طريقة عمل النودلز بيتي أتحدى أي حد يميزها عن الجاهز

المقادير

• 3 كوب طحين
• 2 بيض
• رشة ملح
• ماء حسب الحاجة استخدمت ثلث كوب
• نشا للفرد
• بهارات شوربة النودلز:
• 2م.ص بودرة ثوم
• 2م.ص بودرة بصل
• 2م.ص كركم
• 2م.ص بابريكا
• م.ص كمون مطحون
• 2م.ص كاري
• مكعب ماجي

الخطوات

نودلز بيتي 100% أتحدي أي حد يميزه عن الجاهز

السلام عليكم ورحمة الله وبركاته

بعد استراحة المحارب اللي اخذتها اسبوعين بعد مسابقة السلاسل الاولى كان لابد نرجع بوصفات جديدة ومفيدة.

كل اولادنا بحبوا النودلز وبطلبوها وكثير سمعنا عن اضرارها على الصحة ، وبصراحة ماكنت مفكرة قبل هيك اني اعملها بس طلب جوري للنودلز اجا بوقته وخلاني افكر اجربها وجربتها وزبطت الحمدلله، ولازم اشكرها صراحة لإنها السبب في اني تعرفت عهالوصفة الرائعة خلينا نشوف الطريقة

أولاً/ العجينة

بنخلط كل المكونات مع بعض الطحين والبيض والملح وبنضيف المي بالتدريج لحتى نحصل على عجينة ناعمة وقاسيه شوي كمية المي حسب نوع الطحين أنا اخدت مني ثلث كاسة مي بس ، بنريحها نصف ساعة قبل البدء بالتشكيل.

ثانياً/ التشكيل

بنقطع العجينة قسمين وبنفردها رقيق قد مانقدر ومع رشرشة نشا عشان ماتلزق ، وبعدين بنبرمها على بعضها وبنقطعها بسكين تقطيع رفيع جدا وبنغبرها بالنشا وبنفككها من بعض، وبنرجع ننخلها مزبوط من النشا وهيك النودلز جاهزة .

ثالثاً/ عمل قوالب النودلز

بنستخدم اناء بشكل مربع عشان يعطينا شكل النودلز الجاهز وبنعبيه من العجينة وعلى فرن هادي في الوسط لمدة 20 دقيقة بس ينشف بدون مايتغير لونه. رح يصير يابس زي الجاهز.

رابعاً/ بهارات النودلز

بنحتاج لخلطة بهارات النودلز

2م.ص بودرة ثوم

2م.ص بودرة بصل

2م.ص كركم

2م.ص بابريكا

م.ص كمون مطحون

2م.ص كاري

مكعب ماجي

بنخلط البهارات سوا وبناخد منهم ملعقة واحدة لكل وجبة نودلز لشخص واحد.

خامساًاً/ طهي النودلز

بنغلي كمية مي مناسبة لكمية وجبتك وبنضيف عليها ملعقة بهارات وملعقة زيت وبنزل النودلز لحتى تطرى وتستوي زي طريقة الجاهزة.

وصحة وهنا

ملاحظة/ هاي الكمية عملت 4 وجبات بالضبط