مقبلاتي الشهية ملكة المقبلات
مقبلاتي الشهية ملكة المقبلات
المقادير
- مقادير جيبة التاجر للعجينة:
- نصف كيلو طحين ابيض
- معلقة كبيرة خميرة فورية
- معلقة صغيرة ملح
- معلقة صغيرة سكر
- نصف كوب حليب
- ماء دافئ للعجن
- للحشوة:
- بصل
- صدور دجاج
- ملح
- فلفل أسود
- بابريكا
- هيل مطحونة
- قرفة مطحونة
- ملعقة صغيرة خل
- مايونيز
- مكونات البرغل ببندورة:
- برغل خشن
- زيت نباتي او زيت زيتون
- بصل مفروم ناعم
- بندورة مفرومة ناعم
- ملح
- فلفل أسود
- مقادير للفول بزيت:
- فول مسلوق
- بندورة مقطعة
- عصير ليمون
- بقدونس مفروم
- توم مهروس
- زيت زيتون
- ملح
- مقادير الكبة التركية:
- نصف كيلو برغل ناعم
- بصلة كبيرة
- بندوراية كبيرة
- فليفلاية
- نصف كوب زيت
- نصف كوب دبس رمان
- ثلث كوب دبس بندورة
- ملح
- فلفل أسود
- بابريكا
- رشة كمون
الخطوات
بسم الله الرحمن الرحيم
طريقة تحضير جيبة التاجر
منخلط الطحين والخميرة والسكر والملح منيح مع بعض
بعدين منضيف الحليب عليهم ومنبلش نضيف المي ونعجن لنوصل لعجينة لا طرية ولا قاسية ومنعجنها كتيييييييير مشان تعطينا قرمشة بالقلي ومنتركا تختمر ساعة واذا زادت عن ساعة مو مشكلة
منفردها ومنقطعها بشي مدور ومنقليها بزيت غزير حااامي
ومنلاحظ انها شوي صغيرة وبتنفخ منقلبها ومنقيمها ومنتركها لتبرد شوي
بالنسبة للحشوة منضرب البصل عالفرامة او منقطعو ناااعم ومندبلو بشوية زيت ومنضرب صدورة الجاج عالفرامة ومنحطو فوق البصل ومنضيف عليه الخل ومنقلبهم ليستوو تقريبا منضيف البهارات والملح ومنخلطهم منيح ومنطفي
بس يبرد الجاج منضيف عليه المايونيز وبالنسبة للمايونيز انا نزلت طريقتو قبل مع الكريسبي اذا بتتذكروه طعمتو رائعة وخاصة مع هالاكلة
ومنحشي طابات العجين بهالحشوة واستمعتعو بالجمال هههههه
اما بالنسبة للسلة فعملتها بعجينة عادية بشكل شرايط متل مو واضحة بالصورة ودهنتا بصفار البيض مع ملعقة خل وقدمت الجيبات فيها
يارب تجربو هالاكلة وتنبسطو فيها لانها فعلا رائعة بهالطريقة
طريقة تحضير البرغل ببندورة
منقلي البصل بالزيت ليدبل منضيف البندورة كمان لتدبل منحط مقدار المي ليغلي منضيف البرغل منغليه شي 5 دقايق على نار عالية بعدين منغطيه ومنوطي النار ليستوي تماماً
هالاكلة ممكن تتاكل لحالها كوجبة خفيفة ومفيدة وممكن تتقدم جنب الكباب او لحم شقف متل مابيعملو الاتراك ههههه
طريقة تحضير الفول بزيت
منسلق الفول وبدل ما نحطلو بيكربونات الصوديوم لحتى يستوي منحطلو ظرف بيكينغ باودر ورح يطرى عالآخر ومنكون تخلصنا من اضرار البيكربونات
بس يستوي ويبرد شوي منصفيه ومنضيف عليه باقي المكونات بكميات حسب الرغبة ومنخلطو بهدوء
طريقة تحضير الكبة
مننقع البرغل بشوية مي دافية ومنغطيه شوي وبهالاثناء منبرش او عالخلاط منضرب البصل والبندورة والفليفلة ومنحطهم عالبرغل ومنخلطهم سوا ومنرجع نغطيه لحتى تمتص حبات البرغل المكونات وترتاح لحوالي ساعة او ساعتين بهالاثناء منخلط دبس الرمان ودبس البندورة والزيت والبهارات واذا في دبس فيفلة فينا نحط كمان ورشة بقدونس اذا موجود ومنضيفهم عالبرغل ومننادي لابو العيال لانو صار دورو بالدعك هههههه هية اصولها بتندعك بالايد منيح لحتى تتماسك لكن اذا حبيتو تفرموها عالماكينة انتو حرين هههه وبعد ماتندعك منيييح وتتماسك بتصير جاهزة للتقديم ممكن مع خضار وممكن مع شوية زيت وجوز حسب رغبتكم وبس يا احلى أميرات بتمنى تجربو هالوصفات وتدعولي وبوعدكم رح تلاقو رشاقة مالها مثيل هههههه
بحبكم من كل قلبي كلياتكم
