طريقة تخزين الجبنة البيضا (الخضرا )ملكة تحضيرات رمضان

المقادير

• جبنة بيضا
• ماء مغلي
• اكياس تفريز

الخطوات

اول شي بنغلي الماء في وعاء غميق وبنضيف الجبنة على دفعات مو كلهم مرة وحدة بتخليهم يغلو لغاية ما تحسي الحبة بلشت تصير طرية مو تسيح بالمي وبتشيليهم من المي حبة حبة وبتفرديهم بصينية كل وحدة لحالها جنب بعضهم ما تحطيهم فوق بعضهم وهم سخنين بيخرب شكلهم

تاني خطوة بتخليهم يبردو مزبوط وبتحطيهم كل ست حبات بكيس تفريز وبتحطيهم بالفريزر ووقت بدك تستعملي منهم بتطلعي كيس وبتخليهم يدوبو وبتسخني مي وبتقطعي الجبنة اربع قطع وبتحطيهم بيغلو وبتنشليهم من المي وبتخليهم يبردو وطبعا المي الي غليتيهم فيها لا تكبيها بتصبيها فوقهم لما تحطيهم بالمرتبان وبتسكريه منيح وبتحطيه بالتلاجة وصحة وهنا عقلبكم

هاي الطريقة انا معتمدتها عندي في ناس بيغلوهم الغلوة التانية وبيحطو عليهم مستكة ومحلب في المي وهم بيغلو وبعدين بيحطوهم بمرتبنات وبيضيفو عليهم المي وبيخزنوهم هيك

ولا تنسوني من دعواتكم بالشهر الفضيل الله يعطيكم كل شي بتتمنو يا قلبي انتو ويهدي بالكم ويخليلكم احبابكم يارب ❤❤❤