منسف فريكه ملكة الارز
منسف فريكه ملكة الارز
المقادير
- دجاج
- رز صنوايت
- فريكه خشنه
- رقاق بيتي او شراك محمص بالفرن بيعطيكي نفس الطعم تقريبا
- لوز مقلي للزينه وبقدوس
الخطوات
هاد المنسف تعلمتو من حماتي بتحكي خفيف كتيييير بالصيف بدل منسف اللحمه واللبن وكتييير زاكي وخفيف
اول شي بتسلقي الجاج بالطريقه المتعوده عليها بتحطي بصل وورق غار وملح وفلفل اسود وبهار رشه خفيفه لانو مابدنا المرقه يطلع لونها غامق لانو راح نحط منها جنب المنسف وبس تستوي الجاج بنفلفل الفريكه بمرقه الجاج بنقلي بصله بشويه زيت وبنحط عليها الفريكه الخشنه المنقيه ومنقوعه بمي دافيه نص ساعه وبنغمرها بمرقه الجاج وبنتركها على نار هاديه لتستوي
بعدين بنحضر الرز وبنفلفلو بالطريقه العاديه بس انا بحط شويه من مرقه الجاج عليه بيعطيه طعم زاكي وبس يستوي بنطفي عليه وبنبلش نحضر فيه اول طبقه بنحط الرقاق او الشراك المحمص او عادي بدون تحميص الي بتحبيه بتشربيه شوي مرقه جاج وبتحطي الطبقه التانيه الفريكه بتوزعيها عل الوجه وبتحطي الجاج المحمر اخر شي وبتزينيه باللوز المقلي والبقدونس
اعتمدوها بعزايمكم راح تحبوها كتيييير سهله وخفيفه وزاكيه
