قصة الليلة بعنوان ذكريات بللها الزمان بقلم مال الشام
قصة الليلة بعنوان ذكريات بللها الزمان بقلم مال الشام
قصة الليلة بعنوان ذكريات بللها الزمان بقلم مال الشام
قصة الليلة بعنوان ذكريات بللها الزمان بقلم مال الشام, هذه القصة تأتيكم من قسم المنوعات في زاكي, استمتع بالقصة, وانتظرونا كل يوم بقصة جديدة شيقة ومفيدة, وشجعنا بكتابة تعليقك في القصة.
#ذكريات_بللها_المطر_بقلم_م
الجزء الأول + الجزء الثاني + الجزء الثالث + الجزء الرابع + الجزء الخامس+السادس
+ السابع + الثامن #انتهت
** حبيبي عمااااااااااااااااد
عماد : اييييه
** وين رايح يا عمري؟
عماد : بس رح جيب عصير و اجي
** ماشي ما تتأخر
راح عماد يجيب عصير .. وقعدت انا على كرسي بالحديقة تحت الشجرة .. كانت الدنيا ربيع
الشجر خضارو بيجنن .. وريحة الورد فايحة ..
قعدت و غمضت عيوني وانا عم شم ريحة الوردة الجورية القريبه مني .. وتزكرت كيف كنت انا و عماد قبل ما اتجوز
..لهلأ بتزكر كل شي صار كأنو اليوم يا الله شو كانت ايام حلوة .. كنت اشتغل بمحل اكسسوارات صغير وكانت الدنيا شتوية
مطر وبرد كتييييييييييييير ..
كنت مشغله دفاية الكهربا وحاطه عليها رغيف خبز لانو كنت جوعانه .. ولابسه جاكيت جوخ رمادي و سكارف احمر
وكنت مشغلة اغنية فيروز عم دندن معا
سألوني الناس عنك يا حبيبي
كتبوا المكاتيب و أخدها الهوا
بيعز عليّ غني يا حبيبي
و لأول مرة ما منكون سوا
سألوني الناس عنك سألوني
قلت لن راجع أوعى تلوموني
غمضت عيوني خوفي للناس
يشوفوك مخبى بعيوني
وقتا انفتح باب المحل وانا قاعده و ملزقه بالدفاية
ندى : بدي سكر المحل
حكيت وانا معطيه ضهري للباب .. وما شفت الا عماد اجا و وقف جنبي وتيابو عم تشرشر مي .. وعم يرجف من البرد
ندى : ييييه لك عماد شو جابك اطلاع بسرعه ؟
عماد : خيييييييييييي .. برد ما معقول يا بنت الحلال
ندى : انت الي ما معقول شو هاد !!
عماد : بردان بردان الله يوفئك بس خليني ادفى شوي
بعدت عنو وتركتلو مجال ليوقف قريب من الدفايه .. وقتا كان المغرب وانا صار لازم سكر و ازا مرق حدا من اهلي وشاف عماد رح تصير مصيبه
لان لقطونا من قبل مع بعض
ندى متوترة : مطر كتير برا ؟
عماد : ايه والله كتير كتير
ندى : طيب حدا بهيك جو بيلبس كنزة صوف ؟
عماد : شو بعرفني هي الي لقيتا بوشي بعدين حبيبتي ليكي لونها متل لونك عيونك حبيتها كتير
رجعت اتطلع عالساعه وانا متوترة
ندى : هههه مجنون .. يلا انا لازم سكر
عماد : ايه يلا بس تكة خليني ادفى حاسس عظامي تلجت
ندى : كأنك عم ترجف يا عمري ؟
عماد : كتير بردان .. جسمي شرب مية المطر كلها ..
كان لابس كنزة صوف خضرا سميكة .. ريحتها رطوبة .. و عم تنقط مي ..
زعلت عليه وقتا .. كان هيك شكلو بريء والمطر مبلل شعرو و رموشو .. و وشو كمان كان عم يقطر مي
ندى : طيب تاخود تلبس جاكيتي ؟
عماد : لا الله يسامحك كيف اخدو خليكي انتي مدفية حالك
ندى : وشك احمر كتير .. يمكن عليك حرارة رح تمرض
قربت وحطيت ايدي على جبينو .. تلبكت كتير و رجف البي
عماد ابتسم بدفا : شو طلع معك ؟
احمرو خدودي ونزلت عيوني بالأرض : غليظ يلا اطلاع من هون
عماد : ماشي حبيبتي انا رح روح مشان ما اعملك مشاكل .. بس هاتي بوسة
فتحت عيوني وانا مصدومة : شوووووووووووو ؟
عماد : شو ؟ بمزح والله .. ما بدي شي خلص رايح
ندى : ايه فكرت حالي سمعت شي تاني
عماد : ما تفكري تؤبري البي بتصرفي سعرات حرارية
شلحت الجاكيت الي لابستو وحطيتو فوقو
عماد : لك مجنونة هلأ بدك ترجعي عالبيت
ندى : باخود تكسي انت دفي حالك.. حسيت عليك حرارة
عماد : هي حرارة الحب حياتي
ندى : هي حرارة غلاظتك يا البي
عماد : ههههههه يلا حبيبي انا رح روح … بدك شي ؟
ندى : هئة سلامتك . .بس توصل فوراً بدل تيابك و طمني
عماد : ماشي ..بخاطرك
ندى : الله معك يا البي
ضليت عم راقبو وهو طالع من المحل وعم يركض تحت المطر .. نيالهن .. نيالهن حبات المطر كيف عم يتخبو بين تيابك
كان نفسي اتخبى متلهن وحس بالدفا ..
غاب عن عيوني .. و بلشت شم ريحة شي عم يحترق
ندى : يييييييي الخبزة .. والله لتجنني يا عماد
ضبضبت المحل.. و سكرتو .. ورجعت عالبيت مشي لان ما كان معي اجار تكسي .. و وصلت عالبيت وانا عم اعطس واسعل
وحاسة البرد فات لالبي
فتت و زتيت حالي بفرشتي و علبة المحارم بحضني ورن موبايلي
ندى : الو ؟
عماد : كيفك حياتي ؟
ندى : انا برشحة
عماد : برشحة ؟ ههههههه
ندى : ايه و علبة البحارم بحضني
عماد : عنجد مرشحة ؟
كنت عم احكي وانا مخنوقة وحرف الميم ما عم يطلع معي ما بعرف ليش قلب على باء .. يمكن لان انفي مسدود
ندى : ايه .. و بردانة كتير
عماد : سلامتك .. شبك ؟
ندى : با بعرف شكلي اخدت بررررد
عماد : ليش ما طلعتي بتكسي ؟
ندى : ايه طلعت بتكسي بس بردت
ضليت وقتا اسبوع بفرشتي … كنت ماخده برد كتير و غبت عن الشغل وما كنت اقدر رد على عماد او احكي معو
لان اخي حمزة كان جاي اجازة من الجيش وقاعد عنا وكنت خاف كتير ..
اليوم السابع كنت متحسنه شوي ..
نزلت من البناية وانا ماشيه بطريقي بلشت اسمع حدا عم يلطشني ويسمعني حكي حلو
— : شو يا ئطة .. ريتها ما تبلى هالربطة
ندى : انقلع من هون ولاك
– – – : شو يا ملاك .. دخيل هالعيون بيجيبو الهلاك
التفتت وانا معصبه و مرعوبة : انئلع من هووووووووووووووووون…عماا
عماد : هههههه اشتئتلك وليه… الي اسبوع مزروع بشارعكن وين مختفيه
ندى : لك دب انته دب ؟ والله وقع قلبي و كيف مغير صوتك هيك ؟ وشو جابك لهون؟ وليش لابس هي الكنزة كمان مرة ؟ بلكي رجعت تشتي هلأ ؟
عماد : حددي السؤال !!
ندى : كلهن
عماد : طيب هدول كتار رتبيلي ياهن لجاوب واحد واحد .. من الأهم للاقل اهمية
ندى : يعني بدك اهم شي ؟
عماد : ايه اهم شي حبيبتي
ندى : اهم شي .. بتحبني ؟
قرب مني واتطلع بعيوني : بعشئئئئئك
دبت بعيونو … حسيت الزمن وقف … والأماكن انمحت .. والهوا انسحب من الدنيا .. رجعت على وعيي
لما شفت اخي حمزة هجم على عماد و صار يضربووو .. زتو بالأرض و مسكني و صار يجرني عالبيت بالشارع والعالم تتفرج علينا
وانا لسه ما عم استوعب شو الي صار فجأة وعم ابكي من رعبتي
ندى : لك اتركني …. اترررررركنييييييييييي
فتح باب البيت ولحشني جوا وفات وهو عم يصرخ ويعيط ويهددني : والله لادبحك واشرب من دمك يا فلتانه
طلعت امي مرعوبة وعم تسأل شبنا
حمزة : بنتك عم تتمعشق بالشوارع .. ما بكفي الفضيحة الي عملتلنا ياها اول مرة .. بدها تفضحنا بالحارة كمااااااان
ندى : كزب يا امي كزب ما تسدئيه
مسكني من شعري وهو عم يصرخ علي : كزب اه يا وسخه ؟
قربت امي وبعدتو عني وضمتني لصدرها وانا عم ابكي وارجف من خوفي .. خفت يضربني متل آخر مره وما اصحى على حالي
غير و وشي مورم وجسمي كلو عم يوجعني
ام حمزة : برضاي عليك يا ابني تتركها حرام عليك ، اخر مرة كانت رح تروح من بين ايدينا كتر ما ضربتا .. الله يحن عليك يا حبيبي
بس حمزة ما تركني .. بعد امي عني ورجع شدني من ايدي وفوتني على الغرفة وقفل الباب وانا عم ابكي واصرخ
ندى : اخر مرة يا اخي .. وحيات الله ما عاد عيدها خلص التوبة التوبة
وامي عم تدق الباب وتقلو افتح الباااااااااب شو رح تعمل فيها
#مال_الشام_يتبع
#ذكريات_بللها_المطر_بقلم_م
الجزء الثاني
ضليت اترجاه يسامحني و نزلت على رجليه وانا قلو ما يضربني ..
طلع عصايه من ورا خزانتو وبلش يضربني …وانا اصرخ وامي تضرب عالباب وتبكي وتقلو ابوك وصاك فيها يا حمزة ما تضربا
وهو متل المجنون … كأنو مو شايف شي قدامو كان يضربني بلا رحمة وانا ابكي من وجعي واترجاه يتركني
حسيت عظامي فكت عن بعضها و البي طفى من الوجع
رمي العصايه من ايدو … وقعت قدام عيوني و انا ملحوشة بالأرض عم اتوجع وابكي وقول وييييييييينك يا ابي وينك
حمزة : بدك ابوكي ما ؟ منيح راح لرحمة ربو وما شاف هالأيام هي ..
ندى : ما عملت شي ما عملت شي ..
حكيت ويا ريتني ما حكيت .. مسكني بين ايديه ورفعني بالهوا ورجع ضربني بالأرض
ندى : مشان الله خلص .. خلص خلص مشان الله .. يا اميييييييييييييييي يا اميييييييييي
على صوت عياطنا اجو الجيران وصارو يضربو عالباب وامي تبكي وتقلهن اكسرو الباب …
جارنا ابو حسان … هههه الله يسعدو .. لولاه هداك النهار كان يمكن موت بين ايدين حمزة
خلع الباب بكتفو وفات و بعد حمزة عني
حمزة : لك اتركني .. اتركني خليني ارجع ربيها
ابو حسان : يا لطييف لك شو عامل بالبنت .. يا ام حمزززة
ركضت امي وبس شاافتني مرمية بالأرض ما عم اتحرك ولا اتنفس صارت تضرب على وشها و على رجليها ..
وبالفعل ضليت تلات ايام مو حاسة على شي حوالي .. ضلو يعطوني مسكنات لان دبحني الوجع و كنت بس اسمع صوت حمزة
ينفض بدني و صير ابكي …
بعدا حمزة اضطر يرجع لأن اجازتو خلصت وما فيه يضل .. راح وكان موصي امي ما اطلع من باب البيت وما امسك موبايل شو ماصار
وهددها ازا بيدرى انو صار غير الي موصي فيه رح يدبحني وما حدا بيخلصني من ايدو هالمرة
بس سمعت باب البيت تسكر وراه حسيت انو الهوا هلأ فات لرئتي … اخدت نفس كبيررررررررررررررررررررررر
وغمرت وشي بوسادتي ورجعت ابكي ..
فاتت امي لعندي وضلت تواسيني وشربتني كاسة عصير ليمون .. الله يرحمها شو كانت حنونة علي
بس صحصحت … ترجيت امي تخليني احكي مع صاحب المحل لاعتزر منو وفهمو ظروفي و وافقت بشرط احكي وهي جنبي
اعطتني التليفون وحكيت معو
ندى : مرحبا عم ابو جمال
ابو جمال : اهلين بنتي
ندى : يا عمي ما تواخذني بس كان عندي ظروف صعبه وما قدرت داوم
ابو جمال : حصل خير .. بس انا جبت موظفة جديدة .. سامحيني يا بنتي بس هاد باب رزق
ندى : بس يا عمو
ابو جمال : الله ييسرلك شغل احسن سامحيني
حسيت قلبي انكسر .. كنت متعلقة كتير بهاد المحل لانو تعرفت على عماد فيه .. وكانت احلى ايامنا كمان فيه
ام حمزة : شو بنتي شبك ؟
ندى : اه ؟ ..
ام حمزة : شو قلك ابو جمال ؟
ندى : ممم .. قلي انو رح يعطيني فرصة بس لازم روح بكرا عالمحل نظفو ورتبو وبعدا فيني اخود اجازة شهر
بيكون رجع اخي ومنشوف ازا بيسمحلي ارجع اشتغل لما لأ
ام حمزة : ايوه .. كيف يعني هلأ ؟
ندى : هلأ يعني لازم روح بكرا
مسكت امي الهاتف واعطتني ياه : يلا اتصلي وقليلو ما فيكي تروحي
ندى : يا امي مشان الله كيف بدي قلو هيك ؟ هو بس هاد اليوم وبعدا ما بعود بطلع بنوب الله يوفئك
ام حمزة : امي يا حبيبتي ما بدنا مشاكل والله ازا عرف اخوكي ليكسر الدنيا فوق روسنا
ندى : ما بيعرف .. من وين بدو يعرف ؟ بروح عالساكت وبرجع على بكير .. بنظف المحل عالسريع وبرجع
ام حمزة : بس !!
ندى : الله يوووفئك مين الي غيرك انا بهل دنيا .. ما تزوديها علي
ام حمزة : طيب .. بس هالمرة
ندى : حاضر .. بس هالمرة ضروري كتير
#ذكريات_بللها_المطر_بقلم_م
الجزء الثالث
ما قدرت نام كل الليل وانا عم اتخيل عماد قدامي .. بحبو !! لا ما بحبو .. انا بموت بدونو .. كل الأيام الحلوة الي عشتها معو
خلتني ما اتخيل حياتي بدونو .. بحة صوتو .. خطوط ايديه .. ريحتو .. دقنو و نظرات عيونو
الطريقه الي بيحكي فيا والضحكة الي بس اسمعا بيطير البي من مطرحو .. بيكفي نقول عن هالشغلات حب ؟ ..
عماد اعترفلي بحبو بطريقة لذيذة كتير .. فات وقتا عالمحل لعندي .. واشترى كم غرض و طلع
لما راح انتبهت انو ناسي دفترو عندي .. ركضت لاعطيه ياه بس كان رايح
رجعت عالمحل و صار عندي فضول لاعرف شو في بالدفتر واعرف اي شي عن هالشب الي بيزورني كل فترة وفترة و بيتطلع علي بنظرات مختلفه و مميزة
بس فتحتو كانت اول صفحة مكتوب عليها عبارة لنجيب محفوظ
“عرفت الحب لأول مرة في حياتي. إنه كالموت تسمع عنه كل حين خبراولكنك لاتعرفه إلا إذا حضر. وهو قوة طاغية،يلتهم فريسته،يسلبه أي قوة دفاع،يطمس عقله وإدراكه،يصب الجنون في جوفه حتى يطفح به،إنه العذاب والسرور اللانهائي.”
ما عرفت بهداك الوقت انا وياه شو نصيبنا.. العذاب و لا السرور!! بس غامرت بحبو بدون اي حسابات او ضمانات
بس طلع الضو قمت و جهزت حالي .. كان الجو بارد كتير والندى عالشباك ..
و انفاسي بيطلع معا بخار الشتوية الأبيض …
عملت فطور لأمي و وصلتني عالباب وهي توصيني ما اتأخر .. كانت خايفه كتير تؤبر البي .. بستها على جبينها ونزلت وانا كانت روحي سابقيتني لتحت
نزلت ومشيت بالشارع وانا عم اتلفت حوالي .. مرقت جنب المكان الي علق فيه حمزة وعماد و اتدايئت كتير وقت تزكرت المنظر ..
مشيت بسرعه كأني خايفه الذكرى تهاجمني ..وانا ماشيه شفت ست كبيرة ومقدرة واقفة على طرف الطريق .. رحت لعندا وحكيت معا
ندى : مرحبا خالة
— : اهلين بنتي
ندى : خالة لو سمحتي انا ناسيه موبايلي بالبيت و لازم احكي مع اخي ضروري ممكن احكي من جوالك ؟
— : ايه تفضلي
فرحت كتير وحسيتها شافت اللمعة الي بعيوني و حاولت ضل طبيعية .. مسكت الموبايل ودقيت لعماد
كان الموبايل بيرن .. ونبضات البي بتزييييد مع كل رنة
عماد : الو ؟
دافـــي .. صوتو دافي وحنون .. بيحسسني بالسلام .. بياخدني من قاع الوجع ليرجعني للحياة والامل كأن البرد كلو طلع من جسمي…
ابتسمت و الدمع فاض من عيوني
ندى : الو
عماد : ندى ؟
ندى : كيفك ؟
عماد : وينك انتي؟ هاد رقمك ؟
ندى : لا هاد رقم الخالة هون بالطريق
عماد : وينك ؟ فيني اجي شوفك ؟
ندى : قدام المحل منلتقي بس بسرعه
عماد : رح كون هنيك
سكرت الخط ورجعت الموبايل وانا خجلانه كتير منها لان ما قدرت مثل واكزب واعمل مسرحية .. كنت اضعف من انو اكزب بهيك وقت
كنت بدي اعتزر منها .. بس هي اتطلعت علي نظرة احتقار و غضب وسحبت الموبايل من ايدي ومشيت
ندى : وانتي كمان ؟ كلكن علي .. اوووف
كملت طريقي واخدت تكسي و وصلت عالمحل .. و بس نزلت من التكسي وشفت عماد ناطرني هنيك عبت الضحكة وشي وركضت لعندو متل الطفل الصغيررررر
مسكت بكنزتو وانا عم ابكي
ندى : اشتئتلك
عماد : شو صار ؟ اخوكي عملك شي ؟ ..ضربك صح ؟
ندى : لا ما ضربني بنوب
عماد : عم تكزبي
ندى : ما عم اكزب حبيبي ما ضربني بس اخد مني الموبايل ومنعني من الطلعه برا البيت ، من يومين رجع عالجيش وقدرت اقنع امي انو
لازم انزل عالشغل ضروري
عماد : شفتي البنت الي جوا ؟ شغلوها مكانك ؟
سرقت نظرة سريعه للمحل وشفتا للبنت .. وانزعجت لان حسيتها اخدت مكاني
ندى : ايه ، عم ابو جمال قلي انو هاد باب رزقو وما بقدر يعطلو اكتر
عماد : يلا بسيطة حبيبتي بكرا بس نتجوز رح افتحلك محل اكبر واحلى من هاد
ندى : ان شاء الله يا رب
مسك ايدي وهو عم يتلفت حواليه .. وقلي خفت عليكي كتير ..
ما تخاف علي .. طول ما انت جوا البي اوعى تخاف علي .. بالبرد انت دفاي .. و بالوجع انت دواي
انت سعادتي وفرحي و كل شي بدنيتي .. اوعى تخاف علي ..
قلتلو هالكلمات وسحبت ايدي من بين ايديه ..
ندى : صار لازم روح
عماد : ايمت رح ارجع شوفك ؟
ندى : ما بعرف بس شكلو هالمرة رح تطول
عماد : بس ما فيني اتحمل تبعدي عني كتير
ندى : ولا انا بتحمل .. بدبر حالي وبجي شوفك ما تقلق .. دير بالك على حالك
لفيت ضهري وبدي امشي
عماد : ندوشة
اتطلعت عليه و انا مبسوطة وعم اضحك : عيونا ؟
#ذكريات_بللها_المطر_بقلم_م
الجزء الرابع
عماد : انا ما رح اتخلى عنك .. رح احكي مع امي ونجي نطلبك
ندى : حبيبي هاد الحكي نحنا مو قدو .. انت لسه امبارح توظفت وما معك مصاري
عماد : بدبر حالي .. ماني مرتاح
ندى : دب ما تشغل بالك … كل شي منيح
مد ايدو ومسكني من كتفي .. كنت ماكلة ضربة قوية على هالمكان … و انوجعت كتييرررر
ندى : ااخ اتركني
عماد :شبك ؟
ندى : بتوجعني ايدي من هون
عماد : ليش ؟
خبيت عيوني وحاولت ما يلتقو بعيونو ..
عماد : ضربك صح ؟
شبكت اصابعي ببعض و كنت عم حاول ما يهرو دموعي لان كل ما اتزكر كيف ضربني بنوجع كتير
عماد : عرفت انو ضربك .. الله يكسر ايديه شو انو بلا شرف .. لك
ندى : عماد خلص
رفعت عيوني فيه … كان معصب كتيررر وعم يضرب ايديه ببعض وعم يحاول يضبط اعصابو
عماد : اسف .. اسف كلو بسببي ..
انا .. انا ما بعرف شو صرلي
كنت حابب شوفك .. ما كنت بعرف انو حمزة راجع
ندى : حاجتك تعتزر انا لازم روح تأخرت … ما تزعل .. ان شاء الله ربك رح يفرجها
عماد : ان شاء الله
ندى : على فكرة .. حلوة هالكنزة ها .. خلصت الشتوية وانت لابسها ههههههه
عماد : ايه لانها بتزكرني فيكي .. هلأ كمان لمستيها بايدك .. كيف بيجي من قلبي اشلحها ؟
رجف البي من البرد وكانو اسناني عم يضربو ببعض .. ودعتو ومشيت وما تطلعت وراي … كنت عم شد الجاكيت على جسمي لان بردانة كتير
طلعت بالميكرو .. وكان على الشباك بخار .. مسحتو بكم الجاكيت … واتطلعت على عماد كان لسه واقف مطرحو ..
وصلت عالبيت و امي كانت مرعوبة كتير .. طمنتا و حطيت حطب بالدفاية لان كنا مركبين دفاية حطب ..
وقعدت جنبا و صرت راقب النار كيف عم تاكل الخشب .. انا كمان عم تحرقني الدنيا بدونو
اديه رح نصبر هيك على هالحالة ما بعرف ..
مرق شهر وانا محبوسة بالبيت ما فيني لا روح ولا اجي و التليفون ممنوع عني وما كنت اقدر زعلها لامي لانها مريضه وما بتتحمل
كتير حاولت دبر شي حل لاطلع شوفو بس ولا مره زبطت معي … هيك .. لوقت ما رجع حمزة .. وجاب معو المصايب
بهداك النهار قلت لأمي انو بدي ضل بغرفتي وما بدي شوفو بس قالتلي هيك رح يعصب ويعملي مشكلة ولازم اتعامل معو عادي وما عصبو
كنت مجبورة اتحمل وساير لان ما في بأيدي شي اعملو
وصل العصريات تقريباً …
فات ورمى اغراضو عالباب ..
رحت حملتهن وفوتتهن على غرفتو… ورحت لفوت عالمطبخ
حمزة : ندى تعي لهون
غمضت عيوني بقوة وشديت قبضة ايدي ..
حمزة : عم احكيكي …
ندى : احم احم ..
فتحت عيونو والتفتت عليه : ايه اخي قلي
حمزة : تعي لعندي لشوف
ندى : عم جهز الأكل خليني شوفو
حمزة : امي قومي شوفي الأكل بدي اتفاهم مع ندى ..
ام حمزة : ليش خير شو في ؟ والله اختك ما عملت شي ومن وقت طلعت ما طلعت من الباب
حمزة : وبعدين معكن على هالمسا .. قلت بدي احكي معا كلمتين يعني بدي احكي معا و خلصنا
ام حمزة : طيب حبيبي ما تعصب يلا انا رايحه اسكب الأكل .. تعي ندى امي شوفي اخوكي بشو عاوزك
ندى : بس ماما
ضرب حمزة الصحن الي قدامو برجلو وصرخ بصوت عالي : قلتلك تعي لهووون
حسيت اطراف جسمي تيبست ورجلي ما عاد حملوني .. كنت بدي استند عالحيط
عنجد للحظة البيت كلو فتل فيني من الرعبة ..
ندى : حاضر .. حاضر
قامت امي ومرقت من جنبي وهمستلي : سايريه يامو سايريه
مشيت لعندو وضليت واقفه
حمزة : اقعدي
#ذكريات_بللها_المطر_بقلم_م
الجزء الخامس
ندى : طيب قعدت .. احكي
حط ضهرو عالحيط : جاينا عريــــس
ندى : عريس ؟ الي ؟
حمزة : لا العريس لأمك وبدي اسالك شو رأيك نوافق ولا لا ؟
ندى : ايه وافق اخي شو عليه خلي امي تنبسط كم يوم بحياتها
حمزة بصوت عالي : عم تجدبيها علي وليه حمارة ؟
ندى : لك شوووو شبببببببببك
حمزة : رفيقي محمود … معي بالجيش .. شب اكابر و اخلاقو عالية .. وانا عاجبني كتير .. عرف انو عندي اخت
وطلبك مني
ندى : عرف انو عندك اخت !! كيف يعني هيك بدون ما يعرف شي عني ؟
حمزة : لا هو بيعرف سمعتنا الطيبة ومين من بكون .. بعدين كفي انك اختي ليحب يناسنا
ندى : كأنو امي ندهتيلي ؟؟ يلا جاااايه .. اخي بدي قوم ساعد امي بالمطبخ
حمزة : بس انا ما خلصت حكي .. الشب جاي الاسبوع الجاي يشوفك .. راح يشوف اهلو ويجيبهن ويجو
بلشت حس بخوف : ايه بس انا ما بدي اتجوز .. بدي ضل عند امي
قمت بسرعه من جنبو وركضت عالمطبخ لعند امي وانا عم ارجف .. و وقفت جنبها لزق فيها ..
حمزة : ندى تعي لهون
ندى : بدنا نسكب الأكل منحكي بعدين
حمزة : بتجي ولا انا اجي ؟ وبتعرفي ازا انا اجيت شو بصير
ام حمزة : امي برضاي عليكي روحي روحي
ندى : امي ما بدي اتجوز الله يوفئك ما بدي اتجوز
ونحنا عم نحكي شفت حمزة صار واقف على باب المطبخ
حمزة : ليش ما بدك تتجوزي ؟
ندى : لأن .. لأن .. انا بدي ضل عند امي ما بدي اتركها
حمزة : ما شاء الله شو هالاخلاق العالية ..
فات عالمطبخ وهو عم يضحك وحاطط ايديه بجيبتو ..
ندى : بعدين امي مريضه وبدها حدا يعطيها الدوا وينتبه عليها وانا ما بدي اتجوز
ما شفتو الا مسك طنجرة الأكل الي عالمجلى وقلبها كلها عالأرض قدام رجلي .. طرشت أكل سخن علي بدون ما حس على حالي صرخت صوت عالي
كتير من الوجع
حمزة : ما بدك تتركي امك ولا بدك تضلي فلتانه مع هداك الشب ؟؟؟؟؟؟؟؟؟؟؟؟؟؟؟؟ بدك تضلي تحبي وتعشقي بالشوارع ؟
ندى : اااااااااااااخ ياااااااااا اميييييييييي رجلي رجلي احترقووووووووووووو
ام حمزة : الله يكسر ايدييييييييييك .. الله يغضب عليك الله يغضب عليييييييييييييييييك
حمزة : بدك تتجوزي يعني بدك تتجوزي .. ومو على كيفك .. والشب رح يجي ويشوفك .. الله لا يوفئك بدك تفضحينا
وطلع من المطبخ … سحبتني امي على غرفتي وكشفت عن رجلي و صارت ترشلي عليهن مي باردة وانا عم ابكي
بس مو من الوجع .. من الخوف .. شو بدي اعمل هلأ
ام حمزة : خلص امي بكفي بكي مشان الله وجعتيلي البي
ندى : ياا امي ازا بتحبيني لا تخليه يجوزني لرفيئو .. اكيد رح يكون متلو امانه ما تخليه يجوزني
كنت عم ابكي وماسكة بتيابها وعم اترجاها
ام حمزة : طيب شو بدي اعمل شو طالع بأيدي
ندى : قليلو في شب تاني خطبني منك وهو مانو هون ورح يجي الأسبوع هاد .. ازا بدك كون مبسوطة بحياتي اعملي هيك كرمالي
ام حمزة : مين الشب ؟ ليكون الي مسكك اخوكي معو ؟
ندى : ايه امي هو .. الله يوفقك .. انا بحبو كتير لعماد .. والله بموت ازا كنت لغيرو .. عقلي ما بيتحمل عيش مع واحد تاني
قليلو انو خطبني منك والاسبوع هاد جايين .. وانا رح خليه يجي هو واهلو
ام حمزة : لك يا بنتي
ندى : بقتتتتتتتتتتتتتتتل حالي .. لك بقتل حالي .. حتى انتي ما بدك تساعديني ؟ شو اعمل يا ربي شو اعمل
ام حمزة : طيب طيب .. طيب اهدي .. انا رح حاول اتصرف … خلص
رميت حالي بحضنها وانا عم ابكي وخايفه كتير .. مسحت على شعري و دمعتها على خدها وقالتلي طولي بالك الله يسامحو الله يسامحو
ضليت ابكي بحضنها لنمت .. وتاني نهار الصبح بس حيت وبلشت اتزكر كل شي صار امبارح نغزني البي ..
كان البيت هادي وما في اي صوت والساعه 10 الصبح … بس البيت كان دافي .. معناها مشغلين دفاية الحطب
مشيت على روس اصابعي وانا خايفه ووقفت ورا باب الصالة الي مسكر وحطيت ادني عالباب
حمزة : طيب .. مو مشان شي بس لان ابي وصاني فيها وهو عم يموت .. ومشان ما تغضبي علي
ام حمزة : لك تؤبر الببببببببببي .. تؤبر البي يا عيوني انته يا حنووون
حمزة : وايمت جاين الجماعة ؟
ام حمزة : اه ؟ هالأسبوع ابني هالأسبوع
حمزة : ايه فهمت هاد الأسبوع بس اي يوم ؟
ام حمزة : اي يوم ؟
حمزة : لك ايه ما حددولك اليوم والساعه ؟
ام حمزة : امبلى .. امبلى حددو بس انا نسيت .. عم انسى كتير صايره والله يا ابني
حمزة : طيب اتصلي واتاكدي اي يوم
ام حمزة : ماشي حبيبي متل ما بدك .. الله يرضى عليك .. قايمة اعملك كاسة شاي
ركضت على غرفتي وسكرت الباب شوي شوي وتخبيت تحت الغطا … وفاتت امي عالهدا عالغرفة وقعدت جنبي
ام حمزة : ندى .. ندى قومي بسرعه
ندى : ايه امي؟
ام حمزة : خلي الشب يجي الخميس الساعه 7
ندى : طيب حاضر
ام حمزة : ارجعي نامي وما تطلعي من غرفتك اليوم رح قلو انك مريضه .. ريحي حالك
ندى : حاضر
كانت بدها تطلع بعدين مسكت ايدها وبستها وانا عم ابكي
ندى : الله يخليلي ياكي وما يحرمني منك
ام حمزة : يا عمري انتي ربي يسعدك ويبعتلك ابن الحلال
طلعت امي وانا بلشت فكر انو لازم احكي مع عماد وخبرو بالموعد بس كيف بدي اتصل فيه !!
نطرت حمزة بس طلع بالليل يسهر عند رفقاتو وقلت لامي انو لازم احكي مع عماد لخبرو عن الموعد
وخلتني احكي من الأرضي
اتصلت على رقمو كتير بس ما كان يرد وامي واقفه جنبي وخايفه وعم تروح وتجي وتطلع من الشباك ازا رجع اخي
ام حمزة : شو صار معك ؟
ندى : ما عم يرد
قربت امي لعندي واتطلعت بعيوني وحطت ايدها على تمها : ليكون ما بدو يخطبك ؟
ندى : لا لا عماد بحبني وبدو يخطبني انا متاكده بس ما بعرف ليش ما عم يرد
ضليت اتصل وما كان يجاوب ابداً .. اتصلت على الهاتف الأرضي تبع بيتهن كمان ما رد
ندى : امي ما عم يرد
ام حمزة : شو يعني ؟
ندى : لازم نرجع نجرب بكرا .. اكيد صاير معو شي
ام حمزة : ولي وبلكي اخوكي ما طلع بكرا ؟ الجماعة لازم يجو بعد بكرا
ندى : ازا ما طلع انتي بتشغليه وانا برجع حاول اتصل
ام حمزة : ياربي انا شو عامله بحياتي ليش هالعزاب يارب
ندى : يا امي طولي بالك الله يوفئك يا حبيبتي
ام حمزة : طيب .. طيب ..
رجعت على غرفتي وحضنت وسادتي وانا عم حاول ما خلي دمعتي تنزل و بعد الخوف عني
حسيت حالي وحيده .. وكل شي حوالي اسود .. ضايعه .. خايفه… وبردانه ..
تاني نهار كان حمزة عم يتحمم ورجعت حاول اتصل بعماد .. وبعد محاولة تلات مرات رد
ندى : الو الو عماااد ؟؟
ام حمزة : رد ؟؟؟؟؟
ندى : ايه ايه امي رد رد
عماد : اهلين ندى
ندى : عماد ما معي وقت كتير .. بكرا الخميس الساعه 7 تعال انت واهلك واطلبوني لان ازا ما جيت رح تصير مصيبه
دير بالك على حالك .. وتعال بالكنزة الخضرا الصوف .. بحبك كتير
عماد : نـــدى
ندى : ييي طلع اخي باي باي باي
طلع حمزة وهو عم ينشف شعراتو وانا ركضت عالمطبخ وامي صارت تحاكيه لتضيع السيرة
حمزة : مع مين كانت تحكي ندى عالهاتف ؟
ام حمزة : مو ندى .. كانت عم تتصلي على مرت عمك بدي احكي معا .. بس ما ردت علينا
حمزة : ايوه .. خير ان شاء الله
اجا تاني نهار وقمت من الصبح انا وامي عزلنا البيت كلو ورتبناه … ونزلت امي اشترتلي تياب جديدة لاستقبل فيهن اهل عماد
وحمزة كان يروح و يجي ويتأفأف وانا حاول اتجنبو مشان ما يعصب ويفركش كل شي ..
كان كل شي جاهز .. وصارت الساعه 7 .. وما اجا حدا
حمزة : شو وين الجماعة ؟
ام حمزة : ليش صارت سبعه ؟
حمزة : ايه
ام حمزة: هلأ بيوصلو طول بالك ..
كنت انا بالمطبخ وعم اتطلع بالساعه والبي عم يرجف … فرحانة كتير .. وخايفه كتير .. وما عم سدء انو اخيراً عماد رح يفوت على بيتنا
ورح يقعد بيناتنا .. ورح ضيفو فنجان القهوة بأيدي
صارت الساعه 8 .. اجت امي لعندي وحكت بصوت واطي : ويييين الجماعة ؟
ندى : والله ما بعرف يا امي هلأ بيوصلو طولي بالك
ام حمزة : متاكده انهن رح يجو ؟
ندى : ايه اكيد اكيد
ام حمزة : طيب انا رح اتصرف
رجعت لعند اخي وقالتلو انها كانت مخربطة والجماعة قالولها رح يجو عالتسعه
حمزة : اوف في حدا بيجي بيخطب عالتسعه ؟ الدني شتويه والناس بتنام بكير شو قلة هالزوق
ام حمزة : معك حق يا ابني بس يلا بسيطة ..
صــــــــارت 9 .. و 10 .. و11 … و12 و 1 و 2 و 3 و 4 و 5
وطلع الضو .. و انا قاعده بأرض الغرفة .. منكمشة على حالي … ضامة رجلي لصدري ولافة حالي بأيدي .. ومخبية وشي
فتح باب الغرفة وفات ضو لعندي
ام حمزة : بكفي بكي يا بنتي … بكفي بكي
ندى : ليش ما اجا ؟ .. ليش هيك عمل
ام حمزة : يا عمري انتي ..الله يحن عليكي قومي توضي وصلي ركعتين وطولي بالك
ندى : حاسة روحي انسلبت مني .. تعبانه كتير
ام حمزة : قومي معي بنتي قومي
قومتني امي … وقفتني عالمغسلة و صارت تمسحلي وشي وتقول اشهد ان لا اله الا الله .. لا حول ولا قوة الا بالله
ندى : خلص اتركيني ماما .. انا رح اتوضى
توضيت ولبست توب الصلاة و صليت .. وبس سجدت ما قدرت ارفع راسي .. هرو كل دموعي وصارو يكتو كت
تاني نهار قال حمزة لأمي انو ما عاد رح يستقبلهن للجماعة … وانو رفيقو واهلو جاين بهل كم يوم ..
ام حمزة : متل ما بدك حبيبي .. الي بريحك
كنت واقفه ورا الباب عم اسمع وحاطه ايدي على تمي وعم ارجف …
بعد يومين … اجا محمود … و اهلو …
#يتبع
#ذكريات_بللها_المطر_بقلم_م
الجزء السادس
فتت لعندهن كأني فايته على عزا .. كأني فايته لسلم رقبتي للدبـــح ..
رفعت عيوني واتطلعت بمحمود .. و وقت شفتو صرت اضحك متل الجدبة ..
قرصتني امي واخي حمزة فار دمو
امي بصوت واطي : لك شبك جنيتي ؟
كتمت ضحكتي وقعدت .. ورجعتلي حيوتي وفرحتي ..
محمود !! مستحيل يقبل فيني … شب كتير حلو
عيونو لونهن ازرق سماوي .. و وشو متل البدر .. دقنو محدده بطريقه جذابة كتير .. وعندو نظرة واثقة و مميزة
حتى قعدتو كانت رجولية و راكزة
بس شفت هيك شب قاعد قدامي قلت خلص الموضوع فرط هلأ بس يشوفني هو رح يروح وما يرجع
قعدنا وصارو يحكو بأمور عاديه .. كيف صحتكن شو اخباركن كيف الأهل وكيف الحياة
وشوية اسئلة عني .. وانا كنت مرتاحه كتير وقاعده ساكته وما عم احكي
بعد شوي قامو كلهن وتركوني انا و محمود قال لنحكي سوا ..
محمود : كيفك انسة ندى ؟
ندى بارتايح ورواق : والله تمام منيحة انت كيفك شو اخبارك ؟ كيف شغلك وصحتك ؟
محمود : ههه تمام
ندى : ايه الحمدلله يا رب .. والله تشرفنا بزيارتكون .. كتير اخي حكي عنك
محمود : بالله ؟ شو حكى عني ؟
ندى : هيك انك شخص محترم واخلاقك عالية
محمود : بس انا ما حكالي شي عنك .. احكيلي
ندى : انا ؟ والله انا تركت مدرستي من الصف التاسع لان رسبت مرتين وما كنت حب المدرسة
وبعدا اشتغلت بمحل اكسسوارات صغير بس كنت بيع كتير وعندي زباين .. وهلأ بالبيت
محمود : هيك اختصار كتير
ندى : اه والله ؟ ليش في شي حابب تعرفو بالتحديد ؟
كفينا حديثنا شي نص ساعه ورجع حمزة قعد معنا .. وبعد ربع ساعه راحو الجماعه .. فتت وجليت جلي الضيافه وركضت على غرفتي ونطيت عالتخت
وانا متل الجدبه … غطيت وشي بايدي وصرت اضحك على حالي اديه كنت خايفه و مرعوبة
فاتت امي بعد شوي ..
ام حمزة : يامو زعلانه ؟
ندى : لا امي .. يا الله جد ربك بيفرجها هيك بلمح البصر .. الحمدلله
ام حمزة : يعني عجبك الشب ؟
ندى : لا
ام حمزة : لكن ؟
ندى : لا هو عجبني ولا انا عجبتو ههههههه
ام حمزة : مين ئلك ؟
ندى : لك انا بئلك .. ما ضل الا شب متل محمود يتطلع فيني الي .. اجدب ابنك ما ؟
وجايبو و واثق من حالو
ام حمزة : لك ليش بتحكي هيك لك بنتي ؟
ندى : شو ليش بحكي هيك يامو ؟ ما شفتيه لمحمود ؟ بعدين مبين وضعهن المادي فوق الريح واكيد بس شافو بيتنا وبساطتنا ما رح يرجعو
ام حمزة : بس يا امي الجماعة بدهن ياكي
ندى : هئة بكرا بيفركشو
ام حمزة : ما عم تفهمي علي ؟ .. الشب قال لاخوكي انو حابب يتجوز بسرعه ورح يقدم على اجازة بالجيش
صفنت شوي وما استوعبت
ندى : ايمت قلو ؟ قبل ما يجو لعندنا مو ؟
ام حمزة : لا .. وهو طالع على الباب
ندى : شو يعني ؟
ام حمزة : يعني عجبتيه للشب
ندى : شو يعني عجبتو ؟ كيف ؟ و حمزة شو قلو ؟
ام حمزة : قلو بيردلو خبر بهل كم يوم ليشاورك … بس اكيد ما بدو يشاورك هو موافق سلف
ندى : امي !!!!!
ام حمزة : لك شبك ؟ شبك ليش هيك قلب لون وشك ؟ .. ندى ؟
كانت امي عم تحاكيني و انا عيوني ما عاد رمشو ولا تحركو .. حسيت بوجع بقلبي وجع قوي .. كأنو كل جسمي انشل
شريط سريع من ذكرياتي مع عماد مرق قدام عيوني
ما كنت سامعه صوت امي وهي عم تحكي معي .. ولا حاسه فيها وهي عم تشدني من تيابي لرد عليها ..
ضليت جمدانه وما عم اعطي اي رد فــعــــل …
لبعد ربع ساعه
ام حمزة : ياااا حمزززة تعا شوووووووووف اختك .. يا حمزة
التفتت عليها و انا عم رتب كل شي صار براسي لأفهم انو خلص رح انزف لرجال غير عماد !!
ندى : امي .. انتي ما رح تخليه يجوزني غصب عني مو ؟
ام حمزة : يا عمري … يا روحي انتي يا البي شو طالع بايدي .. مانك شايفه اخوكي كيف عم يعاملني ويعاملك ؟
ايمت كان الي كلمة او رأي يا امي
ندى : بس انا ما فيني
شهقت امي شهقة قوية .. وركضت عالباب سكرتو ورجعت مسكتني من كتافي .. كانو عيونا حمر كتيررر و حدقة عينا عم تتوسع
مسكتني وصات تقلي : شو قصدك مافيكي ؟ شو قصدك ؟ اوعي تكوني غلطانة شي غلطة
ندى : امي شو عم تحكي انتي ؟
ام حمزة : لكن شو قصدك ؟؟
ندى : انا ما فيني لانو ما فيني .. انتي مو فاهمة شي … انا و عماد منموت بدون بعض .. نحنا بدنا نعيش عمرنا سوا
ماما بتعرفي شو ؟ انا وهو اتفقنا ما نزعل بعض ابداً .. وندير بالنا على بعض
ما نخون .. وما نكزب … وما نجرح بعض ابداً
ام حمزة : بلا هالعلاك الفاضي .. انا وابوكي تجوزنا وما كنا نحب بعض .. ومع العشرة اجت المحبة
ندى : هلأ اجت المحبة بينك وبين ابي الله يرحمو ؟ من ايمت
دبلو عيونها وتركتني وطلعت من الغرفة .. بكضت وراها وما لقيت حمزة بالبيت .. تأكدت انو مو موجود
ركضت عالأرضي واتصلت على عماد وانا عم ابكي
كان عم يرن .. و يرن .. ويرن … وما في حدا يرد …
ام حمزة : على مين عم تتصلي ؟
ارتعبت بس سمعت صوتها .. و وقعت السماعة من ايدي
ندى : بدي قلو يجي
ام حمزة : لو بدو يجي كان اجى
ندى : يمكن ما فهم علي مو ؟ يمكن ما لقى البيت .. او .. او يمكن ضيعو الطريق
يمكن .. يمكن احترقت الدنيا .. يمكن بلعتو الأرض
يمكن … ما بعرف بس اكيد صار شي منعو يجي
ام حمزة : ما صار شي ..
ندى : لا .. اكيد صار شي اكيد
ام حمزة : يا بنتي بكفي … لو بدو يجي كان اجى … خلص بكفي
ندى : شو يعني ؟
ام حمزة : يعني ارضي بنصيبك … و وكلي امرك لاللك
ندى : و عماد ؟
ام حمززة : انسيه
#ذكريات_بللها_المطر_بقلم_م
الجزء السابع ..
مرقو تلات ايام … و تحدد يوم عرسي ..
لك ايه ايه العرس .. عرسي انا ومحمود .. وكل يوم اصحى من نومي مرعوبة واركض عالتليفون اتصل على عماد وما يرد علي
بعدين حسيت انو عنجد ما بدو ياني … كان فيه يرد ويعمل اي شي يحكي اي شي وينو .. وينو وشو الي صار
يئست .. لبست فستاني .. ورفعولي شعراتي وزينوهن بتاج و ورد
حطولي مكياج عروس !! وسلسال على صدري ..
ام حمزة : البسي الكندرة
ندى : شو قلتي امي ؟
كنت كل الوقت كأني مو معهن ..
اجا محمود وطلعنا معو بالسيارة … و بس شافني قلي حكي كتير ما بتزكر شي منو
ما بعرف اكيد كان حكي حلو بس ما بتزكرو ..
كنت قاعده والكل عم يرقصو حوالي وانا عم دور على عماد .. هلأ رح يجي !! اكيد رح يجي
وامي قاعده جنبي وكل شوي تشربني مي
ندى : ما تخافي علي
ام حمزة : جوزك ابن حلال يا حبيبتي ديري بالك عليه
ندى : ماشي امي ..
تجوزت انا و محمود .. الحمدلله كان ما بيشبه اخي … حذفت رقم عماد من ذاكرتي … و جبلي محمود موبايل بس ما رضيت اخدو
قلي انو وقت يروح عالجيش بينشغل بالو علي وبشتقلي
بس كنت عرفانو انو اول ما امسك الموبايل رح اتصل على عماد .. كنت خاف من حالي على حالي
ضليت سنتين اخود حبوب منع حمل بدون علم محمود مع انو كان منيح معي بس كنت جن لما يجي اجازة والبي يتقطع
وقتا اخي حمزة اتزوج بنت من غير محافظة زارتنا مرتين وما حبيتا ابداً
وبعدين امي انتقلت لتعيش عندها لان حمزة اخدلها بيت بنفس محافظتها .. وقت كنت احكي مع امي ما كانت تقلي شي
بس كنت حسها مخنوقة وتعبانه … ليوم توفت نور عيوني والشي الوحيد الي مصبرني على كل وجعي
ماتت امي … وانحرق قلبي … بس دري محمود فوراً اجا لعندي واخدني لشوف امي قبل ما تندفن
وصلت وانا لسه مو مسدئة انو راحت الغاليه .. راحت ضي عيوني والحنونة
ضليت عندهن اسبوعين .. شفت فيهن حقارت مرت حمزة ولئمة .. دمعه وحدها ما نزللها .. كنت حسها شمتانه ومبسوطه
متت الف موته وانا شوفها ولا كأنو ميتلها حدا .. ما تمالكت اعصابي .. وقتا لحقتا عالمطبخ وصرت بهدلها وقلها شبك كأنك خلصتي من عدوتك !!
#ذكريات_بللها_المطر_بقلم_مال_الشام
الجزء الثامن #انتهت
وكلمة منا وكلمه مني علقنا وطلعت اصواتنا .. طلعو النسوان وندهو لمحمود وحمزة واجو لعندنا
واخي الرجال فوراً هجم علي ليضربني
بس مسكو محمود وبعدو عني
ما بعرف شو صرلي .. كان موجوع قلبي منو
ندى : تفووووووووووو عليك يااااا واطييييييييييييييي … تفو عليك يا حريمة يا قليل الأصل
محمود : ندى !!!
ندى : بلا ندى بلا بطيخ الله ينتقم منك يا قليل الأصل … تفيييييييييي عليك
وطلعت مرقت من جنبو لاول مره وانا مو خايفه منو
مسك شعري بايدو و سحبني لورا ضربت بالمجلى
محمود جن جنانو وحطو بالأرض ونزل ضرب فيه وقلو ما بتمد ايدك على مرتي يا واطي
وقتا وقعت وتوجعت كتير كتير … وعلى اثر الضربة اكتشفنا اني حامل …
جن محمود من الفرح وطار عئلو رجعني عالبيت مشان ما اتوتر وانا ببيت حنزة.. و وقتا جبرني اخود الموبايل لان قال بخاف علي احتاج شي ..
اشترالي ياه ورجع على الجيش
وصار الي خايفه منو .. اول ما مسكت الهاتف وطلع جوزي من البيت .. حطيت رقم عماد وايدي عم يرجفو .. واتصلت عليه
وفوراً جاوب .. خفت وفصلت الخط .. ورجع اتصل
رديت وما قدرت احكي شي
عماد : الو ؟ مين معي ؟ الووو
ندى : كيفك؟
عماد : هاد انتي ؟ ..شو زكرك فيني ؟
ندى : ليش مين قال انو نسيتك ؟
عماد : اوووووووووه … هههههههه
ندى : شبك ؟
عماد : مبروك .. نزلت على حارتكن وقدرت اعرف من واحد من الجيران انك تجوزتي
ندى : ايه وهلأ حامل
عماد : يا مبروك يا مبروك تتهني
ندى: انت شو اخبارك ؟
عماد : والله انا تمام .. بعد كم يوم مسافر
ندى : لوين ؟
عماد : على بلاد الله الواسعه
ندى : بالتوفيق
عماد : شكراً
ندى : يلا سلام
عماد : الله معك
كنت بدي سكر بس شي جواتي منعني
ندى : انت ليش تخليت عني ؟
عماد : نعم ؟
ندى : ما كنت تحبني ؟ كنت تتسلى فيني صح ؟
عماد : ما فهمت والله
ندى : من سنتين .. وقت اتصلت وقلتلك تعا بكرا اخطبني ..ليش ما جيت ؟
عماد : اه .. ايه لان الوالد اعطاكي عمرو
ندى : ابوك مات ؟
عماد : ايه
ندى : الله يرحمو ..
عماد : وامي كانت بالعناية المشددة ما كنت قادر رد .. وما توقعتك تكوني سريعه هيك وتتجوزي ههههه
ندى : _ _ _
عماد : بكل الأحوال … الله لا يسامحك
ندى : الله لا يسامحني ؟
عماد :ايه .. جنس حوا كلكن هيكـ .. بس معليش .. الله كريم
ندى : انا
عماد : انتي الله يوفقك بحياتك .. ما عاد بدي اسمع صوتك ولا اعرف شي عنك .. ولو بعيش وبموت الف مره لا رح ارجع حب
ولا بفكر اتجوز … لانك كرهتيني كل النسوان ..
غصيت بدموعي وما عرفت احكي
عماد : وبرجع بقلك … الله لا يسامحك
ندى : انا ما كنت ..
وقبل ما كفي كي سمعت انو الخط انفصل ..
ندى : عماد ؟؟ عماد ؟؟؟؟ لك عمااااااااااااااااد … يا الله عماااااااااااااااااااااااد … عماااااااااد ما تروووووووووووح
ما ترووووووووووووح يا عماااااااااااااد … لك انا بحبببببببببببببببببببك ما تروووووووووووووووح …. ما تروح ما تروووووووووووح
قعدت بالأرض وصرت اضرب حالي واصرخ وابكي وقلو مشان الله لا تروح … لا تروح …
اتصلت عليه كزا مره وما رد علي وبعدا سكرا موبايلو
واتصلت عالأرضي و فصلو وما عاد مسك الخط
حطيت راسي عالأرض .. ونزلو دموعي متل حبات المطر الي كنت احسدهن لأنهن تخبو بحضنو بهداك النهار
وغمضت عيوني وانا عم قلو ما تروح … والله بحبك .. ما تروح ..
فتحت عيوني وانا بالحديقه على صوت ابني عماد جايه من بعيد ومحمود ماسك ايدو
عماد : ماااااااااامااااااااا جبت عصير وشيبس
نقزت .. حسيت حالي ضايعه بالزمن وما بعرف مين انا ولا ويني
ضليت مصدومة لوصل محمود وعماد لعندي
محمود : كأنك بكيانة ؟
ندى : انا ؟
مد ايدو ليحطها على كتفي .. رجعت لورا وقلتلو لا لا انا منيحه
محمود : شبك ؟
ندى : ولا شي
ركض عماد وقعد بحضني … و اعطاني علبة العصير
عماد : يلا اشربي
ندى : حبيبي ما بدي اشرب انته
قعد محمود جنبي … وعماد بحضني .. وصرت اتطلع حوالي وانا ضايعه .. ما الي هوية ولا عنوان
ما الي بيت ولا معنى ولا اي احساس … معي شوية زكريات عم عيش عليهن .. عم عيش عليهن بكل شتوية .. وعم يموتو بس يجي الصيف
سألوني الناس عنك سألوني
قلت لن راجع أوعى تلوموني
غمضت عيوني خوفي للناس
يشوفوك مخبى بعيوني
و هب الهوا و بكاني الهوا
لأول مرة ما منكون سوا
طلّ من الليل قاللي ضويلي
لاقاني الليل و طفى قناديلي
و لا تسأليني كيف إستهدَيت
كان قلبي لعندك دليلي
و اللي إكتوى بالشوق إكتوى
لأول مرة ما منكون سوا
#تمت