كما عودناكم في قسم المنوعاات في زاكي نقدم لكم مجموعه من المقالات الثقافية اخترنا لكم اليوم. قصه شيقه مع الملاحظة انها قصة حقيقية
#كسر الخواطر
#ساجدة جبر
صباح الخير خالة… كيف أصبحتي… بس ما كون فيقتك بعتزر …بس موعد اغير المغذي لعمو…
صباح الخير حبيبتي ….احنا الي معزبينك معنا كل شوي…. انا الي بعتزر ….وينك مبارح استفقدتلك …. اجت ممرضة تانية بدالك وكنت بدي أسألها … وخفت تفكرني اني ما بدي اياها …اتعودت عليكي لك بنتي بهالشهر .
وانا والله يا خاله… بس لو تعرفي ليش غبت حتفرحيلي…. مبارح كانت خطبتي….والله يا خالتو …على قد ما كنت رافضه الزواج… بس من كتر ما شفت قديش متمسكة بعمو وبتحبيه …اتمنيت اتزوج ونعيش قد ما عشتي مع عمو….. خاله…خاله ليه بتبكي …فيه شي ..اكيد ضايقتك…. والله ما كان قصدي..
بتمسح دموعها…لا ياقلبي بس انتي فاهمه القصة غلط… انا حياتي هلا بلشت…وعلى كل حال الف مبروك حبيبتي الله يبعتلك أيام حلوه..
خاله …شو قصدك هلا بلشت حياتك…يعني اتزوجتو عكبر. ..
هههه… لا حبيبتي …..اااخ والله ما عارفه شو بدي احكيلك. .. يمكن هو يصحى وبحكيلك. ..
بس خاله ماتزعلي مني انتي سمعتي الدكتور قال الأمل انه يفيق ضعيف. ..مابدي يصير فيكي شي ..انا خايفة عليكي…لازم يكون إيمانك بقضاء الله كبير..
لا بنتي لا والنعم بالله اكيد …بس لازم يفيق لازم …فيه كلام ما خلص … فيه اعتزارات لازم يقدمها…لازم يقابل وجه ربه والكل سامحو. ..لازم يا بنتي …لازم يفيق…سامعني لك محمود……. فيق …فيق وبتبكي وبتبكي..
خاله خلص وكلي امرك لله …لا اله الا الله…اشربي مي اشربي.. كيف هلا رقتي..
ااه الحمد لله لك بنتي الف الحمد لله على كل حال..
خاله انا متل بنتك ..انا كل يوم بدي اسألك وبخاف تقوليلي ما دخلك … انتي الك شهر كامل على هالقعده… لا بتنامي ولا بترتاحي. .. وما حد بزورك الا قليل. ..خالة انتي ما عندك اولاد…
آااااخ لا بنتي عندي 3 بنات الحمدلله ..وولد الي بتشوفيه بيجي بجيبلي اكل كل يوم هدا ابني رامي الله يرضى عليه..
طب وبناتك وينهم…مسافرات. ..
ايه بتقدري تقولي مسافرات أو ميتات على قيد الحياة…ما تستغربي انا ححكيلك كلشي. .. عشان الظاهر القعدة هون مطولة …ويمكن الحكي يشغلني . ..
تمام …خاله شوقتيني رايحه خلص الي علي وسلم ورديتي… وارجعلك عطول. ..اوعي ترجعي بكلامك ….
ههه ….يبعتلك الهنا يا هنا …ليكني بانتظارك..وين بدي روح…بطلع هنا ..وبترجع بالليل بس تخلص دواما ..بتدق الباب …
فوتي تعالي حبيبتي …
خفت تكوني نمتي انا عارفه اتأخرت عليكي ..اتفضلي هي أحلى فنجان قهوة.
يسلمو ايديكي والله اجا بوقتو…
ايه وهي قعدة ..يلا خاله احكيلي …
اااه تكرم عيونك…هدا يابنتي انا اسمي منار …
هنا: منار …والله يا خالة اسمك بجنن متلك…ايه . …ايه …خلص سكتت …كفي كفي..
منار: يبعتلك الهنا .. ياهنا… محمود هو مو بس زوجي ..هو ابن خالتي وحب عمري ..كله ..وسعادتي وتعاستي بنفس الوقت………….خالتي…..امه لمحمود كانت قمر مصور اتزوجت عمو ابو محمود…الله يرحمهم جميعا…وخلفوا 3 بنات و6 شباب…ومحمود هو البكر و من هو عمره 16سنه ..كان هو الي يصرف على أهله …حاكم وقتها ابوه صحته تعبت…وما عاد قادر عالتعب… واخوانه كانو صغار…وكانت كلمته مسموعة من الكل… حتى من امه وابوه …و ما حد ايتنيلوه كلمه …قال ايه ..ابوه يقول ايه… قال لا ..ابوه يقول لا…ليش ما تساليني ..يمكن لأنه هو الي يصرف وابوه وثق فيه زيادة عن اللزوم ….أو أنه ابوه حب يحملو المسؤولية لانه كان خايف يصيرله شي ..الله اعلم. .. بس هدا الي خلاه دايما واثق من نفسه زياده عن اللزوم… ومفكر حاله انه الصح حتى لو مخطئ.. وما يتنازل ابدا ابدا… حتى لو بدوس على الكل…
ايه ما تستغربي…بس كان حنون كتير كتير…ااااه على حنيته… لما تنزل. ..وكريم لابعد حد.. ما يرد اخ أو اخت لو بدهم اللقمة الي بتمو… يعني كان كله تناقضات زي ما بقولو…
درس إخوانه الخمسة…بس لما اجت على حظ البنات خواته. ..وقف بوجههن. ..وما سمحلهم لايدرسو
…ولا حتى زواج يتزوجو…وهدا الشي مسكينات …عانو منه كتير. .. كانو متل السجينات. .. اكل وشغل بيت لاطلعة. .ولا نزلة. ..طبعا هدا الحكي انا وقتها كنت صغيرة. ..وحكتلي اياه خالتي…. بس اتزوجت..
وكل واحده مسكينه من البنات التلاته. ..صارت معها قصة…
الكبيرة صممت..وهربت واتزوجت…وقالت بتحطو تحت الأمر الواقع…واكيد حيحن عليها بالاخر…وكانت مراهنه انه امها وابوها يقنعوه. ..ويحننو عليها…لكن مسكينه صار عكس ما اتوقعت غضب عليها …قاطعها وتبرا منها…ايه ..ايه لك بنتي …وحكم على الكل ما حد يتعرف عليها…وما بعرف كيف خالتي وجوزها رضخوله. ..ما بعرف …والمسكينه عاشت غريبه ما حد بعرف عنها شي وحتى من حظها سمعنا انه جوزها مو منيح معها…يعني اتجوزت لترتاح. ..لا ارتاحت ولا اتهنت. ..والي بعرفو انها خلفت بنت وولد …وبعديها من قهرها مسكينه انجلطت وماتت… وبرضو ..مارق قلبو عليها …ولا على اولادها بعد موتها…وما بنعرف عنهم شي لهاليوم. ..وابوهم اتعمد حتى ما يحاول يتواصل مع خالتي وجوزها ولا شي ….يعني القسوة من كل الجهات. ..كانت.
هنا: يالله …خاله منار…انتي بتحكي جد..قشعر بدني …والله العظيم
منار: ايه …لك بنتي …جد الجد كمان… واجا دور البنت التانيه…هدي المسكينة …كانت عالبركه …وعقلها عقدها…وبرضو …صممت وضلت ورا ابوها …ليجوزها. ..بس اتقدملها العريس الوحيد…الي تقدملها. .. وهي مسكينه…ما صدقت بدها تتجوز. ..وتطلع للدنيا..رغم عقلها الي مو مساعدها. …واتزوجت ….و نفس وضع اختها الأولى. ..قاطعها ومنع الكل يحكي معها …وقعد فتره ماخد موقف كمان من ابوه…وما بحاكيه. ..وما حاكاه إلا لما راح يطلب منه يجوزني اله…ووقتها ما صدقو…إنه تنازل واجا حكا…ورضي عليهم…ووافقو يزوجوه … والكل بس بده رضاه…ما بكزب عليكي… انا ما كنت بعرف شي وكنت الي بعرفو انه خواته متزوجات بس ما بعرف شي تاني وخالتي عمرها ما شكت شي لامي …رغم أنهن خوات…وكنت بحبه… هو كان رقيق وحنون معي… وعمري ما تخيلتو يكون هيك….وكنت احلم باليوم الي يجمعنا…وتفاجئت يوم الفرح …خواته المتزوجات ما حضرو بسالو وينون بقولي ماتو…وما تناقشي وعشان تعيشي معي ما تسألي كتير. ..سكتت وما سألت..وعشنا مع بعض 4 سنين حملت مرتين جبت توأمين وصار عندي 3 بنات وولد الحمدلله … والحياه يوم هيك معه ويوم هيك… بعدين…في يوم … دق الباب …وإلا هي اخته المتزوجة الي عالبركه…جوزها مطلقها بعد ما زهق من عقلها المحدود . .. وماخد بنتها ومسافر. ..وراميها بالشارع…وحالتها …ياويلي عليها…كل ما بتزكر هالمنظر….دخلتها خالتي …ولمتها بحضنها. ..وصارت تبكي ..وانا ابكي. ..اجا هو وقلها شو رجعك. ..ووقتها خالتي أخيرا اتحركت . ..وقالتلو هدا بيت ابوها …الي رباها. ..ما راح وخلاها. ..وهي رجعتلو. ..
هو عصب كتير… وقال لامه هلا صارت بنتك…وقفلو ابوه…وقالو هاي بنتنا. ..وما غلطت. ..وعقلها مو مساعدها. .يابا ليش هيك قاسي ..يابا ليش الرحمة ماتت عندك…وصار يعيط…هو عصب وطلع بره البيت…وغاب أسبوع. .. وانا حاسه حالي ضايعة …حتى انا ما سأل عني..وصرنا نسأل عنه…عند أصحابه. .وكل المعارف..اي حد ممكن يعرف وينه..
وفي يوم…برن التلفون …وصدفت انا الي رديت…
منار: ألو
محمود: ألو منار انا محمود اسمعيني انا سافرت الكويت ومش راجع طول ما الغضيبه بالبيت. ..ابوي وامي اختاروها وفضلوها علي. ..
منار: محمود…شو بتحكي …هاي اختك…وهدول امك وابوك. ..طب انا ما فكرت فييي …اولادك ما فكرت فيهم …محمود …حرام عليك…
محمود: انا مش حنساكم. ..وكل الي بتطلبوه مجاب بس مش راجع …بدك تيجي تعالي…انتي عارفه انتي شو بالنسبة الي…
منار: محمود وين اجي ومعي أربع اولاد …وبدهم حياة مستقرة. ..وامك وابوك. ..ماصار شي لكل هالجفا. ..سكر الخط بوجهي…
وبعدين …
برن تلفون هنا….يا الله وقتك….ايه خاله هدا خطيبي اجا يروحني. ..اوعديني تكمليلي بكرا…بخاطرك…
منار: تمام حبيبتي ولا يهمك…الله معك …
بتطلع هنا…وبترجع منار تحط كرسيها جنب سرير محمود. ..وتمسك إيده متل كل ليله عشان تحس فيه لو حرك لو اصبع…على أمل يفيق..
#يتبع
منار غفيت المسكينة متل كل ليله وهي ماسكه بأيد محمود…ومرت ساعات الليل …ودق الباب…
صباح الخير خالة. ..موعد الغيار لعمو …قامت عن الكرسي عشان تعطيهم مجال يشتغلو ووقفت بعيد تراقب… وكانو كل ما يقلبو عالسرير…قلبها يدق وتقول بقلبا…اصحا…محمود الله يخليك اصحا…لك انت صاحي متعب قلبي …وكمان وانت نايم متعبه …والله قلبي قرب يموت ونومتك طولت. .. مشتهيه شوف عيونك. …زمان ما شفتهم. ..ما اشتقتلي متل ما اشتقتلتك معقول قلبك مو حاسس فيي والا اتعودت عدم وجودي ودمعت. ..ولفت وجهها ع الشباك. .وسرحت… وما حست وإلا هنا مسكت كتفها …
هنا: يسعد صباحو الحلو. ..والله ما قدرت بلش شغلي إلا قلت لازم اجي اتصبح بالوجه الصبوح. ..(هنا كانت طبيعتها نغشه ومرحه ومهنتها كممرضه علمتها انه الابتسامة والضحك أكبر شفا للمريض وأهله)..
منار: يا أهلا …يا حلوه. ..يسعد صباحك ..وكمان جايبتيلي قهوه …لك يسلمو دياتك يارب…
هنا: الله يسلمك… ايه خاله باقيلي ساعه لشفتي جيت بكير لتكفيلي. ..الله يخليكي. .من مبارح وانا بفكر…وبدي ركز بالشغل….لازم تكمليلي. ..
منار: ههه … لك انتي الله باعتك الي بلسم تريحيني شوي …خلص وين كنا..
ايه …لما سكر التلفون بوجهي…وانا شو بكيت لك يا هنا…مو مصدقه. الي سمعتو..و ولي على قامتي لما امه وابوه عرفو…كأنه عزا وصار بالبيت…ومرت سنه كامله …ما اتصل غير مرتين. ..بس كان مو مقصر فينا بنوب بالمصاري …كل شهر يبعت لابوه الي يكفينا وزيادة. ..وبعد سنة اجا دور الأخت التالتة وهدي بدي احكيلك اسمها لانها رفيقة دربي لهلأ إسمها نوال. ..هدي المسكينة الي السكين مشت عليها…ورضخت لقانون اخوها……………….
اتقدملها ابن عمها…وهي توقعت…..وكلنا اتوقعنا …مدام ابن عمه ورفيق عمرو. ..حتنحل العقدة وحيوافق. ..ومرة نفرح من قلبنا ونتجمع. ..والي فتح معه الموضوع ابن عمه نفسه حاكم هو ما كان يكلم ابوه ولا حد ولا حتى انا …وكان رده الي نزل كالصاعقه على ابن عمه واخته. ..اكيد لا …ولو اتزوجو لا هي اخته…ولا هو ابن عمه ولا بعرفهم. ..تخلى عن القرابة والأخوة والصداقة. ..كل شي عشان يضل متمسك بمبادؤه العقيمة. ..ووقتها نوال صممت تمشي كلمة اخوها ورفضت الزواج وقالت لابن عمها لا …عشان ما بدها اخوها يعمل معها متل خواتها…وما بدها تحرق قلب امها وابوها اكتر..ورضخت وضيعت زهره شبابها …وصارت حياتها تتمحور بالعناية بأمها وابوها واختها الي عقلها مو مساعدها…ومروا سنين وبرضو قلبه ما حن… وما نزل ولو مره واحده…حتى لما اتوفت امه…وبعديها بفترة بسيطة اخته المريضة أعطتك عمرها…وبرضو ما اجا أو فكر يواسي ابوه. ..مع انه كان عنده اخوه وقلنا شو بكى بكي على موتهم. ..بس الكبرياء والعناد الي عنده مانعينو. ..
هنا: طب خاله إخوانه الشباب ما الهم تأثير عليه خاصه انهم كبروا وصارو رجال.
منار: بنظرو الكل صغار..وإزا كان ما عامل حساب لابوه…حيسمع إخوانه لك بنتي…
هنا: ايه والله معك حق.. وبعدين كفي خاله الله يخليكي. ..
بتمشي منار وتبعد عن الشباك وبتوقف جنب رأس محمود وبتلعب بشعراته. ..وبتسرح وبتحكي …شايفه لك هنا …هدا شعره كان متل الليل…كل شعره صارت بيضا هي..بتحكي عن كل دمعه نزلت من عيني على فراقه. … ياااه يا محمود طولت كتير كتير ولما جيتني جيتني غايب عن الوعي …وبتصير تبكي. ..
بتحضنها هنا …وبتهديها. ..
هنا: خلص خاله ارتاحي هلا …ما تحكي ولا تفكري …
منار: بتمسح دموعها…ايه حبيبتي …انتي هلا موعد شفتك …روحي وبنكفي بعدين …الله معك..
بتطلع هنا …وبترجع منار تقعد عالكرسي وتمسك ايد محمود متأمله كالعادة ..ربنا يستجيب لدعواتها ويفيق. ..
بمر اليوم متل الي قبلو وبرضو محمود ما فاق…ومنار ما بتيأس عندها امل بربنا انه ينصفها ويصحى محمود ويسمع منها الكلام الي حاملته بقلبها سنين ومستحمله وبتصير تحكي معه…
بتتزكر اول مره حكيتلي بحبك متى…طب بتتزكر يوم ما نزلنا نشتري الخواتم ومسكت ايدي …وبتمسك إيده. .منار في حاله صدمه وفجوه زمنية مو قادرة تتخيل كل العمر الي مر بتستناه. .ليرجع ويعتذر منها على هجره الها…ولما رجع رجع محمل عالسرير وبغيبوبه…بتغفى المسكينة وبدخل عليها الليل وما بتحس. ..
هنا: بتهمس جنب منار خالة …خالة. ..
بتفيق منار…وبتقولها …نمت كتير …وبتقوم بتتفقد محمود…وبس تشوفو ما فاق بترجع ترمي نفسها عالكرسي وبدت تيأس شوي شوي والتعب باين عليها…
هنا: خاله هدا سرير جبتلك اياه مدي جسمك شوي والله حرام عليكي. …
منار: لا لك بنتي شو بدي فيه هالجسم والا هالحياة بدون محمود …ازا مات …بدي موت معه …والحقه. ..نخلص كلامنا. ..لازم يسمعني…
هنا: طيب براحتك …حتكفيلي هلا
منار: ايه انا بستناكي. ..انتي صحيتي فييي الي دفنتو . ..مر على غيابه 15 سنه وبناته صارو صبايا. ..وانا ما قصرت معهن …وجدهن وعمتهن واعمامهم وقفو معهن …أول شي درسناهم الحمدلله. .وطبعا من غير علمو. ..وكلهم حملتهم شهادات صممت انه غيابه …يكون درس اله هو وانه انا قادره اربي اولادي ويصيرو احسن الناس وفعلا كبرو عالدنيا انا امهم وابوهم …والحمل صحيح كان بهد جبال.. بس برضو كان عندي امل يرجع …خاصة لما عرفت انه كل هالسنين ماتزوج. ..وأنه ما حب ولا حيحب غيري …وهدا كان يقولو لاخوه الي عايش معه…بس عناده دمرني. ..ودمرو. ..
واجا يوم واتقدم لبنتي الكبيرة عريس. ..واتكررت نفس المأساة والتاريخ عاد نفسه…بس هالمره ابوه وقفله وجوزها غصبن عنه…وطبعا كل الي بطلع بإيده تبرأ منها ….وبالنسبة الها عادي هو اساسا طول عمره ما الو وجود بحياتها وما بتزكر شكله اصلا …فما فرق عندها متل ما فرق مع عماتها. …وبرضو حماي … زوج بنتي التانية والتالتة وكان مصمم يجوزهن … قبل ما يموت. ..كان يضل يقولي بدي اخلص من ذنب بناتي الي قضيت عليهم وانا برد على محمود…
والحمد لله كل واحده زوجها احسن من التانية بفضل ربنا…رغم أنه ما كلم واحده ولا كلمني من لما اتزوجو ….بس المهم انه الله وفقهن. …وبعد بفترة مرض عمي واتوفى وما بكزب عليكي كسر ظهري وظهر نوال…هو سندنا بعد الله…وكانت هاي الي كسرت محمود. ..الجبل العالي اهتز… من لما عرف بموت ابوه …صمم ينزل…تقولي كان مطمن علينا انه احنا بحماية ابوه…وهو جاي بالطريق …عمل الحادث. ..والباقي بتعرفيه. ..
هنا: طب اخته وبناته ما حن قلبهم عليه. ..ما اجو. …
منار: انا عاذرتهم وعشان ما احرجهن طلبت من الكل ما يجو…بدي يفيق وكلمو. ..وهدا حقي ..بدي عوض كل السنين … بدي حس كل دقيقة سنه ..وضل شايفته واحكي معه…عندي حكي كتير لك هنا…انا على قد ما كنت زعلانه على وفاة عمي …على قد ماكنت مبسوطة على جيتو. ..بدي يعوضني عمري الي اخده معه…بدي يعوض نوال…ويتعرف على بناته…بتوقف منار وبتصير تهز فيه…لك محمود فيق ..فيق …وبتمسك إيده تشده ليقوم وهي بتبكي…بغمى عليها وبتوقع عالارض…
بتركض هنا …بتنادي الممرضين يساعدوها. .وبنقلو منار على غرفه تانيه…وبصير معها بدايه انهيار عصبي…المسكينة عقلها ما عاد يتحمل…بعلق الدكتور…الها اكتر من شهر ما تركت المستشفى. ..اعطوها مهدءات وراقبوها على طول..
هنا: ولا يهمك دكتور انا ما حتركها. . وبتقرر تلازمها …حست بالمسؤولية اتجاهها. ..
#يتبع
..