لانشون بقري بثلاث خيارات للطعم
لانشون بقري بثلاث خيارات للطعم
المقادير
- ربع كيلو لحمة يفضل منها شوي دهن
- 4 مثلثات جبنة
- م.ص جيلاتين او بياض بيضة
- م.ص بهارات لحمة
- م.ص كزبرة بودرة
- م.ص بصل بودرة
- م.ص هيل مطحون
- م.ص ملح
- نصف م.ص فلفل اسود
- نصف م.ص ثوم بودرة
- 3 م.ك نشا
- نصف كوب ماء مثلج
- نقطة لون غذائي
الخطوات
السلام عليكم ورحمة الله وبركاته
بعد ما عملت لانشون الدجاج حبيت اجرب لانشون اللحمة وبناء على طلب بعض الأخوات جربتها وكانت نتيجة رائعه خلينا نشوف الطريقة
أولاً/ الخلطة
بنبدأ باللحمة بالاول بنطحنها لحالها تنعم شوي وبعدين بنضيف باقي المواد عدا اللون الغذائي وبنطحنها بشكل ممتاز يعني لازم تكون مثل الكريم من النعومة بتطول شوي لتعطيكي النتيجة الناعمة بس معلش عشان ترضي بالاخر.
—بنضيف الجيلاتين بنذوبه بملعقة ماء بارد وبعدين بنضيف ربع كوب ماء ساخن عليه لحتى يذوب تماما وبنضيفه للخلطة وبنطحن. وبديله بياض بيضه.
—بتضيفي نقطة لون غذائي وبتابعي الطحن ، ممكن ما تستعملي اللون بس بصراحة بدونه لون اللانشون مش حلو بطلع بني مش مشهّي للأكل.
ثانياً/ السلق
بنفرغ الخلطة على كيس حراري مفتوح وبنرولها وبنشد الاطراف وبنرد نلفها بورق قصدير وبنشده مزبوط وخليه طبقتين عشان ما توصل المي للخلطة.
—بنكون حاطين مي عالغاز تغلي بطنجرة وبنزل فيها رول اللانشون لازم ينغمر بالمي انا خليت القصدير بارز عن الرول وثبته على اطراف الطنجرة عشان يضل مغمور بالمي.
—بنخليه يغلي على نار خفيفة بس لازم تستمر المي بالغليان لمدة ساعة كاملة.
—بنرفع الرول من المي وبنتركها مثل ماهيه تبرد ما بنفتح ابدا عنها الا لثاني يوم طبعا بالثلاجة.
ثالثاً/التقديم والطعم
ثاني يوم بنقطعها وبنقدمها مع سفرة فطورك او ساندويشات زي مابتحبي .
—طعمها طيب طبعا مش مثل اللانشون الجاهز.
—ممكن تقدم مقلية طعمها بيعطي على همبرغر اكثر كثير طيبة مقلية.
—اذا تم تدخينها بتعطيكي طعم كباب مشوي عالفحم.
وصحة وهنا
