الدولمة على طريقتي
الدولمة على طريقتي
المقادير
- لحمة مفرومة
- ارز قصير الحبة
- كاري مطحون معلقة كبيرة
- باربيكا معلقة كبيرة
- ضمة بقدونس مفروم ناعم
- ملعقة صلصة بندورة
- لب البندورة
- معلقة دبس رمان
- ملح
- زيت زيتون
- بصل
- فليفلة حلوة
- جزر
- بطاطا
- باذنجان
- كوسا
- بندورة
- ثوم
- ليمون 4حبات
- فلفل حار
الخطوات
السلام عليكم ورحمة الله وبركاته
يسعد اوقاتكم بكل خير وسعادة يارب
كيفكم صبايا اكيد في كتير منا بيعرف
او بيسمع باكلة الدولمة وهي اكلة شعبية لاخوانا بالعراق الحبيب وفي منا بيسميها باكلة المحاشي
تعالو نشوف الفرق بين الدولمة والمحاشي
بسم الله نبدأ
اول شي حضرة الجزر قورتهم ولازم يكونو حبات كبار
وبعدين قشرة البطاطا وقورتها
وقورة الكوسا والفليفلة الحلوة وجهزتهم
الباذنجان بعد ما قورتهم نقعتهم بمي وملح نص ساعه حتى اتخلص من مرار الباذنجان ويسهل علينا استواء
ثانياً حضرة الحشوة وهي اللحمة المفرومة مع الارز والبهارات المذكورة ودبس رمان وزيت زيتون وملح وبقدونس ناعم ولب البندورة و صلصة البندورة
ثالثاً غليت مي وبعد ما قشرة البصل شفيتهم من النص بشكل طولي وحطيتهم بالمي لينسلق معي ويتفتح ويسهل عندي طريقة لفهم وبعد ما بردو فتحتهم
رابعاً قورة البندورة بحذر ولازم تكون الحبة يابسة وحمرا واخذت لبها واستعملتو للحشوة
خامساََ حطيت بقاع الطنجرة شرحات بندورة وبلشت احشي الخضار واسفطهم بالطنجرة وخليت آخر شي البندورة والبصل حتى ما يتفعصو ويحافظو على شكلهم
سادساََ حطيت على وجه الطنجرة صحن كبير حتى يضغط الخضار وما يتفتح البصل وحطيت عليها مي غمرتهم لحد الصحن وحطيتها على النار بعد اول غلوة نوصت النار وخليتها ساعتين
سابعاََ دقيت كم سن ثوم مع فلفل حار ناعم وملح وخلطتهم مع الليمون المعصور ونص فنجان زيت زيتون وسكبتهم على وجه الطبخه وتركتهم نص ساعه لحتى صارت جاهزة
وهيك الدولمة صارت جاهزة والف صحه وعافيه عليكم
استودعتكم الله ♥️
