لبن معقود مع رز

المقادير

• لبن رايب
• لحمة او دجاج
• رز
• زيت قلي
• ملح
• ماجي حسب الرغبة
• بصل
• نشا
• مكسرات
• هيل مطحون او حب

الخطوات

اول شي يا قلبي بنجهز اللحمة او الدجاج الي بدنا نطبخ فيه طبعا تقطيع حسب الرغبة وتنضيف بعدين بنسلقو وما بنحط عليه بهارات بيكفي رشة هيل لحتى ما يغير لون اللبن

تاني شي بنجهز اللبن الرايب طبعا كل كيلو بدو معلقتين نشا كبار ونص معلقة ملح صغيرة وعلى الخلاط بنخلطهم منيح منيح عشان يصير ناعم كتيير وما يفقس بالغلي

تالت شي بعد ما يستوي الدجاج او اللحمة بننشلهم من الطنجرة وبنصفي المرقة وبنجيب بصل على قد طبختنا وبنقطعو جوانح وبنحط ماجي بالمرقة وبنحط البصل لينسلق بالمرقة

رابع شي بعد ما يستوي البصل ما تدوبو كتيير الي يكون مستوي مو دايب

بنضيف اللبن الي مجهزينو من قبل على الخلاط

مع التحريك المستمر لحتى يغلي ما بينترك من دون تحريك بعد ما يغلي بيكون كثيف شوي وناعم ازا لقيتو شوي خفيف بيكون بدو نشا بنحط معلقة او تنتين حسب ما بدو بشوية مي باردة وبنضيفهم مع التحريك وما بينغلى كتير عبل ما تدوقو الملح والحامض بتطفو النار عليه

ازا بدو حامض بتحطولو حامض الليمون

هلأ في ناس بتحط الدجاج جوات اللبن وفي ناس بتقليه او بتشويه انا بحب اقليه

بنعمل رز ابيض جنبو

وطبعا لا تنسو المكسرات الي عالوجه

والف صحة وهنا عقلبكم يا قلبي

ولا تنسوني من دعواتكم وياريت تدعو لامي حبيبتي كمان بعد ازنكم