وصفاتي للعيد ملكة تحضيرات العيد
وصفاتي للعيد ملكة تحضيرات العيد
المقادير
- مقادير كرات التمر اللذيذة للكبار والصغار
- كيلو تمر
- نصف كوب حليب
- ملعقة كبيرة زبدة
- 3 ملاعق كبيرة قشطة
- باكيتين او 3 بسكويت سادة مطحون حسب احتياج التمر
- رشة قرفة وهيل مطحونين
- ممكن إضافة اي نوع مكسرات مطحون بترغبوه
- مقادير كرات الشوكولا
- كيك شوكولا مفتت
- باكيت بسكويت سادة مطحون
- 3 ملاعق كبيرة سكر
- ملعقة كبيرة زبدة
- ملعقتين كبار قشطة
- ملعقتين كبار كاكاو باودر
- شوييية حليب ((وممكن إضافة اي شوكولا متوفرة عندكم لهالصلصة لتعزيز النكهة))
- بسكويت السابليه الرائع
- 100 غرام ( بما يعادل اصبع ) زبدة لينة بدرجة حرارة المطبخ
- نصف كوب سكر بودرة
- باكيت فانيليا
- بيضة
- رشة ملح
- رشة بيكنغ باودر
- طحين حسب الاحتياج ممكن حوالي كوب ونصف او اكتر شوي حسب الطحين..
- مقادير كب كيك الكنافة المحشية بالقشطة
- كنافة خيوط
- زبدة مدوبة
- قشطة عبارة عن ( كوب حليب مطبوخ مع 3 ملاعق كبار نشا وملعقتين سكر وباكيت فانيليا + كمية منيحة قشطة حليب مفروط منخلطهم مع بعض ومنحصل على قشطة رائعة وممكن تضيفو قشطة علب بتعطي نكهة اطيب) وهي القشطة معتمدة عندي دايماً تقريبا
- بلح الشام
- ملعقة كبيرة زبدة
- 3 ملاعق زيت نباتي
- نصف كوب حليب
- نصف كوب ماء
- ملعقتين كبار سكر
- باكيتين فانيليا
- كوب طحين مع رشة ملح
- بيضتين
- بالنسبة للقطر الثقيل منحط كوب سكر مع نصف كوب ماء + عصرة ليمون ومنتركو يغلي 10 دقايق وبصير جاهز
الخطوات
بسم الله الرحمن الرحيم
اول شي كل عام وانتو وحبايبكم والأمة الإسلامية كلها بألف خير وفرج يا احلى عيلة
تاني شي حبيت غير عن المعمول والكعك لانو البنات كفو ووفو ماشاء الله بوصفات رائعة متلهم فغيرت عن النمط التقليدي لضيافة العيد وبتمنى تجربو وصفاتي وتعجبكم
لكرات التمر منحط التمر الخالي من البذر عالغاز مع الحليب والزبدة ومنعملو تقليبتين تلاتة ليطرى ومنحطو بالخلاط ومنضيف عليه القشطة والهيل والقرفة ومنطحنو ليصير خليط ناعم منطالعو من الخلاط ومنضيف عليه البسكويت واي نوع مكسرات مطحون بترغبوه ومنخلط ليتشكل عنا شبه عجينة منقدر نشكلها
منكورهم ومنغطهم بأي شي حابينو (متل السمسم والكاكاو وبسكويت مطحون وجوز هند او مكسرات ناعمة
لكرات الشوكولا منفتت البسكويت والكيك ومندوب باقي المكونات عالغاز لتتجانس مع بعضها ومنخلطهم كلهم مع بعض ومنحطن شوي بالبراد ومنشكلهم
لبسكويت السابليه
منخفق الزبدة اللينة لتصير كريمية ومنضيف الها السكر البودرة والفانيليا ومنخفق ليندمجو تماما ويصير خليط فاتح منضيف البيضة ومنخفقها منيح وبعدا المكونات الجافة بدون مانعجن بس منلم العجينة لم ومنغلفها ومنحطها بالبراد نص ساعة لتتماسك تمام وبتصير جاهزة للتقطيع والشوي على درجة حرارة 160
الكنافة واضحة تماما بالصور واي حدا عندو سؤال انا جاهزة
منسقي الكنافة بعد مانرتبها بالشكل اللي حابينو بالزبدة ومنحشيها ومنشويها وبس تطلع من الفرن فورا منسقيها بالقطر البارد وهية سخنة
لبلح الشام
منحط الزبدة والحليب والمي ورشة الملح عالغاز وبس يسخنو منضيف الطحين ومنحرك بسرعة لتتجمع العجينة على بعضها ومايبقى شي عالاطراف منشيلها عن النار ومنستنى لتروح سخونتها شوي منضيف البيض بيضة ورا التانية ومنخلطها منيح لتختفي البيضة ومنعبيها بكيس ومنحطها بزيت باااارد وبس نخلص تشكيل منشغل النار عالواطي لحتى تطلع عنا الحبات لفوق وتنتفخ شوي منقوي النار ومنقلب شوي شوي لتتحمر منشيلها فورا على قطر بارد وتقيل..
وهنا والف عافية حبايب قلبي بتمنى وصفاتي تكون عجبتكم وتحطوها بالمفضلة وتجربوها وبشوفكم بالوصفة الجاية ان شاء الله
