الكبة الرمثاوية
الكبة الرمثاوية
المقادير
- كيلو رفيعة او جريش قمح ناعم
- كاسة برغل ناعم اختياري
- فنجان زيت زيتون
- ملح
- كركم
- كمون
- ماء دافي
- للحشوة:
- لحمة مفرومة ناعمة
- بصل مفروم ناعم
- زيت زيتون
- باكيت ماجي
- ملح
- فلفل اسود
- كمون
- هيل ناعم
- كركم
- ملعقة كاري اختياري
- زعتر ناشف او مردقوش
- صنوبر محمص كمان اختياري
الخطوات
بسم الله نبدأ…
اول شي بنقوم بخلط المكونات مع بعضها بدون الماء
بنرشها بالمي الدافية ونخلط مثل لما بننقع البرغل بس مانكثر مي ونتركها مغطية اقل شي نص ساعة عشان يتشرب المي كلها نفقدها بعد ربع ساعة اذا كانت ناشفة كثير بنرد نزيد مي
بس نشوف انها اكتفت بالنقع بنبلش دعك فيها واذا احتاجت مي خلال الدعك او العجن بنرش شوي شوي او نبلل ايدينا
ماعندي صور والا كان حطيت صور كيف بكون شكلها قبل وبعد العجن
بس تنعجن وتتامسك شوي بنختبرها بنعمل منها كبة اذا تشققت بتكون لسا بدها عجن واذا ماتشققت بتكون جاهزة
بتركها ترتاح اقل شي ربع ساعة وبعدها بنبلش نحشيها باللحمة ونشكلها
الحشوة
بنقلي البصلة بزيت الزيتون شوي بدون تحمير
وبنحط اللحمة وبنقلبها بالبهارات والماجي والملح بس تستوي بنتركها ع نار هادية عشان تتنشف من السوائل مزبوط اذا كانت اللحمة مافيها دهنة بس تستوي بضيفلها زيت زيتون مقدار نص فنجان صغير وبس تبرد بدخلها الثلاجة عشان ماتغلبني بالشغل
طريقة طبخ الكبة
بحط مي بطنجرة مناسبة للكمية اللي عملناها تقريباً اقل من نصها
بضيف للمي زيت زيتون وملح وماجي وكركم وكمون وبس تغلي بوطي للنار تحتها وببلش اسقط الكبات وحدة وحدة وبس احطهم كلهم بالمي بحرك الطنجرة عشان مايلزقو ببعض
او بملعقة خشبية بحرك عالهادي شوي بس وبغطي الطنجرة وبتركها تغلي من 5 الى 10 دقايق بس حسب كمية الكبة وحجم الطنجرة وخلال الغلي بطلع كبة وبختبر استواءها بملعقة وبس اتأكد انها استوت بطفي النار وبطلع الكبات وحدة وحدة بمصفاية القلي (الكفكيرة)
وبتتاكل ساخنة وصحتين وعافية
