مكعبات الشوكولاتة من كتاب زاكي الرائع 3

المقادير

• للطبقة الأولى:
• 3 كوب بسكويت سادة مطحون
• علبة صغيرة قشطة
• لطبقة الكراميل:
• كوب وربع سكر
• ربع كوب ماء
• 2 ملعقة كبيرة زبدة متماااسكة وليست سائحة
• 2 ملعقة كبيرة قشطة
• 2 ملعقة كبيرة حليب سائل
• رشة فانيليا
• للطبقة الثالثة:
• 4 حبات شوكولاتة سادة بوزن 35 غرام للواحدة
• 4 ملاعق كبيرة زيت نباتي

الخطوات

بسم الله الرحمن الرحيم

كيفكم يا اميرات؟؟ هالوصفة المميزة من كتاب زاكي وانا نقلتلكم المقادير متل ماهية بس انتو طبعا بدكم تنتبهو لحجم القالب وتتحكمو بالعيارات متل مابناسبكم

متل مو ملاحظين انا مسمكة طبقة الشوكولا شوي يعني حسب انتو كيف حابين الطعمة تحكمو بالطبقات وهنا وعوافي حبيباتي

منعجن البسكويت المطحون مع القشطة منيح ومنرصهم بالصينية ومنضغط عليهم ليصير عنا طبقة متساوية

منجي للطبقة التانية

بطبق صغير منخلط القشطة والحليب والفانيليا سوا

وبطنجرة منحط السكر مع الزبدة الباردة والمي ومنشغل عليهم الغاز على نار متوسطة بدون مانحرك لحتى مايسكر معنا

وبعد مايغلي ويبلش يظهر لونو الذهبي متل مو واضح بالصورة منخفف النار عليه ومنضيف عليه الحليب والقشطة والفانيليا ومنحرك بسرعة ليتجانسو منيح ويتماسك الكراميل اللذيذ

منخليهم عالنار الخفيفة لمدة دقيقة ونصف مع التحريك المستمر وبعدا منطفي ومنسكب الخليط فوق طبقة البسكويت ومنحطو بالبراد بس شوي صغيرة لبين مانجهز الطبقة الثالثة تبع الشوكولا

بدي الفت نظركم انو اذا الواحد ارتكب غلطة ممكن يقسى الكراميل او يسكر

يعني اذا غلى عالغاز زيادة رح يقسى معكم اكتر

منجي للطبقة الاخيرة اللي هية الشوكولا

مندوب قطع الشوكولا الصغيرة على حمام مائي مع الزيت

ومنضيفها فوق طبقة الكراميل بعد ماتكون تماسكت شوي بهدوء ومنرجعها للبراد لمدة نصف ساعة وبعدها يمي يمي

ماتعملو متلي وتستعجلو لانو رح تنزل الشوكولا بقلب الكراميل وماتخليه على استقامة وحدة واهئ اهئ

يلا مو مهم الشكل المهم الأخلاق

عفواً قصدي الطعمة -_-

جربوها حبيباتي مع فنجان قهوة لذيذ ودعولي دعوة حلوة

بحبكم من كل قلبي وبشوفكم في الحلقة القادمة هههه