سلسلة مذكرات امرأة قصص واقعية

 سلسلة مذكرات امرأة قصص واقعية
في قسم المنوعات في زاكي نقدم لكم أعزاءنا القراء هذه القصة المميزة, متابعة ممتعة نتمناها لكم.

صبايا هاي قصة ( سلسلة مذكرات امرأة
كل قصة من هاي السلسلة رح تنزل على اجزاء
القصة هاي هي القصة الاولى من السلسلة ورح تكون على جزئين
هاد الجزء الاول وغدا مساءا رح اضيف الجزء التاني للي بتحب تتابع )
تنويه ( جميع القصص الواردة بهذه السلسلة واقعية )
#سلسلة_مذكرات_امرأة_بقلم_حنين_طه
#قوس_قزح
غمضت عيوني عدمعة باردة بدها تنزل تحرق قلبي توجع خدي
لملمت بقايا اوراقي كل ذكرياتي كل كلمة كتبتها بيوم وحطيتهم بصندوق حطيت قلبي معهم وسكرته
…………………
ام فراس ( يا امي فادية وينك )
فادية ( يلا امي عم تقل عحالي لبس برا كتير برد )
ام فراس ( لك ام مو لهدرجة الجو برا معقول )
فادية ( والله يا امي انا اذا ما دفيت ما بقدر ركز بشي بتدخل المعلومات كلها براسي )
ام فراس( طيب طيب خلصيني دفي حالك منيح وعجلي رح تتأخري عفحصك )
لبست عحالي تلت ارباع الخزانة وطلعت اليوم هو اخر يوم عندي بفحص البكلوريا وهي تاني مرة عم عيده لانه بالمرة الاولى سقطت مو لاني مو شاطرة بس لاني توترت كتير وما عرفت حل اي شي
هالمرة ثقتي زادت شوي بنفسي لكن لسا مرعوبة
الجو اليوم بارد كتير لكن سبحان الله جو الشتا قد ما يكون بارد لمة العيلة وجمعتهم سوا بهيك ايام بتبعث جواتك دفا بتحس باطرافك سخنين مع انه البرد عم ياكلهم
خلصت فحصي كنت رضيانة عنه نوعا ما واول ما طلعت فتلت وجهي بدي اخد تكسي لحتى ارجع عالبيت كانت الدنيا عم تمطر بقوة وما في ولا تكسي عم يقبل يوقف
صرت امشي بسرعة بالشارع حتى اقدر لحق موقف الباصات
اركض ومع كل خطوة غوص شوي بالمي عالارض ونقط المي عم ينزل على راسي بسرعة
واخيرا وصلت تخبيت تحت المظلة ووقف المطر
بعد بشي خمس دقايق طلع قوس قزح ما اعظم الخالق
من شوي الارض ما كانت تندعس من كتر المطر وهلا عم تتزين باحلى الالوان
ايهاب ( اي لون بتحبيه اكتر )
فادية( عفوا )
ايهاب( شايفك كتير مهتمة بالوان قوس قزح )
فادية( ايه حلوين كتير )
ايهاب( انا ايهاب ناطر الباص من شي نص ساعة
عفكرة انتي كتير مبللة )
فادية( ايه مزبوط
اليوم كان اخر يوم عندي بالفحص لهيك كنت مضطرة اطلع من البيت )
ايهاب(لازم بهيك اجواء يعطلوكم والله )
فادية( لا دخيلك شو نعطل ما صدقت متى خلصت
هههههههه)
ايهاب( مممممم ضحكتك كتير حلوة
)
فادية ( شكرا الك ها ليكو اجا الباص )
طلعت بالباص وتعمد ايهاب يقعد جنبي وطول الطريق ما سكت يدخل بموضوع ويطلع من واحد تاني مع اني كنت تعبانة وبرادنة بس لاول مرة بتمنى الطريق تطول لاول مرة بكون بردانة وبعرف ركز منيح بكلامه بطريقة حكيه سرحت بكل شي فيه لحتى نادى الباص عالركاب النازلين بمنطقتي )
فادية( انا صار لازم انزل )
ايهاب ( لا شو تنزلي طيب ليكي اعطيني رقم اهلك امك اي حدا )
فادية ( ليش بقا )
ايهاب ( لك شو ليش بسرعة والله نيتي سليمة )
فادية ( طيب طيب اكتب عندك )
سواق الباص ( يلا يا اختي خلصينا صرلي ساعة واقف لتنزلي الدنيا اخر وقت صار الباص مكان لطق الحنك )
فادية( عجبك هيك انفضحنا)
ايهاب( ايه ما تحترم حالك ،،،، خلص وصل الرقم روحي هلا سلام )
رجعت عالبيت بعصر مي كانت الفرحة مو واسعتني بالرغم من اني اكلت برد بيسوى عمري ومرضت مرضة غير شكل الا انه تلفون ايهاب بهديك الليلة زاح كل الهم والمرض عن قلبي
كان داقق علي ليخبرني انه عم يدور على عروس من فترة ولما شافني عجبته ومن هاد الحكي وصدمني لما قلي انه انه امه وابوه منفصلين من خمس سنين واله اخت وحدة متزوجة برا البلد لهيك هو تولى مهمة يدور لنفسه على عروس
واكيد قلي انه بيشتغل محاسب بشركة وكل شي مهم عن حياته )
فادية طيب انت متى رح يجي ابوك ليطلبني رسمي)
ايهاب ( حددي الساعة واليوم وبنكون عندكم )
فادية( ممممم طيب بدي قلك شي
انت رح تطلبني من امي لانه انا ما عند اب )
ايهاب( والدك متوفي يعني)
فادية( ايه ابي توفى من لما كنت صغيرة كتير )
ايهاب( الله يرحمه يا رب )
فادية( ابي كان سواق عشاحنة تزوج هو وامي وحبو بعضهم كتير حملت امي وجابت اخي فراس بعدها بفترة جيت انا عالدنيا
لحتى اجا هداك اليوم طلع ابي مشوار وحب ياخد اخي فراس معه كان فرحان فيه كتير وكل يوم عم يشوفه بيكبر قدام عيونه وللاسف ما رجع لا ابي ولا اخي ماتو بحادث سير انا كتير بحزن على امي وبحزن على حالي انه ما عندي اب لا اخ ولا سند )
ايهاب( من هاي اللحظة انتي عندك اب واخ وصديق وخطيب وزوج ان شاء الله )
كلام ايهاب كان مريح كتير بعض الاشخاص حتى وهم عم يكذبو بكونو مريحين بكون نفسنا نقلهم معلش ظلو اكذبو علينا بس لا تقطعونا
خبرت امي عن ايهاب وقلتلها انه الشب شافني عند موقف الباصات وحابب يتقدملي رسمي
وامي حددت موعد مع ايهاب ليجي تاني نهار
هو ووالده
حضرنا كل شي بيلزم من ضيافة وترتيب ولبست احلى شي عندي مع انه كنت رافظة فكرة الزواج قبل ما خلص جامعة بس خلص ايهاب فيه شي غيرشي بيجذب متل مغناطيس استحوذ على كل شي بملكه بقلبي وبعقلي
فادية( ها امي الباب عم يدق رح روح افتح )
ام فراس ( لك تعي لهون انتي العروس فوتي لجوا انا بفتح )
كنت جوا بالمطبخ وسامعة صوت امي وايهاب ووالده عم يحكو ويتعرفو على بعض
ووقتها خبرها ابوه لايهاب عن طلاقه هو وزوجته وبدورها امي خبرتهم عن وفاة والدي
طلعت قدمت القهوة
ابوه لايهاب بيشبه كتير ايهاب رجال مقدر مبين عمره باخر الخمسين
ابو ايهاب( ما شاء الله يا ارض احفظي ما عليكي والله يا ايهاب عرفت تختار )
كان كل شي عم يمشي بسرعة اتفقنا عالمهر والخطبة وعكتب الكتاب لاول مرة بحياتي بحس انه في شي بخصني متيسر هيك
فرحت من كل قلبي شفت فرحة امي الا انطفت من سنين
وزادت فرحتي لما عمي اخد عهد على نفسه يكملي دراسة اذا طلعت نتيجتي ناجحة
كتبت كتابي وطلعت نتيجتي بنفس الوقت ناجحة بمعدل منيح
اصر ايهاب يعمل حفلة خطبتي ونجاحي سوا
كان يوم رائع ورد بكل مكان امي فرحانة اغاني ورقص
واهم شي ايهاب جنبي
بعد عجقة الحفلة وتحضيرات الخطبة قعدت انا وايهاب نتناقش بموضوع الجامعة واتفقنا ادخل تخصص كيميا
ابتدا العام الدراسي الجامعي كنت كل يوم الصبح اتصبح بوجه ايهاب نطلع عالجامعة بالباص وكل مرة نقعد نذكر بعض باول مرة التقينا فيها بالباص
وكل مرة شوفير الباص يسمعنا نفس الجملة ( الباص صار مكان لطق الحنك )
علاقتي بايهاب كانت هادية متل البحر الهادي بس اكيد ما في بحر بيبقى هادي على طول الا ما يكون فيه موج عالي بعض الاوقات
كان اغلب هالموج سببه الغيرة مني ومنه هو لو يصحله يداوم معي ما كان اخر وانا لو يصحلي كنت ما خليته يروح على دوامه وهيك حياتنا كانت ماشية )
ايهاب( يسعد صباح الحلوين )
فادية( صبااااحو شو ليش تاخرت اليوم )
ايهاب( ايه اليوم ماخد اجازة وانتي ما رح خليكي تداومي بالجامعة )
فادية( لك عندي محاضرات مهمة ما بحسن )
ايهاب( كرمالي بتحسني )
فادية( طيب متل ما بدك )
ايهاب( شو حابة تفطري )
فادية( سندويشة فلافل )
ايهاب( هلا هيك سندويشة فلافل)
فادية( ايه لشو المصاريف الزايدة يعني بدي نضب ايدنا شوي خلينا نشتري سيارة بلا ما نبقى نروح ونيجي بالباصات )
ايهاب( ييييييي لك فادو الباص المكان الي انولد فيه حبنا )
فادية( ايه انولد بالباص بيكبر وبيكمل بشي سيارة فخمة )
ايهاب( هههههههههه متل ما بدك فلافل فلافل )
كنا قادين وعم ناكل فلافل لما خطرلي اسال ايهاب عن امه لانه حتى لو منفصلة هي وابوه المفروض يعرفني عليها لكن الي كنت استغربه انه ولا مرة ايهاب جاب سيرتها
لما فتحت موضوعها اتدايق لكن ما خبى عني خبرني انه والدته ووالده انفصلو بسبب امه
ايهاب( امي كانت وحدة قوية كتير وكانت تكره ستي ام ابي وتسيء معاملتها
ستي باخر عمرها تعبت كتير وما ظل عندها حدا فقرر ابي يجيبها تعيش عنا لكن امي ما استحملتها كانت تجرحها وتهنيها لحتى ابي طلق امي وستي بعد بشهرين توفت )
فادية ( لا حول ولا قوة الا بالله )
ايهاب( عادي لا تزعلي امي من يوم ما انفصلت عن ابي لهلا مو رضيانة تشوفني وليكها عايشة عن اخوالي بلبنان ما بشوفها ابدا )
فادية ( طيب والدك ما فكر يتزوج بعدها )
ايهاب ( ابي كره كل النسوان بعد امي بتحسيه صار معقد من وراهم هههههههه)
ايهاب( صحيح انتي امك بعد وفاة ابوكي ليش ما تزوجت )
فادية( شو تتزوج طبعا لا انا ما بقبل وهي حرام ما طلبت قعدت تربيني وتكبرني
الله يقدرني ردلها معروفها بيوم )
فادية( ييييييي بلشت الدنيا تمطر لك كانه في اتفاق بين لقاءتنا والمطر )
ايهاب( ههههههههه ايه شايفة يلا هلا بتوقف وبطلع قوس قزح
عفكرة فادية بتعرفي انه قوس قزح بيشبهك كتير )
فادية( يا سلام كيف بقا )
ايهاب( اللون الاحمر متل لون الورد بخدودك
واللون الاصفر متل لون شعرك
واللون الاخضر متل لون عيونك
اللون البنفسجي متل لون كنزتك
واللون النيلي متل لون المكياج الي حاطتيه
اما اللون البرتقالي متل لون الورد الي موجود على لفحتك )
فادية( اوووه شو هالغزل طيب والازرق )
ايهاب( الازرق هو لون السما وقت بتطلعي فيها بتكون صافية كتير
فادية ( رح اخجل ها )
ما اجمل الحياة لما يكون فيها حدا بيهتم بادق تفاصيلك بيسال عن ابسط احتياجاتك
لماا تمنحك شخص وقلب بحبوك وبخافو عليك
اشتدت المطرة بهداك اليوم وانا اضطريت اروح عالبيت وصلني ايهاب للموقف وهو رجع على بيته
لكن لما وصلت عند باب عمارتنا شفت عمي ابوه لايهاب طالع من بيتنا
ليش ؟؟
شو بيعمل هون ؟؟؟
ليش لا امي ولا ايهاب خبروني انه ابوه عنا ؟؟؟
شو عم يصير من وراي ؟؟؟
احيانا البيت الي بتحسه امان الك
بيفتح عليك باب جهنم
……..يتبع
#سلسلة_مذكرات_امرأة_بقلم_حنين_طه
#قوس_قزح
الجزء التاني
دخلت عالبيت وانا حاطة ايدي عقلبي ما بعرف ليش ما اخدت الموضوع بحسن نية ما بعرف ليش قلبي كان ناقزني
حتى وضع امي كان مو طبيعي لما فتت عليها خلص الانسان الي بيعمل شي غلط ببان على وجهه بسرعة
حاولت بالبداية اعمل حالي ما شفت شي واني اخد واعطي مع امي عادي وقول لحالي هلا بتفتح الموضوع وهلا بتقلي انه عمي كان هون بس ابدا صارت الدنيا عشوية وامي ما جابت سيرة
كنا قاعدين بنتعشى لما قررت افتح معها الموضوع
فادية( امي صحيح بدي اسالك عمي ابوه لايهاب شو كان عم يعمل هون اليوم )
ام فراس( اااه عمك اه اجا لحتى يسال عنا اذا محتاجين شي )
فادية( ليش ليجي عالبيت وانا مو فيه بعدين شو بدنا نحتاج يعني لو كنت محتاجة شي كنت طلبته من ايهاب )
ام فراس ( ما بعرف شو بعرفني انا بعدين انتي عم تحققي معي يعني فادية )
فادية ( لا انا ما عم حقق معك بس انا من حقي افهم بعدين انتي ليش لهلا ما قلتلي ولا فتحتي الموضوع معي نطرتك لحتى تقوليلي انه عمي كان هون ما قلتي )
ام فراس (هي هي علينا انا بحكي الي بدي اياه والي مو حابة قولو ما بحكيه فهمانة ولا لأ)
فادية( طيب خلص امي متل ما بدك رح اسكت انا مو حابة احكي اكتر بالموضوع )
قمت على غرفتي مو مستغربة من ردة فعلها لامي كنت متوقعة انه امي مخبية شي جواتها عن هالموضوع ما بدها اياني اعرفه لهيك قررت راقبها حتى اعرف شو نهاية هالقصة
كنت كل يوم روح عالجامعة بس طنش اخر محاضرة وروح انطر قدام باب بيتنا لشوف شو بصير وحدسي طلع بمحله
كل يوم عمي بيجي عالبيت بغيابي وامي ما بتجبلي سيرة ابدا وانا حط بقلبي واسكت لشوف شو نهاية هالمسخرة
لحتى ما عاد قدرت اسكت اكتر رحت لعند امي افاتحها
كنت خجلانة منها خجلانة قلها امي انتي على علاقة مع عمي بس ما بقدر اسكت اكتر الي استفزني اكتر انه امي هالمرة ما حاولت تخبي بالعكس صارحت بمشاعرها
ام فراس ( ايه انا وعمك في بينا علاقة واذا بدك سميها حب )
فادية( بعد هالعمر لك امي لك انا خجلانة اطلع فيكي وانتي عم تحكيها هيك بكل صراحة )
ام فراس( الي عشرين سنة مسكرة هالقلب وقاعدة عم ربيكي بس هلا خلص انا زهقت انا تعبت حضرتك كمان فترة بتتزوجي وببتركيني لوحدي )
فادية( كنتي قليلي انك حابة تتزوجي بس مو تعملي علاقات محرمة امي )
ام فراس( هاد الي صار وابو ايهاب ناوي يتقدملي رسمي وانا بصراحة موافقة وكنت حابة قلك بس خجلت والله خجلت )
اطلعت عليها وعيوني مليانة دموع ( ايه امي الله يهنيكي ومبروك سلف
بس انا ما عاد الي عين حطها بعين ايهاب ولا بعين ابوه الله يسامحك بس )
دخلت عغرفتي وقفلت عحالي الباب قعدت عتختي حاول استجمع قوتي امي الي كانت تقلي شو هو الصح والخطا امي الي ربتني احسن ترباية عم تغلط
بهالوقت امي خبرت عمي عن الي صار وهو فتح الموضوع مع ايهاب ،،، بالاول ايهاب اعترض خوف من المشاكل لكن بالاخر انصاع لرغبة والده واجا دوره ليقنعني
ايهاب( لك يا قلبي اذا هم رايدين بعض ليه احنا نوقف بوجههم)
فادية( بس يا ايهاب ما بقدر افهم علي كيف بدي اتزوج واحد ابوه متزوج امي )
ايهاب( لك مو احسنلك انه امك تكون حماتك احسن ما تيجيكي شي حماية تطير عقلك من راسك )
فادية ( ما بعرف والله خايفة )
ايهاب( انتي ما بتثقي فيني وبقرارتي )
فادية ( هلا هيك اكيد بثق فيك بس والله لنصير علكة بتم الناس )
ايهاب( دخيلك العالم بيحكو عالفاضي وعالمليان خليهم شي مرة يحكو عالمليان بعدين هم ما بيعملو لا عيب ولا حرام هم بشرع ربنا رح يتزوجو )
فادية ( خلص تمام متل ما بدكم انا موافقة )
كوني بثق بكلام ايهاب وقرارته وافقت على زواج امي من عمي بدون مشاكل لكن اتفقنا انه اتزوج انا وايهاب قبلهم لهيك تم عرسنا قبل عرس امي وعمي بشي شهرين
ايهاب( جهزت اميرتي)
فادية( كيف طالعة بجنن ما )
ايهاب( ايه طبعا بتجنني احلى وحدة بكل العالم
دخلك شو احساسك وانتي رايحة على عرس امك )
فادية( هههههههه نفس احساسك وانت رايح تزوج ابوك هههه)
ايهاب( دخيل هالضحكة انا )
وهيك تزوجت امي وعمي وانا كملت جامعتي
شو كنت مرتاحة برجع بلاقي اكلتي جاهزة لبستي مغسولة ولانه هي امي ما كنت استحي او اتكلف منها كل شي بدي اياه كان ميسر
ايهاب انسان حنون متفهم اسلوبه راقي بالتعامل معي وعمي كمان كان انسان كتير محترم بس عصبي شوي لكن قلبه ما في اطيب منه
كنت صلي دايما واشكر ربي الي بعتلي هيك زوج وهيك عيلة بس طعم السعادة اله مدة صلاحية وفترة معينة بعدها بنتهي وانا ما كنت حاسبة اي حساب لهيوم
دق دق دق
فادية ( يلا جيت جيت
اهلا بشو بقدر اخدمك )
ام ايهاب( وينه ابني )
فادية ( عفوا )
ام ايهاب ( عاملة حالك مو عارفتيني انا امه لايهاب )
فادية ( اه اهلا اهلا خالة تفضلي مية اهلا وسهلا )
ام ايهاب ( ما بك شي حلوة )
فادية ( شكرا خالة هاد من زوقك )
دخلت حماتي لعندي بصراحة كنت مصدومة من جيتها
مو بس انا لوحدي الي انصدمت جيتها صدمت ايهاب وابوه والي استغربته اكتر انه جايبة معها شنتة تيابها
يعني جاية تقعدعندي طبعا انا ما بقدر قلها لا وكمان ابنها ما بيقدر يقلها لا
انا اساسا ما كان عندي مانع لكن وجودها قلب حياتي كلها
دايما تنق كل شي ما بيعجبها كلامها متل السم
بهادل عكل شي وانا من تم ساكت ما بدي نكد على ايهاب فرحته بامه لانه اله خمس سنين مو شايفها لكن الامر تطور وصارت المشاكل تزيد بينها وبين امي لانه حماتي كانت كل ما تشوف عمي طالع او نازل تحاول تحكي معه وتتحركشه
وعقولة المتل ( الاولى احلى لو كانت وحلة )
علاقة امي وعمي توترت كتير لكن كنا نحاول نسيطر عليها وانا دايما صبر امي وهديها ما معقول تسمي عحالها مطلقة وكنت فكر انه حماتي فترة ورح تروح لكن قعدتها واقامتها عندي كل مالها عم تطول ومشاكلها عم تزيد وانا بالعة الموس عالحدين وساكتة
بلشت اتراجع بدراستي وافقد تركيزي باي شي اساسا ما كنت الحق من كتر مشاكل حماتي وامي
وصبر حالي بحب ايهاب الي بس حتى ايهاب بلش يتغير لما امه ضربت عالوتر الحساس ( موضوع الخلفة )
ليش مرتك لهلا ما حملت وليش لهلا ما جابت وكل يوم نفس السيناريو
لحتى اجت الشتوية وحماتي لسا عندي ،،لكن صرت متعودة عليها وعفصولها الناقصة
فكنت اتركها اوقات كتيرة تقعد مع ايهاب وانزل اقعد مع امي
ام فراس ( فادية هاد انتي )
فادية ( ايه امي انا مين بده يكون يعني )
ام فراس( تعي بدي اياكي بموضوع )
فادية ( خير امي )
ام فراس ( لك امي شوفيلي عالرقم بظل يدق علي ما بيسكت بيعرفني وبيعرفك وبيعرف خصوصيات حياتنا )
فادية ( كيف هيك )
ام فراس( والله ما بعرف يا بنتي وخايفة قول لعمك يقلب الدنيا عراسي بتعرفيه عصبي ومن غير شي الوضع بيني وبينه هالايام مو منيح
الي مجنني انه صاحب هالرقم بيعرف كل شي بصير معنا بحياتنا )
فادية ( طيب امي فكرتي تحكي معه تعرفي مين هو )
ام فراس( لا والله خفت )
فاددية ( رح احكي لايهاب وخليه هو يتصرف )
ام فراس( ايه امي الله يرضى عليكي)
انشغل بالي بالقصة انه كيف هيك رقم غريب بيعرف كل تصرفاتنا وكل حياتنا
خطرلي يكون حدا عامل معنا مقلب بس ليش
وكل مرة حاول افتح الموضوع مع ايهاب ما يصحلي
كنت مقررة خلي الامور تروق بالبيت واحكيله بس البيت كل مالها اموره بتتعقد
وحماتي على اصغر الامور بتعملي قصة
اذا الاكل مالح بتقلي بدك ترفعي ضغطي
واذا دالع بتقلي شو شايفتيني ما بعرف طعمة تمي
وعلى هالحكي سيقو كل المواقف
باختصار انقلبت حياتي جحيم
في منزل امي
ابو ايهاب ( شو ام فراس شو حضرتيلنا غدا )
ام فراس ( عملتلك مقلوبة بعرفك بتحبها )
ابو ايهاب ( ايه الله يخليكي حضريلنا السفرة )
بهالوقت رن موبايل امي مسج اجت امي تركض لتمسك موبايلها لكن ايد عمي سبقتها ومسك التلفون وقرا المسج
( مشتهي انا كمان اكل من هالمقلوبات مرت اخي
)
ابو ايهاب( مين هاد
لك احكي انطقي)
بلش عمي يتصفح بالتلفون ويقلب فيه وقرا كل شي عرف انه صاحب الرقم بيعرف كل شي بخص امي والمفاجأة انه امي كاينة ترد عليه وتحكي معه
وحجتها انه بالاول ما ردت عليه واهملته وانه خبرتني عن الرقم هاد لحتى حاكي ايهاب وخليه يشوف مين صاحب الرقم ولما انا ما عملت شي قررت امي تتصرف وعرفت انه صاحب الرقم هو عمي اخو ابي ومتطورة العلاقة بيناتهم لصداقة كونه عمي وصارت امي هي الي تخبره تفاصيل حياتنا
عليت اصواتهم وعمي رفع ايده وضربها
احنا فوق بالبيت سمعنا صوتهم نزلنا كلنا لنشوف شو في
بالبداية ما قدرت افهم شي من صوت صراخهم
لكن بعدين قدرت افهم لما امي كانت تقول لعمي متل ما حضرتك مو سائل فيي وصرت تحنحن لمرتك الاولى انا من حقي احكي مع سلفي
وطبعا حماتي ما رح تفوت هيك فرصة عحالها
ام ايهاب ( منيح الي عرفتها عحقيقتها الي بترضى تحكي معك وتعمل معك علاقات وهي بهالعمر ما تستغرب تحب واحد تاني عليك وهي ببيتك )
ابو ايهاب ( ام فراس انتي طالق )
بكيت امي كتير وحاولت تفهم عمي انه الموضوع مو متل ما انت فهمان وانه في حدا اكيد عم يلعب فينا وعمل كل هالقصة ليورطني
لكن عمي انعمى على عيونه وما عاد شاف قدامه
ابو ايهاب( ايهاب)
ايهاب( نعم ابي)
ابو ايهاب( هم كلمتين يا اما هلا هلا بترمي يمين الطلاق عمرتك وبتنقلع هي وامها مع بعض من البيت
يا اما لا انت ابني ولا بعرفك بغضب عليك ليوم الدين )
ايهاب( بس يا ابي فادية ما دخلها بشي هي)
ام ايهاب( طب الجرة عتمها بتطلع البنت لامها)
فادية ( عمي ببوس ايدك تهدى الموضوع ما بوصل لهدرجة )
ابو ايهاب( شو قللت قسما بالله بغضب عليك )
بعد ضغط من عمي وحماتي على ايهاب دام لاكتر من نص ساعة نطقها ايهاب
( فاااادية انتي طالق خدي اغراضك واطلعي من البيت مع امك )
دخلت بحالة هيسترية من البكا والضحك سوا
لملمت تبابي وتياب امي لحتى نطلع
عزت علي كرامتي
عزت علي كسرة امي
عز علي موقف ايهاب
مسكت امي من ايدها لحتى نطلع
فادية ( بتعرف يا ايهاب انت وعدتني تكون سند الي وانت فعلا كنت سند بس سند مايل )
طلعنا انا وامي ورجعنا عبيتنا مكسورات مجروحات تنتين مطلقات
حاولت امي تحكي معي تفهمني وتخبرني انه ما في شي بينها وبين عمي وانه كان بيحكي معها بس ليطمن علي وعليها
وحلفتلي الف يمين انها متاكدة الف بالمية انه حماتي ورا موضوع عمي من البداية بس انا ما كنت قادرة اسمع لامي ولا قادرة اعرف شو بدها تحكي
بهديك الليلة امي ما تحملت الظلم صابتها جلطة وللاسف انا ما لحقتها لما وصلت عالمشفى كانت مفارقة الحياة
صدق الي قال الدنيا ام لما راحت امي راحت معها الدنيا
مع انها ظلمتني وظلمت نفسها بس بتظل امي …. بعد وفاتها اسودت الدنيا بعيوني
كنت بفكر انتقم من كل الي اذى امي واذاني
خاصة لما اجا ايهاب يرجعلي بعد وفاة امي بس خلص الي انكسر ما عاد يتصلح واذا راح الغالي لا اسف عالرخيص
وايهاب للاسف طلع ارخص من الحب والثقة الي اعطيته اياهم وما بقول الا حسبي الله ونعم الوكيل
هاي هي مذكرة حياتي عم احكيلكم قصتي والدنيا عندي كتير برد
كانت تشتي من شوي نطرت كتير الشتا ليخلص
حتى اطلع وشوف قوس قزح نطرته ونطرته لحتى لمحته بطرف مرايتي المكسورة بلش يبان
بتصدقو اول مرة بكتشف انه قوس قزح بيشبهني فعلا
وهالمرة مكسور متلي 💔
يا جبار القلوب اجبر كسر قلبي
#انتهت
استنوني غدا بالجزء الاول من المذكرة التانية

لاترحل قبل أن تكتب تعليق برأيك في القصة أو حتى كلمة “تم” لتستمر وصول منشوراتنا لك