كنافة بالقشطة ملكة تحضيرات رمضان

المقادير

• نص كيلة كنافة خشنة
• كاسة سمنة
• للقشطة :
• اربعة كوب حليب سائل
• ست معالق كبار سميد وسط
• ست معالق كبار طحين
• اربع معالق كبار نشا
• ماء ورد معلقة صغيرة
• ماء زهر معلقة صغيرة
• للتزين:
• فستق حلبي
• قطر ثقيل للقطر:
• كوبين ماء
• اربعة كوب سكر
• عصرة نص ليمونة
• معلقة كبيرة ماء ورد
• معلقة كبيرة ماء زهر

الخطوات

السلام عليكم صديقاتي كيفكم شو اخباراتكم ان شاء الله الجميع بالف خير يا رب

اليوم وصفتي خفيفة لطيفة وكتيييييير طيبة

بكل بساطة بفرك الكنافة حتى تتفكك كاملة وبحطلها نص كوب سمنة وبفركها منيح حتى تتشرب كاملة من السمنة وبعدين باقي كوب السمنة بحطو بالصينية مقاس ٢٤ وبخلي جزء من السمنة لوجة الكنافة وبعد ما دهنة الصينية باخذ نص كمية الكنافة وبوزعو بالصينية وبرصو وبضغطو منيح منيح بس ارصومنيح بحط على وجه الكنافة كيس نايلون وبحط فوقها ثقل حتى تنكبس منيح وهاد سر من ارسرار القرشة وطبعآ كمية السمنة كمان هو الي بعطيكي القرشة والقطر السميك كمان بحافظ على القرشة وكمان لازم يكون بارد

وبعد ما ضغطة الكنافة بتركها وبجهز القشطة بحط كل المكونات مع بعض ما عدا ماء الورد وماء الزهر بتركهم للأخر وبخلطهم عالبارد وبعدين برفعو على الغاز مع الاستمرار بالتحريك حتى الغليان وبعدين بحط الماء الورد والزهر وبطفي تحتو وبرجع للكنافة بشيل عنها الثقل وبوزع عليها القشطة وببعد عن الاطرف حتى ما تطلع لبرا وتنحرق معنا وبعدين بوزع باقي الكنافة على الوجة وبضغط بشكل خفيف حتى ما تطلع القشطة على وجة العجينة وبعدين بوزع ع الوجة باقي كمية السمنة وبعدين بدخلها بفرن حامي مسبقآ وبضل اتابعها لحتى تتحمر من الأطراف مزبوط تحسيها فكت من الصينية وصارت تتحرك معك ارفعي طرف الكنافة وشوفيها اذا اخذت اللون المطلوب بحمر وجها بس يصير ذهبي بتطلعيها وبتشربيها بالقطر البارد وبتقلبيها بجاط التقديم واذا حسيتي بدها كمان قطر زيديلها وزينيها بالفستق الحلبي وتقدم باردة وصحتين وهنا على قلبكم

وبالنسبة للقطر

بحط السكر والماء على الغاز بس يبدأ بالغليان بحطلو عصير الليمون وبتركو لمدة عشر دقايقعلى نار هادية وبعدين بطفي علي وبحطلو ماء الورد وماء الزهر وبحركو وبتركو يبرد تمامآ قبل الاستخدام وبالهنا والعافية عليكم ولا تنسونا بهالأيام المباركة من صالح دعواتكم يا غاليات