كتف خاروف مشوي بالفرن مع ارز بالزنجبيل والتوم ملكة الأرز

المقادير

• كتف خارف طازه
• مجموعه بهارات بحط منها رشه صغيره من كل نوع (قرفه زنجبيل فلفل اسود صوص الباربكيو المدخن توم بهارات لحمه خل وملح) بخلطهم كلهم مع بعض وبدهن فبها اللحمه وبتركها لتاني يوم
• ارز بسمتي ٤ كاسات كبيره
• زنجبيل طازه ٣ معالق كبيره
• توم تقريبا راس واحد
• بهارات مهران او اي نوع انتي بتحبيه للرز
• ملح

الخطوات

بعد ما تنبل اللحمه لتاني يوم بنلفها بالقصدير وبنحطها ساعتين بالفرن لتستوي بهاي الفتره بنحضر الرز هاد الرز كتيييييير زاكي وسهل وسريع وطمعو ونكهتو مميزه وخاصه بالعزايم بننقع الرز البسمتي بمي دافيه وبنحطو على جنب من ١٠ دقايق لنص ساع مايزيد عن هيك بطنجره بنحط الزيت وبنقلي اللوز او شي وبنشيلو بعدين بنكون هارسين الزنجبيل والتوم مطحنون ناعم انا بحطهم مع بعض بمحضره الطعام وبخلطهم ليصيرو مهروسين وبحطهم عل الزيت بالطنجره وبقليهم يادوب ٥ دقايق على نار هاديه وبحط عليهم الرز ازا كان عندك مرقه لحمه او جاج حطيها عليهم وازا ما كان عندك حطي مكعبين ماجي والبهار الي بتحبيه معلقتين كبار ومعلقه صغيره هيل مطحون وتركيها على نار هاديه لتستوي وبتحطي اللحمه فوقها وبتزينها باللوز والبقدونس وصحتين وعافيه انا عملت جمبها صوص الدقوس طلع زاكي بتجبي حبتين بندور مستوين بتقشريهم وبتحطي عليهم راس بصل صغير كتير وحبه فليلفه ورشه فلفل اسود وشطه سائله ونص حبه عصير ليمون وملعقه رب البندوره وبتخلطيهم بالخلاط وبتقدميها جنب اي نوع رز

وهاي صوره من عزومتي عملت جنبها كرات البطاطا بالكريمه ويلانجي