الندم بقلم هلا غرابلي

#الندم #بقلم #هلا #غرابلي

انتهت القصة

احذر النساء يا صديقي فانهن يعطين بلا حساب يسامحن بلا عقاب يتجاوزن عن نزواتك و هفواتك دون تفكير لكن جرحا واحدا قد يحول احداهن لمجرمة تقتلك في قلبها انت و صورتك و ذكراك (مقتبس)

سوسو حياتي ليش ما بتسجلي نادي رياضة ….؟؟؟؟

شايف عندي وقت كتير يا دوب لحق شغل بيت و طبخ و ركض لاولادك و بعدين يلي بسمعك بقول مرتك وزنها مية كيلو ….

خلص انسي الموضوع ……

سارة البنت يلي تعرفت عليها بالجامعة و حبيتها كتير و انجذبت لشخصيتها ما بئا موجودة هلأ كانو حبيت بنت و تزوجت بنت تانية على طول معصبة و على طول عم تركض ورا نور و وليد و تصرخ علين حتى صوتها تغير و صار خشن حتى جسمها تغير كان جسمها ممشوق و متناسق مع بعضه و هلا بعد ولدين زادت 10كيلو و كل ما بفتح معها موضوع نادي الرياضة بتخلقلي اعذار وهمية لدرجة ما بقا فتحت الموضوع معها كانت متل الطفلة الصغيرة بحيويتها و اندفاعها للحياة بس هلأ انسانة مختلفة تماما و كانو كبرت مية سنة ب5سنين زواج معقول الزواج بغير المرة للاسوأ ما للافضل انا ما بنكر انو مرتي سارة قلبا طيب و معطاءة و حنونة و بتفضل راحتنا على راحتها بس انا بدي شوف البنت يلي اخترتا و حبيتا فيها …..

اول ما تزوجتا حسيت حالي باني اسعد انسان بهالعالم و اكتر رجال محظوظ لانو كانت من نصيبي كنت شوف حالي فيها قدام الناس بس هلا انا انسان بلا روح بلا حياة و اانا اكتر انسان متزوج تعيس بحياته حتى وقت برجع على بيتي بلاقيها يا بالمطبخ عم تطبخ و تعزل يا بغرفة الاولاد احيانا بفوت على البيت و بقعد نص ساعة و ما بتحس على وجودي ابدا حتى ناديلها سارة انا هون انا جيت تعي استقبليني….‪#‎hla_gharabli‬

كنت روح اسهر مع رفقاتي بمزاج معكر و وقت يسالوني شبك ضياء قلن ولاشي مكتئب قلنالك ما تتزوج شو بدك بالجازة هم و غم ركبت راسك و بدك تتزوج قال شو بحبها بحبها و بدي استقر و اسس اسرة و شوف اولادي ولله ما شفنا واحد متزوج مبسوط لهلا قلتلن لا بتلاقي رجال مبسوطين لكل قاعدة شواذ ……

كان رفيقي محمد من رفقاتي المقربين احكيلو كل همومي و مشاكلي مع مرتي يلي ما عم اقدر انسجم معها و احيانا كان يعطيني نصائح كيف الرجال لازم يتعامل مع المرة كنت اضحك عليه قلو هدول النسوان ما حدا بيقدر يفهم علين شو بدن لانو هنن نفسن ما بيعرفو شو بدن و بعدين انت روح تزوج و جرب بعدين تعا اعطيني نصائح …..

رجعت على البيت كالعادة فتت و لقيت عنا ضيوف تابعت على غرفتي لغير تيابي لحقتني سارة قلتلي قبل ما تغير تيابك فوت سلم على رفيقتي ريما قلتلها من ايمت ليش انا بفوت بسلم على رفقاتك؟!!

قلتلي بس هالمرة لانو هي اشترت شقة و بدا تجهزها و ما عارفة من وين بدا تبلش لهيك قلتلها زوجي بيشتغل بالتعهدات و هو بيخدمك بهالموضوع فوت يلا ما تخجلني قدامها مدحت فيك كتير فتت لسلم على رفيقتا ريما ….اول ماشفتها حسيت بهالة انوثة كبيرة حواليها و كانو قطعة من مغناطيس عم تجذبني لعندها حتى تلبكت و ضيعت الكلام كذا مرة بنت جذابة طويلة نحيفة جسمها متل عارضات الازياء صوتها ناعم و يا دوب مسموع كلامها منسق ايديها ناعمين بشرتا عم تشع نضارة اجت قعدت مرتي سارة جنبا و حسيت اديش في فرق شاسع بين الاتنين للحظة حسيت حالي اني ما متزوج مرة و متزوج رجال حكيت انا و اياها و انا كل تركيز عيوني عليها و مفتون فيها بعدين اتفقت انا و اياها نروح على الشقة يلي اشترتا لالقي نظرة عليها حتى بلش جهزلا اياها و سلم اياها على المفتاح…..يتبع

الجزء التاني:

تاني يوم دقتلا لريما و قلتلا رح مر اخدك عالساعة خمسة لتاخديني شوف الشقة و انا كنت ما مصدق يجي اليوم لارجع شوفا و وقفت بالسيارة تحت بيتا و نطرتا لتجي و ريحة عطرها الناعمة سبقتا و خرقت قلبي نزلت من السيارة و سلمت عليها وفتحتلا الباب فورا و قلتلا تفضلي قلتلي ميرسي و طول الطريق و انا افتح مواضيع معها بس لاسمع صوتها يلي كان يدوبني ولا عيونها المكحلين ولا ابتسامتها الناعمة كلها سحر و جاذبية طلعنا على الشقة يلي كانت صغيرة كتير و اتفقنا على الديكور و اعطيتها رايي بانو اعملا المطبخ امريكي و حبت الفكرة كتير و قلتلها التجهيز بياخد معي وقت كتير و لازم نبقى على تواصل حتى قلك اول باول وين وصلت بالتجهيز قلتلي رقمي معك ايمت ما بدك حكيني قلتلها اكيد طبعا و بعدين قلتلها شو رايك نشرب قهوة قلتلي لا ما بقدر بدي روح على النادي العب رياضة ناطريني رفقاتي قلتلا شي حلو ليش بتلعبي رياضة مشالله ما بحاجة ابدا قلتلي حتى ضل محافظة على وزني و رشاقتي يالله اديش في فرق بينا و بين المرة يلي عندي بالبيت …#hla_gharabli

صرت كل يومين دقلها بحجة شكل لاسمع صوتا و اعرف اكتر عن تفاصيل حياتها كانت مرة عايشة حياتها بالطول و بالعرض كل تركيزها على حالها و جمالها و كيف تنبسط بحياتا كنت كل ما دقلها يا بتكون بالنادي عم تلعب رياضة او بالسوق عم تشتري تياب و مكياج الها او مع رفقاتها بالمسبح او بمشوار حسيت حالي لقيت فيها الانسانة يلي ضيعتها من زمان حتى ايقنت اني اسأت اختياري بمرتي سارة صرت اتقرب منها اكتر وبلشت اعزمها على فنحان قهوة او غدا احيانا بحجة تجهيز الشقة و بعدين ما قدرت اتحمل انطر اكتر و صارحتا و قلتلا اني انا معجب فيكي و عم اتعلق فيكي يوم عن يوم و كل تفكيري صار محصور فيكي حتى انا و قاعد مع مرتي و اولادي حتى انا و نايم مع مرتي عم اتخيلك معي قلتلي مستحيل انا خون رفيقتي سارة قلتلها طيب و انا شو ذنبي حبيتك و بعدين سارة شو بدو يعرفها ملهية ببيتها و اولادها و انا ما بقا اقدر اتخيلك برا حياتي انتي اعطيتي لحياتي طعم و لون ما تحرميني منك قلتلي كل هيدا حكي و كلام انا بهمني الافعال قلتلا شو بدك اطلبي؟؟قلتلي انا بدي صير مرتك و غير هيك رح انسى كل هالحكي يلي قلتلي اياه قلتلا موافق قلتلي بس شو بدو يضمنلي ما كون نزوة بحياتك تتزوجني شهر و طلقني قلتلا قولي شو بدك اعملك لاثبتلك اني انا بحبك و ما رح تكون نزوة بحياتي قلتلي البيت يلي بدك تسكني فيه اكتبه باسمي هيك بطمنلك اكتر صفنت شوي قلتلي شو غيرت رايك ؟؟قلتلا لا بس اعطيني شوية وقت للاقي البيت المناسب قلتلي خود وقتك……

بعد يومين بالليل دق موبايلي مسكته و فتت على المطبخ و رديت كان المتصل ابو ايمن من مكتب العقارات ليقلي انو لقتلك بيت بالمواصفات يلي بدك اياها و بالمنطقة يلي بدك اياها قلتلو بكرا منمر منشوفه و بعد ما سكرت الخط معه دقتلها لريما و قلتلا هاتي البشارة حكاني ابو ايمن من المكتب يلي قلتلك عليه و قلي انو لقالنا بيت بالمواصفات يلي بدنا اياها رح مر عليكي بكرا منفطر سوا و بعدين منروح نشوفه ….و اخيرا يا ريما رح تصيري مرتي و تحت سقف واحد ….تصبحي على خير يا روحي بحبك باي..سكرت الخط مع ريما و رجعت لنام بس وقت فتلت راسي شفت سارة بوجهي قلتلا سارة رعبتيني انت هون من ايمت ؟؟كانو عيونها حمر و عم تبكي على الساكت قلتلي انا هون من وقت دقيت لريما قلتلا دقتلا كرمال قلها انو بكرا بمر عليكي لانو الشقة تعيتا خلصت قلتلي كذاب انت واحد كذاب و بلشت تصرخ و تبكي بدك تتزوج علي و مين رفيقتي ريما الله لا يباركلك يا خاين و هديك الوسخة خرابة البيوت انا بشوف شغلي معها و فاتت على غرفة النوم و بلشت ضب تيابها قلتلا سارة طولي بالك انت فهمانة غلط قلتلي بعد عني بعد عني و على صوت صراخها فاقو الاولاد و شافو امن عم ضب تيابها و عم تبكي و بلشو يبكو معا قلتلا ليكي الاولاد خلص اهدي لنتفاهم مسكت موبايلا و دقت لاخوا قلتلو تعا خدني هلأ هلأ اجا اخوا و طلع على البيت و قلها شو في شو صاير ليش عم تبكي قلتلو الخاين الكذاب بدو يتزوج و مين رفيقتي كمان اطلع فيني اخوا و قلي ايه الله يهنيك تزوج بس بدك طلق اختي قبل و قلا لاختو مشي اختي اجت سارة بدا تاخد الاولاد معا قلها اخوا ما بتاخدي ولا ولد اتركيهن للعريس و لعروسته قلتلو وفيق شبك فوت شوي لك ليك الاولاد شوف مناظرن قلي شوف منظر اختي اهم عندي من اولادك و اخدا و راح …….

تاني يوم دقيت لريما و قلتلها شو صار معي و انو ما رح نقدر نشوف البيت هلا لانو الاولاد معي و خبرتها انو باقرب فرصة منروح منشوف البيت و بعد ما خلصت حكيي معا دقيت لرفيقي محمد و قتلو مر لعندي على البيت ضروري اجا محمد و حكتله عن الشي يلي صار قلي الله لا يعطيك شطارة على هالعملة لو انا بمحل اخوا لمرتك طبعا بدي اخدا و ازتلك الاولاد ليش بدك تتزوج عليها و مين كمان رفيقتها قلتلو بحبا لريما و مستحيل اتخيل حياتي بدونها بحسها نصي التاني قلي مجنون انت بدك تخرب بيتك كرمال وحدة عرفتها من شهر او شهرين و مرتك ام اولادك الكل بيعرف مين هي سارة و مين اهلا نعم الناس و نعم الترباية و بعدين مو هاي سارة يلي حبيتها بالجامعة 4سنين قلتلو اي انا حبيتا بس هلا ما بقا بحبا ما بقا هي نفسا سارة تغيرت كتير عن قبل قلبا و قالبا ما بحس اي مشاعر اتجاها عقلي و قلبي كلو مع ريما قلي طب و اولادك هدول الاطفال شو ذنبن يروحو بين الرجلين قلتلو ما بروحو مابصير علين شي سارة قلبا طيب بكرا بترجع على البيت او بتبعت بتاخدن ما بتتحمل فراقن يومين قلي انت عم تخرب بيتك بايدك تصطفل يا رفيقي انا نصحتك …..يتبع

الجزء التالت:

بعد ساعة دقتلي ريما و قلتلي انو سارة دقتلا بس ما ردت عليها و بعتتلا مسجات كلا مسبات و بهادل قلتلا طيب هي معصبة هلا ما تردي عليا و انا رح حاول اتصرف باسرع وقت و تاني يوم رحت انا و الاولاد عند بيت اهلا لسارة مشان رجعا لبيتا بس قلتلي اذا بعدك حاطط براسك فكرة الزواج من ريما انا بدي الطلاق قلتلا ما بصير عليكي شي انت ببيت و هي ببيت و يوم عندك و يوم عندا جنت و صرخت و حتى قلعتني و قلتلي ما بدي شوف وجهك ابدا و خود اولادك معك و طلقني و ادفعلي كل متأخري حاولت كتير معا بس ما قبلت و ضلت معندة على الطلاق و خبرتا لريما بانو سارة بدا تطلق و تتركلي الاولاد شو بدنا نعمل ؟!قلتلي اي خلص طلقا و اخلص منا و نور و وليد كتير هادين و انا رح دير بالي علين و عاملن متل اولاد اختي و بعد عشرين يوم طلقتا و بلشت باوراق زواجي من ريما و معاملة تسجيل البيت باسما و كنا وين ما نروح ناخد وليد و نور معنا لبكونا كتير و حسيت ريما عم تدايق منن بس ما كانت تبينلي هالشي و لانو نور و وليد كانو توم و عمرن 3سنين كانو شقيين كتير على طول يركضو ورا بعض و يعلقو قلتلي ريما دقلا لسارة و قلا ما اشتقتي لاولادك و الاولاد اشتاقولك بلكي بتاخدن هالفترة بس دقتلا لسارة و قلتلا هالحكي بس كان جوابه بس اشتقلن بحكيك تجبلي اياهن كنت كتير مقهور منا انو ما سالت علين كتير و كل اسبوع كانت تاخدن ساعة بس ما توقعت الامور توصل بيناتنا لهون او انو تتركلي الاولاد حتى بشهر العسل ما اتهنينا و علقنا كذا مرة لانو شفتا لريما عم تضربن و تصرخ علين و بعد شهر العسل بلشت مشاكل من نوع تاني صرت بس ارجع على البيت تكون ريم معصبة و تقلي اولادك اليوم جننوني ما فضيت اطبخ او اعمل شغلة بالبيت صير جيب معك اكل جاهز و كل يوم على نفس الحالة اول ما ارجع من شغلي تبلش اولادك عملو هيك و اولادك خربو هيك و دق لسارة قلا تاخدن اسبوع تريحنا شوي منن حتى صرت اكره ارجع على بيتي و مرة جيت بدي اطلع على شغلي دورت على قميصي الازرق لالبسو قلتلا ريما وين قميصي الازرق قلتلي بالغسيل قلتلا الي اسبوع حاططه بالغسيل لهلا ما عرفتي تغسليه شو عم تعملي طول نهار اذا برجع على البيت بلاقيه فوضى و طبخ معظم الاحيان انا عم جيب اكل جاهز معي قلتلي عم دير بالي على اولادك و يا دوب عم افضى لحالي شوي انا انسانة كمان قلتلا ما في داعي توقفي عشر ساعات على المرايا و تستقبلي رفقاتك او تطلعي معن مشوار كل يومين انت مرة متزوجة و عندك مسؤوليات اتجاه بيتك و زوجك و لبست تيابي و طلعت معصب من البيت …..

بعد شهرين من زواجي دقتلي سارة و قلتلي جبلي وليد و نور بدي شوفن و اخدن مشوار بشوفك بالحديقة بعد ساعة قلتلا انا بالشغل هلا بدي وقت لجيبن من البيت و لاقيلك قلتلي ناطرتك على راحتك رجعت على البيت حطيتن بالسيارة و اخدن على الحديقة لشوف سارة يلي الي شهرين ما شفتا بعد الطلاق و حسيت حالي اني مشتقلا و وقت شفتا ما عرفتا كانت متغيرة نحفانة و حليانة سلمت علي و قلتلي بعد ساعتين تعا خدن لانو عندي موعد قلتلا موعد شو ؟؟؟قلتلي ما بخصك قلتلا ماشي و بعد ساعتين رجعت اخدن و قلتلا طلعي لوصلك لموعدك قلتلي ميرسي في حدا جاي ياخدني تركتا و مشيت و طول الطريق و انا عم فكر لوين رايحة و مين هيدا يلي جاي ياخدا حتى فكرت كذا مرة لف السيارة و ارجع راقبا بس دقولي من الشغل و بعد يومين دقتلي ريما و قلتلي انو ما اتأخر لانو بدنا نطلع نتغدا برا و وقت طلعنا تغدينا قضينا المشوار بالنكد و المشاكل من ورا نور و وليد يلي عذبونا بالاكل و ركضنا وراهن بالمطعم بالاخير ريما قلتلي خلص قوم نرجع على البيت يا ريت ما طلعنا و وقت وصلنا على البيت علقنا مع بعض و قلتلي انا ما بقا قادرة اتحمل وقت اخدك اخدك لحالك ما مع اولادك انا ما مجبورة فين روح حطن عند امن اصلا وينا امن اكيد دايرة على حالها و زاتتلي اياهن انا ربين و طعمين و لبسن و اركض وراهن حياتي انقلبت من فوق لتحت حتى لحالي ما بقا افضيت اهتم فيها لك مشوار ما بقا قدرت اطلع مع رفقاتي متل العالم و الناس لك حتى هنا صارو يتهربو مني و ما يحبو يطلعو معي لانو معي اولاد صغار قلتلا وقت اخديني كنت بتعرفي بهالوضع طلقتا لسارة و تركتلي الاولاد قبل ما نتزوج و انت قبلتي بوضعي هيك قلتلي اي قبلت بس قلت بتشتاق لاولادا و بتبعت بتاخدن بس ما سالت علين ابدا ….

دقيت لسارة تاني يوم و قلتلا بدي شوفك و احكي معك كرمال الاولاد و وقت شفتا قلتلا انو نور و وليد ما بس اولادي و اولادك كمان يا بتصيري تاخدين 3ايام بالاسبوع يا اما ما في تشوفين ابدا قلتلي ما انا يلي بتهدد و اولادي ايمت ما بدي بشوفن حتى لو حرمتني شوفتن في قانون و في محاكم هي بتجبرك تجبلي اياهن لهيك ما تخلينا نفوت المحاكم بيناتنا قلتلا لك حرام عليكي الاولاد عم يسالو وين ماما اشتقنالا خدنا لعندا قلتلي وقتي مليان بين النادي و الكوافيرة و دورات التنمية و البرمجة و مشاويري مع رفقاتي يعني ما عندي وقت الن خلي ماما ريما دير بالا علين يلا انا بدي امشي سلام وتركتني و مشيت ما كنت متوقع ابدا انو سارة يطلع منا هيك و يكون قلبا قاسي و ما تسال على اولادا ابدا …..#hla_gharabli

بقينا شهرين تانين و نحن على مشاكل و نكد من ورا الاولاد كرهت حياتي اكتر من قبل حتى ريما يلي فكرتا انسانة مرحة و هادية طلعت غير هيك تماما على طول منكدة و معصبة من الاولاد و مرة علقت معا و طلعت معصب من البيت و رحت على القهوة لاسهر مع رفقاتي يلي الي زمان ما قعدت معن لانو ريما ما كانت تخليني اسهر برا البيت كرمال ابقى مع الاولاد فتت سلمت علين و قعدت قلتلن وين محمد هالندل عم دقلو كتير ما عم يرد علي و ما عاد شفته ابدا اطلعو رفقاتي ببعض و سكتو قلتلن شبكن شو صاير قلولي ليش ما بتعرف؟ قلتلن شو بدي اعرف؟ اليوم طليبة عروسته لمحمد قلتلن العمى بقلبه ما قلي طيب على القليلة لنباركله بس و مين سعيدة الحظ يلي قدرت و اخيرا تقنعه بالزواج سكتو شوي و نط رفيقي احمد و قلي سارة طليقتك حسيت الدم طلع لراسي قلتلو شو عم تحكى ولا ؟هجمت عليه و ضربته و بعدوني رفقاتي عنه قلولي شبك العمى بقلبك شو دخله احمد بعدين هاي طليقتك ما بقا مرتك طلعت من القهوة و ركبت بالسيارة و بوجهي لبيت اهلا لسارة و طول الطريق و انا عم اكل بحالي و اتحلف لمحمد كيف بيطلبا لسارة معقول حاطط عينه عليها و هي على ذمتي معقول كانو بحبو بعض من قبل و وصلت على بيت اهلا و خبطت على الباب و فتحتلي سارة يلي كانت متل العروس لدرجة ما عرفتا نحفانة كتيرر و رجعت متل اول مرة تعرفت عليها حتى لبسا و وجها كلو تغير ما كانو هاي يلي كانت مرتي فتت متل الوحش على الصالون وينو الندل وينو خاين العشرة و هجمت عليه و ضربته و ضربني و ركض ابوا و اخوا لسارة فكونا عن بعض و دفشوني برا البيت و قلعوني و طلع اخوا لبرا وراي قلي لهون ما بقا بتجي شو جاي تعمل جاي تضرب صهرنا بنص بيتنا قلتلو هلأ هادا صار صهركن قلي انت طليق اختي ولا اهبل شبك انت محرم على سارة و هو رح يصير محلل الها روح لمرتك و اولادك صرت صرخ بنص الشارع سااارة سااارة ولله العظيم انا بحبك و ما بتخيل حدا ياخدك غيري ولله يا محمد لموتك و اشرب من دمك قلي اخوا روح انقلع من هون لميت الناس علينا هاي انت تزوجت رفيقتا بس هي تتزوج رفيقك ممنوع طلعت بالسيارة و انا عم ابكي شو عملت بحالي مرتي رح تصير على اسم حدا تاني كانو كنت نايم و هلأ صحيت سارة البنت يلي حبيتا سارة ام اولادي فتلت بالشوارع ساعات و انا عم ابكي متل ولد صغير و اتذكر كل ايامي و ذكرياتي معا طب ليش طلقتا بس لانو نصحت شوي بس لانو التهت ببيتا و اولادها عني شوي و هي كانت تضحى براحتا كرمال ما تقصر علينا بشي كنت ارجع على بيتي لاقي بيت مرتب و اكلة طيبة و مرة بتحبني ولا لانو ريما دخلت على الخط و خربتلي بيتي …..#hla_gharabli

رجعت على وجه الصبح على البيت و اول ما فتت حست علي ريما و قلتلي بكير ولله منيح يلي تذكرت الك بيت تجي تنام فيه قلتلا ريما ما ناقصك و بلشت ليش شو عملتلك انا ليكني طول نهاري بشتغل متل الخدامة من ورا اولادك ما كنت قادر اسمع ولا كلمة و خاصة صوتا هجمت عليا و ضربتا و فشيت كل قهري فيا انت يلي خربتيلي بيتي انا كنت مفكر حالي ما مبسوط مع مرتي بس لاا انا ما مبسوط معك الله يلعنك و بعد ما ضربتا تركت البيت و رحت على بيتي القديم بيتي انا و سارة و نمت فيه بس تاني يوم الساعة عشرة فقت على صوت خبيط الباب ركضت فتحته و شفت ريما جايبتلي الشرطة و شحطوني شحطة الكلاب على السجن لانو كنت ضاربا و معلم على وجها اكلت اتلة و نمت ليلتين و بعدا دفعت كفالة و طلعت و وقت رجعت على بيت ريما لاخد اولادي و تيابي جيت لافتح الباب ما انفتح معي طلعت مغيرة القفل دقتلا ما ردت علي بعدين بعتتلي مسج (انا بعتت الاولاد لعند سارة و معاهن شنتة تيابن و تيابك و غيرت قفل الباب لهون ما بقا بتجي و بوجهك روح على المحكمة طلقني انا ما عاد بدي اياك )……يتبع

الجزء الرابع:

رحت على بيتي القديم تحممت و غيرت تيابي و رحت لعند سارة و دقتلا قلتلا الاولاد معك قلتلي ايه قلتلا اي نزليلي اياهن قلتلي يلا رح جيبن و جيب معن شنتة التياب قلتلا طيب ناطرك تحت بالشارع بس امشي لقدام مية متر و بتشوفيني ناطرك بالسيارة نزلت هي و الاولاد طلعت الاولاد بالسيارة و انا اخدت الشنتاي منا و حطيتا بالباكاج و لفيت لعندا حملتا و صارت تصرخ و تقلي نزلني يا مجنون حطيتا بالسيارة و طلعت فورا و اخدت موبايلا منا و قفلته و مشيت قلتلي وقف السيارة بدي انزل هلا يلي بدو يشوفنا بدو يفكر رجعنا لبعض و انا هلا بحكم المخطوبة قلتلا و مين قلك انو نحن ما رح نرجع لبعض؟قلتلي انا ما بدي اياك بعدين وينا ريما شكلا تركتك و بس تركتك جاي ترجعني ولا بس شفتني عم روح لغيرك تذكرت انك كنت بتحبني قلتلا انا غلطت بزواجي منا لريما و بدي صلح غلطي و بدي صلحه بطريقتي و ريما رح روح طلقا و بدنا نرجع متل اول بس انا و انت و الاولاد ببيت واحد قلتلي لا شو شايفني لعبة بايدك انا ما بقا بحبك يا ضياء انت جرحتني جرح مستحيل يشفى مع الايام ما بقدر اتقبلك بحياتي قلتلا يعني بدك تفهميني انك بتحبي محمد؟قلتلي لا ما لحقت حبه لسا بس هو انسان منيح من كل الجهات و بشهادتك انت اديش كنت تقلي عنه منيح قلتلا هيدا محمد حسابه معي كبير قلتلي لوين اخدني؟قلتلا رح ننزل على اللادئية نقعد اسبوع و هنيك منكتب كتابنا عند الشيخ و بس نرجع على الشام منثبته بالمحكمة و التفت على اولادي شو بابا بدنا نروح على البحر نسبح قلتلي نزلني هلا ما بدي روح لمحل معك انت مجنون هيدا اسمه خطف قلتلا لو ما بعمل هيك بكون مجنون قلتلي ما بدي ارجعلك بعد الشي يلي عملته فيني فضلت مرة عني انا ام اولادك بس شكلك هلا عرفت قيمتي و عرفت شو هي ريما يلي اكبر هما انو ظفرا ما ينكسر وبعدين قبل ما تفكر ترجعني روح طلقا بالاول مستحيل انحط على اسمك مرة تانية و بعدا هديك مرتك قلتلا لارجع بطلقا قلتلي و بس طلقا انا بفكر ارجعلك و يلا هلا نزلني قلتلا ما رح نزلك و رح نتابع على اللادئية و من هنيك بتشتريلك كام قطعة تياب لدبري حالك فين هالاسبوع قلتلي يلي ببالك ما رح يصير و وقت يسالني الشيخ رح قلو ما موافقة عليك الزواج ما بصير بالغصب قلتلا لوقتا منحكي اعتبرينا رايحين رحلة استجمام و انسي انو نحن مطلقين و بدل ما قاعدة هيك حطيلك على شي غنية لانو الطريق لسا طويل ..#hla_gharabli

بعد 4ساعات وصلنا على اللادئية و اخدنا شاليه قلتلي هات موبايلي بدي حكي اهلي بكون انشغلن بالن علي قلتلا انا ببعتلن مسج بانو نزلتي معي على اللادئية لنتزوج مرة تانية و رح ابعت مسج لمحمد انو ما موافقة عليه لانك بعدك بتحبيني قلتلي مين قلك انو بعدني بحبك و اصلا ما رح يصدقو اهلي انو انا رحت معك بكامل اراداتي رح يعرفو انك اخدتني بالغصب قلتلا ما يصدقو على راحتن يجو يدورو عليكي هون …..

بقينا اسبوع بالشاليه و انا عم حاول قرب عليها و هي ما تقبل و حاولت كتير اقنعا بانو نكتب كتابنا و هي ترفض حلفتلا مية مرة انو انا بحبا حلفتلا مية مرة انو انا ندمان و كنت اعمى بس هي كانت تقلي مستحيل سامحك و انسى شو عملت فيني ايام سودة قضيتها و انا عم اتعذب و بعيدة عن اولادي بالوقت يلي انت كنت فيه بشهر العسل مع رفيقتي قلتلا شو بدك اعمل حتى تسامحيني و ترجعي لبيتك و اولادك قلتلي بس اتزوج رفيقك محمد شي 3شهور و بعدين بفكر برجعلك الا لا بس اذا عجبني محمد و حبيته ما بوعدك ارجعلك قلتلا عم تلعبي باعصابي مسكتا من ايدا و قلتلا بقتلك و بقتلو اذا بتتزوجو قلتلي هاي انا ما قتلتك و قتلتا و وسخت ايدي فيكن عادي كون اوبن مايند قلتلا انا رجال ما بقدر اتحمل فكرة انو مرتي تكون مع غيري ولله بحرقكن قلتلي طيب لوقتا منحكي مشي نسبح هلأ لانو اجتني فرصة استجمام و انا ما بضيعا بالنكد و المشاكل و بعدين يعني كنت لازم اطلق حتى تنزلني اسبوع تصييف باللادئية …..hla_gharabli#

بعد اسبوع رجعنا على الشام و على بيتنا فورا قلتلي خدني على بيت اهلي قلتلا انسي بيت اهلك و فتنا على البيت قلتلا انا نازل على المحكمة لبلش بمعاملة طلاق ريما و انت شوفي البيت شو ناقصه اغراض لارجع بشترين نزلت من البيت و قفلت الباب حتى ما تهرب و بس خلصت شغلي من المحكمة رحت لعند ابوا لسارة على محل شغله و اول ما شافني اخوا هجم علي و بدو يضربني و قلي وينا اختي يا حقير وين رحت فيا عم ندقلا و موبايلا مقفل قلتلو طول بالك اختك ببيتا رجعنا تزوجنا و طلقتا لريما و هاي جيتي من المحكمة و بعدين انا حكيي مع ابوك ما معك اجا عمي و قله لابنه خلص ابني اتركنا لحالنا سلمت عليه و اعتذرت منه و قلتلو انا بحبا لسارة و سارة بتحبني انا خربت بيتي بايدي و ندمت و بدي صلح غلطي و بدي نرجع متل اول و قمت بست راسه قلي انا ما بدي غير بنتي تكون مبسوطة كل رجال الو نزوة بحياته بس المرة يا ضياء اذا انجرحت ما بتنسى و بتسامح بسهولة و حتى لو مرتك قصرت معك شوي و التهت ببيتا و اولادا عنك لازم تكون انت سندا و تساعدا و تقيم حمل عنا شوي ما تركض تتزوج عليا فورا المرة ما بدا قاموس لتنفهم بالمسايرة و الكلمة الطيبة بتمشي متل ما بدك قلتلو صح كلامك عمي و انا هون لارجع اطلب ايدا منك صار يضحك قلي ليش ما تزوجتو لهلا الكن اسبوع مع بعض قلتلو لا انا كذبت على وفيق لامتص غضبه بس سارة بالبيت هي و الاولاد و هلا جيت من المحكمة بس خلص من معاملة طلاق ريما رح بلش باجراءات الزواج لانو سارة مستحيل تقبل ترجع تتزوجني قبل ما تشوف ورقة الطلاق قلي طيب يا عمي بس رجعا على بيت اهلا لانو تعتبر محرمة عليك هلأ لتكتبو االكتاب بترجع على بيتك قلتلو بخاف تغير رايا و تبطل بدا اياني او محمد يتعرضلا و يلعب بعقلا و تتزوجو قلي هاي حياتا و هي بتقرر ما فيك ترجعا بالغصب اذا هي ما بدا قلتلو طيب …..

رجعت على بيتي و قلتلا لسارة انو انا مريت على المحكمة و بعدا لعند ابوكي و اخوكي و حكتلا كل شي صار معي و قلتلا قومي لوصلك على بيت اهلك و بلشت ابكي و قلتلا انا غبي و ندل بستاهل كل يلي عم يصيرر فيني حتى لو ما قبلتي ترجعيلي معك حق بس انا ما بدي اياكي تغلطي متلي و تتزوجي محمد بس لتردي كرامتك لانو كرامتك محفوظة انا يلي اتبهدلت و انهنت و فتت على السجن و اكلت اتلة و انا يلي انذليت و اولادي انا يلي تعبو نفسيتن بغيابك و انا عم نقلن من بيت لبيت انا رح اتركك يومين لتفكري و تاخدي قرارك و بعد يومين بجي على بيت اهلك لاخد منك الجواب النهائي …..

بعد يومين رحت لعند اهلا لسارة و معي بوكيه ورد رحت و انا على اعصابي ماكنت عارف شو بدي اتصرف اذا ما قبلت ترجعلي فتت و سلمت على بيت حمايي و قعدت و اانا خجلان من حالي و طلعت سارة بعد ربع ساعة سلمت علي و قعدت معنا قلتلي انا فكرت منيح و حسيت حالي انو ما بقدر عيش معك و اغفرلك بعد الشي يلي عملته فيني و ممكن ترجع تعيدو نفسه مع وحدة تانية اطلعت فيا و حمرو عيوني و حسيت حالي رح انفجر قلتلا طيب انا رح امشي معناتا و قمت و انا على امل تقلي ارجع انا عم امزح معك و نزلت انا و عم ابكي و قبل ما وصل لسيارتي سمعت صوت عم يناديني التفتت شفت سارة واقفة عالبرندا و عم تناديلي قلتلا شبك نسيتي تقولي شي؟؟ قلتلي اديش بدك تحطلي مهر ؟؟ضحكت و قلتلا رح حط وزنك دهب قلتلي و بلكي زاد وزني قلتلا بزيدو الدهبات قلتلي معناتا اطلع و طلع معك الميزان ….

انتهت.