مقبلاتي فطيرة الدجاج عالغاز ملكة المقبلات

المقادير

• مقادير الحشوه :
• دجاج مسحب
• حبة بندوره
• حبة فلفل أخضر
• راس بصل
• زيت قلي
• ذره أو شرائح زيتون
• جبنة موزريلا
• مقادير العجين :
• كاستين طحين
• م ص خميره
• م ص باكنج باودر
• م ص ملح
• معلقتين طعام زيت زيتون
• بيضه
• ماء دافئ للعجن

الخطوات

مساااء الخير للجميع …اليوم راح اقدملكم طريقتي بمقبلات فطيرة الدجاج عالغاز سريعه وسهله ..

وبنصحكم تجربوها بتشهيي ..

وبتمنى تعجبكم وتضيفوها عالمفضله

ويلااا مع شرح الطريقه …

& اول شي بنكون مجهزين الدجاج المسحب منظف ومغسل وبنقطعه لمكعبات صغيره

& بنقلي راس بصل ولما يذبل ويصير لونه ذهبي بنضيفله الدجاج وبنقليه لحتى ياخذ لون ..ومن ثم بضيف الملح والفلفل الاسود والكاري وبهارات دجاج

& وبنضيف الفلفل المفروم ناعم ..وبندوره مفرومه ناعم وبقلبهم وبخليهم عالنار واطيه لحتى يستوي الدجاج ..هو ما بطول وما باخذ وقت كتير ..

& وممكن تضيفو اذا بتحبو أخر شي قبل ما اطفو الغاز شرائح زيتون او ذره او فطر لكم الخيار ..انا ضفت الذره بس لانه أولادي ما بحبو الزيتون والفطر ..بتضيفو يلي بتحبو وبتقلبوهم وهيك بتكون معنا الحشوه صارت جاهزه

& هلأ بنجهز العجينه بنضيف للطحين معلقة باكنج باودر ومعلقة خميره.. ومعلقة ملح.. وبيضه..

ومعلقتين زيت زيتون ..وبنخلطهم سواا ..وبنبلش نضيف المي الدافيه شوي شوي ونعجنها لحتى تتجانس

& والعجينه بتكون عندي رخوه شوي عشان يسهل فردها ..بتكون اقل سماكه من عجينة المعجنات المعتاده

وبنتركها عشر دقائق فقط لترتاح مو لتختمر

& بنكون جهزنا المقلاه ودهناها زبده او زيت ..وبنضيف نصف كمية العجين وبنفردها ..وبنضيف الحشوه وبرش عالوجه الحشوه جبنة موزريلا ..وبعد هيك بضيف كمية العجين كامله بحذر عشان تتغطى عندي الحشوه من فوق واذا احتجت بفردها شوي شوي بمعلقه مدهونه زيت

& بحطها عالغاز عالنار اقل من الوسط بشوي وبنتبهلها عشان ما تنحرق ..وبغطيها ..وبعد ما يمر تقريبا عشر دقائق او أقل ..بنقلبها عالجهه التانيه عشان تاخذ لون وتستوي من الجهتين ..

& وطريقة القلب عالسدر أو جاط يكون اكبر من المقلاه بقلب الفطيره عليه عشان اقدر اقلبها عالجهه التانيه

برجع بنزلها بالمقلاه وبغطيها ..وهون بدي انتبهلها عشان ما تنحرق لانه بتكون تقريبا مستويه

& وأخر شي لما اشوفها اخذت لون بطفي تحتيها وبضعها في صحن التقديم وبرش عالوجها جبنة الموزريلا وهي ساخنه ..

ان شاء الله تعجبكم الطريقه انا حاولت احكيلكم أدق التفاصيل عشان هيك شرحي طويل بس الوصفه سهله ..وصحه وعافيه