تشيز كيك بنكهة الشوكولا والقهوة ولا أروع
تشيز كيك بنكهة الشوكولا والقهوة ولا أروع
المقادير
- للطبقة الأولى:
- كوبين بسكويت دايجستف مطحون
- ربع كوب زبدة
- للطبقة التانية:
- باكيت كريما بنكهة الشوكولا
- ملعقتين كبار شوكولا نوتيلا او اي نوع تاني
- 3 ملاعق كبار قشطة
- ملعقتين كبار جبنة دهن
- نسكافيه
- حليب
- بين الطبقات:
- قطع موز
- كرات صغيرة شوكولا
- بسكويت
- بنسكافيه
- حليب
- الطبقة الاخيرة:
- باكيت كريمة فانيليا
- 3 ملاعق كبار قشطة
- 4 ملاعق كبيرة جبنة دهن
- ملعقة صغيرة شوكولا
- للتزيين عملت كريمة زبدة:
- زبدة لينة
- سكر بودرة
- كريمة سائلة
- او قشطة دهن
الخطوات
بسم الله الرحمن الرحيم
للطبقة الأولى ((كوبين بسكويت دايجستف مطحون + ربع كوب زبدة مدوبة وممكن اكتر شوي بحيث انو يتماسك البسكويت بس نضغط عليه))
للطبقة التانية ((باكيت كريما بنكهة الشوكولا + ملعقتين كبار شوكولا نوتيلا او اي نوع تاني + 3 ملاعق كبار قشطة + ملعقتين كبار جبنة دهن + نسكافيه مذوبة بملعقتين حليب وبالنسبة لكمية النسكافيه حسب كيف بتحبو قوة طعمتها بالنسبة الي حطيت ملعقة صغيرة))
بين الطبقات حطيت متل مو شايفين قطع موز وكرات صغيرة شوكولا وفوقهم بسكويت مغطوط بنسكافيه مدوبة بحليب بامكانكم تستغنو عن اي مكون من هدول بس بالنسبة الي حبيت ميز هالقالب هالمرة وكانت طعمتو فاخرة تماما ههههه
الطبقة الاخيرة (( باكيت كريمة فانيليا + 3 ملاعق كبار قشطة + 4 ملاعق كبيرة جبنة دهن + ملعقة صغيرة شوكولا))
للتزيين عملت كريمة زبدة ((زبدة لينة + سكر بودرة + كريمة سائلة او قشطة دهن))
اول شي منعجن البسكوت المطحون بالزبدة ومنرصهم بالقالب ومنحطو بالبراد لبين مانعمل الطبقة التانية
منخفق الكريمة ومنضيف عليها باقي المكونات ومنخلطهم ومنضيفهم عالبسكويت ومنحطها بالبراد لبين مانجهز اخر طبقة
منجهز الطبقة الاخيرة بنفس طريقة الطبقة اللي قبلها واذا حبينا منحط بيناتهم شي
ومنضيف الطبقة الأخيرة ومنغطي القالب ومنتركو بالبراد ليبرد ويتماسك تماماً والافضل يبقى ليلة كاملة لنتيجة رائعة
بالنسبة لكريمة الزبدة تبع التزيين اذا حبيتو تعملوها فهية سهلة كتير
لازم تكون الزبدة لينة يعني مو باردة ولا سايحة
منخفقها لتصير كريمية ومنضيف عليها السكر البودرة حسب الرغبة ومنرجع نخفقهم منيح ليمتزجو تماماويصير شكلهم كريميييي ومنضيف عليهم الكريما السائلة او القشطة ومنرجع نخفقهم شوي وهيك بتصير جاهزة حبيباتي
ملاحظااااات مهمة كتير
♡ بالنسبة للكريما لازم تنخفق بحليب باااااارد كتيييير لتنجح تماما
♡ احرصو المزيج تبع الكريما مايسيل كل ماكان متماسك اكتر بكون افضل،، يعني ماتكترو الحليب اللي رح تخفقو فيه الكريمة
♡ اذا حبيتو تستغنو عن نكهة القهوة استغنو عنها للي مابيرغبوها
♡ بس تاكلوها لا تحسبو السعرات الحرارية والذي منو حرصاً على استمتاعكم بالطعم ههههههه
♡ الملاحظة الأخيرة هية اني أحبكم في الله
وبشكر رب العالمين على صحبتكم وبتمنى تدعولي بالبركة ودعوات حلوة من قلوبكم الصافية
وانتظروني في الحلقة القادمة هههههه
