شيشبرك
شيشبرك
المقادير
- ١⁄٢ كيلوغرام لحم مفروم
- ٢ كوب طحين، منخول
- ٢بصل صغير، مفروم ناعم
- رشة هيل مطحون
- ١ ملعقة كبيرة زيت نباتي
- بهار حسب الرغبة
- ملح حسب الذوق
- ١ كيلوغرام لبن نعاج ان توفر وان لم يتوفر لبن بقري + ملعقة نشا كبيرة
- ٣ فص ثوم مهروس
- ٢ ملعقة كبيرة كزبرة طازجة، مفرومة
- ١⁄٢ ملعقة كبيرة زيت نباتي
- ١ ملعقة كبيرة نشا، في 2/1 كوب ماء
الخطوات
اليوم اجتني فكرة حلوة وروعة
عندي قالب ثلج خاناته على شكل سداسي وحلو كتير ،خطرتلي فكرة اعمل الشيشبرك فيه وفعلا قمت وتنشطت اسم الله حولي وحواليه
قمت قلبت راسين بصل مفرومين وضفتلهم نص كيلو لحمة مفرومة وقلبتهم وملحتهم وبهرتهم وتركتهم يبردوا .
وقمت عجنت كاستين طحين مع معلقتين زيت ذرة ورشة ملح وشوية مي وتركتهم يرتاحو .
جبت قالب الثلج غسلته ونشفته ودهنته زبدة ورشة طحين متل قالب الكيك تماما،
قطعت قطعة من العجين ورقيتها ع حجم القالب واكبر شوية ،فردت العجينة فوق القالب وعبيت خانات القالب باللحمة المقلبة مع بصل ،
رقيت كمان عجينة وفردتها فوق اللحمات وبالشوبك رقيتهم منيح لحتى تحددت خانات القالب ،قطعت بالسكين كل الزوايد وقلبت القالب وفصلت كل حبة لوحدها بالسكين كما هو موضح بالصور
ولميت الاطراف باصابعي لحتى طلعت كل حبة شكلها دائري ،صفيتهم بصينية مدهونة زبدة وشويتهم بالفرن ..
جبت علبتين لبن رايب ويفضل لبن نعاج ولو ما فيه استعملي اي لبن رايب يكون طعمه حادق شوية .وبتخفقيهم بالخلاط مع معلقة نشا وبتطبخيهم ع نار هادية ولما يصير اللبن يغلي متل المي مش فوران بتضيفي حبات الشيشبرك المشوية
وبتدقي كم فص توم وبتقدحيهم بشوية زيت وبطشيهم فوق الشيشبرك وبتزينيه عند التقديم بالبقدونس او الكزبرة او نعنع ناشف حسب الرغبة
وصحة والف هنا
وعلى فكرة الحبات صغيرة وحلوة لكن بالصورة بتظهر اكبر من الواقع
اعطونا رايكم وتعليقاتكم سواء ايجابية او سلبية ،
#افكار ام نضال لعمل الشيشبرك
