طريقة الكنافه روعه ملكة رمضان

المقادير

• عجينة الكنافه تقريبا نص كيلو للصينيه الصغيره
• 2 كوب جبنة عكاوي
• 1 كوب جبنة موزريلا
• 6 ملاعق سمنه مذوبه
• 2 ملعقه لدهن الصينيه
• معلقة قطر
• للقطر :
• 2 كوب سكر
• 2 كوب ماء
• عصرة ليمون
• للتزين :
• فستق حلبي

الخطوات

السلام عليكم ويسعد أوقاتكم بالخير

بقدملكم طريقة الكنافه عالطريقتي طعم راائع

ان شاء الله بتعجبكم

يلااا نشوف الطريقه …..

& بنجهز القطر اول شي بنضيف السكر وعليهم المي وبتركهم بدون تحريك عالنار وسط لحتى يغلي بضيفله عصرة ليمون وبتركه يغلي لعشر دقائق وبكون جاهز ( القطر بكون وسط لا خفيف ولا ثقيل )

& بنجهز جبنة العكاوي بنكون ناقعينها بمي من قبل بوقت اقل شي 12 ساعه او قبل بيوم وممكن اذا كانت مالحه نغير عنها المي اكثر من مره اهم شي الجبنه بالكنافه تكون حلوه وما فيها نسبة ملوحه وتكون مصفيه مزبوط من المي لازم ..بنصفيها مزبوط من المي وببرشها او بفرمها ناعم وبحطها بصحن او مصفايه ووبضغط عليها بفاين المطبخ عشان يتشرب كل المي الموجوده بالجبنه بكرر التنشيف بالفاين لحتى اخفف من المي وهيك جاهزه للاستخدام (انا خلطت معها موزريلا اختياري ممكن ما تستخدموها )

& عجينة الكنافه بفرمها ناعم ممكن عالسكين او بالمفرمه الكهربائيه انا فرمتها عالسكين ونعمتها

وعشان يسهل علينا فرمها حطيتها بالثلاجه قبل الاستخدام كل ما كانت بارده كل ما كان اسهل تقطيعها

& بعد ما تجهز العجينه بشربها بالسمنه المذوبه تقريبا اخذت ست معالق مذوبه وممكن خمسه حسب ما بتحبو قرمشتها وبضيفلها معلقة القطر يلي بتساعد انها تعطيني لون حلوو للكنافه وبخلطهم مزبوط

& ثم بضيفها بصينيه مدهونه بالسمنه وبنزود السمنه يعني تكون مبينه وظاهره السمنه (والصينيه لازم تكون حوافها قصيره عشان لما نقلبها ما تفتت )

بنضغط عالعجينه مزبوط بأيدنا عشان تمسك وبعدين بنضغط عليها بصينيه او صحن اصغر من الصينيه يلي فيها الكنافه

& ثم بوزع عليها الجبنه وبخليها بعيده شوي عن اطراف الكنافه وبضعها عالغاز عالنار اقل من الوسط (والنار لازم تكون عالطرف الصينيه ما بنحطها عالنص عشان ما ينحرق )

بحط طرف الصينيه وبضل الف فيها شوي شوي لحتى تتحمر عندي اطراف عجينة الكنافه بتكون جهزت ( مثل ما هو واضح بالصور تحمير الاطراف )

ممكن نغطي الصينيه عشان الجبنه تذوب اسرع

& بعد ما تجهز بقلبها وبخليها ترتاح شوي يعني لدقيقه مش اكثر وبسقيها بالقطر الساخن وبزينها بالفستق الحلبي وبقطعها وبقدمها وصحه وعافيه

& هي كثير بتشبه الكنافه الناعمه لانه نعمتها بالفرم ..وانتو بتتحكمو بالفرم لاي نعومه بدكم اياه

& ان شاء الله بتعجبكم الطريقه وبتجربوها وبتحبوها

دمتم بكل الخير