معكرونة بنكهة مميزة مع حيلة تفرح الأطفال

المقادير

• معكرونة سباغيتي
• بصل مقطع جوانح صغيرة
• مكعبين ماجي
• خليط من الزبدة والزيت
• كريما للطبخ واذا مو متوفرة استخدمو القشطة بتعطي تقريبا نفس النتيجة
• فطر مقطع شرائح
• قليل من جبن القشقوان او الموزاريلا
• ملعقة دبس بندورة مندوبها بشوية مي لتمتزج بسهولة
• صلصة البشاميل:
• زبدة
• زيت
• الطحين
• حليب

الخطوات

بسم الله الرحمن الرحيم

مندوب الزبدة مع الزيت ومنضيف مكعبين الماجي والبصل ومنشوحو لحتى يدبل

منضيف ماء مغلي حسب كمية السباغيتي وملح حسب الرغبة ومنضيف السباغيتي ومنركا لتستوي

بطنجرة تانية منطبخ البشاميل ومنضفلو ملح وفلفل اسود وبس يتسبك البشاميل منضيف الكريما او القشطة وجبنة القشقوان وشرائح الفطر ومنحرك ليدوب القشقوان ويبلش الفطر يدبل منطفي

وبس تقرب تستوي المعكرونة منضيف عليها دبس البندورة ومنخلطها ليتجانسو مع بعض وبس تستوي منضيف الصلصة البيضا ومنحرك وبتصير جاهزة للتقديم

بالنسبة للحيلة هية بسيطة كتير وبنفس الوقت حلوة

غلفت بطاطاية بالقصدير متل مو شايفين بعد ماقمت شرحة رقيقة من سفلها بس لحتى يصير الها قاعدة مستوية وحطيتها بسفل الجاط وغرزت فيها اعواد الشوي الخشب ودخلتهم بالشوكة

ولما صبيت السباغيتي حطيت عالشوكة وطبعا بتحاولو تكترو عليها لحتى ماتبين اعواد الخشب وهيك بتبين كأنها طايرة وشايلة الاكل لحالها

• كمية من صلصة البشاميل (عبارة عن زبدة وزيت مندوبهم ومنحمس فيهم الطحين ومنضيف عليهم حليب ومنحرك ليسمك المزيج)

يارب تعجبكم وتعجب ولادكم

جربوها ودعولي بالبركة وبكل شي حلو متل قلوبكم الراقية

بحبكم من كل قلبي وبتمنى تبقو دايما بأحسن حال