مملكة الحرملك بقلم هلا غرابلي
مملكة الحرملك بقلم هلا غرابلي
كوني مثقفة ،كوني واعية،كوني فاعلة…لا ترضي بان تكوني مجرد وجه جميل…ابحثي…اقراي….فكري….ناقشي.. فعقلك اجمل من ان يضل في حالة ركود….(مقتبس)
الجزء الاول
يا نورا ابعتيلي ورا جمانة رئيسة طاقم المهندسات حتى اعرف وين وصلو بمهمتن…
حاضر سيادة الملكة ،بتأمري بشي تاني …
لا يعطيكي العافية….
انا الملكة بدر الدجى عمري 30 سنة مطلقة ثلاث مرات ،نهيت اول زواج الي لانو زوجي كان بيضربني الله يكسر ايديه و نهيت تاني زواج لانو زوجي كان بخيل كتير و مأنشح يفطرني نص رغيف خبز مع 3زيتونات على العدد و خلعت التالت لانو خاني مع جارتي ،يعني طلعت من هال 3 زواجات ناقمة و حاقدة على جنس الرجال اجمع و طلعت بمبلغ كتير كبير حاصل متأخري كاملا و تمنيت كتير انو ما يكون في رجال على وجه الارض لانو رح تكون حياتنا مريحة و هادية اكتر ،بس امنيتي ما ضلت امنية و حولتا لفكرة مجنونة و بعدا دخلت الفكرة بحيز التنفيذ فورا و قررت اعمل بلدة صغيرة للنساء حصرا و ما يكون فيها ولا رجال و هالمشروع الكبير ساعدوني فيه رفقاتي يلي ما تزوجو و رفقاتي يلي طلقو و ما حابين يرجعو يتزوجو مرة تانية….
اشتريت قطعة ارض و بلشت اسسا و عمر عليها المشروع الضخم و يلي لهلأ قيد التنفيذ و رح افتتحه بعد اسبوع و بلش اقبل بطلبات الانضمام لمملكة الحرملك …
سيادتي: وين وصلتو يا جمانة؟ ،الافتتاح بعد اسبوع
جمانة: سيادة الملكة ،كل شي عم ينعمل متل ما امرتي بالضبط،عملنا 6بنايات بكل حي بالحرملك و البناية الوحدة مؤلفة من 20طابق و بكل طابق شقتين و عملنا مسبح كبير بكل حي و ملحق كبير بيضم صالون تجميل و صالة جيم و سينما كبيرة و كافي نت و مبنى تاني للندوات و الدورات الثقافية و المهنية و صالة كبيرة للمناسبات و الحفلات و مول كبير رح يضم نخبة من افضل الماركات العالمية و مدينة ملاهي كبيرة بضم كل الالعاب ..
سيادتي :بدي البنايات كلها تندهن باللون الزهري ومشتقاته و لاتنسو رسومات اللولو كاتي و باربي و فلة بس بدون قرودها السبعة و اهم نقطة ممنوع منعا باتا لوجود السيارات بالحرملك لهيك كترو من السكوتر و البسكليتات …
جمانة:طبعا سيادة الملكة و زودنا كل حي بمحلات الايس كريم بكل النكهات و شوكلا النوتيلا و الحلويات بكل اصنافها و اكيد ما نسينا الحدايق و زرعنا فيها كل انواع و الوان الورد و عملنا حديقة حيوانات وحدة لكل الحرملك و مكتبة ضخمة كتير بضم كل انواع الكتب العلمية و الادبية و مشفى كبير
سيادتي : قولي انشالله ما رح نحتاج للمشفى كتير لانو مسببات الامراض ما موجودة عنا بالحرملك و بالنسبة لسور الحرملك و بابه بدي يكونو اعلى من هيك و امتن حتى ما يتم الاعتداء او التجسس على سكانو ..
جمانة :سيادتك ، ما تاكلي هم هالموضوع ابدا ، زودنا الباب و السور بافضل كاميرات مراقبة ،يعني اذا الدبانة بتمرأ منشوفا …
سيادتي:برافو عليكي جمانة ،انا من دونك ما كنت رح خلص الحرملك بهالمدة القياسية و رح اعمل جولة بكرا لشوفو شخصيا و هلأ فيكي تروحي تكفي شغلك و انت طالعة قليلا لنورا تبعتلي ورا ناديا رئيسة العلاقات الاجتماعية بالحرملك ….
ملاحظة: القصة خيالية جدا حتى ما تقلي شي عضوة وين صايرة هالمملكة بدي روح اسكن فيه
ــــــــــــــــــــــــــــــــــــــــــــــــــــــــــــــــــــــــــــــ
الجزء التاني:
سيادتي: ناديا شو صار معك بطلبات الانضمام ؟
ناديا:متل ما طلبتي سيادتك حطينا شروط القبول بالصفحة الرسمية على الفيسبوك للحرملك و لاقت اعجاب كبير بين الناس و لحد الان تم قبول 500 طلب بس في طلبات قيد الدراسة و ما عرفت اخد قرار فيها لهلا ؟
سيادتي: متل شو ؟
ناديا:هلا معظم المنضمين للحرملك هن ارامل و مطلقات و عازبات بس من فترة اجاني بحدود الخمس طلبات لحوامل بس طبعا منفصلين عن ازواجن ،هدول ما عرفت ارفضن الا اقبلن؟
سيادتي:الحامل بصبي بترفضي طلبا و الحامل ببنت بتقبليا و طبعا هالشي بدو يكون باثباتات من االدكتورة النسائية بالحرملك حصرا
ناديا:حاضر سيادتك و في شغلة تانية ،اجتني مسجات من ماكدونالدز و بيتزا هت انو بدن يفتحو فرع عنا بالحرملك ،ما عرفت شو بدي ردلن ،قلت بستشيرك بالاول..
سيادتي: هالموضوع بدك تحكي فيه مع اخصائية التغذية نرمين بس ما بظن تقبل لانو اكلن فيه سعرات حرارية عالية و ما صحي ابدا و نحن بهمنا صحة حريم الحرملك و مري هلأ على رئيسة قسم المالية و اكدي عليها على نظام الاقساط للنسوان يلي ما بتقدر تدفع كاش و لا تنسي تتواصلي مع الدكاترة النفسين ،بدنا دكتورة شاطرة و عندا خبرة لكل حي …
بعد اسبوع افتتحنا الحرملك و بلشنا نفرز المنضمين للحرملك على الشقق و كان التقسيم بانو كل 3بنات عازبات بياخدو شقة اما المطلقات و الارامل و عندن اولاد ،كل وحدة منن بتاخد شقة و حطينا شروط لتفادي المشاكل بين السكان ،و كان اول اسبوع متعب كتير بالنسبة الي و خاصة انو صار شوية مشاكل بين النسوان على الشقق و اطلالتن بس قدرنا نتجاوز هالنوع من المشاكل و بالاسبوع التاني بلشنا ندمج السكان مع بعضا من خلال حفلات طربية و مشاهدة عروض سينمائية او رحلات للحدايق او حفلات باربكيو ،و كانت النتيجة بالنسبة الي اكتر من مرضية و خاصة انو صار انسجام و توافق بين سكان الحرملك بسرعة كبيرة و الراحة النفسية و الجسدية ظهرت على حريم الحرملك و بالشهر التاني من افتتاح الحرملك، بلشنا ننسب كل صبية للدورة و المهنة يلي بتحبا حتى تكون عضو فعال بالحرملك و تخدم باقي السكان و قضينا ايام حلوة كتير و امسيات و نشاطات ترفيهية كتيرة ساعدت برفع معنويات الحريم و استعادة ثقتن بحالن و خاصة للحريم يلي كان عندها اكتئاب من حياتن الزوجية السابقة و اكيد طبعا ما نسينا حصة البنات الصغار بالحرملك و فتحنالن روضات و مدارس ليتعلمو و يتسلو ، بس يا فرحة ما تمت ،بعد 5 شهور كاملين و بعد ما اخد الحرملك شهرة كبيرة و كانت نسبة المنضمين الو بأزدياد كل يوم ، فاتت لعندي نورا و قلتلي اجتك برقية مستعجلة ، قلتلا هاتي لشوف من مين ، مسكت الرسالة و مكتوب عليها المرسل ملك الزلملك، اطلعت بنورا و ضحكت و قلتلا مين هيدا ملك الزلملك ؟اول مرة بسمع فيه؟ ، قلتلي سيادتك هيدا رجل اعمال مشهور بمجال العقارات، بعد ما عملنا الحرملك بشهرين ،حب يرد علينا و عمل زلملك،ضحكت و قلتلا هاتي لنشوف شو باعتلنا و شو بدو مننا ،فتحت الرسالة و بلشت اقرا فيا و كان مضمونها تهديد مباشر الي بانو الحرملك لازم يتوقف خلال شهر و اذا ما توقف رح يشنو حرب عليه لانو نسبة العنوسة بازدياد عند الرجال لانو ما بقا في نسوان ليتزوجوها و بالتالي الجنس البشري رح ينقرض بهالحالة ،حسيت لهجة الرسالة جدية جدا ،قلتلا لنورا اجمعيلي كل رؤساء الاقسام بالحرملك لانو على ما يبدو نحن داخلين على حرب كبيرة …يتبع
الجزء التالت:
التقيت برؤساء اقسام الحرملك على طاولة االاجتماعات لناقش حلول للمرحلة الصعبة يلي بدا تواجه الحرملك و اطلعتن على البرقية المستعجلة و مضمونها:
جمانة: نحن محصنين الحرملك منيح بس فينن يحطو سلالم على السور و يتسلقو و يفوتو عليه …
سيادتي : طيب ليش ما منكهرب السور ؟ ….
جمانة : حتى لو عملنا هيك ،بجوز يجو جوا و ينزلو علينا بمظلات من السما ،يعني في مية طريقة ليفوتو على الحرملك لهيك لازم نلاقي حلول تانية …
ناديا: سيادتك انا عندي اقتراح ،نحن ما منقدر حاليا نفوت بحرب مع الزلملك لانو ما عنا اي تجهيزات لهيك حرب و ما كنا حاطين بالحسبان يصير هالشي لهيك انا برايي نطلب نشوف ملك الزلملك و نتناقش معه بحلول دبلوماسية …
سيادتي :بدك نفوت رجال للحرملك ،طبعا لا …
ناديا :طيب انا عندي اقتراح تاني ،ليش ما منعمل استفتاء بين حريم الحرملك و منسالن اذا في منن نسبة حابة تتزوج و تغادر الحرملك ، و بعدين منبعت برقية لملك الزلملك بالعدد و المواصفات يلي قبلو يتزوجو ،يعني العروس من عنا و العريس من عندن ،و هيك منكون سكتناهن لفترة قصيرة لبين ما نكون جهزنا جيش و قوات مسلحة لنقدر ندافع عن الحرملك….
سيادتي:طيب اقتراح مقبول نوعا ما ،بس رح ضيف عليه بانو الزواج رح يكون بشروطنا الخاصة يلي بتضمن حقوق المرة و تحافظ على صحتا النفسية و الجسدية و اما اذا ما التزمو بهالشروط رح نرجع نسحب حريمنا من مؤسسات الزواج و نرجع نضمن للحرملك …
ناديا :تمام ،معناتا انا رح خبر الدكاترة النفسيين باحياء الحرملك حتى يفتحو هالموضوع مع الحريم و انشالله بكون بكرا عندك على الطاولة تقرير شامل بالاسماء و المواصفات يلي قبلو يتزوجو …..
خلص الاجتماع على اخر قرار اتفقنا عليه و باشر الجميع بمهامه الجديدة و انا نطرت التقرير مع انو كنت رافضة تماما انو ضحي بعدد من الحريم عندي بس كنت مضطرة حتى انقذ الحرملك من حرب كبيرة ،بس للاسف كان التقرير ورق فاضية لانو ولا حدة قبلت تتزوج و ضحي بحالا كرمال مصلحة الحرملك و الكل اكدو انو هن مرتاحين بالحرملك و ما عندن نية ابدا انو يغادروه و يتزوجو لانو الزواج بالنسبة الن ارهاق لطاقتن و جسمن ،لهيك رجعنا اجتمعنا لناقش حلول تانية و قررت ابعت كرت دعوة على العشا لملك الزلملك و اقعد معه شخصيا و اشرحلو انو الحريم عنا رافضين فكرة الزواج و طلبت من نورا تجمعلي كل المعلومات الشخصية عن خصمي لاعرف كيف لازم اتعامل معه …..
بعد يومين ،شرف سمو الملك سليمان يلي كان وسيم و جذاب بشكل ملفت للنظر و انا وقت شفتو مدري شو صرلي صار قلبي يدق بسرعة و تلبكت شوي و هو كمان كان الارتباك واضح عليه ،جمعتنا طاولة عشا وحدة و ضو القمر كان عاكس على اجواء الغرفة و عاطي الطابع الرومانسي مع انو هو عشا عمل فقط وبدأ حديثو معي كالتالي:
الملك: ما توقعتك تكون صغيرة بالعمر ،فكرت حالي رح قابل مرة خمسينية بس هيك بعتقد اريح الي…
الملكة : عمري 30سنة بس هيدا مجرد رقم بس والتقدم بالعمر ما بيعمل مننا شخصية واعية و ناضجة ،التجارب وحدا هي العمر الحقيقي للانسان و انا عمري اكتر من خمسين سنة ….
الملك: معناتا انا عمري قرن كامل ….
الملكة:معناتا رح نتفاهم انشالله ،انا بعد ما تلقيت رسالتك و يلي كان محتواها تهديد واضح ،انزعجت كتير من اسلوبك لانو انا ما بتهدد بس المشكلة المحتملة يلي طرحتا بانو الجنس البشري احتمال ينقرض خلاني اتجاوب معك ، و بناءا على هالشي اقترحت على حريم الحرملك اذا بدن يتزوجو و تبعا لشروطنا الخاصة بس للاسف ولا وحدة منن قبلت و انت بتعرف انو الزواج ما بصير بالغصب …..
الملك: الزواج ما بصير بالغصب صح ،بس الزواج هو سنة الحياة و ضروري لاستمراريتا ،والمشاكل يلي بتصير بين الرجال و المرة هي مشاكل طبيعية نتيجة لاختلاف الجنسين و طريقة تفكيرن و التكوين السيكولوجي الن و بالاخير هي يلي بتعطي جمال و رونق للعلاقة الزوجية …
الملكة :تمام هالحكي ،بس الامور ما بهالبساطة و موضوعنا ما بس مشاكل عن اختلاف اراء و افكار ،الموضوع انو جنسنا عم ينظلم كتير من طرفكن و احيانا عم ينهان و ينضرب و ما عم تقدرو انو نحن الحلقة الاضعف و نحن الضلع القاصر و بدنا اهتمام و رعاية و كلمة حلوة لنقدر نكون معطاءين و نقدر نربي جيل بشخصية قوية و فعالة بمجتمعه و يكون خالي من العقد النفسية …..
الملك:انا معك بهالحكي ،بس ما فيكي تعممي هالحالات على جنسنا كاملا لانو في نسبة منيحة بتقدر المرة و بتحترما و بتعرف واجباتا قبل حقوقا…
الملكة :نسبة قليلة جدا ،و شو ذنب الباقي بانو يتحمل هيك اهانات و معاملة سيئة و خاصة اذا ما كان فيه سند و دعم الن…
الملك:انا جاهز و مستعد اضمنلك بانو الرجال يلي عندي بالزلملك هن من النخب الاول و كلن تم تعليمن اصول التعامل مع الانثى و تم تأهلين من خلال دورات تثقيفية عن الزواج و مسؤولياته ،حتى فنون الرومانسية انعملا دورات عنا بالزلملك و انا لو ما سمعت عن حسن اخلاق حريمكن و ثقافتن و ادبن ،انا ما كنت بعتلك برقية من الاساس و ما كنت جيت لعندك شخصيا ….
الملكة : يعني شو بتقترح؟
الملك:انا بقترح انو نضم الحرملك لزلملك و نعمل المدينة الفاضلة يلي عنوانها الاحترام المتبادل بين الزوجين و انشالله رح تكون اول تجربة بالتاريخ و تجربة ناجحة يقتدي الكل فيها…..
ما كنت بقدر ارفض اقتراح الملك سليمان لانو كان عنده طريقة اقناع بشكل غريب لهيك وافقت و بلش يتردد كتير على الحرملك كرمال ننسق امور مدينتنا الجديدة و كلفت رؤساء اقسام الحرملك بمهمات جديدة و اهمها تهيئة الحريم لفكرة الزواج يلي انطرحت بالاول و انرفضت ،بس وافقو بعد اقناعن بانو الرجال يلي موجودين بالزلملك رح يكونو اقرب للازواج المثاليين و رح يشاركوكن بكل المسؤوليات و رح تكونو ايد وحدة بكل المجالات حتى من ضمنها ترباية الاولاد و شغل البيت المتعب …
بعد 5شهور ،انعملت اول حفلة زواج بالزلملك و كانت بضم 100عروس و عريس و كل 5شهور كانت تنعمل حفلة زواج تضم اعداد كبيرة ،اما انا يلي كنت مقررة ابدا ما اتزوج بعد تجاربي السابقة ، سحره و جاذبيته لسليمان يلي كان فعلا ملك باسلوبه ما تركولي اي خيار لارفضه ما بس كشريك بالمدينة و كزوج ،بالاخير الرجال و المرة ما فينن يستغنو عن بعض لانو كل واحد بكمل التاني بس الشي يلي تغير بعد الحرملك و الزلملك انو صار الطرفين مؤهلين للزواج،كل واحد صار بيعرف شو حقوقه و واجباته و انو اهم شي وجود الاحترام بين الطرفين و استمراره حتى لو الحب انتهى.
انتهت.