حلا العروس التركية من كتاب زاكي

المقادير

• للطبقة الأولى: 3 باكيت بسكويت سادة مطحون + 100 غرام (اصبع زبدة) او حسب ماتحتاج المهم يصير البسكوت اذا ضغطناه بايدنا يلم شوي عبعضو
• للطبقة الثانية: 3 كوب حليب سائل + نصف كوب سكر او اكثر حسب الرغبة + 3 ملعقة كبيرة نشا + ملعقتين كبار طحين + باكيت فانيليا + ظرف كريمة بودرة + (ممكن 3 حبات مستكة مطحونين بملعقة سكر.. مذكورين بالكتاب بس بصراحة انا ماضفتن هههههه )
• للتزيين كمية وفيرة من جوز الهند واي شي بترغبو تضيفوه♡

الخطوات

بسم الله الرحمن الرحيم

اشتقتلكم ياحلوين وبدي قلكم انو الوصفة رائعة بس في تعليق بسيط بخصوص الكريمة رح قلكم عليه أثناء الوصفة♡

للطبقة الأولى منسيح الزبدة ومنوزعها عالبسكويت ليتبلل بالزبدة متل حبات الرمل ومنرصو بالصينية أو جاط البايركس ومنضغط عليه ليصير طبقة متساوية..

منجهز الطبقة التانية

منحط الحليب والسكر والنشا والطحين والفانيليا (والمستكة اذا بدكن) بطنجرة ومنحرك كل شي سوا ليمتزجو تمام ومنشغل تحتهم النار مع التقليب المستمر ليبلشو يغلو منطفي تحتهم ومنقيمهم عن النار

هلا مذكور بالوصفة انو نضيف عالخليط ظرف الكريمة ونخفق لمدة خمس دقايق وانا جربت هالشي بس الخليط صار طري شوي متل مو شايفين بالصورة

ممكن اذا حبيتو تخفقو الكريمة لحالها وتحطو خليط الحليب فوق طبقة البسكويت و فوق خليط الحليب تحطو طبقة الكريمة

او خلطو كل شي مع بعض وضيفوهم على طبقة البسكويت وخلوها بالبراد لتتماسك تماااااما

كم ساعة مثلا او ليلة كاملة 🙂

بس تبرد وتصير جاهزة للتقديم ضيفو عليها كمية منيحة من جوز الهند واي شي بتحبوه وصحة والف هنا حبيباتي

بحبكم من كل قلبي وتذكروني بدعوة حلوة♡