المقادير لخبز المسخن:
٣ كوب طحين أبيض
كوب طحين أسمر
ملعقة صغيرة ملح
ملعقة صغيرة سكر
ملعقة كبيرة خميرة
ماء دافيء للعجن
الطريقة:
– نخلط كل المكونات الجافة مع بعض ونبدأ نضيف الماء بالتدريج مع العجن لحد ما تتكون عندي عجينة بتلزق وطرية نوعا ما، بغطيها وبتركها تخمر ساعة.
– بعدين بقطعها خمس قطع وبحطهم على صينية مرشوشة طحين وبتركهم يرتاحوا شي ١٠ دقايق.
– باخد قطعة برقها على سطح مرشوش طحين وبحطها على صينية تيڤال على عين الغاز الكبيرة من فوق لحد ما تنشف العجينة وتاخد من تحت لون خفيف بعدين بدخلها الفرن على الشواية على أعلى رف لحد ما تتحمر شوي وبطلعها وفورا بغطي الخبز بفوطة مطبخ وبحطه جوه كيس نايلون وبلفهم منيح عشان ما ينشفوا واتركوهم مغطيين ليبردوا عالآخر قبل الاستعمال وصحتين.
المقادير للمسخن:
دجاجة مقطعة ومنظفة
عودين قرفة
كمشة حبة هيل (كمشة يعني عدد قليل من الحبات )
كمشة فلفل أسود حب
كمشة بهار حلو حب
ورقتين غار
5 حبات بصل كبيرة
زيت زيتون
الطريقة للمسخن:
– بتسلقي الجاج وبتحطي معاه عودين قرفة وكم حبة هيل وفلفل أسود حب وبهار حلو حب وورقتين غار.
– بتفرمي البصل فرمة وسط وبتحطيه في طنجرة وبتحطي عليه معلقة صغيرة ملح ومغرفة طعام من مرقة الدجاج وبتحطيه على نار عالية لحد ما تنشف ميته تقريبا ويبلش بده يلزق.
– وهو عالنار قبل ما تنشف ميته بتحطي عليه فلفل أسود ناعم وبهار حلو ناعم وكمون وبتخليه لينشف ودوقي إذا بده كمان ملح أو بهارات وبعدين بتضيفي زيت الزيتون لحد ما يصير في نفس مستوى البصل وخليه يغلي غلوة وطفيه.
– بتصفيه في مصفاية من الزيت وخلي الزيت في جاط عشان تغطي الخبز إذا بدك واذا ما بتحبي زيت كتير تغطيه.
– وزعي البصل على الخبز مباشرة ورشي سماق وصنوبر والدجاج حطيه في صينية وبهريه نفس بهارات المسخن وملح وادهنيه من زيت البصل ودخليه الفرن يتحمر وصحتين.
نرحب بك لتكون من أصدقاء زاكي, وذلك بالانضمام لجروب “زاكي” على الفيس بوك:
المسخن وخبز المسخن