كوسا محشي
كوسا محشي
المقادير
- كوسا وسط حسب العدد
- رز حبة قصيره
- لحمه مفرومه
- بصله صغيره
- 3 سنون توم
- ماجي او ملح حسب الرغبه
- بهارات مشكله
- كاري
- بقدونس ونعنع
- زعتر ناشف
- زيت
- رب البندوره
الخطوات
اول شي بنغسل الكوسا منيح وبنشيل القمع وبنحفرها ( طبعا للامانه انا فاااااااشله جدا بحفر الكوسا الا ما ينخزق مي شي 5 او 6 حبات ف طبعا هاد حفر زوجي ، هو دايما بحفرهم ، بضل يحكيلي متزوجتيني مشان احفر يا حيف ع الزلام ما علينا نكمل
طبعا بكون نقعت الرز بالمي وانا بحفر قصدي وزوجي بحفر انا بكون اجهز بالخلطه
بغسل الرز بعد ما ينقع وبصفيه وبضيف البقدونس والنعنع والزعتر الناشف والماجي او ملح وبهار مشكل وكاري وبفرم راس بصل صغير كتير ناعم انا ببشره مشان يدوب والتومه وبضيف الزيت واللحمه وبخلطهم منيح
هلأ برجع بغسل الكوسا مره تانيه وببلش احشيها فوق النص بشوي تقريبا وبنصفهم في طنجره انا بحط تحتهم حبه صغيره بطاطا وحبه بندوره وبضيف شوية ملح بكون غاليه مي وبحط فيها الصلصه بدوبها وبعدين بغمر الكوسا فيها وبعد ما تغلي بوطي تحتها ع الاخر لحتى تستوي وبس
وبالعافيه والهنا عليكم يارب ❤❤❤❤
