طريقة كيكة الموز لمحبي الموز
طريقة كيكة الموز لمحبي الموز
المقادير
- 4 بيض بدرجة حرارة المطبخ
- م .ك.فانيلا
- م.ص.خل
- رشة ملح
- كوب سكر
- نص كوب لبن زبادي (يوغورت)
- ثلث كوب زيت نباتي
- 2 كوب طحين
- 2 م. ك. نشا
- م.ك. بكنج باودر
- لكرملة السكر بنحتاج كوب الا ربع سكر
- اربع حبات موز مقطعين دوائر
الخطوات
السلام عليكم ويسعد أوقاتكم بالخير
اليوم بقدملكم كيكة الموز لمحبي الموز طعم جديد ومختلف ولذيذ ان شاء الله بتعجبكم
يلاااا نشوووف الطريقه ……
& بنكرمل السكر عالنار وسط ولما يضل اللون الابيض للسكر خفيف بنبلش نحركه عالسريع وما بنخليه يطول عالنار عشان ما يمرمر بعد ما يتكرمل بالكامل بنرفعه عن النار وبنضعه بصينية الكيك وبنضع عليه شرائح الموز وهو ساخن لانه راح يجمد عالسريع ..
ملاحظه : اذا جمد معك وما كان متوزع بكل الصينيه بنرجعه عالنار هاديه وبنحركه لحتى يذوب وبشيله عن النار وبنوزعه عالكل الصينيه وبنضع الموز
بنتركه عالجنب وبنبلش بتجهيز خليط الكيك
قبل ما ابلش بشغل الفرن عالوسط عشان يحمى لحتى اخلص تجهيز الخليط
& بنضع البيض والفانيلا والخل والملح وبخلطهم سوا وبضع عليهم السكر وبخلطه لحتى يذوب السكر ثم بضع عليه اللبن والزيت وبخلطهم ثم بضع الطحين والنشا والبكنج باودر ( منخولين ) بنزلهم عالدفعتين وبخلطهم بالخلاط اليدوي
ولما يختفي الطحين تماما بضعه بصينية الكيك فوق الموز
& بضعه بصينية الفرن عالرف الثاني او الدرجه الثانيه يلي موجوده بالفرن بنزل صينية الفرن عليها عشان ما يكون قريب للنار كثير ..وبضع بصينية الفرن ماء ساخن عشان اضمن انه الكيك ما ينحرق
باخذ وقت من 35 —40 دقيقه عالدرجة حراره 180
بختبر استواءه كالعاده بعود خشبي وبتركه خمس دقائق بعد ما يستوي وبقلبه وهيك بكون جاهز معنا
ان شاء الله بتجربوه وبتحبوه انا اول مره بجربه وعجبني بس للاسف ما حبوه اولادي لانهم ما بحبو الفواكه مع الكيك بشكل عام
دمتم بكل الخير
