انتقام امرأة بقلم هلا غرابلي

الجزء الاول… الجزء الثاني…الجزء الثالث…انتهت
لجزء الاول

الزواج….

مصير كل بنت ببيت اهلها تتزوج و تنتقل لبيت زوجها لانو بالنهاية البنت هي ضيفة ببيت اهلها و بعدين هاي سنة الحياة لازم تتزوجي و يصير عندك اولاد و رجال يحميكي حتى لو كنت قادرة تحمي حالك بحالك و الا رح تحصلي على لقب العانس …..هيك مجتمعنا بيفكر و هيك اهلنا بتفكر بدون اي رحمة لمشاعر البنت يلي بتكون ناطرة نصيبها متلها متل غيرها لانو بتخاف يفوتها القطار و يقولو عنها عانس او معقدة نفسيا من الرجال…..

عمرك 32سنة و بعدك ما تزوجتي و يلي بعمرك صار عندن 5اولاد و عم يركضو قدامن ….هاي الجملة الشهيرة لامي يلي ما تركت طريقة الا ما جربتها لتزوجني فيها حتى وصلت لمرحلة اخدتني عند شيوخ ليعملولي حجابات او يحبسولي التابعة او يعطوني ورق عليه كتابات شخبط شخابيط لحلها بمي و اشربها و حتى كانت مستعدة تجبلي شعرة من مؤخرة قردة نفاس ولدانة جديد و هالشي طلبه شيخ منها و قلها هالشعرة بتجلب الحظ و بتفك النحس يلي راكبني على قولتها بس ما قدرت تامنلي هالشعرة لهيك انا لهلا ما تزوجت

..

ما بلومها لامي لانو كان عليها ضغط نفسي من اسئلة كل الناس يلي حوالينا على ليش لهلا الاء ما تزوجت و ما عم يجيها عرسان و لازم تلحق بسرعة تجبلها ولد …..حكي كتير تعبني انا كمان….

رحت على وظيفتي و اول ما وصلت زتيت حالي على كرسي مكتبي و انا معصبة و عم نفخ قالتي رفيقتي ولاء يلي كانت صديقتي و زميلتي بالشغل شبك جاية هيك معكر مزاجك؟؟ قلتلها بدي اتجوز قلتلي شوووو؟؟! قلتلها بدي اتجوز بدي عريس تعبت من حكي الناس و من نق امي اليومي فوق راسي بقبل باي واحد ما في مشكلة حتى لو كان فقير و ما معه ولا ليرة ما عندي مشكلة بس اخلص بدي ارتاح قلتلي من وين يا حسرة ليش ضل شباب بعد هالازمة و الحرب يلي صارت بالبلد ليكني متلي متلك بس انا مطنشة قلتلها ما بقدر اعصابي تعبت يا رب با رب ابعتلي نصيبي …..

مر شهر على نفس السيناريو اليومي قبل ما يجي العريس المنتظر عريس الغفلة يلي كان اسمه مازن البيطار…..شب وسيم وجذاب مقطوع من شجرة يعني ما عنده لا اب و لا ام و لا حتى اخوات و موظف بشركة المياه راتبه جدا قليل و وضعه المادي فقير جدا مستاجر غرفة وحدة بمنطقة شعبية بس لينام فيها اخر الليل …..

اول ما قالت جارتنا لامي جايها عريس لبنتك الاء امي طارت من الفرحة و قررت تتمسك بهالعريس الوحيد و ما طيرو ابدا من ايدها اجا شافني و عجبته و انا عجبني كتير قلت معقول هالشب بدو يصير زوجي كتير حلو لك احلى مني لهيك مسكت فيه بايدي و اسناني و قلت الفقر ما عيب اهم شي اخلاقه و انا وضعي منيح و اهلي وضعن منيح كتير منتساعد مع بعض لنشتري شقة و نجهزها و نتزوج فيها حتى البابا هدانا سيارة على كتب كتابنا يعني فرجت اخيرااا بلشنا ندور على شقة لنشتريها و نجهزها و فعلا توفقنا بشقة كتير حلوة و كبيرة و مشمسة و وقعنا العقد و بلشنا نجهزها على ذوقي ابتداء من البلاط و الدهان و نهاية بالاثاث…..

بعد ما خلصت امورنا عالاخر نزلنا نحدد موعد العرس ونختار الصالة يلي بدنا نعمل فيها عرسنا المنتظر و كان خطيبي مازن انسان جدا راقي و محترم معي و ماشي متل ما بدي يقلي انت فصلي و انا بلبس وحددت موعد عرسي بعد عشرين يوم …….

قبل عرسي ب10كان من المفروض يجي خطيبي و يوصلني لعند الكوفيرة لتبلش معي بماسكات البشرة و تصبغلي شعري اشقر متل كل البنات بعرسن دقتله كتير و ما رد انشغل بالي عليه و خفت يكون صاير معه شي رحت على محل شغله اسال عنه قلولي اخد اجازة من اسبوع وفورا طلعت من محل شغله لبيته يلي كان مستاجره و سالت عنه صاحب البيت قلي خلص عقده من عشر ايام و ضب اغراضه و سلم البيت ……

وين راح….اختفى ….انشقت الارض و بلعته ….قلت معقول يكون قاعد بالشقة الجديدة و عمل هالحركة ليشغل بالي و روح لهنيك و يكون محضرلي مفاجاة ورد و شموع و كاتو متل ما كنت شوف مقاطع فيديو على اليوتيوب واحد عم يفاجا حبيبته ويمشيها على طريق كله شمع و ورد احمر …..

تحمست كتير و رحت بوجهي فورا على شقتنا يلي بدنا نتزوج فيها و نعيش العمر كله بسعادة و حب و نخلف فيها صبيان و بنات حطيت المفتاح و بدي افتح الباب بس المفاجاة انو الباب ما انفتح و القفل كانو مغير رجعت حاولت مرة و اتنين و تلاتة بالاخير انفتح الباب بس ما من برا حدا فتحو من جوا و طلعت صبية لابسة قميص نوم احمر وعمرها تقريبا بال17سنة قلتلها عفوا لا تواخذيني شكلي مخربطة بعتذر جد قلتلي ولايهمك بدك بيت مين؟ قلتلها بيت مازن البيطار بس قلتلي اي هيدا بيت مازن البيطار قلتلها عفوا و مين حضرتك قلتلي انا مرته

……………………………………………………………………………

الجزء التاني:

مرته ..

مرته…

انا مرته انا خطيبته انا يلي عرسي بعد 10ايام انا يلي دفعت اكتر من نص حقها لهل الشقة انا يلي عفشتها انا يلي نقيت حيطانها و سقفها و ابوابها انا يلي روحت كل شقى وظيفتي عليها لاتزوج فيها و خلف و ربي اولادي و هلا جاي عم تقولي انا مرته قلتلي انت الاء خطيبته السابقة… قلتلها سابقة؟؟؟؟!وينو هالواطي ما عرفت قلها وينو زوجي الا وينو زوجك و صرت صرخ وينووو قلتلي اذا بتريدي بلا مشاكل و روحي من هون زوجي مسافر هاليومين و انت صفحة و طواها بحياته قلتلا كيف طواها انا مكتوب كتابي عليه و مرته قدام الله و قدام القانون قلتلي ليجي بطلقك ……

نزلت عالشارع و انا عم ابكي و اضحك حتى يلي شافني بالشارع بهالوضع قال عني مجنونة دقيت لبابا و قلتله تعا خدني انا تعبانة و بجوز اوقع بالارض قلي شبك وينك انت ؟؟؟ قلتلو انا بالشارع تحت بيتي …. بيتها …بيته ..قلي شبك ما عم افهم عليكي ليكني جاي ….

اجا بابا و طالعني بالسيارة واخدني عالبيت سالني عالطريق شبك شو صاير معك و وينه مازن بس انا ما رديت بكلمة طول الطريق كنت ساكتة مصدومة وصلت عالبيت و فتت على غرفتي فورا و راسي رح ينفجر شربت علبة دواء كاملة باندول و ما بقا حسيت على شي الا لما فقت بالمشفى و قلي الدكتور لحمدلله على سلامتك و شفت اهلي فوق راسي و عم يبكو قربت امي شبك بنتي احكيلي شو صاير معك ليش هيك عملتي قلتلها انت السبب قلتلي شوفي ليش هيك عم تحكي معي قلتلا مازن تزوج من اسبوع بنت ال17سنة و مقعدها بالبيت يلي طيرت كل مصاريي عليه حتى السيارة يلي اعطانا اياها بابا كمان طارت لانو باسمه انا انتصب علي انا انضحك علي و كلوووو ليش بس كرمال اتزوج و ما حدا يقول عن بنتك عانس ….

امي انصدمت و دارت صدمتها كرمال نفسيتي يلي هلا فكرت تراعيها و قلتلي طولي بالك فداكي كل مال الدنيا اهم شي انت بخير و صحتك بخير قلتلها و قلبي …قلبي يلي حرقه ابن الحرام قلبي ما بخير عرسي بعد 10ايام و ليكني مرمية على تخت بالمشفى و هو عريس

بعد 3ايام طلعت من المشفى مع ادوية مضاد اكتئاب و مهدئات و بقيت شهر ما طلعت من البيت او بالاحرى من الغرفة الا للضرورة القصوى و حتى وظيفتي اخدلي البابا اجازة مفتوحة ….ماالي عين اطلع قدام الناس يلي سالو ليش انلغى العرس قبل هالمدة القصيرة و طول هالفترة كانت رفيقتي ولاء تزورني كل يوم بعد وظيفتها كرمال تخفف عني يلي صابني و مرة قلتلي لايمت بدك ضلي هيك قومي بقا و ارجعي وقفي على رجليكي و انسي الماضي قلتلها ما بقدر دمرني و حرقلي قلبي قلتلي قومي و حرقيله قلبه انت ….جلست شوي و نصتت لولاء و قلتلها كيييف كيييف قلتلي عندي فكرة براسي ما بعرف اذا بتعجبك قلتلها قولي فورا قلتلي اول الشي ردي على ابوكي لازم تروحو عند محامي و ترفعو دعوة طلاق و تاخدي ماخرك و شو ما حصلتي منه منيح وبالنسبة اله لهل الندل نحن رح نربيه بطريقتنا قلتلها هاتي لشوف شو رح نعمل قلتلي ما نحن يلي رح نعمل ابو الهماهم هو يلي رح يعمل قلتله مين هيدا قلتلي هيدا رجل الميشن ايمبوسبل رجل المهمات الصعبة توم كروز النسخة العربية ضحكتيني و ما الي نفس اضحك و هيدا شو بيقدر يعملنا قلتلي قصدك شو ما بيقدر يعملنا قلتلي اعملي يلي قلتلك عليه بالاول في محامي شاطر رفيق اخوي روحي انت و ابوكي لعنده ليبلش بالدعوة و تاني يوم بروح و انا اياكي عند ابو الهماهم

كنت ما مصدقة ايمت روح عنده لابو الهماهم لاعرف كيف رح يساعدني و ياخدلي بحقي و اجا اليوم الي اتفقنا عليه و رحت انا و ولاء على مكتبه يلي كان بمنطقة شعبية كتير و معروفة بكترة العصابات فيها فتنا لعنده بعد ما استدلينا عليه من اهل المنطقة و ما كان بيشبه توم كروز ابدا يا دوب يطلع النسخة الصينية من شعبان عبد الرحيم رحب فينا كتير و شربنا قهوة و سالنا شو طلبنا قلتله بدي احرق بيت قلي اوووف كتير هيك بيت مين و ليش ؟؟!قلتلو ما ضروري تعرف؟؟؟ قلي احكيلي قصتك و اذا تعاطفت معها رح راعيكي اكتر و قدملك هدية على حسابي كمان حكتله قصتي بالتفصيل و انصدم قلي ما مرق علي ابن حرام بافعاله قلي تكرمي رح نعملك البيت و اثاثه رماد يعني يلي بفوته رح يقول اكيد صاروخ غراد نازل عليه قلتله بس دير بالك ما بدي يبين حريق مفتعل او تكون مرته بالبيت ما بدي إذيها ما ذنبها قلي اكيد نحن شغلنا نظيف و بيعجبك و سالتو عن الهدية يلي بدك تهديني اياها قلي بدي افصل اسلاك الفرام من سيارته قصدي السيارة يلي نصبها على ابوكي يعني حادث بسيط يتكسر فيه مية كسر ليعرف انو هالشي خطية بنت الناس يلي ضحك عليها قلتله كتيررر منيح و اتفقنا عالمبلغ قلتلو دفعة هالشهر و دفعة تانية الشهر الجاي لانو ما معي ابدا كلو حطيتو على البيت و بدي طلب منك هاي رقمي و عملولي مس كول و انتو عالطريق لتنفذو المهمة

…………………………………………………………………….

الجزء التالت:

بعد 4ايام اجاني مس كول ابو الهماهم يلي كنت ناطرته باللحظة دقيت لرفيقتي ولاء و قلتلها حضري حالك رح تبلش حفلة الالعاب النارية رح مر عليكي و نطلع سوا نحتفل و نشوف المفرقعات ومريت على ولاء يلي كانت شارية شيبس و كولا و شوكلا قلتلها وليه شو نحن رايحين نتفرج على فيلم سينمائي قلتلي لسا احلى و بعدين بدنا نحتفل بهالمناسبة و اخدنا تكسي و طلعنا فورا على المنطقة يلي فيها بيتي او بالاحرى بيت مازن يلي كان مشالله منور بين كل البيوت بالنار يلي عم تاكله اكل هالنار يلي فكرتها رح طفي شوي من النار يلي جواتي وقفنا عالرصيف و نحن عم نقرش شيبس و بسكوت و نتفرج كيف الناس ع تركض وتصرخ وتقول حريقة اتصلو بالاطفاء و بعد نص ساعة اجت سيارة الاطفاء لطفي ما تبقى من البيت بعد ما خلصت هالمسرحية يلي انا كنت مخرجتها رجعت على البيت و طمرت حالي بالتخت و بكيت بكيت كتير انا حرقت تعبي و حرقت مصرياتي و حرقت حلمي بس هالشي اهون من انه يتهنى فيه هو و مرته يتهنو بشي ما من حقهم

.

نطرت كام يوم ليرجع يدقلي ابو الهماهم و يقلي المهمة التانية نجحت بس انا انبني ضميري و خفت يموت بالحادث وصير ظالمة بعد ما كنت مظلومة غيرت رايي و انا يلي دقتله و قلتله الغي المهمة التانية يلي اتفقنا عليها قلي ليش ماامعك خبر؟؟؟!قلتلو بشو ؟؟!قلي المحروس خطيبك عمل حادث سيارة رباني الله وكيلك ما النا علاقة قلتله كيف هيك صار؟؟!قلي الجيران دقوله و قلوله تعا اسرع بيتك عم يحترق و طلع متل المجنون ماسرع بسيارته و ضرب بسيارة تانية و حملوه عالمشفى سمعت انو تكسر تكسير هو و السيارة ….انا ما عرفت حالي افرح الا ازعل عليه بس قلت لحمدللله الله كبير …..

ضلت دعوة الطلاق مرفوعة عليه مع انو تاجلت كذا جلسة كرمال وضعه الصحي و بعدين سمعت انو باع البيت و السيارة ليتعالج و يعمل عمل عمليات لرجليه و ايديه و يركب صفايح فين و مرته كمان طالبة الطلاق منه و رافعة عليه دعوة لتاخد متاخرها منه ……

اما انا بقيت على تواصل مع المحامي كرمال دعوة الطلاق يلي حصلت عليه بعد سنة و حصلت على نص متاخري و وقت اجا طلقني اجا على كرسي متحرك و كان ما قادر يطلع بوجهي …..

رجعت لوظيفتي و لحياتي لترجع الدنيا تفاجاني بس هالمرة كانت مفاجاة حلوة ….دقلي المحامي بعد طلاقي بشهرين و قلي بدي شوفك ضروري قلتله خير في شي قلي منشرب قهوة و منحكي قلتله ماشي بناسبك بكافي لاكتوس قلي اوك عال6رح كون ناطرك و وقت رحت شفته ناطرني و حامل بوكيه ورد بايده و قدملي اياه قلتلو شو المناسبة قلي ما لحقت باركلك بالطلاق ضحكت و قلتله الله يبارك فيك و كانت المفاجاة وقت سالته عن سبب شوفتي قلي انا بحبك و بدي اطلب ايدك من اهلك انا رفضت رفض قاطع و قلتله انا صرت بكره جنس الرجال قلي ما كلنا منشبه بعض اعطيني فرصة لاثبتلك مين انا و انو انا فعلا بحبك و ما بدي شي منك ……

بقينا نحكي و نتواصل مع بعض 6شهور قبل ما اتاكد انو فعلا هو بحبني لنفسي ما لمصلحة و بعدين خطبنا فترة سنة و بعدها تزوجنا و صار عنا 3اولاد اما رفيقتي ولاء ما بس ضلت رفيقتي و صارت سلفتي كمان….

انتهت.