بوظة بالمستكه شبيهه بالبوظة العربية ملكة الحلويات الشامية

المقادير

• 2 كوب حليب سائل مثلج كامل الدسم
• 4 ظرف كريما بودرة
• كوب حليب بودرة
• كوب الا ربع سكر بودرة
• م.ص ممسوحة بودرة سحلب
• نصف م.ص مستكه
• علبة قشطة
• فستق حلبي مطحون

الخطوات

بوظة بالمستكة شبيهه بالبوظة العربية ملكة الحلويات الشامية

السلام عليكم ورحمة الله وبركاته

مع حر الصيف صار بدها بوظة تبرد وترطب علينا الجو ومافي اطيب من البوظة العربية طبعا ولكن مارح اتجرأ واسميها بوظة عربية احتراما للوصفة الاصلية فسميتها بوظة بالمستكه وطعمها بيشبه لحد كبير البوظة العربية.

أولاً/ خليط البوظة

بنضرب كوب كريما بودرة او مايعادل 4 ظرف في 2 كوب حليب سائل مثلج بنضربه لمدة خمس دقائق وبعدين بنضيف علبة قشطة وكوب حليب بودرة وكوب الا ربع سكر بودرة والمستكة والسحلب وبنتابع خفق كمان خمس دقائق لحتى يتجانس الخليط .

—مش بالضرورة يكون خليط كريمي ممكن يكون خليط قوامه كثيف كافي.

ثانياً/ التجميد

بنجمد خليط البوظة وكل ساعتين لثلاث ساعات بدنا نطلعه ونحركه عشان بكون تجمع ثلج حول البوظة لازم يندمج كل الخليط بتجانس.

—ممكن مرتين ثلاث مرات بكفي.

—وبآخر مرة بنضيف الفستق الحلبي المطحون وبنقلبه مزبوط.

ثالثاً/التقديم

طبعا كامل مدة التجميد بتحتاج 24 ساعة تقريبا او حسب ظروف فريزرك إذا كان مليان اغراض بطول مدة التجميد لانه كفاءة الفريزر بتقل.

بتتقدم البوظة مع رشة فستق حلبي مطحون وطبعا قوام راااااائع وطعم اروع كثيير طيبة عنجد وما بتجمد زي الجليد لا بتضل تنقسم بسهولة.

بتمنى تجروبوها وتعطوني رأيكم والف صحة وهنا.