اللذيذه لمحبي الباتنجان ..المعتاد انه هالطبخه تكون مع لحمه ..بس جربتها مع قطع الدجاج والصراحه الطعم روعه وحبيت اشاركها معكم وان شاء الله تنال اعجابكم
ويلااا مع شرح الطريقه ….
& اول شي بنجهز الدجاج ..انا استخدمت صدور الدجاج قطعتهم …وقليتهم بزيت قليل لحتى اتحمرو ضفتلهم ثوم مهروس وقليتهم سواا وضفتلهم رشة ملح وفلفل أسود وبهارات دجاج…
&وقليت معهم صلصة البندوره من بعد ما قلبتهم سوا ضفت البندوره المعصوره او المفرومه حسب ما بتحبو وبقلبهم سوا عالنار عاليه وبضيف معلقة السكر عشان حموضة الصلصة تخف وبعد هيك بضيف مي لحتى ينغمر الدجاج وبعد ما يغلي بوطي تحته لحتى يستوي الدجاج وتتسبك الصلصه
& والباتنجان بقطعه حسب الرغبه صغير او كبير انا عملته قطع وسط عشان ما يذوب ملحته وقليته ووضعته عالفاين المطبخ لحتى يتشرب الزيت يلي فيه ..وبعد هيك وضعت طبقة باتنجان بالبايركس او الصينيه ووضعت الدجاج والصلصة ووضعت طبقة باتنجان عالوجه
& ودخلتها عالفرن تاخذ طعم مع الباتنجان وبالفرن طعمها غير اذا حبيتو عالغاز كمان بزبط ..بخليها تقريبا عشر دقائق فقط لانه كل اشي مستوي بس لحتى تتسبك مع الباتنجان ..
& بقدمها مع الارز الابيض وكتييرررر طيبه ..
وصحه وعاافيه
