طريقة القطايف ولا أروع ملكة رمضان

المقادير

• كوب طحين
• نصف كوب سميد ناعم
• رشة ملح
• م.ص بيكينج باودر
• 1.5 م.ك سكر
• ربع م.ص كربونة
• كوب ماء دافئ
• كوب حليب سائل دافئ

الخطوات

السلام عليكم ورحمة الله وبركاته

طبعا بعد الوجبات الرئيسية والاطباق الجانبية صار بدها حلويات شهيه ، وما في بعد القطايف برمضان نحلي فيها ويا سلام لو كانت من شغلنا ومن تحت ادينا ، وطرق القطايف كثار بس انا حبيت هالطريقة طيبة وسهلة وفيها قرمشة لذيذة ، بتختلف اختلاف بسيط عن الوصفة اللي اعطيتها للصبايا من قبل بس هيه نفس المكونات عدا انه هاي بدون خميرة، خلينا نشوف الطريقة

أولاً/ العجينة

بالخلاط بنحط كل المواد اللي عنا جاف وسائل وحطي السوائل بالاول عشان ما يلزق الطحين باخر الخلاط .

—بنضربهم بشكل ممتاز لمدة حوالي 4 دقائق عشان تمتزج كويس وما يضل اي حبيبات.

—بنريح العجينة نص ساعة بس راحة هيه مافيها خميرة فما رح تخمر.

ثانياً/الصب وادواته

بنحتاج صاج او قلاية تكون غير لاصقة شرط وبنسخنها عالوسط وبس تسخن بنخفض الحرارة وبنبدأ نصب بس بالاول حركي الخليط شوي بمعلقة .

— عشان تتحكمي بحجم القطيفة استخدمي اداه وحدة مثلا علبة اي شي عندك عشان يطلعوا نفس الحجم او إذا ايدك ميزان خلص حطي الخليط بدلة قهوة وصبي الحجم اللي بدك ياه.

—رح تبلش القطايف دغري بتكوين فقاعات صغار وبتبلش تنشف، اللي بنشف وجهها خلص بتشيليها فورا على فوطة مطبخ نظيفة وبتغطيها لازم.

ثالثاً/القلي

بتحشي القطايف بالحشوة اللي بتحبيها والقلي بزيت ساخن طبعا لحتى تتحمر الحبات. وبتنقليهم لمصفى .

رابعاً/ القطر والتقديم

في ملاحظتين هون لازم احكي عنهم

—اول شي القطر لازم يكون ثقيل شوي ما يكون سائل مثل المي لانه بخلي القطايف تطرى.

—وانه ما تغمري القطايف بالقطر زي ماكنا نعمل زمان وتتغرق قطر وتغرق الصحن معها، انتي بس بملعقة بتصبي قطر على حبات القطايف بتمرري خيط قطر عليهم رح يشربوا القطر وبتوازن ومارح يتعبى الصحن قطر بتطلع حلاوتها ممتازة وبتحافظ عالقرشة وبتحافظي على شكل الصحن كمان.

خامساً/ أهم عاملين للحفاظ على قرشة القطايف

1. السميد هوه اللي بيعطي قرشه للقطايف السميد هو العامل الاهم.

2. انه القطر يكون ثقيل وبارد

وبتمنى انكم تجربوها ، لانه إذا جربتوها مارح تشتروا جاهز بعد هيك كثير سهلة وسريعه وطيبة ورائعه وما بتفرق عن الجاهز ابدا وهذا وعد مني ،وصحححتين وهنا