كيكه جاناش الشكولا
كيكه جاناش الشكولا
المقادير
- 6 بيضات
- نصف كوب حليب
- نصف كوب زيت
- كوب وربع سكر
- فنجان ماء دافئ
- ملعقه خل ابيض
- نصف ملعقه كربونات
- فانيليا ظرف بكمبودر 30 غ
- رشه ملح
- 3 اكواب دقيق منخول 3 مرات
- برش ليمون او برتقال
- للجاناش:
- كوب كريمه سائله
- تنين كوب شكولا دارك
- للتزيين:
- ظرف كريم شانتييه
- مالتيزرز
- اوريو
- كيندر بوينو
الخطوات
السلام عليكم صبايا زاكي اليوم راح شارك معكن كيكه بتصلح لاعياد الميلاد او كيكه اسفنجيه مع كاسه شاي للضيوف والاحباب
اول شي لنجاح اي كيك صار الكل يعرف انو لازم تكون المقادير كلا بحراره المطبخ اهم سبب من اسباب النجاح
منبدأ بفصل البياض عن الصفار
منضيف للصفار نصف كميه السكر والفانيليا وبرش الليمون ومنخفق على سرعه عاليه لمده ١٠ دقائق لحتي يتغير اللون ويصير فاتح
منجيب البياض ومنبلش نخفق ونضيف كميه السكر الباقيه بس بالتدريج لحتي ينفش البياض معنا ويصير رغوه كثيفه ومنخلي عجنب
منرجع للصفار منضيف عليه الزيت والحليب ومنخفق
منجيب فنجان مي صغير منضيف عليه ملعقه الخل والكربونات ومي دافيه ومنضيفو للسوائل ومنخفق لتمتزج المكونات كلا
منجيب الطحين المنخول مع البكمبودر ومنبدأ نضيف بالتدريج ليختلط مع السوائل راح تلاقو الخليط تقيل
هون منشيل المضرب ومنستخدم سباتولا او ملعقه ومنضيف البياض شوي شوي ومنحرك من تحت لفوق بخفه لتخلص معنا كميه البياض منلاقي خليط الكيك صار جاهز للخبز
طبعا فرن محمى مسبقا على ١٨٠ بياخد من ٤٥ ل ٥٠ دقيقه ومنختبر النضج بعود خشبي
لما نلاقي الكيك استوى منتركوا بالفرن ربع ساعه يهدا ومنخلي باب الفرن مفتوح شوي
الجاناش
منجيب علبه كريمه سائله منسخنا على النار بس تغلي منشيلا ومنضيف عليها الشكولا ومنحرك ومنتركا عجنب بصير عنا خليط سائل للتغطيه الكامله للكيكات ولو تركنا لتاني يوم راح يصير سميك قوامو متل قوام الكريما منقدر نزين فيه بكيس الحلواني
لما بردت الكيكه طالعتا قسمتا نصفين وسقيت كل نصف بقطر خفيف وحشيتا فواكه وبعدا حطيتا على شبك وغلفتا بالجاناش
حطيتا بالفريزر عشر دقايق وبعدا كملت التزيين
خفقت مغلف كريم شانتييه مع نصف كوب حليب متلج وزينت الاطراف
وحطيت عليها الشكولا والاوريو والمالتيزرز ورجعتا للفريزر عشر دقايق
بتمنى تعجبكن
صحه وهنا للجميع
