قصة قصيرة بعنوان قسمة ونصيب بقلم حنين طه

قصة قصيرة بعنوان قسمة ونصيب بقلم حنين طه
هذه القصة تأتيكم من قسم المنوعات في زاكي
#قسمة_و_نصيب
قصة قصيرة

كل شي بهاي الدنيا قسمة ونصيب واذا الك نصيب بشي هو الك

جود: مرحبا
امجد : اهلين تفضلي
جود: قالولي انه محلكم كتير منيح بتصليح الموبايلات فجيت لحتى اصلح موبايلي
امجد : خير شو ماله
جود: والله ما بعرف كل شوي بيطفي بفلل شحنه بس بيقعد معي عشر دقايق مشحون وبعدها بفضى
امجد : اعطيني اشوفه ممممم بدي اعتذر منك الموبايل هاد بده شغل كتير وانا لسا متدرب هون بدك ليجي محمود صاحب المحل بيزبطلك اياه هو عنده خبرة اكتر مني
جود: يا ربي طيب ما في امل اخده معي هلا
امجد : يا ريت بيطلع بايدي
جود: طيب صاحب المحل متى بيجي
امجد: بعد الساعة ستة اذا بتحبي تاخدي تلفونك معك وترجعي بعد الستة بصير
جود: لا صعب كتير اجي المسا انا قلت بمر عليكم وانا مروحة من الجامعة طيب خلص مو مشكلة هي التلفون عندك وبكرة وانا رايحة عالجامعة بمر عليك باخده بس اذا سمحت في مجال رقم للمحل ارن عليه حتى اعرف خلص التلفون او لا
امجد : اكيد طبعا تفضلي
جود : شكرا الك

امجد ما اعطى جود رقم المحل اعطاها رقمه هو لانه من اول لحظة دخلت فيها عالمحل عجبته وقال لحاله خليني اعطيها رقمي بلكي شبكت السنارة
وحتى انه ظل طول الوقت يفكر فيها سرحان بجمالها وادبها رقتها بالكلام كل شي فيها حلوة
اما هو شب عادي عمره ٢٥ سنة وبلش يدرس جامعة على كبر

محمو: هيلووووو شو يا بشو سرحان
امجد : اهلا اهلا اخي محمود لا والله ابدا بفكر بدراستي يلا كونك جيت خليني انا اروح عالبيت
محمود : ماشي حبيبي ولا يهمك صحيح بكرة انا معطل من الشغل لهيك لا تيجي عالمحل بكير اقعد مع امك وروح على جامعتك واعتبره بكرة اجازة
امجد : بكرررة لا بدي اداوم هون بكرة
محمود : مالك دايما كنت تقلي جاي عبالك ترتاح هلا لما قلتلك خد اجازة بطلت الحق علي حابب تداوم تعال داوم
امجد : لا خلص مو مشكلة بعطل

امجد كان بده يداوم علشان بشوف جود بس تيجي تاخد التلفون بس ما حب يخلي محمود يحس عليه قرر انه يعطل وحكى مو مشكلة بس ترن علي بحكي معها ومن كلمة لكلمة رح احكيلها اني معجب فيها
اما محمود هو شب طويل اسمراني مخلص هندسة برمجيات وبشتغل بشركة وبعد المسا بيجي بيقعد بالمحل وكل بنات الجامعة قاتلين حالهم عليه حتى انهم بخربو تلفوناتهم بالقصد حتى يجو عنده عالمحل بس هو تقيل شوي ما بتعجبه اي بنت
مسك محمود الموبايلات الي بدهم شغل كتير والي بكون امجد بالعادة حاططله اياهم عجنب حتى يصلحهم
ومسك موبايل جود ليصلحه كان الموبايل بده اعادة ضبط وشغل كتير عمللها اللازم لحتى يزبط بس خاف انه يكون مسح الصور الي عليه دخل عالاستديو ليتأكد انه ما مسح الصور
محمود: يااااا ربي شو هالبنت الحلوة دخيل اسم ربنا ما اجملها
شو عم اعمل انا يييي عندي خوات بنات وعندي ولايا رح اقعد اطلع عصور المخلوقة الله يخزيك يا شيطان ويستر على كل بناتنا
بس كمان محمود ما راحت جود عن باله طول الليل كل شوي يتذكر فيها وبجمالها

محمود : احسن ايشي اقوم اصلي ركعتين بلا كل هالافكار وبكرة بعرف مين صاحبة الموبايل وبطلبها عسنة الله ورسوله

وهيك لتاني نهار

جود : مرحبا
كان محمود لافف وجهه
محمود : اهلا ( ضحك سنه)
جود : انا انا امبارح كان في شب هون واعطيته تلفوني
محمود : طيب اهدي شوي وركزي شو بدك تقولي
جود : ههههه اسفة قصدي انه امبارح كان في شب غيرك هون اعطيته تلفوني كان بده تصليح وحكالي انه صاحب المحل بس بيعرف يصلحه
محمود: مزبوط انا صاحب المحل
جود: رنيت عالرقم الي اعطاني اياه بس كان غير متاح
محمود: غريب تلفون المحل هيو وفي شبكة هون
جود: والله ما بعرف صلحته لتلفوني
محمود: اها صلح تفضلي
جود : طيب ممكن رقمك انت حتى اذا موبايلي رجع خرب او ما قبل يشتغل اتصل فيك
محمود : اكيد تفضلي
صحيح قبل ما تروحي تاني مرة اذا بدك تودي تلفونك لمكان تصلحيه انتبهي تشيلي صورك عنه مو دايما بيوقع بين ايدين ولاد حلال
جود: ما رح اوديه لمكان يصلحه الي عندك يعني دايما رح يوقع بايد ابن حلال سلام

ايوا ايوا محمود عجبها كتير لجود وهلا صار معها رقمه فكرت كتير كيف ممكن توصله
جود: الو
محمود: اهلين مين معي ( طبعا هو قلبه عرفها بس عمل حاله مش عارفها)
جود: انا جود الي جيت اصلح موبايلي
محمود: اه طمنيني الموبايل منيح في شي مو زابط
جود: لا انا رنيت اشكرك انه كتير منيح بس يا ريت يرجع يخرب مرة تانية
محمود: هههههه ليش بقا
جود : هيك سر

وهاي المكالمة فتحت بينهم مكالمات كتير اتطورت العلاقة شوي شوي بنات الجامعة كلهم صارو يعرفو انه جود في بينها وبين محمود علاقة وكل شو تحاول وحدة تخرب علاقتهم سوا

جود: مين هاي اسمة الي حضرتك كاين تحكي معها قبل فترة
محمود : انا ما حكيت مع حدا مو كل وحدة تيجي تزت براسك كلمة تصدقيها
جود: وليش ما اصدقهم
محمود : طيب يا ستي لو فعلا هم صادقات كان رحت خطبت وحدة منهم وحتى ابرهنلك اني صادق اعطيني رقم ابوكي ابوي بعد يومين بوصل من السفر ورح نيجي نطلبك الي
جود: انا مو مصدقة حالي رح تصير الي والي وبس يا الله كيف كل شي صار بسرعة ما حسينا بشي صح
محمود : لاني بدي اياكي بالحلال يا جود

محمود اخد رقم ابوها لجود وكان عم يستنى بابوه يجي من السفر لحتى يروح يطلبله البنت الي قلبه اختارها
مرق يومين بس بس

جود : يا الله ليش محمود ما عم برد عتلفونه ليش تلفونه مغلق معقول بيضحك علي معقول الي قالوه بنات الجامعة عنه صح انه ملعوب وتبع بنات ورح يزتني متل ما عمل مع غيري
احسن شي ادق عرقم المحل

امجد: الو
جود: عفوا لو سمحت مو هاد رقم محل محمود
امجد : لا هاد رقم الشغيل الي عنده
جود: اه امجد طيب وين محمود
انجد : والله ما بعرف شو اقلك محمود المفروض اليوم ابوه يوصل من السفر لكنه عمل حادث صغير لهيك هو ملتهي بتحبي احكيله شي
جود: لا شكرا سلامتك

قلب جود بلش يغلي خايفة على محمود كتير
جود: محمود واخيراقدرت احكي معك طمني كيفه ابوك
محمود: لا تخافي بابا بخير الحمد لله اجت سليمة
جود: يلا الحمد لله المهم انه بخير
محمود : لا تخافي انا عند وعدي ابي مصر يجي بكرة يطلبك حتى وهو تعبان لانه شاف قديه انا بحبك
جود: يخليلي اياك يا رب محمود صحيح بدي اقلك شي بتتذكر لما قلتلك اني اخدت رقم المحل وكنت ارن عليه غير متاح لما قلقت عليك رنيت عالرقم بس طلع امجد معطيني رقمه مو رقم المحل
محمود: متأكدة غريبة ما اله بالعادة ،،،، طيب طيب حبيبتي بدي اروح هلا اشوف ابي بحاكيكي بعدين

بلشت جود تحضر لبسة بتجنن وبتطير العقل لحتى تلبسها وقت طلبتها من محمود ومع انه اهلها كانو رافضين كل الرفض انه جود تنخطب قبل ما تخلص جامعة بس لما شافوها قديه متمسكة بمحمود امها اقنعت ابوها بانه يوافق
تمت الطلبة وكل شي كان على احسن ما يكون وعيون محمود وجود عم يرسمو قلوب حب صغيرة من كتر الفرح

محمود : يلا هلا صرتي مرتي الا شوي يلا روحي نامي هلا عشان تصحي بكير ونروح نعمل الفحص وبعدها نكتب الكتاب وبعد هيك بدي اوصلك بسيارتي عالجامعة لتدوري وتتفتلي بالجامعة وتقوليلهم طلع صادق معي ما خذلني لاني والله ما ضحكت على بنت قبلك
جود: انت احلى فرحة شفتها بحياتي بدي بكرة يجي بسرعة
محمود: بكرة بدي تلبسي اول لبسة شفتك فيها لما جيتي عندي عالمحل
جود : محمود قول لليل يروح ويجي النهار بسرعة
محمود : رح يجي حبيبي رح يجي بيعرف قديه احنا مستعجلين لهيك ما رح يطول

ومتل ما قال محمود لجود لبست اللبسة الي كانت لابستها اول مرة التقو فيها وراحو عالمركز الصحي هم وام محمود وام جود
لما انغزت جود بالابرة حس قلبه عم ينغز معها
واخدو العينة اللازمة من جود ومن ممحمود وقعدو يستنو النتيجة وكانو عم يحكو شو لون البدلة بدها اياها وباي صالة رح تحجز وكيف بدها تعمل شعرها بيوم الخطبة وامهاتهم عم يطلعو فيهم ويضحكو

جود : ها هي طلعت الممرضة والدكتورمحمود ليش هيك وجوههم ما بتتفسر
محمود: ما بعرف حبيبتي لا تخافي كل شي رح يكون منيح
الدكتور: حضرتك محمود وحضرتك الانسة جود انا ما بدي اكتر حكي انتو التنين واعين وفهمانين للاسف نتيجتكم سلبية ما بقدر اعطيكم تقرير بالموافقة
جود : محمود امسكني مو قادرة اوقف على اجري
محمود: كيف يعني ما بتقدر تعطينا موافقة انا بحبها وهي بتحبني ابوس ايدك كيف يعني
الدكتور: يا ريت بايدي اعمللكم شي والله ما كنت قصرت بس انت حامل للتلاسيما وجود كمان حاملة للتلاسيما وبهاي الحالة ما بقدر اعطيكم موافقة لانه رح تكون في احتمالية كبيرة لانجاب اطفال مصابين
محمود: مو مشكلة حتى لو كانو مصابين انا بدي اتزوج جود
الدكتور: يا حبيبي لا تنجر ورا العواطف بكرة رح تقدر تشوف ابنك بعيونك عم بموت قدامك وانت مو قادر تعمله شي بعدين المحكمة ما بتقبل تزوجكم سامحني
محمود : انا بدي نعيد الفحص
الدكتور: ولا يهمك بنعيده
وانعاد الفحص مرة ومرتين وتلات وباكتر من مطرح وكلهم نفس النتيجة

محمود: شو يعني خلص حبنا انتهى يا ريت النهار ما طلع يا ريتني موتت ليلة امبارح
ام محمود : وكل امرك لربنا لك امي عسى ان تكرهو شيئا وهو خيرا لكم

……….

جود: ااااااخ يا امي خلص راح محمود ما ظل في محمود ليش هيك الدنيا خذلتنا ليش مو حرام
ام جود: يا امي كل شي بالدنيا اله حكمة عند ربنا ما حدا منا بيعرفها
……..

محمود: امي قومي نروح عند جود نواسيها هلا بتكون متنهنة بكى
……….

محمود: جود بعدك بتبكي
جود: لا انا ما ببكي انا منيحة انت منيح
محمود : انا منيح انا من اليوم وطالع اخ الك شو ما بدك شو مابدك انا جاهز فيه ورح تكوني منيحة ورح تنخطبي ووتتزوجي ورح تجيبي اولاد كتير واول واحد منهم رح يكون اسمه محمود
جود: عم بتقويني وانت دموعك بين عيونك
محمود: هس احنا اقويا ولا تخليه حدا يحكيلك محمود خذلك انا وفيت بوعدي بس الزمن بده نكون اخوان مو زوجين
جود: بابا انت جيت
ابو جود: معلش يا ابني معلش يا بنتي لا تزعلي نصيبكم انا عازز علي فشلتي قدام الكل صرت عازم كل الحارة وقرايبنا على حفلة اليوم لكتب الكتاب
محمود : لا فشلة ولا شي عمي جود خطبتها اليوم بس استنو علي نص ساعة هلا برجع

كلهم قعدو يتصفنو ببعض وين راح محمود وشو راح يجيب

محمود: امجد يا امجد
امجد : اهلين محمود
محمود: يلا قوم معي بدي اروح اخطبلك
امجد: مين بدي اخطب وامي واهلي
محمود: بعدين هلا العروس بتستنى فيك
امجد: مين هي شو عم بصير
محمود: جود العروس انا عرفت جديد انك اعطيتها رقمك زمان بدل رقم المحل عرفت جديد انك كنت بدك اياها بس بعدت احتراما الي انا وجود ما زبط الفحص الطبي تبعنا ما رح الاقي شب يحترمها ويصونها متلك يا امجد قوم معي
امجد : بس هاي البنت الك مش الي
محمود : خلص يا اخي هيك الدنيا قوم

وصل محمود وامجد عالمركز الطبي وعرفهم محمود على امجد وحكالهم كلمة انا كنت دايما احكي لامجد يا ريت عندي اخت لازوجك اياها وهلا الله اعطاني جود اخت الي ما رح اقدر الاقيلها احسن منه وكل شي اتفقنا عليه امبارح رح يظل متل ما هو مهر وشبكة وهلا خلينا نعمل الفحص

نتيجة جود وامجد طلعت ايجابية
ومع انه جود كانت رافظة امجد تماما بس لانه محمود اختاره يعني رح يكون باخلاق محمود وافقت
ومع انه امجد كان رافض تماما لجود لانه اعز رفقاته اختارها
ومع انه حب جود ومحمود ظل غصة بس هيك القسمة والنصيب

#حنين_طه