ألذ صفيحه باللحمه مضمونة مليون بالمية لإفطار ولا ألذ وخاصة للعزومات سلسلة وصفاتي لرمضان 1

المقادير

• للعجينة:
• ملعقتين كبار سكر
• ملعقة كبيرة خميرة فورية
• كوب ماء دافئ
• ثلاث أرباع كوب حليب دافئ
• ملعقة كبيرة ونصف لبن
• ثلث كوب زيت
• نصف ملعقة كبيرة بيكينغ باودر
• نصف ملعقة كبيرة ملح
• حوالي 4 كوب طحين (حسب الحاجة ونوع الطحين)
• لخلطة الصفيحة:
• نصف كيلو لحم مفروم نااعم
• كوب من البصل المضروب عالخلاط
• كوب ونصف من البندورة المضروبة عالخلاط
• ربع كوب دبس رمان
• ملعقة صغيرة فلفل أسود
• ملعقة صغيرة بهارات مشكلة
• نصف ملعقة كزبرة يابسة مطحونة
• رشة هيل وقرفة وتوم بودرة
• ملح حسب الرغبة

الخطوات

☆بسم الله الرحمن الرحيم☆

للعجينة

أول شي منحط الماء الدافئ والحليب والسكر والخميرة ومنخلطهم ليدوبو السكر والخميرة منضيف كوب ونصف طحين ومنخلطهم منيح ليمتزجو ومنغطيهم ومنتركهم ربع ساعة ليرتاحو وتتفاعل الخميرة منضيف الزيت واللبن ومنخلطهم ومنرجع نصيف وراهم البيكينغ باودر والملح والطحين بالتدريج لنحصل على عجينة طرية وملمومة على بعضا ومنعجنها حوالي عشر دقايق ومنرجع نغطيها ومنريحها ربع ساعة وبتصير جاهزة للشغل

أثناء وقت راحة العجينة منجهز الحشوة

منخلط المكونات كلا مع بعضها لتمتزج مع بعضها بشكل ممتاز وبتصير جاهزة للشغل.. واذا حسيتوها نزلت مي كتييير صفوها شوي

لازم تمون متل الصورة تقريبا بحيث ماتكون ناشفة ولا تملي العجينة مي..

هلا بقى مناخد قطع صغيرة من العجينة ومنكورها

ومنرش رشة طحين صغنوتة محل مارح نفرد

ولنحصل على شكل قرص الصفيحة البيضوي في حيلة بسيطة لفرد العجينة وهية انو نحط الشوبك بشكل مستقيم و نفرد اول مرة وبعدا منحط الشوبك بشكل مائل متل مو واضح بالصورة ومنفرد بالميل رح يصير عندكم شكل بيضوي رائع ومرتب وبكل سلاسة وسهولة

رققو العجينة قد مابتحبو وطبعاً الصفيحة معروفة انو عجينتها بتكون رقيقة كتير بس الحجي تبعي بحبها تكون أسمك لهيك أنا مابرققها عالأخير وطبعاً الخيار راجع إلكم

ومنفرد عليهم طبقة من خليط اللحمة ومندخلهم الفرن اللي منكون محميينو قبل بوقت على درجة حرارة 180 ليتحمرو من تحت وفوق وانتبهو مابياخدو وقت أبدا

اذا التزمتو بالخطوات متل مو حاطتها تمام

رح تستمتعو بطعم رائع ماتنسوه لا انتو ولا أهل بيتكم هههههه

بتمنى تعجبكم وتدعولي بالبركة يا أميرات♡