عمل صينية بطاطا بنكهة مارح تنسوها لو جربتوها
عمل صينية بطاطا بنكهة مارح تنسوها لو جربتوها
عمل صينية بطاطا بنكهة مارح تنسوها لو جربتوها
انتي تسنيم تعي بدي شوفك قديه معدلة بفرم البصل ههههههه وانتو لحقوني نشوف المقادير لبين ما الشطورة تخلص شغلها:
المقادير
- بطاطا مقطعة مكعبات صغيرة شوي
- بصل مقطع جوانح
- شرائح فطر وابدا مو بالضرورة نفس اللي بالصورة انا حبيت جربو بس ومالاقيت فيه اي ميزة عن الفطر المعتاد بالعكس طري زيادة وشكلو بيرعبني هههههه
- كريمة سائلة للطبخ او بدالها 3 ملاعق كبيرة قشطة مخلوطة ب4 ملاعق حليب
- مقدار ملعقة كبيرة من الشبت المفروم ناعم وممكن استبدالو بنوع تاني من الأعشاب متل الريحان او الزعتر البري مثلا
- شوية زيت نباتي
- ملح
- فلفل أسود
- رشة فليفلة حمرا
- رشة توم بودرة او سنين توم مهروس
- قشقوان للوش يسعدلي هالوش ههههه
الخطوات
☆بسم الله الرحمن الرحيم☆
اول صورة فيها الفطر العجيب اللي قلتلكم عنو ههههه
قطعتو مربعات وجهزت البصل والبطاطا والذي منو
منحط شوية زيت بالطنجرة ومنقلب فيه جوانح البصل ليدبل
بتعرفو شو اكتر شي بكاني بحياتي؟؟
ايه البصل ماغيرو حسبي الله فيه بس هههه
المهم بس يدبل بصل افندي منزت عليه مكعبات البطاطا مع البهارات خليه يختنق ونرتاح من ريحتو الظريفة ومنخلطهم ونغطيهم ومنتركهم لحتى تقريبا تستوي حبة البطاطا بس تبقى محافظة على شكلها وماتنهرس وتضيع هيبتها ساعتها منحط الشبت أو الأعشاب التانية ومنقلبهم سوا ومنصبهم على جاط بايركس ومنصف فوقهم شرائح الفطر ومندخلهم عالفرن ليتحمر الوش شوي
بس يتحمرو منطالعهم ومنوزع خليط الكريمة او القشطة مع الحليب فوق الفطر والبطاطا ومنحط عالوش قشقوان ومنرجع ندخل الصينية للفرن لتتمازج كل هالنكهات مع بعض ويسيح هالقشقوان ريتو مايبلى هههه
طبعاً مابدي احكيلكم عالطعم أعتقد وصلتكم الفكرة وبتمنى من قلبي تجربوها وتقدموها لأطفالكم وتدعولي بالخير والبركة يا ورداتي انتو♡
أستودعكم الله
