اليوم عيد ميلاد بنتي قمر …

اعتذرت من بيت ابو سليم و قلتلهن انو اليوم ما رح اقدر روح اخدم عندن لأن هاد اليوم كتير مهم بالنسبة… 

حبيت اعمللها مفاجئة مميزة غير كل سنه… لبست المانطو السكري الي اعطتني ياه ام سليم هدية… و لبست معو حجاب ابيض طلعو كتيييير حلوين مع بعض!! سكرت باب الشقه شوي شوي و نزلت على روس اصابعي

ام خالد: اهليييييين ام قمر شو وين مشخصه و طالعه

ام قمر: هسسسسس وطي صوتك… مابدي قمر تسمع…

ام خالد: ايه ايه خلص سكتت بس وين رايحه؟

ام قمر: اليوم عيد ميلادها… بدي اعمللها مفاجئة

و نزلت على درج البناية… و اول ما وصلت عالشارع الرئيسي وقفت تكسي… لك اييييه تكسييي!! يعني معقول اركب بالسرفيس و المواصلات و وسخ تيابي؟ بعدين ما بدي اتأخر على قمورتي…

حاولت استمتع… قعدت بالكرسي ورا متل الهوانم وحطيت الشنته جنبي…يا الله الشام شو كبيرة! بعدين عجئة كتيييييررر
فتحت الشباك و شميت ريحة طيبة كتيررررر…
غريبة هالبلد…. مع كل شي عم يصير فيها بس ما بتشم ريحة البارود و لا الدم… بس ريحة ياسمين بلدي… العالم عم تضحك و الشوارع ما بتفضى… اديشنا شعب بيحب الحياة؟!

الشوفير: هون اختي؟

ام قمر: يييي وصلنا؟ ما حسيت بالوقت..

الشوفير: ايه وصلنا…. ناولينا 450 ليرة

ام قمر: يوووووه ليش 450… كل شي بهل بلد بيغلى الا البني ادم عم يرخص… يوميتي كلها 500 ليرة.. الله ما قالها شو هالغلا هاد..

الشوفير: لا حول ولا قوة الا بالله!!

ام قمر: طيب طيب خلص لحظة اخي… رح طولهن…

دورت بالشنته و الي معي كانو ألفين ليرة… بدي جيب لعبة وعدت قمر فيها و بدي جيبلها قالب كيك… كنت حاسبه حسابي ارجع بتكسي بس مو مشكلة برجع بالميكرو..

ام قمر: تفضل… شكراً…

نزلت و دورت على محل الالعاب الي بدي ياه و لقيتو… و فتت جبتلها لعبة باربي من زمان كانت مشتهيتها… حلوة كتير و بتشبها!!

و جبت قالب كيك صغير لان كمان الحلويات غليانة..

و طلعت بالسرفيس… و بعد ما قعدت عالكرسي حسيت شي بارد… كان في عصير تحتي و تلوثت تيابي…
كنت رح انفجر بس هديت حالي… وفتحت علبة الحلو مشان شق على قالب الكيك و اطمن عليه!! … لقيتو قاعد بهدوء بمكانو… يؤبر البي

و تطمنت على اللعبة كمان… بعدا مبتسمة دخيل عينها..

ام قمر: ايه ايه اخي نزلني هوووون

الشوفير: شو منزلك هون يا اختي طولي بالك لنقطع الحاجز

ام قمر: لا لا هون هون نزلنييييييي

الشوفير: لا إله إلا الله… طيب امري لالله…

وقف الميكرو و نزلت كنت مستعجلة كتير وفرحانه… تفركشت رجلي ووقعت من درج الميكرو…

الشوفير: هههههه الله الله…

ومشي و راح

ام قمر: الله ياخدك… غبييييي…. بسيطة والله غير ادعي علييييك

روح الهي تعمل حادث و تتكسرررر..

يييي لا لا استغفر الله يمكن عندو ولاد بعمر بنتي… استغفر الله العظيم ياربي استغفر الله العظيم…
نكتت تيابي و انا متدايئة من حالي… الله يسامحني يارب…

فتحت قالب الكيك و لقيتو انهرس… و راحت الوردة الي عليه… زعلت كتير بس مو مشكلة المهم يكون طيب…

مشيت و مشيت و مشيت… لوصلت على بيتي…
طلعت قالب الكيك و فرشتو بالأرض… و طلعت اللعبة و حطيتها جنبو…

ام قمر : كل عاااام و انتي بخيرررر امي..
شوفي شو جبتلك… هي اللعبة الي كنتي مشتهيتها… و هاد كيك لحبيبة امها..
جبتلك ياه كان حلو كتير بس وقعت و انتزع لا تزعلي مني…
طمنيني يامو… حلوة الجنة؟ ديري بالك على ابوكي… اشتقتلكن كتيرررر…
انا انتقلت على بيت جديد… مو بعيد من هون حبيبتي ما تخافي… امك ما رح تتركك لحالك…
اوقات هيك بشتهي لاقي الك قبر انتي و ابوكي لحطلكن عليه ورد و اسقيه… بس مافي… امانه تسامحيني يامو…
دورت عليكي كتير والله رفعت حجار البنايه حجر حجر ضليت شهر اجي لدور عليكي انتي و ابوكي بس ما عرفت لاقيكي… و لا لاقيه.. سامحوني امانه

المهم… لسه مخبيتلك مفاجئة كتير حلوة… غمضي عيونك لئلك ما تفتحيهن… غمضتي؟؟؟

فتحيييييييييي …. جبت شرشفي معي… بدي نام عندك اليوم
ما اشتقتي تنامي بحضني؟ و لا كبرتي يا ضرسانه؟ هههههه

قلتلك شو صار معي ببيت ابو سليم الشهر الماضي؟ … انسرق طوق دهب… خفت يتهموني فيه بس الله كبير طلعت بنت اختها سارقتو و اعترفت… و بعدين اعتزرو مني لانو شكو فيني و انا سامحتهن… يامو اشتئتلك… اشتئتلك كتير
عم يديئ خلئي لحالي يعني ليش ما اخدتوني معكن انتي و ابوكي؟
هيك هنت عليكن تركتوني لحالي؟؟ الله يسامحو ابوكي قليلو اني زعلانه منو خيرات الله… اكيد راح لحالو مشان يتهنى مع حور العين…

ضلت ام قمر تحكي لقمرها كل شي صار معا لوقت عتمت العين… لفلفت حالها… و نامت على الحجار و هي عم تبكي..

تاني نهار من وش الصبح تجمعو الناس كلهن عند البناية حوالين ام قمر و كانو عم يتفرجو

## لا حول ولا قوة الا بالله… ميته المخلوقه الله يرحمها غطوها… شو قصتها!!

## ييييي لك مو هي ام قمرررر؟؟؟ … الله يرحمنا برحمتو شو جايبها لهون

## عم يقولو قرصها عقرب بالليل كان معشش بين الأنقاض و طلع عليها وما حست على حالها

## له له له… كانت عالبركة الله يرحمها… من وقت ما اجت قذيفة عالبناية و ماتت بنتها و جوزها وهي جنت… يا حرام
قلنالهن من الاول يحطوها بمصح…

## مو هي الي ما لقولها جثة بنتها لانها كانت اشلاء؟ لك ايه والله هي … الله يجيرنا يارب… الله يجيرنا..

#تمت