أوزي عالطريقة السورية
أوزي عالطريقة السورية
المقادير
- لحمة مفرومة ناعم
- بزاليا خضرا
- رز قصير الحبة مغسول منيح ومنقوع حوالي نص ساعة
- خليط من الزبدة او السمنة والزيت
- ملعقة خل تفاح ابيض مخفف
- ملح وفلفل أسود
- عجينة كلاج او باف بيستري انا ضفت التنتين بالصور لتشوفوهم
- قليل من الزبدة او السمنة السايحة
- مكسرات (اختياري)
الخطوات
☆بسم الله الرحمن الرحيم☆
هاد الأوزي عالطريقة السورية بتمنى من كل قلبي تجربوها لأنها سهلة ولذيذة ♡_♡
أول شي يا حبوبات بالنسبة للطبخة ( الرز ببزاليا )
منحمس اللحمة بخليط الزيت والزبدة او السمنة بعد شوي منضيف البازيلا وحسب قديه بدها لتستوي منقلبهم مع بعض مع رشة ملح وفلفل أسود وبس يستوو منقيم قسم منهم حسب الكمية على جنب
منضيف المي حسب كمية الرز لحتى تغلي منزبط ملحها ومنحط الخل ومنضيف الرز ومنتركو يغلي حوالي 8 دقايق على نار عالية بعدين منوطي النار عالاخير والرز مغطى طبعا لحتى يستوي ويتهدى تمام
هلا الخطوة التانية هو عجينة الكلاج او الباف بيستري
الباف بيستري منمدها شوي حسب حجم الصرة اللي رح نعملها والطريقة موضحة بالصور
والكلاج منقسمها كمان حسب حجم الصرة ومنرتبهم ومنحط بقلبهم اول شي اذا حبينا مكسرات وبعدها شوي من خليط اللحمة والبازيلا وبعدين الرز ببازيلا ومنسكرها منيح ومندهنها كلها من برا ومن تحت بالزبدة او السمنة ومندخلهم شوي عالفرن من فوق وتحت لتتشقر العجينة
وصحة والف هنا يا أميرات♡
