ورق العنب (الدوالي) على طريقتي
ورق العنب (الدوالي) على طريقتي
المقادير
- ورق عنب حوالي نصف كيلو
- ثلث كيلو لحمة مفرومة ناعم (ممكن اكتر حسب الرغبة)
- 4 كوب كبير رز أو حسب كيف بتحبو تكون الحشوة كتيرة او قليلة
- ملعقتين كبار زبدة او سمنة مع ملعقتين كبار زيت
- ملح وفلفل حسب الرغبة راس توم مقشر
- كاسة صغيرة زيت زيتون
- عصير ليمون حسب الرغبة
- لحمة أو جاج بالطنجرة غير تبع الحشوة (اختياري وممكن نستغني عنو)
الخطوات
بسم الله الرحمن الرحيم
يسعدلي أوقاتكم يا أحلى بنات اشتقتلكم كتير وبعتذر عن التأخير بتنزيل الوصفات وبتمنى تكونو اشتقتلولي كمان ههههه ويارب تكون كل أموركم بألف خير وجبتلكم دوالي على طريقتي بدون اضافات زايدة او تعقيد لحتى نحتفظ بطعمتها الأصلية
يارب تجربوها وتعجبكم حبايبي
أول شي منجهز الحشوة بعد مانكون نقعنا الرز لساعتين او اكتر مو مشكلة.. منصفي الرز ومنضيف اللحمة والزيت مع الزبدة أو السمنة والملح والفلفل ومنخلطهم لتتوزع اللحمة منيح ومنلف ورق العنب.. منكون سالقين اللحمة نص سلقة مع بهارات صحيحة ومنصفها مع اليبرق بالطنجرة ومنضيف عليهم راس توم مقشر والملح وكاسة صغيرة زيت زيتون وماء غمرهم (من ماء السلق مع ماء عادي) ومنحط فوقهم تتقيلة لحتى ما يفوش اليبرق ويفتح وقت تغلي المي ((بالنسبة الي بحط عليهم صحن حجمو مناسب وفوق الصحن زبدية مي)) ومنشغل النار عالقوي بالبداية لحتى تغلي منيح منخليها نار متوسطة ومنضل نستفقدها ونضيف مي لحتى ما تنشف لحوالي ثلاث ارباع الساعة منحط عصير الليمون ومنركز ملح المرقة ومنتركها تغلي كمان ربع ساعة او أكتر شوي وبعدا دوقو حبة شوفوها اذا مستوية تمام ((حبة ها مو تتغدو انتو وعم تدوقو ههههه)) اي وبس منطفي النار ومنصفيها فورا من المرقة لحتى ما تفتح حبات اليبرق معنا وصارت جاهزة للهجوم
وصحة وألف هنا
