على مر الزمن بقلم هلا غرابلي

اتمنى أن لا تكون هناك تعليقات جارحة لأنها قصة وفقط

الجزء الاول

يارا  : دوختني نزلني نزلنيييي

غيث: بحبك بحبك بحبك

يارا: هلا بيجو الاولاد

غيث: اي و يجو يشوفونا ، خلين يعرفو اديش ابون بحب امن

نزلني و لفني من خاصرتي

يارا: اي و امن بتحبك و بتموت فيك ،اخ يا غيث بعمرا السعادة ما بتكمل ،لو كان وضعنا احسن من هيك ،اديش منكون مبسوطين

غيث: بتعاود تفرج انشالله ،دوم الحال من المحال ،تعي لقلك كلمتين

يارا: خلص ولو ما اغلظك ،يلا روح رح تتاخر على شغلك

غيث:  رايح ،اليوم عنا تعتيل لعاشر طابق الله يكون معنا

يارا : الله يقويك يا رب و يرزقك من غامض علمو ، غيث الدنيا جاي على عيد ،شو بدنا نجبلن للاولاد؟

غيث: دخيل الله ما تذكريني  ،صرت بكره العيد من هالشغلة ،لشوف اليوم شو الله بيرزقنا و بعطيكي تشتريلن شو ما كان

يارا: طيب و انت ما بدك تشتري الك؟

غيث: لا الاولاد اهم ،و اذا زاد شي اشتري الك بلوزة مع انو متاكد ما رح يزيد …ليكي هاتي بوسة قبل ما روح

برمتلو ضهرو و صرت ادفشو على باب البيت

يارا: يلا بقى روح على شغلك ،كل يوم نفس القصة

غيث: طب انت ما بينمل منك ، لتكوني عاملتيلي سحر هههههه

يارا: هههههه اي عاملتلك …الله معك

غيث: سلام بحبك ام احمد نلتقي مساءا

انا و غيث متزوجين من 9 سنين ،تزوجنا عن حب و هالحب ما انطفى ابدا من اللحظة يلي حبيتو فيها لهلأ ،و توجنا هالحب بولدين احمد و رجب ،كان فيني قول اني اسعد مرة على وجه الارض لاني متزوجة رجال ما في متلو اتنين ،بس وضعنا المادي و فقرنا هو يلي منغص عيشتنا ،حبيتو لغيث و بعرف انو هو فقير كتير بس تزوجتو و انا متأملة انو  رح يتحسن وضعو بس وضعو بقي متل ما هو و كلمالو للاسوأ، تزوجنا بملحق على السطح غرفتين صغار كتير بقلب بعض ،و حتى المنتفعات كانت بقلب بعضا ، التواليت بقلب الحمام و المطبخ صغير كتير ما بيسع الا شخصين ،بس كل هالشي كنت متحملتو لانو بحبوغيث  ،بس كنت ازعل على اولادي لانو محرومين من شغلات كتير و خاصة وقت بيجتمعو مع اولاد عمن يلي وضعن احسن من وضعنا بكتير  مع انو اخوات زوجي ما بفكرو يساعدونا ماديا  ابدا و حتى غيث ما بيقبل اي حدا يشفق او يتصدق علينا،كان يجو عند بيت جدن و لابسين احلى لبس و معن العابن اما اولادي كانو ولاشي ،مع انو بقولو  الاولاد ما بيفهمو بهيك شي ، بس لما الكبار بفتحو عيونن على هيك قصص بصيرو الصغار مجرد دمى ناطقة لكلام الكبار ، كان الوقت يلي بجتمع فيه مع سلفاتي من اصعب الاوقات و ابطئها ،كان من الاوقات يلي بتكون تحدي الي لاضبط اعصابي و اكتم غيظي مع انو انا بعرف انو هن بغارو مني و من محبة زوجي الي و طريقة اظهار حبو الي  …

اجا العيد ،العيد يلي مفروض يكون فرحة للكبير و الصغير بس العيد بالنسبة الي هم ، من وين بدي اشتريلن و شو بدي اشتري لاولادي بهالغلا؟، و متل كل عيد رحت على الباله المستعمل و اشترتلن بنطلون و بلوزة لكل واحد مع انو ما منروح بالعيد غير عند بيت اهلي و حماي و على الحديقة العامة ، فقت الصبح و ما شفت غيث جنبي بالتخت ، و قبل ما قوم من التخت ، اجا و جايب معو فنجانين قهوة و معن وردة

غيث: كل عام و انت بخير…كل عام و انت مرتي ..كل عام و انا عم حبك اكتر و اكتر …تفضلي ..هاي عيديتك…يسعدلي صباحك

يارا: و انت بخير يا حياتي.. ….ههههه من وين جايب هالوردة الحمرا

غيث: اخ اكلت مية مسبة لجبتلك هالوردة …لك هاي كل ما بروح على طريق  شغلي في  مرة ختيارة عندا حديقة برا البيت و زارعا ورد و على طول بتسقين و بدير بالا علين كانو اولادا و من يومين حطيت عيني على وردة ،رحت اليوم تعربشت على سور حديقتا و قطفتا ،هي شافتني طلعت تسب و تصرخ علي ….هههه حتى لحقتني بعصاية القشاطة كانو قتلتلا ولد من اولادا بس هربت منا

يارا : ههههههه فظيع انت عم حسك ما عم تكبرا ابدا

غيث: معك بضل محافظ على شبابي

الجزء التاني:

شربنا القهوة و فطرنا و  لبسنا و رحنا عند بيت اهلو لزوجي لنعيد علين و متل العادة هنيك بتجتمع كل العيلة ،فتنا سلمنا على الجميع و النسوان كانت قاعدة لحال  و الرجال لحال ،و كالعادة و متل كل عيد بلشت الاحاديث المعتادة

هبة : ولله كلفوني تيابو لحمودتي 30 الف  ،جبتن من عند تشيبي

ربا: ييي انا فستانا لبنتي فوفو يلي ما طبقت ال 3سنين سعرو 25الف بس اخدتو من عند ديوكس بار ديوكس ،بتعرفي هاي ماركة تقيلة

هبة : و انت يارا اديش كلفوكي تياب اولادك و شو ماركتن ؟

يارا : انا …ما جبتن ماركة ،حرام الواحد يحط هيك مبالغ على تياب لانو كل سنة عم يكبرو الاولاد و بصيرو التياب صغار علين و بيهترو و  بينكبو

ربا : اي بس انا ما بكبن  بتبرع فين للفقرا و المحتاجين يلي ما معن يشترو و بجيبو كل تيابن من الباله

هبة : صحي يارا اختي شافتك من يومين بالباله المستعمل شو كنت عم تعملي ؟ ما تفوتي هيك محلات شعبية

يارا : اي لفتلي نظري بنطلون خرج غيث لشغلو

ربا : هبوشة وين ناوية تتغدي اليوم ؟

هبة : رامز بدو ياخدنا على مطعم اللؤلؤة البيضاء نتغدى سمك هامور

ربا : امم ما جربتو ولا مرة ، انا بروح على درج الياسمين و روزا ،هدول اكلن طيب كتير  و قعدتن حلوة بس غالين شوي

هبة: اي منجربن دخيلك العيد 4ايام و كل يوم بمطعم شكل ههههه

و قبل ما يلف السؤال علي ، قمت فورا بحجة شوف اولادي ،قمت على البرندا يلي عم يلعبو فيها ، شفت ابني احمد قاعد بالزاوية و ما عم يلعب مع اولاد عمو ، قربت لعندو  وقرفصت قبالو

يارا: حبيبي احمد شبك ….ييي ليش عم تبكي ؟

احمد: بدي ارجع على البيت هلأ هلأ

يارا: ليش ماما ،حدا زعلك ؟

احمد: ماما هون ما في حدا بحبنا

يارا:ما تحكي هيك الكل بحبنا ستك بتحبنا ،قوم معي اقعد جنبي و بس نرجع على البيت منحكي …مسح دموعك …ما بدي شوفك عم تبكي ابدا..يلا قوم

رجعت انا و ابني احمد على الصالون لنكفي المهزلة السنوية ،رجعت على امل يكونو خلصو سلفاتي استعراض و مفاخرة باللبس و الاكل

هبة : يارا انشالله عجبوكي اللحمات يلي بعتلك اياهن من الاضحية،دبحنا هالسنة 3خواريف يا قلبي نسبة الفقراء عم تزيد كتير

يارا : اي يسلم ايديكي يا رب

هبة : ولله انا كترتلك اياهن الكن مخصوص لانو بعرف اولادك يا قلبي معن فقر دم

يارا : تسلمي كلك ذوق ، مذوقة من يوم يومك

حسيت حالي عم اختنق ، حتى وقع الكلام ممكن يكون اقوى من ضربة سيف بالضهر يلي يمكن جرحو يلتئم مع الوقت بس الجرح يلي بيسببو كلام بعض الناس بيبقى اثرو بالروح و  العقل ، بياكلك شوي شوي و حتى بيحرقك و بيعملك رماد ،فتت على الحمام بكيت شوي على الساكت و رجعت مسحت دموعي و شديت حالي شوي و رجعت على الحرب النفسية

هبة : ههههه اي انا اذا بتفتحي خزانتي بتحسيا متل اعصار تسونامي ،عندي تياب كتيرة و في شي ما عم البسو ،رح ابعتلك يارا قسم منن

يارا: لا تسلميلي ما بدي ،و بعدين مقاسك غير مقاسي انا انحف منك بكتير

هبه(احمر وجها و بين عليها الانزعاج): اي انت نحيفة زيادة عن اللزوم

يارا : انت يلي كربوجة ،انا وزني و طولي متناسقين مع بعض

هبة : ليش اصلا في احلى من الصحة ، الصحة عز و اكابرية

يارا : الاكابرية لا بالصحة و لا باللبس و لا بالاكل ،الاكابرية بالاخلاق

تلبكت و ما عرفت شو تجاوب ، اطلعت بزوجا وقلتلو

هبة : رامز ….رامز…يلا ما بدنا نروح تأخرنا  ،بدنا نلحق نعيد و نشم الهوا

و خلصت القعدة عند حماتي و بلش الواحد ورا التاني ينسحب و نحن بقينا اخر الشي ،تغدينا عند حماتي يلي كانت بتحبنا و بتميزنا عن الباقي و خاصة انو  انا بنت رفيقتا ،لانو امي و حماتي كانو صحبة كتير ايام المدرسة بس الزمن فرقن و رجعو اجتمعو وقت حبينا بعض انا و غيث و  هالشي زاد من كره سلفاتي و اولادن النا

غيث: حبيبي هاتي صحنك لاسكبلك ،شكلك خجلانة يعني

يارا : لااا بالاكل ما في خجل ،يسلم ايديك

غيث: يسلم ايديكي يا امي على هالاكل الطيب بس ما تزعلي مني ما بشوف في اطيب من الاكل من تحت ايدين مرتي حبيبة قلبي

مسك ايدي و باسا

يارا: غيث …شبك …ما بصير تحكي هيك

ام رامز : هههههه اتركيه اتركيه يحكي، ليش مرتك من وين تعلمت الطبخ مو مني

يارا: اي وللله يا مرة عمو  لولاكي ما كنت بعرف  حتى اقلي بيضة

غيث: هههههه خلص ام رامز التلميذ بتفوق على معلمو احيانا  و اعترفي انو مرتي سبقتك و صارت اشطر منك

ام رامز : معترفة معترفة ،الله يخليكن لبعض و يديم المحبة بيناتكن

يارا : الله يسلمك يا مرة عمي و يخليلنا اياكي و يطول بعمرك و الله يرحمو لعمي و يسكنو فسيح جناتو  هو و ابي ماتو بنفس السنة

ام رامز : الله يرحمن يا رب و يغفرلن من اسبوع امك مرت علي صبحية و شربنا قهوة و تذكرناهن و ترحمنا عليهن

بعد ما تغدينا عند حماتي،شربنا قهوة و رحنا نسهر عند بيت اهلي ، يلي ساكن فيه امي و اخي محمود و مرتو و اولادو ،وكانت مرة اخي و امي ما متفقين ابدا و على طول مشاكل و اخي معظم الاحيان يصف لجنب مرتو حتى لو كانت على  غلط بس رغم هالشي كانت امي بتحبو و مدللتو كتير هو و مرتو و ما بترفضلو طلب ،و ما تفاجأت وقت قلتلي امي

ام محمود : يارا بدك تنزلي بعد العيد  مع اخوكي تتنازلي عن حصتك بالبيت لاخوكي

يارا: ما فهمت ..بدك تكتبي بيت العيلة باسمو ؟

ام محمود : اي

يارا: ليش ؟ابي كتب البيت باسمك  قبل ما يموت و خليه باسمك

ام محمود: ما بتفرق باسمي او باسم اخوكي

يارا: لا بتفرق هو قاعد عندك بس اذا انكتب البيت باسمو انت رح تصيري قاعدة عندو و انت بتعرفي انو مرتو ما منيحة معك ،هديك المرة ليش توضيتي على المغسلة و نقطتيلا شوية مي على الارض عصبت عليكي

ام محمود : معلش امي معلش ،الله يهديا بس اذا كرمال هالموضوع ما تاكلي هم  ،بس ما يكون بدك حصتك

يارا : …..لا ما بدي شي ..بدي سلامتك بس  ، طيب قلتيلا لاختي سارة ، بلكي هي بدا شي من البيت و خاصة انو هي على مشاكل مع زوجا على طول و زوجا مفكر يتزوج عليا لانو لهلا ما جبتلو ولد و فوق منها يا قلبي بخيل عليا كتير

ام محمود:  اي دقنالا على السعودية و قلنالا ، و ما حكت شي ،قالتلي اعملي يلي بدك اياه امي و بعدين هي وضع زوجا المادي منيح  و انت عندك بيت ملك اما اخوكي يا قلبي ما عندو شي ،اقل منها امن عليه قبل ما موت

يارا : خلص ما تحكي هيك ..الله يطول بعمرك و تكرمي بعد العيد بنزل بتنازلو عن حصتي

ام محمود : ما بدي تتنازلي و انت مغصوب على امرك ،انا قلت بكرا بيطلعلكن حصة من البيت يلي قاعدة فيه حماتك بعد عمر طويل

يارا : امي انا ما بحب احكي بمال و حصص ورثة ،الله يطول بعمركن انتو الاتنين و ما بعينا شي ولله ،و اطمني رح اتنازل بطيب خاطر

ام محمود : الله يرضى عليكي ،ليكا اجت مرة اخوكي ،بعدين منكمل حكي بهالموضوع

طلعت من عند اهلي و انا عم فكر بقرار امي يلي ما فيني اعترض عليه ابدا ،بعد ما وصلنا على بيتنا ، عشيت اولادي و بعد ما فرشتلن بغرفة القعدة لنيمن ،حكيت ابني احمد و فهمت منو ليش كان عم يبكي

احمد:  ابن عمي قلي انو هن عايشين متل  الملوك اما نحن يا حرام تيابنا متل الارباط  و الخدامين و ما عنا العاب متل عندن ،امي ليش نحن ما متلن ؟ ،بشو هن احسن مننا؟

قعدتو  بحضني و بلشت احكيلو قصة من نسج خيالي حتى قرب فكرتي لمستوى عقلو الطفولي

يارا : بدي احكيلك  قصة الملك المتكبر و الخادم المحبوب (الملك سليم يلي كان يلبس كل يوم لبس جديد و كل يوم ياكل  اكلة شكل و باقي الاكل يقلو للخادم منصور انو يكبن بالزبالة و حتى تيابو وقت يمل منن يقلو كبن كمان  ، كان متبطر كتير على نعمة ربو و ما مقدرها و كان بخيل كتير على شعبو  ،كل خزينة الدولة تروح على لبسو و اكلو ،بس الخادم منصور كان ياخد بقايا الاكل و تياب الملك و يوزعن على الشعب الفقير  ،يلي بالاخير  عمل ثورة على الملك و نزلو عن العرش و حطو الخادم منصور محلو  لانو كان بيستاهل انو يكون هو  الملك و وقت استلم الحكم الخادم منصور تغير وضع البلد للافضل و زادت محبتو عند شعبو و وقت مات الخادم منصور لبس كل شعبو الاسود سنة كاملة حداد عليه )فهمت يا احمد شو قصدي من القصة  الغني غني باخلاقو و ادبو و ثقافتو ما غني بشو بيلبس و بياكل ، و ابن عمك مفكر حالو غني بس هو يا حرام فقير كتير و بينزعل عليه و انت  لازم تكون ملك باخلاقك قبل كل شي و الحال ما بضل متل ما هو ،بدي اياك تدرس و تتعلم و شوف حالي فيك انت و اخوك و بتحصيلك العلمي بتثبت حالك و ما تهتم لحكي ابن عمك او غيرو ،لانو مع الايام بجوز انت تصير الملك منصور  و هو يصير   الخادم سليم

الجزء التالت:

نيمت اولادي و فتت على غرفتي ،و ركضت و  نمت جنب غيث و حطيت راسي على صدرو

يارا: غيث انا ما حكتلك شو قلتلي امي ؟

غيث:لا شو قلتلك ؟

يارا: بدا اياني اتنازل عن حصتي بالبيت لاخي بعد العيد

غيث: عنجد و انت شو قلتيلا؟

يارا : شو بدي قلا يعني ،قلتلا تكرمي

غيث: مع انو اخوكي و مرتو ما بيستاهلو ينكتب البيت باسمن بس خلص ما تزعلي امك كرمال هالشي و عطى الخالق احسن من عطى المخلوق ،ما تزعلي

يارا : لا ما زعلانة

غيث: لكن ليش مكشرة ،اضحكي خليني شوف ضحكتك

يارا: هاي ضحكت

غيث: لا هاي  ما ضحكتك ، انا بعرف كيف ضحكك

يارا: ههههه خلص …هههههه…غيث …ولله انا بغار كتير من خاصرتي ههههه

غيث: صحي ما بدنا نروح نعيد على اخي رامز و ناصر بكرا

يارا : بتعرفني ما بحب روح لعندن يعني بتعرف كيف نسوانن ما بينطاقو

غيث: بعرف، اصلا انا بستغرب كيف اخواتي قادرين يعيشو معن بس لازم نعمل الواجب كرمال اخواتي هن اكبر مني

يارا : طيب بروح بس ساعة وحدة عند كل واحد

رحنا تاني يوم عند سلفي رامز ،و فتنا قعدنا بالصالون و الاولاد فاتو يلعبو بغرفة اولاد عمن ،كالعادة معظم حكيا لسلفتي هبة عن المال و اللبس و الماركات ،و مرقت هالساعة علي متل سنة كاملة ، علقو اولادي مع اولادا على الالعاب و قام غيث فصل بيناتن و بعدين نحن و واقفين لنطلع من عندن ، جابتلي هبه كيس اسود كبير من اكياس الزبالة

هبة : يارا خدي هيدا الكيس معك ، ضبتلك فيه التياب يلي ما بقا عم يلبسن امجد و اغيد و حطيت فيه اكام لعبة لاحمد و رجب  حرام بضلو اطفال

انقهرت كتير و انتبه غيث علي فورا و  قبل ما رد انا ، رد غيث عليا فورا

غيث: هههههه فكرتو كيس زبالة يا هبة ،قلت بدك تحملي ضيوفك  زبالتكن هن و طالعين من عنكن ،ما من شيمكن  هالعادة

هبة : لا اعوذ بالله ،بس بعتذر ما لقيت كيس كبير  يسع كل هالاغراض

اطلع زوجا رامز  فيها هو و خجلان من تصرفا  و زورا بطرف عينو

غيث: بلا معلمية عليكي ، نحن منحمل هيك اغراض كتير من ناس على مستوى  لجمعيات خيرية بس بكونو محطوطين بكرتونة و  مغلفين بطريقة راقية ،لهيك حطين بكرتونة  مرتبة و ابعتين لجمعيات خيرية و مأوى ايتام ،هدول الناس بحاجة هيك شي لانو ما في اب و ام فوق راسن

قرب علي و لف ايدو على خاصرتي  و اطلع فيني و ابتسم و كمل حكيو

غيث: و الله يخليني انا و اميرتي يارا فوق راس هالاولاد و ما نخلين يحتاجو شي لانو دفا العيلة هو الشي يلي ما بيتعوض

سكتت هبة على الاخر و ما طلع صوتا ابدا و وقت صرنا برا ، فرطنا ضحك

يارا:هههههه قصفت جبهتا

غيث: هههه بتستاهل ، شفتيا كيف سكتت و فاتت ببعضا ، ما تخافي انا ما بسمح لحدا يزعجك طول ما انا عايش و رح كون بضهرك متل السيف

يارا:لك انت ما في منك ،الله يخليلي اياك ،ولله بخاف احسد حالي او حدا يحسدني عليك

غيث: خلص من بكرا معناتا حطيلي خرزة زرقة بين عيوني كرمال الحسد

خلص العيد و اخيرا و بعد العيد نزلت انا و اخي على المحكمة و تنازلت عن حصتي و سجل البيت باسمو ، و بعد شهر من ملكية اخي للبيت ،احتدت المشاكل بين امي و مرتو و حكاني اخي لاجي فورا ، رحت و فتت على غرفة سوسن و محمود و بقيت امي و الاولاد بغرفة القعدة

محمود: انا ما بقا قادر اتحمل اكتر من هيك ،كل يومين مشكلة جديدة امك و سوسن متل الزيت على النار

يارا: يا سوسن بضلها مرة كبيرة و قد امك سايريها ولله امي ما في منا

سوسن: امك اخلاقا صعبة كتير و ما بينعاش معا ابدا ، و انا تعبت و اكتر من هيك ما مستعدة اتحمل

محمود: يارا الله يخليكي خدي امك عندك تقعد اسبوع زمان ، بتكون مرتي ريحت اعصابا شوي

يارا : محمود ،اذا انا قبلت ،امك ما رح تقبل لانو بتعرف انو بيتي صغير و  هون امك الها غرفة لحالا و بترتاح اكتر

محمود : انت هلأ بتقنعيا …بس اسبوع

يارا : طيب و انت سوسن اقعد راجعي حالك بهالاسبوع و الدنيا بدا شوية مسايرة و تنازل شوي من عندك

الجزء الرابع:

طلعت من غرفتن و قلتلا لامي بدي اخدك اسبوع

عندي تغيري جو ، عارضت اول الشي بس بعدين اقنعتا بانو بتغيري جو و بتهدى النفوس شوي ،  ضبتلا تيابا و رجعنا على بيتي ، و بقيت اسبوع عندي ،كنت نام انا و اياها بغرفة النوم و غيث ينام على الصوفا بغرفة القعدة ،  انبسطنا فيا انا و زوجي و اولادي كتير  لانو امي بتحب اولادي و حنونة علين ، و خلال هالاسبوع ما سأل ابدا عليا اخي محمود ،ملت امي و صار بدا ترجع على بيتا ، ضبت اغراضا و رحت لوصلا ، حطت المفتاح بالباب و اجت لتفتحو ،ما انفتح معا ، حاولت انا فيه بس فجأة طلع من البيت شب

يارا: عفوا مين حضرتك؟

الشب: انت مين حضرتك؟ ، عم تحاولي تفتحي باب بيتنا

يارا: بيتكن …عفوا هيدا بيت اهلي

الشب: لا هيدا بيتنا من اسبوعين اشتريناه من واحد اسمو محمود و من  4ايام سكنا فيه

التفتت على امي و شفتا مستندة بايدا على الحيط و كانو رح توقع من الصدمة و عيونا عم يدمعو

ام محمود: باعو ….باعو

يارا : طيب ماشي لا تواخذنا اخي …..مشي امي …طولي بالك ….هلا منحكيه و منشوف وينو و  ليش هيك عمل

رجعنا على بيتي و نطرت غيث ليجي ليدقلو من موبايلو ، اتصل فيه كتير و ما رد ابدا و بعدين قلتلو لغيث هلا شوف كيف بدي خليه يرد فورا ،  بعتلو رسالة  رد  علي ضروري طالعتلنا ورثة من عمك يلي باميركا ،و رجع اتصل فيني فورا

محمود: عنجد يارا ،شو طلعلنا ؟

يارا: عم اكذب عليك ما طلعلنا شي ،وينك انت ،كيف بتبيع البيت بدون ما تخبرنا

محمود: ايييه بعتو و اشتريت احسن منو و بعدين البيت باسمي و انا حر التصرف فيه

يارا: اي و امك ؟ ما بتخبرا، رحنا فجاة شفنا عالم و ناس فيه

محمود: اي التهيت بالبيع و الشرا و نسيت خبركن ،  خليا لامك  عندك هالفترة لسا ما زبطنا وضعنا هون و بس يزبط انا بجي باخدا

يارا: طيب وين عنوان بيتك الجديد؟

محمود: يلا يارا انا مضطر سكر اجاني شغل مستعجل

سكر بوجهي ، سالتني امي شو قلك اخوكي ؟

يارا:  قلي انو اشترا بيت احسن و اكبر و لسا عم يزبطوه و شغلة اسبوع بيجي بياخدك ،خلص امي اقعدي هون شو صاير عليكي

ام محمود : امي بيتك صغير ما بدي احجز حرية زوجك الي اسبوع نايمة محلو جوا

يارا: لا عادي ولله غيث مبسوط فيكي

ام محمود : طيب بس خليني انا انام على الصوفا ،هيك برتاح اكتر ، بضل زوجك رجال   و بدو ياخد راحتو مع مرتو

يارا: طيب متل ما بدك

مر اسبوع و اسبوعين على اقامة امي عندي و ما اجا محمود ياخدا ابدا او حتى اتصل ليطمن عليها ،بعد طول هالفترة دقلي على موبايل زوجي

محمود: انا ما رح اقدر اجيب امك لعندي لانو مرتي ما قبلانة و قالتلي يا انا يا امك بالبيت ، و انا ما بدي اخرب بيتي يا يارا

يارا : بيتك !!…شو نسيت انو هالبيت هو لامك و كان باسم امك بس مو الحق عليكي الحق على امك يلي ما بتعرفك حقيقتك ،فضلت مرتك على امك عيب عليك

سكرت الخط معو انا و معصبة و من عصبيتي قلتلا لامي يلي قلي اياه محمود ،سكتت و شردت و ما حكت ولا كلمة  بعدين لانتبهت انا شو حكيت و خفت عليا  من ردة فعلا الصامتة ،فات غيث على غرفة النوم و اشرلي بعينو بانو الحقو

يارا : اي حياتي

غيث: حبيبي  انت انتبهتي شو حكيتي مع امك ؟

يارا : انتبهت الله يقطع لساني ، ما كان قصدي بس من فورة دمي من هالندل ،قشطا البيت لامو و قلعا بالاخير

غيث: ارجعي زبطي شو حكيتي ،ولله امك بهالعمر ما بتتحمل صدمات

رجعت طلعت على غرفة القعدة

يارا: امي اعتبري هالبيت بيتك ولله العظيم الك الصدر و النا العتبة و اعتبريه لغيث متل ابنك

ام محمود : ……

يارا: شبك امي ما ضلي ساكتة ردي علي بشي

ام محمود : الله يغضب عليه

و صارت تبكي و تغضب عليه لمحمود

غيث: مرة عمي طولي بالك ما تغضبي عليه ،قولي الله يهديه يا رب

ام محمود : ما توقعتو انا امو يزتني برا ،ولله ما هيك ربيتو بس الحق علي ما كنت لازم سجلو البيت باسمو و بعرف عندو هيك مرة حية  ،بس بستاهل يلي عملو فيني لانو قلتلا لمرتك تتنازل عن حقا

يارا: روقي خلص ،شي صار و انتهى ، و بعدين  امي ما دخلا مرتو ، ليش عقلو ما براسو  ،مانو رجال ليميز الصح من الغلط و يغضب امو ،خلص انسي ،لحالو بكرا بيجي عندك بس يعرف غلطو

ام محمود : ارجعي اتصلي فيه بدي حكيه

يارا : امي خلص ما تسمي بدنك

ام محمود: يارا ارجعي اتصلي فيه

يارا : طيب

رجعنا اتصلنا فيه و اعطيتا الموبايل لامي تحكيه

ام محمود : لك تفو عليكي يا ندل الله يغضب عليك ليوم الدين ،اسمع ولا كلب مرتك بتنسى انو الك ام و اخت و ما بدي شوف صورة وجهك حتى على دفني ما بدوس يا حيف بس ،يا ضيعان تربايتي بس

سكرت الخط معو و رجعت تبكي و رجعنا نهديها انا و غيث ، اقترح غيث نروح نسهر عند امو ساعة زمن لتغير جو امي ،رحنا عند مرة عمي و امي لانو صحبة معا فشتلا قلبا و حكتلا كل شي

ام رامز : طولي بالك الله يهديه يا رب ، تعي قعدي عندي ، بيتي غرفة و صالون و انا قاعدة لحالي

ام محمود :يكتر خيرك يا ام رامز بنت اصل من يوم يومك بس ما بدي احجز حريتك بكفي اعدة عند يارا و بيتا يا دوب واسعا

ام رامز: لهيك عم قلك ، غيث بس ترجعو بضبو اغراضا لام محمود و بتجيبون لهون ،خلص بدك تبقي عندي و بتسليني بوحدتي و نحن  رفقات من ايام المدرسة و سبحان الله رجعو غيث و يارا جمعونا مع بعض بعد كل هالعمر

ام محمود : ولله يا ام رامز انا شايفتا ما زابطة و بعدين اولادك الشباب بجو عندك زيارة و انا بضل غريبة

ام رامز : ما غريب الا الشيطان يا ام محمود ، خلص  بدك تبقي عندي ، ولله بتنبسطي و منروح منعمل صبحيات عند الجيران

يارا : امي متل ما بدك ،بتحبي تبقي عندي اهلا و سهلا فيكي ، بتحبي تبقي عند مرة عمي ، وين حاسة حالك بترتاحي اكتر ابقي….

الجزء الخامس:

ام محمود: لا ببقى هون

غيث: الله اللله بدنا نفتحلكن جمعية ارامل هون ،شو رايكن نجبلكن عرسان و نزوجكن  ،ولله بعدكن صبايا ،يعني حرام تبقو صبيتين لحالكن بالبيت

ام رامز : ههههه ولك امشي من هون   تعي يا يارا ضبي زوجك ، بدو يزوجنا

يارا : هههههه ليش لا بعدكن صبايا

غيث: امي انا نفسي يكون عندي اخ صغير

ام رامز : امشي روح على بيتك خلي مرتك ترجع تحبل و تخلف

طلعنا من عند حماتي و تركت امي عندا  و هن مبسوطين ببعض و عم يخططو وين بدن يروحو و شو بدن يعملو ،كانو الاتنين مبسوطين ببعض ، رجعت  على بيتي و ضبيت تيابا لامي و اخدن غيث لبيت اهلو ،كنت قلقانة شوي من ردة فعل اسلافي و  سلفاتي بعد ما يسمعو انو امي سكنت عند حماتي ، و وقت قلتلو لغيث هالشي

غيث :ما حدا بيسترجي يدخل بقرارات امي ، البيت بيتا

يارا : بس اخواتك رامز و ناصر بيصرفو على امك تقريبا

غيث: اي و اذا يعني ،شو امك بدا تاكل خروف محشي و بعدين انا شو بقدر  قيم من دخلي ،بعطيكي و انت بتعطيا لامك

يارا : يالله بس هيك بكون تقلت عليك كتير و انا بعرف انو يا دوب نحن عم ندبر حالنا

غيث: يا روحي ما تخافي الله يلي بيرزق ،و قيمينا من هالسيرة و قومي اعملينا سهرة غير شكل احتفالية بافتتاح الاتحاد النسائي يلي عملوه امك و امي

يارا : هههههه اي ما تكرم عيونك

غيث: لك دخيل عيونك انا شو بحبك

تاني يوم رحت عند بيت اهلو لغيث  لشوف حماتي و امي بس ما كانو بالبيت و رجعت رحت باليوم التاني كمان ما شفتن  ،و رابع يوم اجو الاتنين عندي

يارا : ولله اهلا و سهلا كيف هيك تذكرتونا ،وين غاطين ، صرت رايحة مرتين و ما شفتكن

ام رامز : ما عم نفضى ، عم ندور

ام محمود: ولله حاطة رجلي على رجل حماتك و عم نزور رفقاتنا من ايام المدرسة و شوي عند الجيران و احيانا منروح  نتشمس  بالحديقة ، بس اذا جيتي المسا امي بتلاقينا

يارا : يييي عنجد بتنامو بالبيت يعني هههههه

ام رامز: ههههه اي منام بالبيت ، و بكرا نحن بقيانين بالبيت ،عنا استقبالية ، تعالي

قعدو عندي ساعة و نص بس

ام محمود:  يييي انتصار(ام رامز) لك واعدين ام العبد اليوم نروح نشرب قهوة عندا

ام رامز : يييي قومي خيتا قومي،هاي ام طمزة بتزعل اذا حدا وعدا و ما اجا

قامو الاتنين من عندي و لبسو بلمح البصر و طلعو فورا ،و انا قعدت اضحك علين  و ما بقا رجعت شفتن الا بعد3ايام وقت رحنا عندن بالسهرة انا و غيث و بعدا رجعنا على بيتنا نحن و عم نضحك و اول ما فتنا على البيت ،رن موبايلو لغيث

غيث: حياتي ، كانو هاي اختك سارة يلي عم دقلي ، الرقم سعودي ،خدي ردي

رديت على الرقم و كانت اختي سارة عم تبكي و خبرتني انو زوجا طلقا و حجزلا بعد يومين ترجع لهون ، تلقيت الخبر متل الصاعقة ، حاولت هديا و قلها تحاول تصلح الوضع معو بس قلتلي ما بس طلقني و طلع متزوج علي و عندو ولد ، و ما بقا قادرة ضل عندو اكتر من هيك ، قلتلا طيب تعي بس حاولي تاخدي متأخرك و ما تتنازلي عنو ابدا ، قلتلي رح يعطيني اياه ، سكرت الخط معا و قعدت بكيت ،لفني غيث  و بلش يواسيني

يارا: اخ على حظك يا سارة شو قليل ،فوق ما بتجيب اولاد كمان اطلقت ،استغفر الله العظيم اللهم لا اعتراض على حكمك

غيث: روقي حبيبتي رح قوم اعملك فنجان قهوة لتروقي

يارا :يالله ما بصير يمر  علي شهر من غير مصيبة تانية ، ولله تعبت ، ليش هيك عم يصير معنا ؟

غيث: ايه عادي طولي بالك بتعاود تفرج انشالله ما بحب شوفك عم تبكي يا روحي

يارا : هلأ بس تدرى امي بخبر طلاق سارة ولله لتجن و خاصة انو هي قاعدة عند امك ،يعني سارة وقت بدا تجي وين بدا تروح بحالا ؟

غيث: خلص ما تاكلي هم   ،بتقعد مع امك ببيت اهلي

يارا: ياااا غيث مستحيل امي و اختي …ولله عم نتقل عليكن ….حسبي الله فيك يا محمود ..بدي دقلو و قلو ،لازم على الاقل يقعد اختو عندو

غيث: خلص ما دقيلو انسيه لاخوكي ،ما رح يجيكي الا سمة البدن منو

دقتلو لاخي محمود و خبرتو و عصب و قلي انسوني بقا و طالعوني من حياتكن و روحو دبرو حالكن بحالكن و ما بقا ترجعو دقولي لو شو ما صار ،رجعت بكيت لانو الاخ يلي مفروض يكون سند النا  لنتكي عليه ،طلع سند مايل  و خايب ،رحت تاني يوم خبرت امي بطلاق اختي سارة ،بكيت كتير على حظا وانا حاولت هديا

ام محمود:  طب وين بدا تقعد اذا انا قاعدة عند العالم و الناس

الجزء السادس :

ام رامز :ولله بزعل منك ام محمود هلا صرنا غربا عنكن ..خلص بتقعد هون  سعرا بسعر اولادي

تاني يوم اجت اختي سارة و هي مكسورة الخاطر و وجها تعبان من الهم و الحزن و نحفانة كتير عن قبل ،استقبلتا ببيتي و اجت امي و حماتي  عندي  ،قضو نهار عندي و حكتلنا سارة عن معاناتا مع زوجا و كيف كان يهتا على طول انو عقيمة و ما جبتلو ولد لهلأ ، خبرتا لسارة انو امك عم تنام عند حماتي بعد ما عمل اخوكي هيك فينا  و انت كمان رح تبقي هنيك ،  تكركبت و خجلت بحالا   وتحسبنت على محمود و  خبرتني انو معا مصاري من متاخرا و بتستاجر بيت بس غيث اقترح عليا انو ما تروح مصرياتا على اجارات و ضبن لتفتح فين مشروع صغير او تشغلن مع حدا حتى يرجعولا بمردود و قلا رح حكي اخي رامز و هو بيعرف هيك ناس ،و بردلك خبر

رجعو بالسهرة  امي و سارة عند بيت حمايي ليستقرو هنيك ،و تاني يوم بالسهرة رحت انا و غيث لعندن و اتصل غيث باخوه رامز و قلو يمر على بيت اهلو ،اجا رامز و اتعرف على اختي سارة لاول مرة لانو رامز كان مسافر برا البلد و وقت اجا ليستقر هون كانت اختي سارة متزوجة الها سنة ،قعد معنا رامز و قلو غيث اقتراحو و رحب فيه رامز كتير و قلا لسارة انا بشغلك اياهن بالتجارة معي و قلها ما تخافي ما رح اعطيكي قرش حرام و صار يشرحلا شو طبيعة شغلو و اديش رح يعطيا علين كل شهر و باقي التفاصيل ، بعد يومين اجت سلفتي هبة عندي هي و معصبة ،فاتت قعدت عندي و بلشت حكيا

هبة: اسمعي يارا انا بعرف شو عم تعملي

يارا : ما فهمت عليكي

هبة : عاملة حالك بريئة ،هالشركة يلي بين زوجي و اختك المطلقة بدي تفضيلي اياها ،شو عم تحاولي تعملي

يارا : شبك روقي هالشركة كانت من اقتراح غيث ما مني

هبة : ولله و بعدين وين بيت اهلك ما يقعدو فيه ،عم يقعدو عند العالم الغربا و الناس عم تحكي عليكن ، انا شو جابرو لزوجي و سلفي ناصر يصرف علين

يارا: حياتي زوجك و سلفك ما عم يصرفو على اهلي ،اختي سارة اجت و معا متأخرا و امي نحن عم نعطيها كل شهر

هبة: صدقتك ،انتو يا دوب معكن تاكلو و تشربو

يارا : الله يلي بيرزق و بعدين هالحكي قوليه لزوجك ما الي ،اذا هو بدو يفض الشركة على راحتو ،بس ما تجي لنص بيتي و تزتي هيك حكي و كلام

هبة : انتو يلي حجتو حالكن ،خلي اختك المطلقة ضب حالا ، زوجا زتا و تزوج عليا، ما تروح تلفي على واحد متزوج و تاخدو من عيلتو

يارا : لهون و بس احترمي حالك و اعرفي حالك شو عم تخبصي و تحكي و حاج تقذفي العالم بكلام باطل و بعدين  اذا يعني اختي  مطلقة و ما حدا رح ياخد زوجك منك

هبة: اي خلص خلص قليلا دبر عريس ما عن طريقنا و تطلع من بيت حمايي احسن ما تشوف شي ما يعجبا ،فهمنا امك بس اختك كمان هيك تخنتو كتير

يارا : عم تهدديني  ،و ما انت يلي بتقرري يلي يطلعو ولا لا ،البيت ما بيتك و لا بيت اهلك و هالحكي كلو بدو ينحكى لزوجك

قامت وقفت هي و معصبة و صوتا علي

هبة : اسمعي وليه حشرة انت ما قدي و صدقيني فتحتي حرب عليكي انت وحدك رح تكوني الخسرانة

يارا : اطلعي برا ،انت وحدة نورية و شرشوحة

هبة : واضح مين النوري فينا و مين بيلبس من الباله و مين يلي ….

يارا : ضبي لسانك بتمك و اطلعي براااا

طلعت هبه من بيتي و انا بقيت ارجف و ابكي و بدني مسموم و اتحسبن عليها ،لبست و رحت عند بيت حمايي و قلتلا لسارة فضي هالشركة بينك و بين سلفي و حكتلا كل شي صار ، صارت تبكي و بعدين اتصلت برامز و قلتلو بقدر شوفك هلا ضروري  اذا ما عندك شغل مستعجل،اجا رامز مستغرب من اتصال سارة

سارة : انا بدي ترجعلي مصرياتي ،ما بقا بدي تابع بهالشراكة معك

رامز : ليش ؟لسا من يومين بلشنا …في شي ؟

سارة : لا ما في بس انا بيتت استخارة مبارح و ما تفائلت

رامز : اممم طيب جربي هالشهر و اذا ما عجبك ما تكملي

سارة : لا معلش اخ رامز كلك ذوق انا اخدت قراري و مشي الحال

رامز : طيب متل ما بدك بس اذا غيرتي رايك انا جاهز  و بكرا الصبح بمر و بعطيكي مصرياتك

راح رامز و انا رجعت على بيتي و بس اجا غيث من شغلو ،حكتلو كل شي صار معي بهالنهار و عصبي علي

غيث: يارا كيف بتتصرفي من عندك ،كيف بتخلي اختك تسحب الشراكة ،حتى لو هددتك هبة ،اصلا مين هبة و مين مفكرة حالا

مسك موبايلو و اتصل باخوه

يارا:  غيث دخيل الله ، خلص ما بدي مشاكل معا  ،نحن ما ناقصنا مشاكل يلي فينا بكفينا

الجزء السابع:

رد رامز و قلو غيث ما تقول لمرتك انو انا المتصل  ،تعا لعنا ضروري و ما تخبر مرتك انو جاي لعنا ،بعد نص ساعة اجا رامز و خبرو غيث بكل الحكي يلي قالتلي اياه هبة ، احمر وجهو لرامز و بين عليه الانزعاج

رامز : امانة ما تواخذينا ولله هالمرة بدا تجنني و ما عشت يوم مبسوط معا ،شايفة حالا احسن من كل العالم و بتهين الكل بدون اي اعتبار لمشاعرن ،خلص اعتذري لاختك سارة عني و انا الحق علي يلي خبرتا ،كان لازم اشتغل على الساكت ،و رح ارجع مر على اختك سارة و ارجع اخد المصاري

يارا :رامز بلاها لهل الشراكة الله يخليك ما بدي مشاكل مع هبة ،بخاف تعرف ولله بتخرب الدنيا و اختي سارة ولله ما ناقصا ،بكفي جاي مكسور خاطرا بعد طلاقا

رامز : خلص ولايهمك ما رح تعرف و بعدين ما تاخدي كلاما على محمل الجد او تتحسسي منو اوك

طلع من عنا سلفي رامز بعد ما تفاهمنا على كل شي و رجع اخد المصاري من سارة يلي ما كانت حابة ترجع تفوت بهالقصة كرمال هبة ، بعد شهر اجت عندي اختي سارة و فاتحتني بموضوع

سارة : يارا انا عم حس انو سلافك صارو كتير عم يجو عند امن

يارا: ما فهمت و اذا يعني ،بدن يشوفو امن

سارة : كيف بدي فهمك اياها ما بعرف ،  هديك المرة لطشو رامز لناصر بالحكي و قلو ما بجي الا بشوفك قبلي الله يرحم ما كنا نشوفك الا بالشهر مرة  مع انو انا اول ما بجو بفوت فورا لجوا بس حماتك او رامز بنادولي  لاقعد معن و كل مرة بحجية شكل

يارا: قصدك تقولي رامز و ناصر عم يجو كرمالك

سارة : اي هيك حاسة لهيك بدي اطلع استأجر برا

يارا : بلكي اختي انت فهمانة غلط

سارة : لا ما غلط  الشاطر يلي فين بدو يتقرب و يهتم فيني مفكرين اذا انا مطلقة و ما بجيب اولاد يعني خلص بصير سهلة و متوفرة للكل

يارا : وحدي ربك شو هالحكي يلي عم تقوليه ما حدا بيسترجي يفكر فيكي  بهالطريقة و الكل بيعرف شو انت  ،طب من وين بدك تدفعي اجار ؟

سارة : من مردود شراكتي مع رامز و  رح دور على شغل

يارا: اخ بس حسبي الله فيك يا محمود

سارة : الهي ما بتوفق و ما بشوف الخير بحياته بهدلنا انا و امو  ،قليلو لغيث يدورلنا على بيت للاجار يكون رخيص و لو غرفة و منتفعاتا

يارا : طيب بالاول لتلاقي شغل و بعدين بتستاجري

اجا غيث من شغلو و قبل ما خبرو بفكرة سارة ،اجا مبسوط كتير و حملني و صار يقلي انو طاقة السما انفتحتلو ، خبرني انو  اليوم التقى بواحد كان عم  ينقلو بضاعة و حبو كتير و عرض عليه شغل توزيع بالجملة و قلو انو رح اعطيك سيارة توزع فيها لكل المحلات و براتب مغري ،كان فرحان كتير انو دخلو رح يزيد و رح يشتغل بشغل مريح ، خبرتو بفكرة سارة و قلي تاجلها شغلة شهرين بس ليصير معا لسا شوية مصاري  ، بعد شهر صدفت جية ناصر لعند امو و شاف رامز عم يعطيا لسارة مصاري و راح فورا خبر مرتو ربا يلي خبرت هبه بانو الشراكة مستمرة بيناتن و تاني يوم اجت هبة و ربا لعند حماتي

ربا : سارة انت لايمت رح ضلي قاعدة هون ،يعني انا مشانك، العالم عم تحكي عليكن ،بتعرفي زوجي و سلفي بزورو امن و انت بضلي غريبة

ام رامز : تحكي العالم شو ما بدا تحكي ما بهمنا ،سارة متل بنتي

هبة : مرة عمي حكي ربا مزبوط ما حلوة رجالنا بضلو غريبين و هي مطلقة ،بتخاف ناس يجيبو سيرتا بالعاطل

سارة : انا عم دور على شغل  هالفترة و رح نطلع نستاجر برا انا و امي

هبة : اي ولله بكون احسن و يا ريت باسرع وقت

ام رامز : هبه التزمي حدودك هيدا البيت بيتي و هدول ضيوفي و انا بقرر ايمت بطلعو من عندي ما انت

هبه : و نحن كمان من حقنا نحافظ على رجالنا

سارة : ليش مين قرب على زوجك ؟

هبه : هالشراكة يلي عملتيا بينك و بينو ما لله  ،شو مفكرتيني  غبية

ام رامز :هبة خلص بقا ،استحي و شوفي كلامك

هبه: مرة عمي انا شايفتو بس هالمخلوقة هي و اختا عم يرفعو لراسن لفوق كتير ،ديرو بالكم تنكسر رقبتكن

سارة : على فكرة الله يعينه رامز عليكي كيف متحملك

هبه: سارة انت عم تتجاوزي حدودك معي ،و مين يلي اصلا زوجا زتا و تزوج عليا  و مين يلي اخوا قشطن البيت و قلعن برا لو ما بتستاهلو ما كان صار فيكن هيك

و قبل ما اختي سارة ترد على هبه ،امي غابت عن الوعي  و ما قدرت تتحمل كل هالحكي يلي صار بين هبه و سارة ،ركضت سارة و ام رامز عليها و هن عم يصرخو و خايفين عليا  و بعدين سطحوها و جابو مي باردة و رشو على وجها لحتى رجعت فاقت  ،و من الشي يلي صار بامي ، حماتي قلعت هبة و ربا و قلتلن ما بقا يدوسو هيدا البيت ،و بعد ما  صحصحت امي  اجت سارة لعندي و اخدتني لشوف امي و حكتلي كل شي صار على الطريق ،  و انا  قاعدة عند حماتي اجا سلفي رامز بعد ما خبرتو هبه بانو امو قلعتن و فهم من حماتي كل شي صار ،و خبرتو انو ما بقا بدا تشوف هبة او ربا عندا و سلفي رامز تفهم هالشي و اعتذر من امي و سارة عن الحكي يلي قالتو مرتو ،كنت مفكرة القصة خلصت هون بس سلفي رامز رجع على بيتو و علق مع مرتو هبة و طلقا،بعد ما طلقا اجت لعند حماتي و صارت تخبط على الباب و تصرخ

هبة : افتحو الباب ….يارا …سارة ….ولله لندمكن على الشي يلي عملتوه فيني لكن انا اطلق من تحت راسك و راس اختك …افتحو ….يا نور يا ارباط …..خربتيلي بيتي يا خرابة البيوت يا خطافة الرجال

يارا: مرة عمي افتحلا الباب

ام رامز : لا ما تفتحيلا هلا بتروح لحالا ،اصلا من زمان ابني رامز لازم كان يطلقا و ما يحوي هيك نفسيات مريضة

يارا : الله يصلح الحال و يهديا ، كل الحق على ناصر هو يلي راح خبر مرتو بالشراكة

بقيت شي ربع ساعة تصرخ و تهدد و بعدين راحت و انا فتت لشووف اختي سارة يلي سمعتا عم تحكي مع طليقا و تبكي و تترجاه ليرجعا و وقت شافتني تلبكت و نهت المكالمة فورا

يارا :شو هيدا يلي سمعتو ؟

سارة : انا تعبت اعصابي كل يومين مشكلة ،ارجع لطليقي افضل حل ،انت الحق عليكي ليش ما خبرتيني انو اخوكي محمود قشطا البيت لامك ما كنت رجعت لهون ،شوفي على الذل و الاهانة يلي نحن فيه

يارا : طولي بالك انا ما توقعت ابدا الامور تصل لهون ، و ما في ذل اكتر من الشي يلي عملتيه هلا

سارة : شو بدنا نعمل ،كل االابواب مسكرة بوجهنا ،وين نروح بحالنا

يارا : خلص ما تبكي كل ضيقة وراها فرج

سارة :  نحن بدنا نضب اغراضنا هلا و نطلع و رح نجي عندك نام اكام يوم لنلاقي بيت اجار

يارا : ماشي متل ما بدك ، اهلا و سهلا فيكن

ضبو اغراضن اهلي و طلعو من عند حماتي يلي حاولت تمنعن  بس سارة كانت مصرة انو تطلع تفاديا لمشاكل لقدام و بعد 5ايام استاجرلن غيث بيت صغير جنبي وصارت تدفع الاجار من مصاري الشراكة و غيث يساعدن ماديا بعد ما تحسن شغلو ،بعد فترة شهرين اجا غيث عم يضحك

يارا: شو القصة داخل مبسوط اليوم ؟

غيث: احذري شو

الجزء التامن:

يارا : شو؟

غيث: حكاني اليوم اخي رامز قال بدو يتجوز اختك سارة قال عجبتو كتير

يارا: شوووو،بدك هبة تاكلني بلا ملح

غيث: شو بدنا بهبه و هبة طليقتو ما بقا مرتو

يارا: حتى لو ،و اصلا سارة ما بظن تقبل ،و ما الو شي مطلقا يروح يرجعا بضل ام اولادو

غيث: ما بدو اياها اصلا كيف كان متحملها ما بعرف ،بس على كل حال انا موافق بالنسبة الي و رح اسعى بهالجازة

يارا: نحن ما دخلنا ،انا بقلا لسارة و سارة هي يلي بتقرر

رحت تاني يوم فورا و خبرتا لسارة و انصدمت كتير لانو كانت مفكرة رامز عم يحاول يتقرب منا كل هالفترة ليستغلا بوضعا ، رفضت اول الشي بس بعدين امي قنعتا و وقت سالتني عن رايي ،قلتلا تمهلي شوي و ارفضيه حاليا حتى تعطيه فرصة و ما يكون اخد قرارو مستعجل و بلكي رجع مرتو و اذا ما رجعا من هون ل 4شهور بكون فعلا ما بقا بدو اياها ،خبرتو لغيث بالشي يلي صار حتى يقول لاخوه قرار سارة بالرفض و بانو اولى بانو يرجع مرتو ،بس لما اجا يعطيا لسارة المصاري قلا انا اخد قراري و حتى لو ما تجوزتك الك ،انا ما بقا بدي هبة  ،بس انا حبيتك الك و شفت فيكي الشي يلي بدي اياه ،اختي سارة ما ردت عليه ابدا بشي ،و بعد يومين سمع سلفي ناصر بانو اخوه رامز حكا باختي سارة و انطبلت الدنيا بهالخبر  ،بعد اسبوع حدا خبط على باب بيتي و كانو جاي يقتل حدا ،قلت هيدي هبة سمعت بالخبر، فتحت الباب

يارا: محمووود

محمود:اي محمود شبك كانك شفت شي شبح قدامك وين اختك ال…….وين الفلتانة ….يلي جاي توسخ سمعتنا

يارا: شبك ليش هيك عم تحكي على اختك و بعدين شو ذكرك فينا

محمود: و انت كمان عم تشجعيا ،لصفي حسابي معك بالاول

هجم علي و بلش يضربني ببيتي و ابني احمد شاف خالو عم يضرب امو ركض لعند بيت اهلي و قلها لامي و اختي يلي اجو ركض على بيتي و بعدوه عني

ام محمود:الله يكسر ايديك ،الله يغضب عليك

محمود: يغضب  علي ولا يغضب على بناتك

و وقت شاف سارة هجم عليا  متل التور و بدو يضربا و بعدناه عنها و امي عم تغضب عليه

محمود: بدي ربيها لهل الكلبة ،مصاحبة واحد متزوج و عندو اولاد  و بدا تاخدا من مرتو هاي بنتك التانية عم تساعدا ،بدكن توسخو سمعتي و يقولو عني مقورن

ضربتو امي كف و قلتلو

ام محمود: اخرس احسن ما حط صرمايتي بتمك ،وقت بتحكي عن اخواتك احكي عنن بادب اشرف منك و من يلي قلك هيك و بعدين يا قليل الشرف جاي تعمل دور الاخ هلأ ،وين كنت وقت اختك رجعت مطلقة و ما في بيت تروح عليه ، وين كنت وقت انا ما لقيت بيت استر حالي فيه و زتيتني عند صهرك الغريب كرمال مرتك قليلة الاصل انقلع من هون انقلع انت لا ابني و لا بعرفك والله يلعني لانو ما عرفت ربيك و دللتك على حساب اخواتك لنزعتك ،اطلع برا اطلع

محمود: ما طالع قبل ما خلص على بنتك يلي بدا تعيبني

ام محمود: انا يلي مستعدة خلص عليك و اقتلك بايدي هدول اذا بتقرب على وحدة فين

محمود:شو شايفتك واقفة لصفن و تشجعين ،شو طمعتي بمصاري رامز و بدك تشغلي بنتك على شوية تانية

ام محمود:  اخرس يا قليل الترباية واحد متلك طماع و ببيع امو و اخواتو كرمال شوية مصاري

محمود: انا ما بعت حدا انا كنت عم زبط البيت بس و بعدين كنت ناوي اجي اخدك و اخد هالكلبة

ام محمود: ايمت !ايمت !الك شهور تاركنا و ما كلفت خاطرك حتى تجي او تتصل و تعرف اخبارنا بس بستاهل كل شي صار فيني

ووقت امي عم تعلق مع محمود و انا و سارة عم نبكي ،اجا رامز و حماتي مقطوع نفسن و وجهن اصفر  ،اول ما شفناهن تفاجأنا انو شو عرفن بالشي يلي عم يصير عندي حتى اجو  ركض

يارا: اهلين مرة عمو تفضلي

محمود: ها شرف العاشق ،ولا انت واحد بلا شرف

الجزء التاسع :

هجم محمود على سلفي رامز يضربو و رجعنا فكناهن عن بعض و بالاخير امي دفشتو لمحمود برا بيتي و سكرت الباب و صارت تبكي و تدعي عليه

ام رامز : طولي بالك فوتي ارتاحي ، يارا جيبي كاسة مي و اعمليلا لامك كاسة عصير او لبن لتهدي اعصابا

قمت على المطبخ و لحقتني سارة فورا  و بقيت حماتي و امي و رامز بغرفة القعدة

ام محمود: الله يصطفل فيه ،جاي يتهجم على اخواتو و يحط بعرضا اختو سارة ،هالبنت حظا قليل

ام رامز : انشالله حظا بيتعدل

ام محمود: شو عرفكن انتو ؟

ام رامز : ربا كنتي اتصلت فينا و خبرتنا و قلتلنا لحقو اخوا لسارة بدو يدبحا

ام محمود: ربا …شو عرفا؟

ام رامز:  حسبي الله فيها لهبه ،ما بعرف كيف واصلة لمحمود و مطلعة حكي و كلام بشع عن سارة و يارا و محرضة اخون علين  ،و قايلتلا لربا انو محمود فار دمو وبدو يروح يخلص على اختو ،قامت هديك اتصلت فينا هي و خايفة و عم تبكي من انو يصير جريمة قتل و خاصة انو هي يلي موصلة لهبة انو رامز حكى فيها لسارة ،بس حسابا عسير عند زوجا

ام محمود: حسبي الله فيه و فيها

رامز : لا تواخذوني خالتي ام محمود جبتلكن وجعة راس كتير ، ما كنت عارف انو طليقتي لهل درجة بلا اخلاق  و ممكن تعمل فتنة توصل للقتل

طلعنا انا و سارة من المطبخ بعد ما سمعنا كل الحكي ،فتت ضيف العصير و فجاة طلع صوت سارة

سارة : رامز انا موافقة نتزوج

اطلعنا كلنا فيها بدون ما نحكي ولا كلمة و مستغربين من ردة فعلها

سارة : شبكن …اي موافقة بس رامز انا ما بجيب اولاد …عقيمة يعني

رامز : بعرف و ما بهمني بس ما بدي تكوني وافقتي لتردي على تصرف هبة ،انا بدي تكوني مقتنعة

سارة : اي و انا مقتنعة و وافقت لانو حرام هيك مرة تكون مرتك ،انت بتستاهل احسن منا بكتير

بقيو بيت حماي للسهرة عندي و اجا غيث و حكتلو كل شي صار و عصب من محمود ليش تهجم علينا و ضربنا بس رجعت هديتو و خبرتو انو سارة وافقت على رامز ،بعد شهر تزوجو سارة و رامز على الساكت كرمال المشاكل  ،و سلمو بيت الاجار و رجعت امي عند حماتي ،اما هبة وقت سمعت بخبر جازة اختي من رامز  دقتلا لسارة  كتير حتى تبهدلا و صارت تبعتلا رسائل و من الرسائل يلي بعتتلا اياهن و صدمتنا

هبة :على فكرة انا دفعتلو لاخوكي مبلغ حتى اجا عمل هالتمثيلية عليكن ،انتو كلكن عيلة بتعبدو القرش و بتبيعو بعض بالرخص

ما ردت عليها اختي سارة ابدا و غيرلا رامز رقما فورا و بعد عشرة ايام بعتتلو اولادو لتضغط عليه بس اختي سارة استقبلتن و عاملتن منيح و اعتبرتن متل اولادا حتى الاولاد  بلشو يحبو سارة لهيك و بس حست هبة انو هالشي ما جاب نتيجة و انو رح تخسر اولادا كمان رجعت اخدتن فورا ،اما سلفتي ربا ما بقا اجت عند حماتي بعد ما تقلعت مع انو اتصلت بحماتي و اعتذرت منا بس حماتي ما سامحتا و خاصة انو نقلت حكي لهبه و كانت رح تعمل جريمة قتل ،بعد فترة اختي سارة اقترحت علي اقتراح بانو اخد مصاري متاخرا يلي كانت عم تشغلن مع رامز و اعطين لغيث حتى يفتح فين مشروع لانو هي ما بقا بحاجتن و خاصة انو وضع رامز ممتاز جدا ،انا رفضت بس قلتلي اعتبرين دين و غيث وقف جنبنا كتير و انا حابة ردلو شوي من جمايلو معنا و بس يصير معو يرجعلي اياهن على راحتو  ، خبرتو لغيث باقتراح سارة و طار عقلو من الفرحة و قلي انو في مشروع براسو و خاصة بعد ما بلش يشتغل بالتوزيع بالجملة ، لهيك اخد المصاري و وسع شغلو و صار هو يشتري البضاعة و يوزع و ياخد المربح الو و الله فتحها عليه و تحسن وضعنا كتير ، و صرت انا و سارة نتساعد بمصروف امي و نشتريلا كل لوازما و كانت تترضى علينا كتير بعد فترة 5شهور اندق باب بيتي و قمت افتح لاتفاجأ بزيارة سوسن مرة محمود يلي كانت متغيرة عن قبل و نحفانة و مهمومة

سوسن: فيني فوت

يارا:  تفضلي

سوسن: بعرف انو فاجئتك بزيارتي و بعرف انو بتكرهوني كتير  بس انا قاصدتك بخدمة ،كان محمود حابب يجي بس خجل بعد الشي يلي عملو فيكن

يارا: تفضلي شو الخدمة ؟

صارت تبكي

سوسن : خالد ابني …صار معو فشل كلوي

يارا: شووو ..ايمت

سوسن: اي ولله الي شهرين عم ركض فيه انا و محم و بدو زرع كلية فورا ،يارا انا خايفة ابني يروح من ايدي و ما عارفة شو اعملو

يارا: الله يشفيلك اياه يا رب و ما يضرك فيه ،نحن كيف منقدر نساعدك

سوسن: محمود باع البيت  حتى يقدر يصرف على علاج خالد و بدو يشتريلو كلية و نحن طلعنا استاجرنا برا و حتى من شغلو تقلع لانو عم يغيب كتير كرمال خالد، وضعنا كتير سيء الله وحده بيعلم فينا ،انا بعترف بانو غلطنا بحقكن بس انا بدي تعبرو خالد متل ابنكن و  تساعدونا شوي ماديا و شو بطلع من خاطرك و خاطر سارة و الكن اجر و ثواب انشالله…

يارا: اكيد الطفل ما اله ذنب بتصرفات الكبار ،رح حكي سارة و امي و نجي لعنكن نشوفا

سوسن: ولله انا خجلانة من امك و ما الي عين شوفا و نفس الشي محمود و خاصة اخر مرة كلو منا لبنت الحرام هبة هي يلي عبت راسو عليكن و حكت حكي بيخجل الواحد يحكيه

الجزء العاشر:

يارا : شو حكت ؟

سوسن :قالت انو سارة و رامز بفوتو على غرفة النوم تعيت حماتك و بغطو بالساعة و الساعتين و انو انت بتغطي علين و بتهيأيلن الجو

يارا: يييي حسبي الله فيها بس

سوسن: و بس سمع هالحكي محمود طلع متل المجنون عنكن و انا حاولت هديه بس ما قدرت

يارا: و اديش اعطتو مصاري؟

سوسن: ما فهمت ،مصاري لشو؟

يارا:قالت هبة لسارة انو اعطتو مصاري لمحمود حتى يجي يقتل سارة

سوسن: العمى بقلبا شو  كذابة ،الله وكيلك ولا ليرة و انا كنت من اول القعدة لاخرتا بس هاي بدا تعمل فتنة بينكن

يارا : يلا اخدت نصيبا بس اخي محمود ما بحب الا حالو و ما برد الا على الكلام يلي بصب بمصلحتو و بعدين يا سوسن الله لا يحرق قلب ام على ابنا  و ليكك رح تفقدي عقلك على مرض ابنك و اكلة همو و عم تتحملي مرضو تصوري بعد  كل هالشي ابنك يكبر و يتزوج و ما يتحملك و يزتك بس تختيري ،شو  رح تعملي بكرا اذا لحق مرتو و تركك عند العالم الغرباء،رضا الوالدين  دين و بدو يجي وقت تسديه

سوسن: بعرف و نحن ما شفنا التوفيق ابدا  بعد ما امك طلعت من عنا ،خف رزقو لمحمود و شوفي هلا شو صار بابني خالد تركتو مشلوح بالتخت  و بدو كل اسبوع غسل كلاوي و جيت لعندك لتساعديني الله يخليلك اولادك و ما تشوفي فين شر

يارا: ماشي اعطيني عنوان بيتكن يلي مستاجرينو هلا و انا بكرا بمر عليكي انا و امي

طلعت سوسن من عندي و انا عم قول يا لطيف يا لطيف من غضب الام ،لبست تيابي و رحت عند امي فورا و خبرتا،صارت تضرب على راسا و تبكي و قامت فورا لتلبس تيابا لتروح عندن

يارا: بدك تروحي هلأ امي ،انا قلتلا لسوسن انو بكرا منروح

ام محمود: لا هلأ  بدي روح ما بقدر انطر لبكرا كيف هيك صار معو الولد متل الوردة يا قلبي عليك يا خالد ولله هالصبي عاقل و مؤدب

لبسنا و رحنا عند سوسن و اول ما شفناه لخالد بكينا عليه لانو نحفان و وجهو اصفر كتير و بعد نص ساعة انفتح الباب و اجا  اخي محمود ،يلي ما بقا شفناه بعد هيك الحادثة ،اول ما شافا لامي حضنا و صار يبكي و يقلا سامحيني سامحيني الله رح يحرقلي قلبي على ابني  ،امي بكيت و ما ردت عليه الا بكلمة  الله  يشفيه و سلم علي و قعدنا لنحكي عن خالد و قال انو ما لقى لحد الان حدا يتبرعلو بكلية و خايف ما يلاقي حدا و وضعو لخالد كلمالو عم يسوء ،اعطيناه مصاري و طلعنا من عندو و رحنا عند سارة و خبرناها و قالتلنا رح تقول لزوجا رامز اذا بيقدر يساعدن بهالموضوع و انا قلتلا بقول لغيث و وقت قلتلو لغيث

غيث: يا لطيف ،لازم يحط اسم ابنو  بكل المشافي يلي بالبلد لانو احتمال  يجي اولاد عاملين حوادث مثلا  و ماتو وقتا احتمال يرضو اهلين انو يتبرعو بكلية الميت بس طبعا هالشي بصير بالنوادر و هو و حظو لابن اخوكي الله يشفيه يا رب

يارا: بعرف و قلنا انو حاطط اسمو بكذا مشفى  ،الله يشفيه يا رب

بعد شهر حكتنا سوسن هي و عم تبكي  وقالتلنا الحقوني الحقوني و طلعنا ركض انا و امي و سارة و بدون ما نفهم منا شي

—————بعد ثلاثة سنين——–

غيث:ما تفتحي عيونك الا لقلك

يارا: لك لوين جايبني؟

غيث:هلأ بتعرفي ……يلا فتحي

يارا: شو هيدا غيث !!!

غيث:متل ما شايفة …عجبك

يارا: غيث هيدا البيت النا

غيث: اي حبيت اعملك اياه مفاجأة ، سحبتو على البنك الاسلامي دفعت مبلغ و الباقي على التقسيط  ….فوتي شوفي غرفة الاولاد

يارا: كتييرررر حلو بجنن ما عم صدق نحن بدنا نسكن هون

غيث: اي نحن لكن الجيران

يارا: طب ليش خليتني اترك الاولاد عند سوسن ليش ما جبناهن حتى يشوفو البيت ولله كانو انبسطو

غيث:منجيبن انشالله بس قلت لعفشو على الاخير و بدي عبيلن غرفتن العاب هيك بينبسطو اكتر

يارا:غيث ليش هاي الغرفة ؟

غيث: هاي  للبنوتة يلي بدك تجيبلي اياها

يارا: ها و شو عرفك انو بنوتة بلكي صبي

غيث:انا حاسسني قلبي بنوتة و بتشبه اما كمان

يارا:غيث لتكون غرت من اخوك رامز انو جايتو بنت

غيث:ههههه كل شي وارد

يارا:غيث سمعت انو هبة رجعت طلقت زوجا الجديد

غيث:ليش مستغربة يعني وحدة متلها معقدة نفسيا  مين هالرجال  يلي بدو يتحملا

يارا:بس خايفة ترجع تعملا مشاكل لسارة

غيث:لا ما بظن اخي رامز بحبا لسارة و مبسوط معا و شاف الفرق بين مرتو القديمة و الجديدة و بعدين رامز طاير عقلو و ما مصدق ايمت تولد سارة

يارا: اي سبحان العاطي لحمدلله يا رب مين قال  انو سارة رح تحبل

غيث: يا روحي ما في شي على ربك صعب ،مو كانو هيدا موبايلك يلي عم يرن

يارا:اي …هاي سوسن عم تتصل ….الو

سوسن:يارا احمد عم ينق علي بدو يحكيكي ،خدي حكيه

يارا:اي ماما

احمد: وينكن طولتو ما على اساس تجو تاخدونا على الحديقة

يارا:يلا ليكنا جاين

احمد:ما طولو لانو خالد ورهف عم يتغالظو علينا

يارا:طيب قلا لمرة خالك تجهز اولادا كرمال ناخدن معنا

احمد:كمان بدنا ناخدن معنا

يارا:اي بدنا ناخدن يا حبيبي يا احمد ابون مسافر و عم يشتغل وما في حدا يدير بالو علين يلا باي

غيث: ليكي يارا شو رايك ندشن البيت بقبلة عشق من النوع الثقيل

يارا:هههههه مشي مشي رح نتأخر على الاولاد

غيث:انت الخسرانة

يارا: انا وقت اخدتك ما خسرت شي بالعكس صرت ربحانة

غيث: طب هاتي بوسة على السريع و خليها يتبع للمرة الجاية ….

يارا:يتبع ..يتبع

انتهت