الحلبه بطريقه ناجحه ميه بالميه
الحلبه بطريقه ناجحه ميه بالميه
المقادير
- كوبين سميد وسط
- كاسة طحين
- كاسة زيت زيتون
- معلقة كبيره خميره
- معلقتين او اكثر حسب الرغبه من حبوب الحلبه
- معلقة شومر
- معلقة ينسون حب
- نص كاسة سكر حسب الرغبه
- معلقتين سكر للخميره
- للزينه:
- سمسم
- حبة البركه
الخطوات
بسم الله الرحمان الرحيم
يسعد اوقاتكم صبايا اعانكم الله على الصيام والقيام وهداكم واصلح بالكم جميعا….تقبل الله طاعاتكم
حبيت صبايا اقدملكم طريقتي بعمل الحلبه بطريقه ناجحه ومضمونه لعشاق الحلبه في هذا الشهر الفضيل
تعالو نشوف الطريق قديش سهله ومريحه وطيبه
اول شي بحضر كل ما يلزم لسهولة العمل وبكون قبل بساعه غسلت الحلبه وحمصتها وغليتهاوبطحن معلقة الينسون مع معلقة الشومر وبجهزهم وهذا اختياري
الخطوه الثانيه بحضر السميد والطحين والسكر انا ما حطيت السكر اكتفيت بالقطراخر مرحله وبخلطهم مع البهارات يلي طحنتها وبخلطهم مع بعض كويس وببسهم بزيت الزيتون وبتركهم لمد عشر دقائق حتى تتفتح حبات السميد طبعا بكون وضعت الخميره ومعلقتين السكر بالمي الدافى وحركتهم كويس حتى يتخمرو
وبعد ما تخمرت الخميره بضيفها لخليط السميد والطحين المبسوس وبضيف حبات الحلبه المحمصين ومغليين ومصفيين وببلش ابس بالخليط بميه الحلبه الدافيه حتى احصل على خليط متماسك لا سائل ولا صلب كثير وبدهن الصينيه بالزيت وبرص فيها الخليط وبرش على وحهه سمسم محمص وحبة البركه وبتركه يتخمر في مكان دافىء او بتكوني شغلتي الفرن مسبقا وطفيتيه وبتضعي الحلبه فيه بساعد على تخميرها وبعد ما تخمر بحمي الفرن وبخبزها على درجة حراره 180
وبحمرها من الاعلى وبضيفلها القطر البارد وهي سخنه والف صحه وهنا
ملاحظات على الوضفه
ضفت رشة عصفر للحصول على اللون الاصفر
بامكانك الاستغناء عن كمية السكر الموجوده مع الخلطه
بامكانك الاستغناء عن تحميص الحلبه لكن التحميص اطيب
ايضا اذا ما كنتي من عشاق الينسون والشومر ممكن ما تحطيهم
بامكانك خلط زيت الزيتون بشوية زيت عادي لانه زيت الزيتون بكون ثقيل على المعدة بعض الناس ما بتتحمله
وشكرا لمتابعتكم يا وردات واتمنى هالوصفه تعحبكم وتعملوها بهذا الشهر الفضيل
استودعتكم لله يا احلى اخوات
…رمضان كريم…
