طريقة طبخ المفتول الطازج

طريقة طبخ المفتول الطازج
معكم صديقة زاكي المميزة الشيف سوزان طحان
المفتول اطيب اكله
نزلت فيديو لطريقة الفتل بالعجانه للتوضيح فيكم تتابعوه عالجروب

طريقة طبخ المفتول الطازج
اسلقي اللحم او الدجاج بطنجره المفتول وكالمعتاد شيلي الزفره وضيفي المطيبات ضعي المصفاه الطبقه الثانيه من طنجره المفتول وبتحطي فيها المفتول واتركيها عالنار لمده ٢٠ دقيقه لاحظي تكون المصفاه مرتفعه عن ميه اللحمه فقط بخار يطلع عليها حتى ما يلزق ويعجن هاي التهبيله الاولى

التهبيله التانيه فرغي المفتول من المصفاه بوعاء كبير وحركيه لحتى تتفتح الحبات عن بعض رشي عليه شويه مي يعني كيلو مفتول بحتاج كوب مي على الاكثر وبتحركيه وبتضيفي عليه زيت زيتون وملعقة سمنه ورشه كمون وبترجعي بتحطي نصف الكميه بالمصفاه على النار وضيفي الخلطه يللي بتكوني مجهزتيها من قبل وفوقها النصف الثاني واتركيه عالبخار كمان ٢٠ دقيقه
فرغي المفتول بوعاء وافتحي الحبات بتحركيهم بالشوكه لتتتوزع الخلطه
واسكبيه بطبق التقديم
طبعا فيكي تهبلي المفتول بالمي لكن الافضل تضيفي معها نصف ليمونه بقشرها وشويه زيت وبصله وبهارات حب حتى تعطي نكهه طيبه للمفتول اثناء التهبيل
الخلطه عباره عن بصله مفرومه ناعم جدا يضاف لها ملح وفلفل اسود وعين جراده (اختياري) وقرفه بتفركيهم بايدك حتى يدبل البصل وتنزل ميته فيكي تدقيهم بمدقه التوم او اي شي وبتحطيهم بوسط المفتول
ملاحظه احيانا لما تشتري المفتول جاهز بس طازه بكون مهبل المره الاولى لازم تتأكدي من هالشي عند الطبخ بتعملي الخطوه التانيه بس