لن انسى بقلم هلا غرابلي

الخطوات

الجزء الاول

هدمتني الحياة مرارا …كسرتني بعض المواقف ….حطمتني بعض الظروف ….و الحق بي بعض البشر الاذى و الخراب لكن في كل مرة كان الله يبنيني من جديد(مقتبس)

كل حدا فينا عندو قصة بحياته بحاول كتير يخبيها بمكان ما حدا يوصله حتى لو هربت لمطرح ما حدا بيعرفك فيه و لا انت بتعرف حدا العيون وحدها بتفضحك العيون مرآة الداخل قادرة تعكس حزنك و الغصة يلي بقلبك حتى لو كل ملامح وجهك كانت عم ترقص و تضحك للعيون لغة و قاموس ما حدا بيقدر يفهمن الا العيون نفسها…..

سافرت لمطرح كنت متخيلة انو اقدر عيش و سامح و انسى بس المشكلة انو عشت و سامحت بس ما قدرت انسى الذاكرة احيانا وقت بتضغط عليها لتخليها تنسى بتعاقبك و بتعاندك و ممكن انو دمرك الذاكرة ما فيك تتحداها و تجبرها على النسيان نسيان ماضي اشخاص مواقف بالعكس بتقوى و بتصير ذاكرة من حديد …..#hla_gharabli

ربيت ببيت صغير و باسرة فقيرة صح شفت فقر كتير عند اهلي بس كنت مبسوطة بين عيلتي ابي و امي يلي كانو حنونين علينا و اخواتي مرفت و مي و ماجدة يلي كانو رفقاتي كنا4بنات بس حتى كانو العالم ينادو لابي بابو البنات لانو امي ما جابتله الصبي يلي يحمل اسمه على قولة ستي الله يرحمها يلي ماتت فقع لانو ابوي رفض يتزوج على امي وحدة تانية لتجبله الصبي ……

انا مرام الاخت الكبيرة بين اخواتي نجحت بالبكالوريا و سجلت بالجامعة كلية الهندسة المدنية بمحافظة تانية لانو كان معدلي ما بفوتني الكلية نفسها بمحافظتي لهيك اضطريت سافر و اترك بيت العيلة لالتحق بجامعتي و بالسنة الاولى تعرفت على احمد يلي كان بيدرس متلي بس هو سنة رابعة حبينا بعض كتير و تحدينا العالم كله لنتزوج و حتى تحدينا اهلي و اهله يلي كانو رافضين الزواج بحجج نحن شفناها غير منطقية و مقنعة و بعد سنتين تزوجنا ببيت اجار لنبلش انا و اياه من الصفر انا كنت عم كمل دراستي و اعطي دروس خصوصي و هو كان يشتغل و كنا نتساعد لندفع اجار البيت و ندبر حالنا بالمصاري الباقية من راتبه….يتبع

الجزء التاني:

بعد سنة و نص من زواجنا اجت ليليان بنتي لتزين حياتنا مع انو كنا ماجلين موضوع الحمل لتتحسن ظروفنا و بحكم شغلي ودراستي و شغل زوجي ليليان لبكتنا كتير بجيتها اجت من غير اي حساب بس وجود اختي مي جنبي ساعدني كتير بحكم انو نجحت بالبكالوريا و معدلها فوتها كلية التربية بجامعتي لهيك اجت استقرت عندي و ساعدتني كتير ببنتي انا وقفت دراستي بالجامعة لتكبر ليليان و استمريت اعطي دروس خصوصي و نظمت وقتي على وقت تفريغ اختي من الجامعة و بعدين يرجع زوجي احمد يستلما من اختي مي لتطلع على جامعتا لوقت انا كون رجعت من شغلي و استمرينا على هالنظام سنتين كاملين لوقت فقت هديك الليلة على ليليان هي و سخنانة متل النار التفتت على زوجي احمد لفيقه بس ما لقيته جنبي و كالعادة سهران مع رفقاته رحت لعند اختي مي على غرفة القعدة لفيقها و تجي تساعدني ب ليليان

مي….احمد….

حطيت ايدي على الحيط لسند حالي لانو حسيت حالي رح دوخ و اوقع بالارض من المنظر يلي شفته اطلعو فيني و قامو لبسو تيابن فورا

زوجي و اختي و بنص بيتي صرت صرخ و قلن اطلعو برا اطلعو برا يا وسخين ما بدي شوفكن

لبسو تيابن و قرب علي احمد قلي طولي بالك حاج تصرخي قلتله اطلعو برا احسن ما لم الناس عليكن فتحتلن باب البيت و قلتلن لبرا يلا يلا يا اختي و يلا و زوجي لك تفو عليكن لك الله يلعنكن و هجمت على مي لاضربها بس احمد بعدها عني و اخدها و طلعو برا البيت …..#hla_gharabli

انهارت اعصابي و بكيت كتير و دقيت لامي انا و عم ابكي لقلها شو شفت بس امي ما فهمت علي شي من حكيي بعدين تذكرت بنتي ليليان السخنانة قمت فورا لعندها شلحتا تيابها و حممتا بالمي و اعطيتها خافض حرارة لنزلت حرارتا شوي و هديك الليلة ما غفلت عيني ابدا و بقيت طول الليل انا و عم ابكي و حسيت عقلي ما قادر يستوعب الشي يلي شفته و بقيت اسبوع بالبيت ما طلعت منه ابدا و بقيت طول الاسبوع و انا قطع تياب احمد و تياب مي و مزعت صورنا و كبيتن بالزبالة و بعتلن مسجات كتير بهدلتن و سبيتن و يلي زاد الطين بلة وقت خبرت اهلي بالشي يلي صار ابي ما تحمل الخبر و صابتو جلطة قلبية و اسعفو فورا عالمشفى و دقتلي امي و قلتلي هيك صار بابوكي اتركي البيت و انزلي فورا ضبيت اغراضي كلها و قبل ما احجز لبيت اهلي بعت عفش بيتي كله بيومين بيتي يلي انخرب و يلي خربته ما وحدة غريبة هي اختي من ابي و امي اختي يلي فتحتلها بيتي و امنتها عليه و على بنتي ……

نزلت عند اهلي يلي كان وضعن مكركب من الشي يلي صار و فتت على ابي سلم عليه و قلو لحمدلله على سلامتك و اعتذر منه لانو ما كان لازم خبره ابدا و وقت شاف وجهي شاحب و عيوني منفخين من البكا قلي الله يغضب عليها لاختك مي انشالله بقبرها هالاسبوع تحت التراب قلتلو طول بالك انا صرت احسن ما بس الحق عليها و الحق على الكلب زوجي يلي تحديت الدنيا لاتزوجه اديش نصحتوني انو بلاه و ما من توبنا و بيئتنا و انا بقيت معندة كل شي الو حل قلي عم ندقلها لهل المغضوبة ما عم ترد قلتلو ما رح ترد ما الها عين ترد انا بدي اطلق من احمد هيدا يلي بهمني هلا قلي انا بدي اختك مي ترجع على البيت بدي ادبحها و اخلص منها هي الوحيدة بين اخواتك يلي عذبتنا كتير طايشة و مستهترة و ما عندها مبادئ مع انو ولله كلكن ربيناكن نفس الشي ليش طلعت هاي اختك هيك الله يلعنا ……

حاولت دق لاحمد كتير بس ما كان يرد علي بعتله مسج بانو انا تركت البيت و صرت عند اهلي ما بدي منك الا طلقني بس حتى ما ارفع عليك دعوة طلاق و نفوت محاكم و بعد شهر بعتلي ورقة طلاقي بدون اي محاولة منه ليصلح الوضع او يعتذر هو او مي بس هالشي ما كان اثره علي اصعب من خبر زواجه من مي بعد طلاقي ب 3شهور اتصلت مي بامي و قلتلها انا و احمد تزوجنا و قبل ما تبلش امي بالمسبات و الدعاوي عليها سكرت مي الخط فورا و فاتت امي عندي لتخبرني….يتبع

#hla_gharabliبقلمي

الجزء التالت:

قبل اليوم كنت اعتقد اننا لا يمكن ان نكتب عن حياتنا الا عندما نشفى منها عندما يمكن ان نلمس جراحنا القديمة بقلم دون ان نتالم مرة اخرى عندما نقدر على النظر خلفنا دون حنين دون جنون و دون حقد ايضا

نحن لا نشفى من ذاكرتنا و لهذا نحن نكتب و لهذا نحن نرسم و لهذا يموت بعضنا ايضا(مقتبس)

خلص خلص ما بئا قادرة اسمع اي شي عن مي و احمد خلص ما حدا يجيب سيرتن قدامي المرة يمكن تقدر تتناسى خيانة زوجها مع غيرها بس ما بتقدر تتحمل غدر اختها كمان خنجر بالقلب و خنجر بالضهر بوجعو كتير بكيت كتيرر بكيت عن دهر باكمله بكيت على حبي على غبائي على طيبتي و على سنيني و الدنيا ضاقت فيني و صغرت بعيني كان بدي اهرب من عيون الناس و كلامن و حتى من حالي …..

ضبيت تيابي و قلتلن لاهلي انا بدي سافر مع بيت خالي على اوروبا اهلي رفضو و خافو علي و قلولي ناس كتير غرقت بالبحر و ماتت قلتلن انا ميتة بكل الاحوال انا مقررة خلص و هاي فرصتي لابدأ حياة جديدة و اقدر انسى لانو كل شي هون عم يخنقني و يذكرني و انا بدي انسى ….

طلعت انا و ليليان و خالي و مرته و اولاده على تركيا و من تركيا طلعنا بمراكب الموت كانت كل الناس وجوهها مصفرة و ملامحها ضايعة خطوة لقدام و عشرة لورا كل واحد فينا طالع ليهرب ناس لتهرب من الحرب و ناس لتهرب من ذكريات تعددت الاسباب و الوجهة وحدة ارض غريبة و ناس غريبين و بداية جديدة كنت ما خايفة ابدا كنت جسد بلا روح لانو متت مية مرة من قبل لهيك ما كانت رح تفرق معي اذا غرق المركب و متت موتة وحدة بقينا عشرة ايام بين البحر و السما وين ما طلعنا مي و سما بس عشرة ايام مع ناس عم تطلع لقدام و تحكي عن احلامها و مستقبلها يلي ناطرها بارض المهجر و ناس عم تطلع لورا و تبكي على البلد و على الذكريات و الناس يلي تركوها وراهن و على امل يرجع القدر يجمعن مرة تانية ….

بعد عشرة ايام وصلنا ايطاليا و استقبلنا الصليب الاحمر و بعد نص ساعة اجت دفعة تانية كانت بس 15شخص هنا الناجين الوحيدن من مركبن يلي غرق كان شبح الموت واضح على وجوهن الام يلي غرقو اولادها و الولد يلي ماتو اهله و الرجال يلي ماتت مرته و اولاده قلت بيني و بين حالي لو جيت انا و مي و احمد و ماتو الاتنين بالبحر اهون علي من الشي يلي عملوه كانو طلعو من حياتي على الاقل بذكرى حلوة الن …..

نقلونا على كامب مؤقت بقينا فيه 3 ايام قبل ما تابع وجهتي انا و بيت خالي هن تابعو على السويد و انا بقيت بالمانيا لبلش حياة جديدة و قعدت بكامب تعرفت فيه على ناس كتير كل حدا فينا يحكي عن قصته و رحلته و طموحه و وقت اجا الدور علي صفنت شوي و تذكرت كل شي شفته قبل ما وصل لهون و قلتلن انا كنت جاي انا و اختي و زوجي بس غرقو بالبحر و ماتو و انا و بنتي لحسن حظنا نفدنا من الموت باعجوبة ……

بعد اسبوعين وصلت دفعة جديدة على الكامب و كان من بيناتن شاب وجهو مالوف عندي و بتذكر اني شايفته بس بعدين عرفت من رفقاتي بالكامب انو هالشب من المركب يلي غرق و نجا منه 15شخص و هالشاب غرقو مرته و اولاده بالبحر يلي بلع ناس كتير كانت حالته النفسية سيئة و بياخد ادوية نفسية حتى كان يقعد لحاله و ينعزل عن كل الناس يلي بالكامب كانو عايش لحاله بهالعالم …….

بقيت سنة الا 3شهور بالكامب صح كانت العيشة فيه صعبة لانو كنا نام و نفيق و ناكل على نظام معين بس تعرفت فيه على رفقة كتير كانو يسلوني بغربتي و من ضمنن سامر الشب يلي فقد عيلته كان يحمل ليليان و يلعب معا حتى ليليان حبته كتير و صارت بس تشوفه تركض لعنده و تمسك ايده ليقوم يلعبها و احيانا كنت المح دمعة بعيونه وقت يكون حاملها و بتذكر قلي انا كان عندي بنت بعمر بنتك بس البحر اخدها مني و صار يبكي قلتله الله يرحما و يرحم اما و اخواتا و تابع حديثه قلي بنتك ليليان بضحكتها و حركاتها خلتني انسى وجعي شوي ما بتخيل حالي فيق شي نهار ما شوفها معنا بالكامب قلتله حتى لو طلعت رح نبقى على تواصل اكيد و ايمت ما بدك فيك تجي تشوفها …..#hla_gharabli

اخدت الاقامة و استقريت ببيت لحالي و بلشت بكورسات اللغة كنت حكي اهلي تقريبا كل يومين و ضمنهن عني و كتير شجعتن يلحقوني بس البابا كان رافض الفكرة و بعد شهر دقيت لاختي مرفت

انا: هاتي احكي مع امك عم دقلها و ما فاتحة واتس و رقمها خارج التغطية

مرفت: امك ما هون

انا: وينها؟؟؟

مرفت: سافرت لعند مي

انا: لعند مي؟؟….!ليش سافرت عندها ما على اساس اهلك تبرو منها بعد عملتها السودة؟

مرفت: صح بس مي بالمشفى احمد ضاربها ضرب مبرح و غابت عن الوعي اسعفها على المشفى و دقلنا قلنا اطلعو لعندا

انا : ………. كيفا هلا و ليش طيب ضربا ؟؟

مرفت: ما بعرف شي ابدا امك طلعت من الصبح هي و اختك ماجدة لعندا و حكيتن من شوي بعدن على الطريق ما وصلو

انا: طيب خبريني شو بصير معكن ماشي اول ما يوصلك شي دقيلي فورا

سكرت الخط مع اختي مرفت و انا ما عارفة حالي اشمت الا ازعل احمد بحياته ما مد ايده علي نطرت على اعصابي لاعرف ليش ضربها و كيف وضعها هلا بعد ساعتين دقتلي اختي ماجدة و خبرتني انو هن عندا بالمشفى ورجعت مي لوعيها و حكت انو علقت معو لاحمد لانو قلها انت خربتي حياتي و خليتيني طلق مرتي يلي بحبا و بعديني عن بنتي و هجم ضربها و قلعها و دفشها على درج البناية و غابت عن الوعي و اجا احمد حطها بالمشفى و هرب و ما حدا بيعرف عنه شي

تاني يوم دقتلي ماجدة و قلتلي انو الدكتور قلن انو مي ما بقا رح تقدر تمشي على رجليها قبل سنتين على الاقل و قبل ما داوم على المعالجة الفيزيائية قلتلها يا لطيف الله يشفيها يا رب قلتلي بس المعالجة الفيزيائية بتكلف كتير و انت بتعرفي الوضع قلتلها طيب انا رح حولكن كل شهر لساعدكن بعلاجها قلتلي معقول بعد كل شي عملته فيكي و بدك تساعديها قلتلها لوجه الله تعالى ..

بعد 4شهور اندق باب بيتي فتحت الباب و تفاجات باحمد سكرت الباب بوجهه فورا قلتله الله لايوفقك شو جابك لهون هربت منك و ما خلصت قلي افتحي الباب مرام فتلت الدنيا عليكي للقيتك خلينا نحكي شوي قلتلو خلص الحكي روح ارجع لمرتك يلي عملتلها عاهة يا مجرم و يا خاين قلي ما الحق علي الحق على اختك هي يلي غرتني و خلتني اغلط معا و انا اضطريت اتزوجها لاستر عليها قلتلو انقلع من هون احسن ما دق للبوليس يجو يشحطوك شحطة الكلاب قلي بدي شوف بنتي قلتلو هلا تذكرت الك بنت ما الك عندي شي و انا مخطوبة هلا قلي شووو مخطوبة لمين ؟؟!قلتلو ما خصك و روح من هون فورا #hla_gharabli

انا ما كنت مخطوبة رسميا بس كانت علاقتي بسامر علاقة جدية و فتح موضوع الزواج و انا اجلته لنتعرف على بعض اكتر و ليتحسن هو نفسيا و يتجاوز الصدمة يلي مر فيها بس وصول طليقي احمد لالمانيا هو شي ما كان بالحسبان ابدا بس انا ما رحمته ابدا مو كرمال اختي لا بس لانو اجتني الفرصة لاخد حقي منه و رحت على البوليس و خبرتن انو هو زوج اختي و انو ضربها و عملها مشلولة و قدمتلن كل الاوراق و التقارير يلي بتثبت هالشي و كلو بعتتلي اياه اختي ماجدة والبوليس بدوره تصرف معه و ما بقا سمعت عنه شي ابدا و بعدها فتحت موضوع زواجي من سامر مع اهلي و رحبو بالفكرة و باركولي زواجي اما مي بعد زواجي باسبوع دقتلي لتباركلي بكيت كتير و قلتلي سامحيني انا اخدت عقابي و الشي يلي صار فيني بستاهله و انت احسن مني بكتير امنتيني على بيتك و انا غدرت فيكي بس لانو غرت منك و شفت زوجك اديش بحبك و كيف عم يعاملك لهيك الشيطان لعب بعقلي سامحيني يا مرام لاقدر تابع حياتي مع انو انا مستحيل سامح حاالي بس نحن منبقى اخوات قلتلها انا مسامحتك مو لانك اختي و مو لانو شفقانة عليكي بس لانو المسامح انسان كريم و قوي و انا قوية و قدرت تابع حياتي بعد هالصدمة بس مستحيل انسى مستحيل انسى ……

انتهت.#hla_gharabli