رواية شيطان العشق بقلم اسماء الاباصيري الجزء التاسع

هتفت به فى ذهول

آيات : انت …. انت بتقول ايه ؟

هم بالاجابة عليها و مازالت نظراته تخترقها بعبث لتقاطعه دافعة اياه فجأة للخلف و تهب هى واقفة مبتعدة عن الفراش

آيات : ابقى خلى بقى الشيطان يحضرلك الاكل

ثم انطلقت مسرعة الى خارج الغرفة لترتسم ابتسامة واسعة على محياه و يرتمي بجسده بتعب على الفراش

طائف : البيت صفصف علينا يا آيات و هوقعك يعنى هوقعك ….. يا انا يا انتي

ثم تحرك بعدها مغادراً الغرفة هو الاخر ………. هبط الدرج بهدوء يبحث عنها بعيناه لكن لا اثر لها بأية غرفة من الغرف …… خمن وجودها بالمطبخ ليتوجه نحوه و يصدق ظنه …….. فها هى تقف امام الثلاجة تلتقط شيئاً ما منها و تضعه بفمها ثم تعيد الكرة مرة اخرة بسرعة و كأنها تخشى الامساك بها

طائف بحدة مصطنعة : آنسة آيات ….. بتعملي ايه عندك

اجفلها صوته لتسقط قطعة مما كانت بيديها ارضاً فتنظر نحوها كألاطفال بحسرة على ضياعها ……… و ارتفعت بأنظارها نحوه بغيظ

آيات : انت مش لوحدك اللي متغدتش ……. و بعدين شايف عملت ايه

ثم اشارت الى ما سقط منها لينظر هو الاخر اليه فيجده قطعة شيكولا دائرية الشكل

طائف بتهكم : شيكولاتة ….. بتتغدي شيكولاتة

آيات : الجيش قالك اتصرف … و بعدين انا مفييش حيل اني اقف اعمل اي اكل لنفسي … انا واحدة لسة مضروبة بالنار و جرحي جديد و محتاجة راحة …. مش ده كلامك

اتجه نحوها يمسك بها من مرفقها ليسير معها نحوه احد المقاعد و يجلسها عليه ليتحرك هو بحرية مشمراً عن ساعديه مرتدياً مريول المطبخ

آيات بدهشة : أنت .. أنت بتعمل ايه ؟

طائف بغرور : شايفة ايه ؟

آيات : لا متقولش انك هتتجن و تعملها

طائف بحنق : شايفة حل تاني ؟ الجيش قالك اتصرف ….. قال جملته تلك بغمزة لتردف هي

آيات : انت مش بتعرف حتى تحضر الاكل لنفسك .. عايز تطبخ ؟ طب اقولك خلينا نطلب اي اكل جاهز

طائف : واضح انك مخدتيش بالك الفيلا موجودة فى منطقة عاملة ازاى … مفيش حد هيكلف نفسه و يوصل اى اكل دليفري لحد هنا

آيات : يعنى خلاص مفيش حل تاني …. ربنا يستر بقى و بعد اكلك ده مرجعش للمستشفى تاني

طائف بفخر : عيب عليكي

بدأ بإعداد الطعام و قد ظهر اخفاقه فى خطواته الاولى لكن حاول تدارك الامر بصعوبة لتكتم هى ضحكاتها بداخلها على تصرفاته الخرقاء و التي تراه بها لاول مرة

و اخيراً يبدو انه قد انتهى تماماً من التحضير و حالياً ينتظر نضج الطعام … توجه نحوها ينظر اليها بغرور و تكبر

طائف : شوفتى

آيات بضحك : العبرة بالنهاية

اومأ هو بغرور ليجدها تنظر نحوه بإبتسامة غريبة ليسأل

طائف : ايه ؟

آيات بنفس الابتسامة : ايه انت ؟

طائف : بتبصيلي كده ليه ؟ هو انا عارف اني مز بس توقعتك لاحظتي ده من زمان

آيات : بصراحة ده سبب انى ببصلك فعلاً …….. من امتي بنقعد انا وانت كده

طائف: كده ؟

آيات : بهدوء …. لا و طائف بيه العمري بيهزر و يضحك براحته خالص …… كإنك شخص تاني

طائف بتفهم : مفيش انسان جد على طول

آيات : اتعودت انك تكون استثناء …. عمري ما توقعت رد فعلك

طائف بإبتسامة : ولا انا …. نظرت له بإستفهام ليوضح ……….. ولا انا توقعت رد فعلك

آيات فجأة : آسر كان هنا النهاردة

تجهمت ملامحه فجأة و لكن مازال متمسكاً بهدوءه

طائف : مش قولتلك عمري ما توقعت رد فعلك ….. ها و بعدين ؟

آية بتعجب : متفاجئتش يعني

طائف : مظنش انك متخيلة انى مش هعرف حاجة زي دي و خصوصاً انها حصلت فى بيتي

اومأت بهدوء لتكمل

آيات : طلب مني امشي معاه و اسيب هنا

طائف بهدوء مصطنع : و انتي ايه رأيك …. هتمشي

هدوءه اجفلها و تسبب فى توترها …. بهذه السهولة يسألها ان كانت ستقبل بالذهاب ام لا … وجدت نفسها تلقائياً تجيبه قائلة

آيات : قولتله يديني فرصة افكر

طائف : و فكرتي ؟؟

الى هنا و كفى …….. هتفت به بحدة

آيات بقوة : ايه عايزني اقبل و امشي … خلاص بقيت حمل تقيل على حضرتك .. طب ايه رأيك بقى اني مش رايحة فى حتة و هفضل على قلبك …. متنساش يا بيه انك انت السبب فى اللي انا فيه

اتسعت ابتسامته لينظر لها بخبث و مكر فتدرك هي تحقيقه لمراده فها هي قد اتخذت قرارها بالبقاء دون تفكير …….. اخذ كلاً منهما يتبادلا النظرات حتى اصبح استنشاق الهواء امراً صعباً ….. ظناه بسبب وضعهما و افكارهما و التى اتخذت منحنى اخر و لكن كانت هى اول من انتبه لما يحدث لتجد المكان قد امتلأ عن آخره بالدخان لتهتف بصراخ

آيات بصراخ : الاكل … الاكل اتحرق ………. هتولع فينا عشان ناكل

انتفض اثر صراخها ذاك ليتوجه نحو الموقد محاولاً انقاذ ما يمكن انقاذه لكن قد فات الاوان على ذلك

نجدهم بعد فترة يتناولان بعضاً من البيض المقلي و انواعاً مختلفة من الجبن

آيات : و ادي اخرتها …. كنا هنولع مع البيت و فى الآخر رست على بيض و جبنات

طائف بتذمر : كلى وانتى ساكتة

انتهيا من تناول الطعام ليطلب منها الانتظار للحظات …. توجه للخارج ليعود و بيده شيئاً ما مُغلف كهدية ليناولها اياه

آيات : ايه ده ؟؟

طائف: ده ليكي….. شوفيه بنفسك

تناولته منه بهدوء و بدأت فى فتحه لتجده هاتف احدث طراز

آيات : موبايل

طائف : بدل القديم

آيات بعتاب : قصدك بدل اللي رميته

طائف : انسي بقى …. ساعتها كنت متعصب

تنهدت بإستسلام و همهمت شاكرة قبل ان تستأذن منه لتستريح بغرفتها بعض الوقت ……. اومأ بهدوء ليخبرها انه هو الاخر سينعم ببعض النوم بعد تعب يومان دون راحة

و اتجها كلاً منهما نحو غرفته للراحة و النوم

دلفت الى غرفتها بهدوء و جلست على فراشها تفكر بحيرة …… هل تسرعت بإتخاذ قرارها بالبقاء و هل جاء كرد فعل على حديثه ام نتيجة لاقتناعها بداخلها ان بقائها معه هو الحل الامثل ….. ظلت فترة على حيرتها تلك لتردف بعدها

آيات : متكذبيش على نفسك يا آيات ده كان اختيارك فعلاً …. ده غير انك مكنتيش حاسة براحة لما قولتى لآسر انك هتمشي و حكاية انك هتفضلي لغاية ما تبلغي طائف ده كانت حجة …… طب و آسر ؟؟؟؟

ظلت تفكر بطريقة ما لاخباره بقرارها ذاك لتصل اخيراً الى انها ستبعث به كرسالة له …….. فعلت ما توصلت اليه لتغلق هاتفها بعدها و تخلد الى النوم بسلام

بفيلا الرفاعي

آسر بصراخ : مؤنسسسسس انت يا زفت

مؤنس بخوف : اوامرك يا باشا

آسر بوعيد : احسن رجالة عندنا تحضرهوملي عايزهم قدامى بسرعة ………. ورانا مشوار مهم ولازم يخلص

مؤنس بتوتر : عيوني يا باشا

آسر : غور من قدامى اتحرك ……. يلااا

انصرف مؤنس ليمسك آسر بهاتفه مرة اخرى يعيد قراءة تلك الرسالة والتى بعثت بها آيات منذ لحظات

” آسر انا آيات

انا آسفة للي هقوله بس انا فكرت فى الموضوع مرة تانية و لقيت اني مرتاحة اكتر هنا ….. مع طائف ….. و بخصوص اللي بينا فأنت هتفضل اخويا و سندي اللى عمري م اقدر استغنى عنه

آسفة ”

آسر بغضب : ليه يا آيات ليييييييييييه …….. بس يا ويلك مني يا طائف لو كان كل ده بسببك و كنت انت اللى اجبرتها على كده

شعر بهاتفه يهتز بين يداه ليجده اتصال من لينا …. قطع الاتصال بضيق ليهتف

آسر : مش وقتك انتى كمان دلوقتى

مرت عدة ساعات نعم فيها بنوم هانيء ليفتح عيناه بكسل … ينظر لسقف غرفته بشرود فيبتسم ابتسامة واسعة عند تذكره حديثها و اختيارها له للبقاء بجانبه ……… بعد لحظات تحرك من فراشه بهدوء متجهاً الى خارج الغرفة نحو غرفتها للاطمئنان عليها …… طرق الباب برفق لكن لا رد ….. توقع استغراقها فى النوم ليفتح الباب بهدوء و يدلف الى الداخل لكن لم يجدها بالفراش …. عقد حاجبيه بدهشة ليترك الغرفة باحثاً عنها بالاسفل

و بعد لحظات من البحث بجميع ارجاء الفيلا ….. لا وجود لها ….. ظل يهتف بإسمها بصراخ لكن لا رد ………. بدأ شعوره بالقلق يتفاقم ليتحول هدوءه الى سراب و يظل يهتف و ينادي كالمجنون…….. توجه من فوره الى غرفة الامن لعلهم قد رأوها اثناء خروجها من المنزل لشراء غرض ما لكنه تسمر بمكانه عند دلوفه لغرفتهم …… فلم يكن بإستطاعته سؤالهم اذ كانو جميعاً مدرجين بدماءهم ……. لم يصبحو سوى جثث هامدة و قد تيقن ان الامر جلل و احتمال كونها بخطر اصبح شئ مؤكد

نهش القلق و الذعر قلبه ليتوجه من فوره الى شاشات المراقبة المتواجدة بالغرفة و بدأ بإسترجاع اخر ساعات قد لقطتها الكاميرات ….. ظل يراقب و يراقب بتحفز … يشعر بجسده الذي يرتجف و لاول مرة قلقاً و خوفاً من اصابتها بمكروه ….. لكن لابد من تماسكه و محاولة استعادته لبعض من الهدوء و هو ما اصبح مستحيلاً فور رؤيته اقتحام بعضاً من رجال آسر منزله …. كان التعرف عليهم سهلاً فهم خيرة رجاله المعروفين ……….. ضرب بيداه شاشات المراقبة لتقع ارضاً مُحطمة تماماً ليذئر فى غضب

طائف : آسر عديتلك كتير اوي بس خلاص ده اخرك معايا بعد كده ملكش عندي دية

ثم انطلق خارج الغرفة متجهاً الى الفيلا مرة اخرى ليلتقط هاتفه و يجري اتصالاً بالشخص الوحيد القادر على رصد تحركات آسر و ادراك مكانه الحالي

طائف بوعيد : عايز مكان آسر دلوقتي ……. من غير كُتر كلام عايزه فى رسالة

ثم اغلق الهاتف دون سماع رد من الطرف الاخر

استيقظت من نومها لتفتح عيناها ببطئ و ترمش عدة لحظات تحاول التعرف على محيطها لتدرك خلال ثوان انها ليست بغرفتها بفيلا طائف …. انتفضت تجلس بمكانها تتفحص المكان حولها لتجد انها بغرفة ليست بالنظيفة ولا المتسخة لكن يمكن القول انها قابلة للعيش بها و ها هي ترقد على فراش ليس بوثير لكن مقبول ………. وباقي الغرفة فارغة ……. وجدت باب الغرفة يفتح ليطل منها هو بملامح جامدة سرعان ما لانت فور رؤيتها مستيقظة

آيات بدهشة و قلق : آسر ؟؟؟؟؟؟؟

آسر : مالك قلقانة كده ليه ؟ ايوة آسر يا آيات

آيات : أنا .. انا جيت هنا ازاى و امتى و انت بتعمل ايه هنا

آسر : اهدي يا يويو انا اللى جبتك هنا … كنت مستحيل اسيبه يأثر عليكي اكتر من كده

آيات بحدة : هو مين ده اللى بيأثر عليا ؟؟؟ طائف ؟؟؟؟

آسر بغضب : و هو فيه غيره ….. اكيد هددك بإنك لو مشيتي و سيبتيه مش هيسكت

آيات : محدش هددني يا آسر ده كان قراري انا

آسر و قد اقترب منها اكثر : آيات حبيبتي هو مش هنا مش هيقدر يعملك حاجة قوليلي الحقيقة متخافيش

نظرت نحوه بقلق و خوف و آثرت الصمت على مجاراته فى الحديث فهو يبدو بحالة غير طبيعية

آيات: آسر خلينا نمشي من هنا و رجعني مكان ما اخدتني …. صدقنى طائف مش هيسكت و كفاية اوي العداوة اللي بينكم متزودهاش

آسر بحدة : محدش هيمشي من هنا يا آيات لا انا و لا انتى و بخصوص العداوة فهي موجودة من زمان و هو اللي بدأ

ظلت تنظر نحوه بضعف و قلق … لأول مرة تهابه و تقلق فى وجوده .. لطالما كان الاخ و الصديق لطالما كان سندها و الان هو مصدر خوفها و قلقها …… ظلت تراقبه للحظات حتى تعلقت انظارها بشيء ما خلفه لتتسع عيناها ذعراً و قلقاً هاتفة بأسمه

آيات : طائف

التفت سريعاً للخلف ليجد طائف يقف بثبات مُشهراً سلاحه بوجهه و ينظر نحوه بغضب و كره رآه لاول مره بعينه

آسر بقلق : ازاى عرفت المكان … و ازاى قدرت تدخل هنا … و رجالتي ؟

طائف بتهكم : رجالتك فى خبر كان ……….. شكلك نسيت انت بتتعامل مع مين ….. غريبة يا آسر ده انت اكتر واحد عارفني و انت اللي ادتني لقبي ……. الشيطان فاكر؟؟؟ ……. فى شيطان بقى ميعرفش يوصل للشياطين الصغيرة

آسر : عايز ايه يا طائف عايز ايه مش كفاية اللي حصل زمان …. عايز تعيده تاني

طائف : اللى حصل زمان حصل و انتهى خلاص احنا فى دلوقتي

آسر : آيات تخصني يا طائف …. بتاعتي انا

اشتعلت النيران بداخله ليهتف بها

طائف بصراخ : آيات تعالي هنا جنبي

اجفلت من صوته لتتحرك بذعر متجهة نحوه لكن قاطع طريقها آسر ليسحبها نحوه يحيط عنقها بذراعه مُشهراً سلاحه نحو رأسها ليصرخ طائف به

طائف بتوتر و صراخ : انت اتجننت يا آسر …….. ايه خلاص عقلك طار …… سيبها ….. سيبها بقولك

آسر بجنون : لو مبقتش ليا مش هتبقى لغيري

آيات ببكاء : طاااائف

طائف : آسر بلاش جنان سيبها و هنتفاهم انا و انت …… ثم اكمل بصراخ …….. متداريش ورا الستات متبقاش جبان و ***

استفزه كلامه ليضغط على الزناد بتسرع فتنطلق رصاصته و تستقر بصدر طائف فيسقط ارضاً غارقاً بدماؤه

جحظت عيناها بصدمة و ذهول لتصرخ بإسمه بجنون محاولة التخلص من ذراع آسر التى تكبلها فتشعر بها ترتخي عن عنقها اثر صدمته هو الاخر لما حدث

قفزت نحو طائف لتجلس بجانبه واضعة رأسه بأحضانها و تهتف بإسمه ببكاء

آيات : طائف لا يا طائف ابوس ايدك فوق متروحش مني ….. طااائف لالااااا متغمضش عينك عشان خاطري

حاول الحديث و طمأنتها لكن دون جدوى

فى حين كان الاخر يقف بذهول محدقاً فيما يحدث …. ليستيقظ على صوتها ترجوه بخوف و ذعر ان لا يتركها فيعود جنونه و يتجه نحوه و مازال مشهراً سلاحه نحو طائف

آسر دون وعي : خلاص خلصت الحكاية يا طائف خلاص جت نهايتك و هتدفع تمن كل اللى عملته

آيات برجاء باكي : آسر ابوس ايدك كفاية كفاااااية بقى حرام عليك

اخفض يداه الحاملة لمسدسه لينظر نحوها بصدمة صارخاً بها

آسر بصراح : حرام عليا و مكنش حرام عليه اللى عمله زمان … مكنش حرام عليه يحرمني من اختي … دي كانت اخر حاجة بقيالي …. بس خلاص مش هسمحله يكرر اللى عمله تاني مش هسمحله يخدك منى انتي كمان مستحيييييل

ثم اعاد رفع مسدسه و توجيهه نحو الملقى ارضاً لانهاء الامر فيقطعه صوتها تصرخ بإنهيار و انفعال

آيات بصراخ : لا لا لا مقتلهاش والله العظيم ما قتلها اختك عايشة .. عُلا عايشة …… ابوس ايدك كفاية كفاااااااية حرام عليك سيبنا فى حالنا بقي

الفصل الخامس والعشرون (مغرور)

آيات بصراخ : لا لا لا مقتلهاش والله العظيم ما قتلها اختك عايشة .. عُلا عايشة …… ابوس ايدك كفاية كفاااااااية حرام عليك سيبنا فى حالنا بقي

حدق بها بصدمة و غير تصديق ….. أيعقل ان تكون على قيد الحياة …… هل تفوهت بكذبة لتحميه ……. لكن هذا جنون ……. هو احتمال ضعيف و شبه مستحيل لكن شقيقته ربما تكون حقاً حية ترزق

عاد يخفض يداه مرة اخرى ليسقط منها سلاحه فى حين تسمر بمكانه يحدق بهم بشرود

اما هى فلم تهدأ من نوبة البكاء التى تملكتها و انهيارها الواضح لتستمر بهز جسده بجنون صارخة بإسمه من وسط شهقاتها

آيات ببكاء : طائف … طائف عشان خاطري فوق خليك معايا ………. اعاد فتح عينيه بصعوبة بالغة لتشهق بإبتسامة صغيرة …….. ايوة ايوة خليك صاحى متغمضش عينك …. ثم التفتت نحو هذا الذي يقف كالتمثال محدقاً فى الفراغ لتهتف بصراخ ……… انت واقف كده بتعمل ايه ساعدني خلينا ناخده لاي مستشفى …….. آسر ساعدني عشان خاطري وانسى اي حاجة تانية بينكم …. استمر بشروده ذاك لتصرخ به …. آآآسر

استيقظ اخيراً من افكاره على صوتها تهتف به لينظر نحوها هى و طائف المسجى ارضاً فيتحرك جسده اخيراً نحوه يساعده على النهوض ليرتكز الاخر بجسده على جسد صديقه فى حين تحركت هى لتسنده من الجهة الاخرى ويتوجها سريعاً الى خارج الغرفة …. فور ان خرجا من المكان توجه آسر سريعاً نحو سيارة ما كانت تقف على جانب الطريق ليضع طائف بها و تسرع هى الاخرى فى الصعود بجانبه فى حين توجه آسر لمقعد السائق و بدأ بالقيادة ليصل بصديقه الى اقرب مشفى بإستطاعتها انقاذه

وصلا الى مشفى ما يبدو بحال متواضع للغاية لكن لا بديل امامهم تحرك آسر شبه حاملاً لجسد طائف نحو مدخل الطوارئ فى حين كانت الاخري تتبعهم بسرعة ليستقبلهم المسعفين بعناية واهتمام طمأن حال آيات قليلاً من حيث كفاءة المكان

دقائق حتى نقلوه سريعاً الى غرفة العمليات لاجراء جراحة عاجلة فى حين انتظر كلا من آسر و آيات بالخارج

مضى بعض الوقت لنجدها تجلس على احدى المقاعد الموجودة خارج الغرفة المتواجد هو بداخلها تبكي بصمت على حاله فى حين كان آسر يجلس بجانبها فى حالة من الضياع ليتوجه نحوها بسؤال

آسر : آيات انتي … انتى قولتى ان ان علا اختى مماتتش صح … هى عايشة مش كده

نظرت نحوه بلوم و عتاب

آيات بحدة : شايف ان دلوقتى وقت مناسب لسؤالك ده

آسر بتوتر : آيات كل اللى حصل دلوقتى كان بسبب اللى طائف عمله مع اختي عايزانى افكر فى ايه ولا اقول ايه

آيات بتنهيدة : ايوة يا آسر علا عايشة وانا بنفسي قابلتها بس يكون فى علمك لو حد عرف بالموضوع ده مش هتلحق تقابلها من اللى هيعملوه فيها

آسر بنفى : لا لا انا مستحيل انطق … بس بس ازااااى طائف قتلها انا متأكد انـ…..

آيات مقاطعة بتعب : هو عمل كل ده عشان يوهمهم انها ماتت و يقدر ينقلها فى مكان امان … انا معرفش ايه اللى حصل بالتفصيل بس ده اللى هى قالتهولى

امسك بكفاها ليهتف بلهفة و حماس

آسر : و هي .. هي فين دلوقتى كويسة ؟

اومأت بتعب لتكمل

آيات : صدقنى هي كويسة و بخير بس مش هقدر اقولك على مكانها هتعرفه بنفسك من ….. ثم اكملت و قد عادت الدموع تترقرق بعيناها …. هتعرفه من طائف لما يبقى كويس ان شاء الله

اومأ لها ليشد على يديها الموضوعة بكفيه

مرت ساعتان حتى وجدا الطبيب يخرج من غرفة العمليات ينظر نحوهم بإنهاك و تعب لينتفضا من جلستهم متجهين نحوه

آسر : طمنا يا دكتور حالته ايه ؟

نظرا نحوه بلهفة و قلق ليجيب الطبيب مطمئناً اياهم

الطبيب : الحقيقة الظاهر ان الاستاذ ربنا بيحبه و كتبله عمر جديد لانه لولا انه مولود بعيب خلقي خلى القلب موجود فى الجزء الايمن بدل الايسر كان زمانه توفى بس الظاهر انه مكتبوله يعيش …. اطمنو يا جماعة الحمد لله حالته الى حد ما مستقرة بس ادعو له لانه فى احتمال يدخل فى غيبوبة بسيطة وممكن يتجنبها خالص و ده كله هنعرفه بعد مرور ٤٨ ساعة ان شاء الله …. عن اذنكم

تنفس كلاً منهم الصعداء .. هى لسبب غير معلوم يجعلها غير قادرة على التنفس قلقاً و ذعراً من كونه بحالة خطرة … اما هو فخوفاً و رعباً من كونه كاد ان يقتل صديق عمره و اخيه بلحظة سيطر فيها عليه جنون الانتقام

قاطع تفكيرهم صوت الطبيب يعود اليهم مرة اخرى قائلاً بإهتمام

الطبيب : اه نسيت ابلغكم ان الحالة جاية بطلق نارى ولازم المستشفى تبلغ البوليس عشان يجي يحققو ….. عن اذنكم

انصرف الطبيب مغادراً فى حين ظلا الاثنان يحدقان ببعضهم البعض بقلق لتهتف هى

آيات بحزم : آسر اسمعنى انت لازم تمشي حالاً قبل البوليس ما يوصل لان ساعتها هتبقى مشكلة و مش هنعرف نتصرف

آسر بتوتر : بس ازاى هسيبك و هسيب طـ………

آيات مقاطعة : آسر مش وقت كلام دلوقتى اديك اتطمنت عليه و هو ان شاء الله هيبقى تمام و بعدين انا معاه هنا ولو فيه حاجة هبلغك

نظر نحوها للحظات يحاول التفكير بحديثها قبل ان يومأ بإستسلام لتكمل

آيات : آسر علا ميتة فاهم؟ مفيش حاجة اتغيرت … متخلنيش اندم اني قولتلك

اومأ لها بثبات قائلاً

آسر : اطمني يا آيات لو كنت مرة مقدرتش احمي اختى فمستحيل اكررها و اكون السبب فى اني اخسرها تاني

اومأت بإبتسامة لتحثه بعدها مرة اخرى على الذهاب قبل مجيء الشرطة فيمتثل لطلبها مغادراً المشفى بأكمله و تتجه هى الاخرى للاستعلام عن الغرفة التى سينقل لها طائف بعد خروحه من حجرة العمليات

تم نقله بعد فترة الى غرفة العناية المركزة لمراقبته حتى مرور الوقت اللازم لإستقرار حالته ….. فى حين ظلت هى مسمرة امام الغرفة تنتظر افاقته ترجو الله ان يستيقظ قريباً من سباته ذاك ليطمئن قلبها

مرت فترة كبيرة على انتظارها حتى اشرقت شمس يوم جديد و اصبح الوقت ملائم على اخبار احد ما بإصابته واول من خطر ببالها كان صديقه مازن

كان يغط بنومه عندما وجد هاتفه يهتز منبئاً بورود اتصال له … تأفف بضيق قبل ان يتقلب بفراشه ماداً يده لالتقاط الهاتف و الاجابة دون النظر الى هوية المتصل

مازن بنعاس : ايوة يا رزل ايه مفيش وراك غيري ولا ايه

آيات بصوت ضعيف : مستر مازن ؟ اسفة انى ازعجت حضرتك بس هـ……..

فور سماعه لصوتها الغير متوقع انتفض جالساً و ابعد الهاتف عن اذنه ليطالع الاسم فيجده اتصال من صديقه طائف … اذاً لما تحدثه آيات

قطع حديثها سريعاً ليهتف بتساؤل قلق

مازن : آيات ….. خير و بتكلميني ليه من تليفون طائف … ثم اردف بقلق اكثر …. و بعدين فين طائف ؟

آيات ببكاء : مستر مازن ارجوك ممكن تيجي مشتشفى ال…………

هم واقفاً لتبديل ملابسه فور هتافها بإسم المشفى

مازن بفزع : مستشفى ؟ ماله طائف ؟ ايه حصل ؟

آيات : طائف اتضرب بالنار بس الدكتور قال انه ان شاء الله كويس ممكن حضرتك تيجي بقى عشان انا مش عارفة اتصرف وانا هنا لوحدي

مازن بسرعة : ماشي ماشي مسافة السكة و هكون عندك …. ثم هتف بقلق …. آيات اوعي تسيبيه خليكي جنبه و انا دقايق و هكون عندك

ثم اغلق الهاتف و كان قد اكمل تبديل ملابسه لينطلق نحو المشفى بأقصى سرعة فى حين كانت هى على الطرف الاخر تنظر للهاتف بوجوم هامسة

آيات ببكاء : مش هسيبه … مقدرش اسيبه مقدرش

فى ايطاليا

كان اندريه مكفهر الوجه وهو يتلقى الترقيع و التوبيخ من رئيسه الاعلى ميشيل ليهتف بإعتراض

اندريه : يا بوص مش ذنبي ان آسر متهور و مجنون و بعدين حضرتك عارف ان البت دي لو خلصنا منها هتبقى خسارة لينا و ضربة جامدة

ميشيل بحزم : يبقى تتصرف يا اندريه تتصرف و تشوف حل … احنا مش ناقصين نوسع العيون علينا اكتر من كده وكله بسبب سوء تصرفك و غباءك … ثم اكمل بصراخ ….. مش عارف تتعامل سيبني انا اشوف حل جذري للوضع ده

اندريه بحقد : ياريت يا بوص حضرتك اللى تاخد القرار عشان انا مبقتش فاهم ايه سر تمسكك بآسر و طائف ….. الطرفين دول لو خلصنا من واحد منهم المشاكل هتخلص

ميشيل : مش قولتلك غبي … لما نخلص من طائف مين هيعرف يمشيلنا الشغل فى مصر بعده و آسر لو جينا جنبه طائف هيقلب علينا انت عارف انه دايماً ورا ضهره

اندريه : واديه كان على وشك انه يقتله

ميشيل مزمجراً : اسمع يا اندريه الموضوع ده يتلم و بعد ما طائف يفوق تبعتهولى هو و آسر لهنا و انا هتصرف

اندريه : سمع و ينفذ يا بوص

ميشيل بعد صمت قصير : و البت دي كمان …… عايزها عندي معاهم

اندريه بدهشة : تمام يا بوص

حازم : آنسة آيات ؟

رفعت انظارها نحو هذا الغريب والذي اقتحم خلوتها بردهة المستشفى لتطالعه بتساؤل اجابه هو بالتعريف عن نفسه

حازم : احم احم انا المقدم حازم نشأت المسئول عن التحقيق فى قضية طائف اقصد الاستاذ طائف

آيات بتساؤل : قضية طائف ؟؟؟

تدراك نفسه ليصحح قائلاً

حازم : اقصد يعني بخصوص التعدي عليه و اصابته

أومأت بهدوء ليكمل

حازم : انا عرفت ان حضرتك كنتي موجودة اثناء الحادثة ممكن اسأل حضرتك شوية اسئلة يمكن تفيدنا فى التحقيق

نظرت نحوه برهبة و قلق و لسبب ما شعرت بعدم الارتياح ناحيته لكن لا مفر من اجابته فإن فعلت و تهربت سيشك فى الامر

آيات بقلق : تمام انا تحت أمر حضرتك

و بعد فترة من الاسئلة و الاجوبة

حازم بعدم اقتناع : يعنى انتي بتقولى انك اتخطفتي من فيلا طائف و كانو ناس متعرفهمش و لا تعرفي هما تبع مين ولما طائف جه ينقذك هما اللي ضربوه بالنار

اومأت بتوتر لتؤكد القصة التى اخبرته بتفاصيلها و قد تجنبت ذكر اسم آسر تماماً

تنهد حازم بحنق فهو ظن انه قد حصل على طرف خيط جديد قد يوصله الى امر ما بخصوص قضية الميناء و تورط طائف بها

هب واقفاً مستئذناً للرحيل على وعد بالعودة مرة اخرى لأخذ اقواله بعد افاقته

لينا : آسر ؟

هتفت بها لينا فور اقتحامها لغرفة مكتبه بالشركة و ذلك بعد امتناعه عن قبول استضافتها

آسر بحدة : انتي ازاى دخلتى هنا انا مش قولت مش عايز ازعاج من حد

تقدمت نحوه لتجلس بجانبه حيث كان يرقد على احد الارائك قائلة

لينا بتفهم : وانا مش هزعجك انا حابة نتكلم سوا شوية بس

آسر : وانا مش عايز اتكلم و اتفضلي لو سمحتى سيبيني لوحدي

لينا : عصبيتك و انك تكون لوحدك مش هيحل المشكلة

انتفض من جلسته ليهتف بصراخ

آسر : وانتي ايش عرفك انتي بمشكلتى و ايه اللى يحلها ثم انتي ازاي تسمحـ…….

لينا مقاطعة : طائف

نظر نحوها بحدة لتكمل

لينا : حالتك دي بسبب طائف واللي حصله مش كده …… ندمان و كاره نفسك انك كنت على وشك تقتل صديق عمرك و مابين حبك و كرهك ليه بسبب اللي عمله

آسر بتوتر : انتي …. انتي عرفتي ازاى ؟

تحركت من جلستها نحوه تنظر اليه بهدوء

لينا : مش انا لوحدي اللى عرفت يا آسر انت ناسي انت شغال مع مين

نظر نحوها بقلق لتكمل

لينا : صدقني يا آسر انا عذراك وفاهمة انت حاسس بأيه بس تفتكر سكوتك و وجودك هنا حل .. لازم تفكر و تتصرف بسرعة عشان تلاقي مبرر تقدمه ليهم عن اللى حصل هما مش هيعدوه بسهولة

ثم التقطت حقيبتها مستعدة للرحيل قائلة

لينا : فكر يا آسر و بسرعة …. عشان جالك استدعاء من ميشيل ذات نفسه انت و طائف لما يفوق …. فكر و لو محتاج اي مساعدة انا موجودة ….. كصديقة .. بعيد عن الشغل و مشاكله

ثم تركته يحدق بالفراغ محاولاً اعادة ترتيب افكاره

و بالعودة للمشفى نجدها مازالت تقف امام غرفة العناية المشددة ليقبل عليها مازن بمشروب ساخن و يناولها اياه قائلاً

مازن : اتفضلي يا آيات لازم تشربي اي حاجة بعد تبرعك لطائف بالدم …….. تناولت الكوب منه بصمت ليردف ……. انا مش متخيل الصدف اللى تخلي فصيلة دمك نفس فصيلة دمه النادرة … وجودك وفر علينا تعب كبير

اومأت له بصمت ليذفر قائلاً

مازن : آيات مفيش داعي للقلق انتي سمعتي بنفسك كلام الدكتور وان حالته بقت مستقرة دلوقتى

نظرت نحوه بأمل قائلة

آيات : برضو مينفعش ادخله ؟؟؟

تنهد بقلة حيلة ليكمل

مازن : طب اشربي اللى فى ايدك وانا هروح اشوفهم يمكن يرضو يدخلوكي ليه

اومأت بقوة ليقابلها بإبتسامة صغيرة و يتحرك نحو احدى الممرضات ليتفاوض منها بشأن دخولها له

واخيراً و بعد مفاوضات و اعتراضات وافقت احدى الممرضات على دخولها لرؤيته لتشرق ملامح آيات بحماس و لهفة

الممرضة : ابوس ايدك هما خمس دقايق بس عشان مروحش فى داهية وبلاش كلام كتير من فضلك

اومأت آيات بلهفة قبل ان تتناول الملابس المخصصة لدخول الغرفة و ترتديها بسرعة فائقة

دلفت الى الغرفة بتوتر لتلمح جسده العريض مسجى على فراش ابيض اللون و متصل به بعض الاسلاك غريبة الشكل والتى ترصد بدقة مؤشراته الحيوية

تنفست بتوتر لتخرج الهواء من فمها قبل ان تتقدم اكثر نحوه لتتأمل ملامحه الهادئة والتي مازالت تحمل القوة و الحزم و بعضاً من الحنان الظاهر

تقدمت اكثر حتى اصبحت بإستطاعتها مراقبته بوضوع … وجهه اصبح شاحب اللون و قد ذهبت اشراقته و حيويته لتمتلأ عيناها بالعبرات ….. مالت نحوه لتضع احدى كفيها على جبينه بحنان لتهتف

آيات هامسة : كلهم كانو بيلمحو و بينبهوني للي ممكن اكون حساه ناحيتك وانا بغبائي كنت بنفي كلامهم و استخف بيه ……. كنت بقاوح و بكابر و اقول مغرور و شايف نفسه و فى الاخر بقيت اقول مجرم وقتال قتلة ….. ثم اكملت بإبتسامة حزينة ….. وانا لسة عند كلامي انت مغرور و شايف نفسك و مـ …… قاطعها صوت جهاز دقات القلب بصوته المزعج والذي ينبأ بحدوث خلل ما ثم سرعان ما عاد الي معدله الطبيعي لتهتف بنفس الابتسامة الحزينة …… خلاص خلاص مش شايف نفسك يا سيدي ……… ثم اكملت بحنان …. بس اتضح انى برغم كل ده كنت خلاص وقعت … رغم قسوتك و جفائك معايا و نهاية حياتك اللي مش مضمونة بس بحبك ….. بحبك يا طائف … عشان خاطري خليك معايا و متستسلمش …. مش هتسيبني انت كمان كفاية اللي سابوني زمان …… المرة دي مش هستحمل روحي تتاخد مني …..ثم اكملت بمرح مختلط بالحزن …… يرضيك يويو حبيبتك تتعب و تتكسر تاني

اكملت سلسة توسلاتها له بالاستيقاظ و عدم الاستسلام قبل ان تقاطعها الممرضة و تطلب منها الخروج فوراً قبل مرور الطبيب لمعاينة حالته

خرجت من الغرفة ليهفو اليها مازن سريعاً

مازن : ها يا آيات حالته ايه ؟

آيات بأمل : هيبقى كويس ….. ان شاء الله هيبقى كويس

مازن بحرج : آيات متزعليش مني بس انتى لازم تروحي يعنى هدومك و شكلك مش مناسبين تفضلي بيهم كده

نظرت نحو ملابسها بدهشة لتجد انها مازالت ترتدي منامتها فهى لم يتوفر لها الوقت بتبديلها لتومأ بتردد قائلة

آيات : بس طائف …..

مازن : هي مسافة السكة انا كلمت السواق بتاعى هياخدك يوصلك تغيري و يرجعك تاني وانا موجود مع طائف اهو

اومأت له على مضض لتمنثل لاقتراحه و تتوجه معه الى خارج المشفى

وبالفعل اوصلها السائق الى الفيلا لتدلف اليها لكن ثبتت بمكانها فور دخولها

آيات بتوجس : انت مين و دخلت هنا ازاى؟؟

وجهت حديثها الى من وجدته يقف امامها بتحفز فور دخولها للفيلا .. لتجده شاب طويل مفتول العضلات ينظر نحوها بحذر …… فور صراخها به هم برفع يديه بوضع استسلام قائلاً

طوني : انا طوني و ابقى صاحب طائف و زميله فى الشغل … انتي آيات مش كده

اومأت بقلق ليهتف مطمئناً

طوني : اتطمني انا مش جي أأذيكي انا بس عرفت اللي حصل لطائف و جيت ازوره ……ثم اكمل بحذر …… وكمان معايا ضيفة

ليظهر من خلفه شخص ما فتتسع عينا آيات فور رؤية هذا الشخص

لتصرخ بذهول

آيات : علا ؟؟؟؟؟؟؟
الفصل السادس والعشرون (اعتراف صريح)

ظلت تحدق بدهشة و اضطراب من تواجد هذا الغريب لتتقدم منها علا تقطع دهشتها تلك متسائلة بقلق

علا : طمنيني يا آيات طائف عامل ايه و حالته وصلت لإيه …. لسة فى خطر على حياته ؟؟؟؟

ظلت على سكونها و لم تعطي بالاً لتساؤلات علا لتهتف الاخرى بنفاذ صبر

علا : ما تردي يا آيات و طمنيني

لكنها وجدت هذا الغريب يهتف فى علا بنبرة حانية

طوني : اهدي يا علا ما انا قلتلك ان حالته استقرت

واخيراً خرجت عن صمتها لتهتف بحدة

آيات : مين ده وازاى يعرف بموضوعك وانك لسة عايشة … ثم انتي ازاى قدرتي تيجي مصر .. ايه مش خايفة يوصلولك

طوني بثقة : بوجودي هنا فمفيش داعي ليهم عشان يحطو اى مراقبة

آيات بثقة مماثلة : ايوة مفهمتش برضو حضرتك تبقى مين ؟

علا بنفاذ صبر : طوني يبقى اقرب واحد لطائف بعد آسر و هو ساعدنا كتير عشان نغطي على موضوعي …….. و موضوعك

آيات : يعني انت آآآ…….

طوني : ابقى الدراع اليمين لاندريه و مساعده

اتسعت حدقاتها لمقابلة مثل هذا الشخص بل و معرفته الخاصة بطائف و قربه منه لكن ظل بداخلها هاجس انه ربما يخدعهم فأمثاله لا يمكن الوثوق بهم

تنحنحت لتردف مطمئنة تلك القلقة

آيات : طائف الحمد لله احسن بس للاسف لسة مفاقش انا جيت ابدل هدومي وراجعة المستشفى تاني

تنفس كلاهما الصعداء ليردف طوني قائلاً

طوني : تمام وانا هخلص شوية مشاوير كده و هحصلك على هناك وانتي يا علا هتستني هنا و متتحركيش

نظرت آيات نحوه بقلق وتحركت نحو الدرج للذهاب غرفتها و تبديل ملابسها سريعاً لتجد علا تهتف

علا بحزن : انا للاسف مش هعرف اشوفه ولا اروحله بس هبقى على اتصال معاكي عشان اتطمن عليه ………ثم اكملت بتساؤل حذر ……آيات هو حقيقي آسر هو اللى عمل كده فى طائف

التفتت آيات نحوها لتومأ على مضض فتتحول نظرات الاخرى الى ندم و حزن دفين وتكمل آيات طريقها الى الاعلى بصمت

فى غرفتها و اثناء تبديلها لملابسها وجدت رنين هاتفها يتصاعد لتلتفت فى الغرفة بحثاً عنه حتى وجدته ملقى بإهمال ارضاً التقتطه لتجد ان آسر يهاتفها تنفست بهدوء لتجيب بعدها

آيات : ايوة يا آسر

آسر بلهفة صادقة : طائف عامل ايه دلوقتى يا آيات طمنيني

تنهيدة عميقة خرجت منها لتجيب بإبتسامة صغيرة

آيات : قلقان عليه يا آسر على العموم هي حالته استقرت الحمد لله

آسر بضعف : صدقيني يا آيات لولا اللى فرق بينا زمان مكنش ده هيبقى حالنا دلوقتى

آيات بحذر : متأكد ؟؟؟ يعنى دلوقتى معندكش اي سبب للعداوة اللي بينكم

آسر : عداوة لا … انا دلوقتى اتأكدت ان طائف لسة زي زمان متغيرش و لسة اخويا بس …… بس ده مش معناه انى هستسلم

آيات بتساؤل : تستسلم … تستسلم لأيه بالظبط

آسر : مش هسلمك ليه يا آيات …. انتي ليا انا … هو صاحبي و اخويا بس ده ميمنعش انى ابقى منافس ليه ….. وهعمل كل اللى فى ايدي عشان اكون انا اختيارك

آيات بحزن : سلام يا آسر لازم اقفل دلوقتى

آسر بتفكير : سلام

اغلقت هاتفها لتنظر لنقطة ما بالفراغ هامسة

آيات بإبتسامة : بس انا خلاص اخترت يا آسر ….. ثم وضعت يداها ناحية قلبها لتكمل ……. ده خلاص اختار …. انا آسفة

ثم تحركت سريعاً الى خارج الغرفة لتعود مرة اخرى لمرافقة من انتقاه قلبها

وصلت الى المشفى واتجهت نحو غرفة العناية المشددة تنظر بداخلها لتجد الحجرة فارغة فتصيبها حالة من الفزع و الرعب و تبدأ بالبكاء و النحيب ….. و اثناء هي على هذا الحال وجدت مازن يهرول ناحيتها بملامح قلقة لتسرع اليه هاتفة

آيات ببكاء : طائف فين جراله ايه ؟؟؟؟

مازن بهدوء : اهدي اهدي يا آيات كل الحكاية انه الحمد لله فاق و نقلوه اوضة عادية ….. يااااه كل ده عشان ملقيتهوش فى الاوضة …. خضتيني يا ستي

تحولت حالتها تماماً لتهتف بسعادة

آيات : يعنى هو فاق و كويس ؟ طب هو فين عايزة اشوفه ؟

مازن : حاضر يا ستى هتلاقيه فى اوضة رقم …… انا هروح للحسابات وارجع اغير و اجي

اومأت بسعادة لتتجه سريعاً نحو غرفته حتى وصلت امامها …. وقفت قليلاً بالخارج تمسك بمقبض الباب فى توتر و قلق و قد زادت وتيرة انفاسها ثم حزمت امرها لتطرق الباب فتسمع صوته الضعيف يسمح لها بالدخول .. ادارت مقبض الباب لتدلف الى الداخل

وجدته يجلس نصف جلسة على فراشه وفور دخولها رفع انظاره نحوها لترتسم ابتسامة خبيثة على محياه بمجرد رؤيتها تدلف لغرفته … فى حين ظلت هى مسمرة مكانها اسيرة لرؤيته بخير معافى و قد عادت ابتسامته الخبيثة الماكرة والتي اعتادتها منه مؤخراً

صدح صوته المتعب يردف

طائف بصوت أجش : تعالي واقفة عندك كده ليه …….. قربي

ابتلعت ريقها بتوتر …. و بعد ان كانت تتلهف لمقابلته ها هى الان تقف بتردد على عتبة باب الغرفة

اومأت بهدوء لتتحرك ببطئ نحوه وسط مراقبته لها حتي وصلت الى فراشه تقف بجانبه بصمت

طائف : ايه ساكتة ليه ؟ مالك؟

اجابت بتردد

آيات بتلعثم : حمـ …. حمد لله على السلامة

ابتسم بإتساع ليردف بمرح

طائف : الله يسلمك … بس ايه يعنى ؟ بتردهالي ؟؟ ( قصده لما ناداها فى المستشفى قبل كده حبيبتي و بعدها قال انه بيقولها حمد الله على السلامة ^_^ )

نظرت نحوه بتساؤل ليوضح قائلاً

طائف : اصلي بيتهيألي انى سمعت كلام تاني اتقال غير حمد لله على السلامة

عقدت حاجبيها دون فهم

آيات : كلام تاني ايه ؟

طائف بجدية زائفة : يعنى كلام عن اني مغرور و شايف نفسي …. ثم هتف بمكر قائلاً …. وايه تاني يا طفطف … اه وانى مجرم و قتال قتلة و …….

آيات مقاطعة بخجل وقد احمرت وجنتاها : و اني بحبك

نظر نحوها بصدمة فبرغم ما سمعه اثناء غيبويته عن مشاعرها و توسلاتها له بالاستيقاظ لكنه توقع نفيها لكل ما قيل و عودتها لمشاكساتها و عنادها الدائم

حدق بها بدهشة ليجدها اصبحت كحبة الطماطم فى احمرارها لتتسع ابتسامته ويمد يداه بضعف يمسك بكفها فيشدها اكثر نحوه قائلاً بحنو

طائف : يعني مكنش تهيوءات

نفت بحركة من رأسها لتهمس

آيات : ولا تخاريف

ضحك بصوت عالٍ قليلاً ليكرر

طائف : ولا تخاريف

اومأت بهدوء ليظل يحدق بها بحب لفترة فى حين كانت هى تنظر ارضاً بخجل ………. زادت فترة تحديقه بها و صمته لتنظر نحوه بتوتر متسائلة

آيات : ساكت ليه مش المفروض تقول حاجة ؟

طائف بغباء : حاجة زي ايه ؟

آيات بغيظ : يعنى اي حاجة ترد بيها عليا … ولا هو ايه البعيد مبيفهمش

اطلق سراح كفها ليحدق بها بذهول هاتفاً

طائف : بسم الله الرحمن الرحيم انتى ايه يا بنتي بابور بتهبي فجأة كده

آيات بغيظ : ماهو انت اللي ساكت …. واحدة اتكلمت واعترفت انها بتحبك الرد الطبيعي انك يا تقبل يا ترفض

طائف : والله فى حالتي حالياً و كونك انتي اللى مستنية الجواب فالرفض شيء اخاف من توابعه .. وبعدين يا هانم الراجل هو اللى بيعترف والست هي اللى بتقبل او ترفض

آيات بغيظ : ما انا قولتلك … اصل البعيد مبيفهمش فلازم انا اللي انطق

طائف بتهكم : لا اله الا الله …. تصدقي بوظتي ام الجو الرومانسي

نظرت نحوه بحقد و غضب لتحاول التحرك للخارج فيفاجأها بحركة سريعة و يمسك بكفها صارخاً بألم اثر حركته المتهورة تلك لتتقدم اكثر نحوه هاتفة بقلق

آيات : ايه مالك …. ثواني هنادي الدكتور ارتاح وثواني وراجعة

حاولت سحب كفها منه لكنه شدد علي مسكته له

طائف بألم : متتحركيش من هنا

ثم حاول التنفس بهوء ليقل المه بعد لحظات قضتها هي بالتحديق به فى قلق وبعد ان زال الالم قليلا وجدته ينظر نحوها بجدية هاتفاً

طائف: البعيد بيفهم و بيقدر بس مستني الوقت المناسب عشان يكون ساعتها يستاهلك فعلاً … حالياً مقدرش اربطك بيا بكلام ووعود الا لما حياتى تبقى احسن …. لكن دلوقتى انتي عارفة ايه اللي جوايا

آيات بتفهم ولكنها ارادت مشاكسته : يعنى لو حد سبقك و شاف انه يستاهلني و ……..

طائف مقاطعاً بحدة : هقتله …… واللى عمله آسر معايا عشانك هيكون نقطة فى بحر اللى هعمله فى اي حد يحاول يقرب منك او يخدك مني حتى لو كان آسر نفسه ….. انتي هتفضلي معايا و ليا لحد ما يجي الوقت المناسب ….. فاهمة

اومأت بإبتسامة ليكمل هو بمرح

طائف بوعيد : بقى انا مغرور و شايف نفسي

اومأت بخبث قائلة

آيات : طبعاً وانا لسة عند كلامي ومستحيل اغيره الا لما تتغير …. شوف نفسك من شوية قلت ايه يابني دي كمية تحكم و غرور مشوفتهاش فى حد …. الله يكون فى عوني بقى من اللى هشوفه

طائف بغمزة : بس على قلبك زي العسل مش كده

آيات بخجل اخفته بمشاكساتها : ماشاء الله متواضع اوي حضرتك

طرق على الباب اجفلهم ليعتدل هو بجلسته فى حين سحبت يدها من كفه …… سمح للطارق بالدخول ليجده الطبيب المشرف على حالته و قد جاء لفحصه

الطبيب بإبتسامة : تمام اوي كده ماشاء الله انت جسمك قوى و بيتعافى بسرعة هنحتاجك معانا يومين كمان و تقدر تخرج بعدهم ان شاء الله

اومأ بهدوء و ارتسمت ابتسامة واسعة على محياها قبل ان يكمل الطبيب حديثه قائلاً

الطبيب : كان فيه ضابط جه عشان التحقيق لما وصلت المستشفى بس ساعتها حالتك مكنتش تسمح لكن حالياً انا بلغتهم انك مستعد عشان تديهم اقوالك …. هما فى الطريق

ابتلعت ريقها بصعوبة فى حين نظر طائف نحو الطبيب بهدوء وصمت ليومأ بعدها وينصرف الطبيب بعدها لمتابعة عمله

نظرت نحوه بصمت لتجده شارد بأمر ما …. تنحنحت بهدوء لتلفت انتباهه لها قبل ان تردف

آيات : بخصوص التحقيق ….. كان فيه ظابط جه وسألني شوية اسئلة وانا جاوبته

طائف : اسئلة ايه ؟ وبعدين مقولتليش ازاى قدرتى تجيبيني هنا لوحدك ….. و آسر فين ؟

آيات : آسر هو اللي ساعدني انقلك للمستشفى …. نظر نحوها بصدمة قبل ان تكمل هي ……. بعد ما قولتله ان علا عايشة

طائف بصراخ : نعععععععم

لينا بدهشة : معقول آسر باشا بنفسه مشرفني فى بيتي المتواضع

هتفت لينا بتلك الجملة بعد ان كلنت تجلس بمنزلها بهدوء محاولة اعداد شيء ما لتتناوله على الغداء لتجد من جاء بزيارة لها فتفتح الباب و تتفاجيء بآسر يواجهها

تنحنح و تململ بوقفته قبل ان يردف بتساؤل حرج

آسر : هنفضل واقفين على الباب كده

لينا : اسفة اتفضل اتفضل

افسحت له الطريق ليدلف الى الداخل متفحصاً بعيناه المكان فيجدها تسير خلفه تدعوه للجلوس

لينا بترحيب : قهوة ؟

اومأ لها لتتحرك نحوه مطبخها و تعود بعد فترة و بيدها فنجان ساخن من القهوة تضعه امامه

جلست بالمقابل له بصمت ليردف هو بهدوء

آسر : اسف اذا كنت جيتلك بدون ميعاد بس كنت ….. كنت محتاج نتكلم شوية

لينا بإبتسامة : وانا تحت امرك فى اي وقت

تناول فنجانه ليرتشف منه القليل ثم يُرجعه لمكانه مرة اخرى

آسر بهدوء : كنت محتاج شوية معلومات عن اندريه و ميشيل و افهم ايه شبب الاستدعاء المفاحيء دن … بس قبل كل شيء ممكن افهم انتي ليه بتعملى كده

لينا : بعمل ايه بالظبط مش فاهمة

آسر : ليه بتقربي مني

لينا بإبتسامة : بيتهيألي انت اللى فى بيتي دلوقتى

آسر : و قبليها اقتحمتي مكتبي

نظرت نحوه بصمت لتردف بعد لحظات

لينا بهدوء : انا كنت متبعاك من فترة و اخبارك كلها بتوصلي من طوني .. اكيد يعنى مفيش حد ميعرفش مين آسر الرفاعي ….. اعجبت بشخصيتك و اصرارك انك تنتقم لأختك بس مشكلتك الوحيدة هى التسرع و التهور ……. وتلخيصاً لكل ده فتقدر تقول اني معجبة بيك وبحاول اتعرف عليك اكتر و اقرب منك ده اذا مكنش عندك مانع

ظل يستمع اليها محدقاً بها بدهشة لكنه اثر الصمت و قد قرر بنفسه انها فرصة قد اتت اليه دون بذل اي جهد يُذكر …. رسم ابتسامة صغيره على محياه ليردف

آسر : اكيد معنديش اي مانع فيه حد يقول للقمر لا برضو

بادلته بإبتسامة ماكرة و تدعو اياه بعدها لاكمال قهوته

حازم : يعني ايه يا فندم القضية تتسحب مني … هو لعب عيال

كمال ( رئيسه ) : حازم اتكلم عدل و متنساش انى رئيسك و بقولك خلاص ملكش دخل بقضية المينا او طائف العمري … انا مش عايز مشاكل

حازم : ياباشا مينفعش كده القضية دي انا بذلت فيها جهد كبير جداً … مينفعش مجهودي ده يروح لغيري

كمال : و مينفعش برضو ندخل مشاكلنا الخاصة فى الشغل يا سيادة المقدم

حازم : بس ياباشا ………

كمال مقاطعاً : حازم النقاش انتهي و القضية مبقتش بتاعتك …… اتفضل على مكتبك

حازم بغضب مكبوت : علم و ينفذ يا افندم

ثم قدم له التحية العسكرية مغادراً الغرفة الى مكتبه

آياتبعد مغادرة الشرطة : مكنش هو ده

طائف : مين ؟

آيات : الظابط …. مكنش ده اللى حقق معايا

طائف: اياً كان المهم ان كلامنا واحد وخلاص و مجبناش سيرة آسر و تهوره فى الحكاية

آيات : بس تعرف ده احسن .. الظابط التاني ده مرتحتلهوش

طائف بغضب : عملك حاجة ؟ جه جنبك ؟ ضايقك ؟

نظرت نحوه بعدم تصديق لتهتف مازحة

آيات : بقى آسر هو اللي متسرع … لا يا سيدي معملش حاجة بس هو تحسه منفعل زيادة كده و عدواني

طائف بتفكير : متعرفيش اسمه ؟

بدا عليها التفكير للحظات قبل ان تهتف يدون ثقة

آيات : اسمه تقريباً حازم ….. اه صح المقدم حازم نشأت

نظر نحوها بدهشة ليردف

طائف : اهاااا قولتيلي بقى عشان كده

آيات : ليه هو انتو تعرفو بعض

طائف : ده اللى بعتلى استدعى قبل كده يوم ما خرجتى من المستشفى

همت بالحديث لكن قاطعها طرق على باب الغرفة لتتحرك تفتح الباب فتجد هذا الغريب الذي سبق ان قابلته بفيلا طائف

طوني : ممكن ادخل ولا برضو مش مصدقة انى صاحبه

نظرت نحوه للحظات قبل ان تفسح له الطريق للدخول فيدلف الى الداخل و هي تتبعه لترى رد فعل طائف على مجيء هذا الشخص و التأكد من كونه صديق لا عدو

فور رؤية طائف لطوني انتصب جسده لينظر نحوه بقلق هاتفاً

طائف : طوني … انت بتعمل ايه هنا …… وجيت امتي ؟

طوني بمرح : استنى بس و مش وقته تتفاجئ دلوقتى ….. ياريت الاول تفهم اللى هتاكلنى بعنيها دي انى صاحبك فعلاً و مش ناوي اخطفك ولا اقتلك

نظر طائف نحو آيات ليجدها تحدج صديقه بنظرات نارية ابتسم على اثرها قائلاً

طائف : آيات احب اعرفك … طوني صديقى الصدوق و هو اللى ساعدني عشان اعرف مكانك بعد اللى آسر عمله

اومأت بهدوء لتردف

آيات : و كمان على علم بحكاية علا و جه معاها هنا

طائف : علا ؟ و جه معاها هنا ؟

طوني : علا قلقت بعد اللى حصلك و صممت ترجع مصر فوراً و شبطت فيا

طائف بتهكم : وانت قلبك رهيف و جبتها معاك ….. ثم اكمل بحدة …. انت بتستهبل يا طوني

طوني : اهدى بس و اطمن كله متظبط و متأمن … بلاش قلق بقى

تنهد طائف بقوة ثم نظر لصديقه فرأي بعيناه انه يريد الانفراد به للحديث بأمر ما ليردف

طائف : آيات … ممكن تجيبلنا حاجة نشربها و تطلبيلى الدكتور عايز اسأله فى شوية حاجات

تبادلت النظرات نحوه هو و طوني لتومأ على مضض متجهة لخارج الغرفة

ظل كلاً من طائف و طوني على صمتهما حتى تأكدا من ذهابها ليبدأ طائف بالحديث

طائف : ايه الاخبار ؟ عرفو ؟

طوني : الاخبار وصلت كاملة و الكل عرف باللى حصل معاك و مع آسر

طائف : و آسر ؟ هيقع فى مشكة مش كده ؟

ذفر طوني بنفاذ صبر ليردف

طوني : انت مبتزهقش من حمايتك له… كفاية بقى

طتئف بتحذير : طوني ……. كل حاجة وليها مقابل ولا ناسي

طوني : مش ناسي يا سيدي و فاهم … شغلك معانا قصاد حماية علا و آسر و اظن انضم ليهم آيات دلوقتي كمان مش كده

اومأ طائف بهدوء ليكمل

طائف : و الباقي ؟

طوني : اتطمن كله متظبط و جاهز للتنفيذ اخر شحنة دي هتبقى اكبر واحدة تدخل مصر ولو حصلت اي مشاكل الكل هيروح فيها ….. الميعاد هيتحدد بكرة و هبلغك بالجديد اول بأول

طائف : و آآ ……..

طوني : اطمن … كمال بيه عرف بكل التفاصيل دي و هيعرف بالجديدة كمان …. هانت يا صاحبي هانت و ننضف من كل ده بقى

الفصل السابع والعشرون (اهتمام وغيرة)

ايات : طائف بلاش تهور انت معداش عليك يومين هنا و عايز تخرج ده جنان

هتفت بها ايات بإعتراض محاولة ايقاف ذاك الذي استعد فعلياً للرحيل و قد اتم ارتداء ملابسه ليهتف بهدوء

طائف : انا مش فاهم عاملة كل الهيصة دي ليه مانا قدامك اهو زي الفل

ايات هامسة : قصدك زي القرد

طائف : افندم ؟

تنحنحت بهدوء لتكمل

ايات: طب ممكن افهم ايه الحاجة المهمة اوى دي اللى مخلياك مش طايق تقعد هنا اكتر من كده و مصمم تخرج وانت جرحك لسة جديد

تنهد بتعب ليعاود الجلوس على طرف الفراش وينظر نحوها باهتمام قائلاً

طائف : حاجات كتير اولهم انى لازم اجهز مكان كويس و بعيد لعُلا اللى مكنتش متوقع رجوعها دلوقتى غير انى لازم الحق الدنيا قبل ما تقوم فوق دماغ اسر وده كله كوم و اني………………

ثم توقف عن الحديث لتنظر نحوه بتساؤل

ايات : انك ايه ؟

مد يداه نحوها يدعوها للاقتراب فتمتثل هى الى طلبه ذاك مقتربة نحوه فيمسك بكفها بين يديه هامساً

طائف : غير انى الصراحة يعنى مش عارف استفرد بيكي هنا … شوية طونى وشوية مازن غير الدكتور الفقري و الممرضات المزز …… بصراحة حاجة صعبة

نظرت نحوه بحنق تلكزه بكتفه فيصرخ متألماً اثر فعلتها تلك لتتحول نظراتها من الغضب الى القلق

ايات : اسفة اسفة نسيت ان الجرح بيوجعك …. ثم اكملت بغيظ …. بس ما هو انت اللي بتجيبه لنفسك تستاهل

نظر بعيناها بخبث ليغمز ضاحكاً

طائف : و يرضيكي طفطف حبيبك يتوجع

احمرت وجنتاها اثر نطقه باللقب الذي سبق و اطلقته عليه لاثارة غضبه لكن و كما يبدو انه اصبح يستلطفه آتياً على ذكره كلما اراد المزاح معها

نظر نحوها بدهشة مصطنعة

طائف : معقول ….. ايات بنفسها بتتكسف و وشها بيحمر ……… لا وكل ده عشان قولت طفطف حبيبك …… لاااااا انتى المفروض تتعودى على كده ده احنا لسة بنسخن

ايات بحنق : شكلك عايز ضربة كمان عشان تتكلم عدل

طائف : يا ساتر يارب خلاص ياستي بلاه الكلام الحلو كنا خدنا منه ايه يعني يلا خلينا نتحرك فى حاجات كتير لازم نعملها

اومأت على مضض قبل ان تتحرك بجانبه ليستند عليها ويسيرا ببطيء الى الخارج

فور خروجهم من باب المشفى وجدوا مازن بسيارته الخاصة في انتظارهم و فور رؤيته لهم توجه نحوهم ليساعده على التقدم نحو السيارة و استقلالها

بدأ مازن بالقيادة نحو المنزل حتى ووصلو جميعاً ليردف طائف فجأة بعد ترجله من السيارة

طائف : مازن .. علا وطوني فى مصر .. عايزك تشوفلى مكان يختفو فيه ويكون امان

مازن بدهشة : علا هنا …. طوني اتهف فى عقله ولا ايه

طائف بتململ : مش وقته دلوقتي … عايزك تنجز فى المكان ….هستنى منك خبر كمان نص ساعة

مازن : نعععم … طائف بلاش جنان .. متعمليش زي موضوع الولا اللي اتكلم فى التحقيقات

طائف بتذكر : اه صحيح عملت ايه معاه ؟ هو فين ؟

مازن : فى الحفظ و الصون يا سيدي خلص امورك وبعدين نتفاهم

اومأ بهدوء ليتحرك مازن بسيارته ويتركهم يقفان وحدهم خارج باب الفيلا … نظر نحوها فوجدها تحدق به بذهول لتردف بتهكم

ايات : مافيا مافيا يعنى مش اي كلام

حدق بها بصمت للحظات للتتنهد بعدها و تقترب نحوه مرة اخرى تساعده على السير و الدخول للمنزل و اثناء سيرهم هتفت

ايات : ولا مين ده و تحقيقات ايه ؟

نظر على يساره اتجاهها للاسفل محدقاً بها ليجيب بعد فترة

طائف : عيل جاب سيرتي فى تحقيق بخصوص الشحنة اللي اتمسكت

شهقت بقوة و توقفت عن السير ليتوقف معها

نظرت نحوه بدهشة و قلق ليجيب بهدوء

طائف : بلاش البصة دي …. محصلش حاجة هو معهوش اي دليل يثبت بيه كلامه يعنى كلامه قصاد كلامي

حدقت به بخوف لتهمس

ايات : بس ……

احاطها بذراعه ليردف بحنان

طائف : مفيش بس ….. مش عايز النظرة دى فى عينك انا موجود معاكي يعنى مفيش داعي للخوف او القلق و بعدين يا ستي متقلقيش انتي ملكيش اي علاقة بالقصة دي كلها

هتفت باستنكار

ايات : انت … انت ازاى تفكر فى كده … فكرك انى خايفة على نفسي … انا .. انا خايفة عليك انت … مرعوبة من اللى ممكن يحصلك لو حد عرف حاجة ….. انا عارفة ان الطريق ده كله غلط والغلط نهايته وحشة …. حاسة كأني فى كابوس …. كأن فى قنبلة و متوقعة تنفجر فى اي لحظة

حدق بها بحب و امتنان …. مضى وقت طويل على رؤية مثل هذا القلق و الاهتمام بعين احدهم …. ظل وحيداً لفترة طويلة حتى نسي معنى وجود شخص ينعى به

تنهد بارتياح و حب ليردف

طائف : اهدي يا ايات انا مش هسمح ان نهاية الحكاية تبقى سبب دمعة واحدة من عيونك .. كفاية اوي اللى شوفتيه معايا و صدقيني … صدقيني هعوضك عن كل اللى عدى … و عشان كده النهاية هتكون فى صالحنا احنا تأكدي من ده………. ثم هتف بمرح …. بس قوليلي هنا منين كنتي مش اخدة بالك من حبك ليا و منين كل الكلام الحلو ده دلوقتى ….. ايه ماسورة حب انفجرت

ايات بشرود متجاهلة سخريته: مكنتش حاسة … كنت دايماً حواليا … كنا دايماً ناقر و نقير .. محستش انى مفتقداك او انى ممكن اخسرك ….. الواحد فعلاً مبيعرفش قيمة الحاجة الا لما تضيع منه …. ثم نظرت نحوه بحب …. بس انا ربنا كان لطيف بيا و مخلهاش تضيع مني ….. مخلكش تسيبني لوحدي

كوب وجهها بكفيه ليردف مطمئناً

طائف : و مش هسيبك …. مستحيل اسيبك

اجابته بابتسامة ليبادلها اياها و يسرحان معاً بعالمهم الخاص الذي سرعان ما قاطعه نحنحة خشنة اجفلتهم معاً و جعلتهم يبتعدان عن بعضهما البعض لينظرا نحو مصدر الصوت فيجدوه يقف امامهم

طوني : اسف على المقاطعة بس تقريباً انتو المفروض كنتو تدخلو من فترة …… بقالنا ساعة مستنيين و اللي جوة دي هتموت و تطمن عليك

تنحنح طائف بحرج في حين هي قد احمرت وجنتاها خجلاً من رؤية طوني لهم بهذا القرب ثم تحركا معاً بهدوء نحو الداخل

دلفا الى الفيلا لتقابلهم عاصفة من القلق و الهتاف يصاحبها البكاء فرحاً … كل هذا كان استقبال علا الخاص بطائف بعد اصابته و قلقها المبالغ به عليه ….. شعور ارق بال ايات و جعلها تتساءل عن حقيقة علاقتهم … فعُلا تبدو اكثر قرباً لطائف عن اسر و هذا يبدو محير … اسر يكون شقيقها بالدم فى حين ان طائف ليس كذلك

حاولت اخفاء امتعاضها من تصرفات علا المبالغ بها لكن لاحظ طائف ملامحها الغامضة وصمتها المقلق بالنسبة له

لينادي باسمها عدة مرات وهى مازالت على شرودها حتى انتبهت اخيرا لهتافه باسمها و نظرت نحوه بتساؤل عما يريد

طائف : علا و طونى ماشيين … لو ممكن توصليهم للباب

اومأت بهدوة لتتحرك معهم نحو الخارج حتى وصلو جميعاً الى باب الفيلا فيسبقهم طونى للخارج فى حين توقفت علا قليلاً تحدق بآيات لتردف

علا: متشكرة اوي يا ايات انك اخدة بالك من طائف و بتهتمي بيه … انتى عارفة ظروفي ولولا انى لازم مظهرش دلوقتى كنت فضلت معاكم

ايات بضيق : مفيش داعى تشكريني ……… انا بعمل ده باختياري مش مغصوبة على حاجة وبعدين مفيش حد هيهتم بطائف قد مانا ههتم بيه

علا بدهشة : مش فاهمة قصدك ايه …. ثم اردفت بلهفة ….. هو …. هو اتكلم ؟

ايات : مش فاهمة

علا بفرح : لالا ولا حاجة واضح ان كل حاجة بقت تمام ومفيش داعي اقلق فعلاً لان مفيش حد هياخد باله منه زيك

اومأت ايات بابتسامة مقتضبة قبل ان تتحرك علا الى الخارج فى حين اغلقت هي الباب لتستند عليه بظهرها هامسة بحنق مقلدة لهجة الاخرى

ايات : مفيش داعي اقلق لان مفيش حد هياخد باله منه زيك ………. وانتى تقلقي ليه اصلاً

طائف بمرح : حبك ليا جننك للدرجة دي … بقيتي تكلمى نفسك يا ايات .. عليه العوض و منه العوض

انتفضت فزعاً لرؤيته امامها فجأة لتنظر نحوه بضيق قائلة

ايات بحنق : مش بكلم نفسي ولا حاجة ده انا كنت بكلم اختك و بطمنها عليك …… ثم اردفت بضيق … الا يعنى علا مطلبتش انها تشوف اسر يك …. هو مش اخوها والمفروش اقربلها منك

طائف بتفهم : علا هتموت وتقابله بس مش عايزة تطلب مني انا دلوقتى عشان فاكرة انى مش طايق سيرته بسبب اللي عمله معايا

اومأت بتفهم لتكمل

ايات : طب و هما دلوقتى هيروحو على فين

طائف : مانتى لو كنتي منتبهة معانا واحنا قاعدين كنت اخدتى بالك ان مازن اتصل و دبرلهم مكان ….. ايه شاغلك؟

حركت رأسها تنفي وجود امر ما

ايات : مفيش بس يمكن تعبانة شوية من قلة النوم ….. خليني اساعدك تطلع اوضتك وبعدين هحضر الاكل عشان تاخد علاجك وبعدين ننام شوية

اومأ بتفهم لتتحرك بالفعل نحوه تعاونه على السير ليستند عليها باستسلام وقد ارتسمت على وجههة ابتسامة رضا و امتنان

باحدى المطاعم الراقية على النيل

لينا بضحك : بتهزر … معقول جاتلك الجرأة تعمل كده عشان تسافر مصر مع باباك

هتفت بها لينا بمرح اثناء تناولها وجبة الغداء برفقة اسر بعد دعوته له … ففي اليومان الماضيان تقاربا و كثر حديثهم و حكاويهم و نمت علاقتهم بشكل ملحوظ

اسر بمرح : كنت صغير و نزول بابا مصر كانت احلى فسحة ممكن اروحها

لينا بتفهم : عشانها مش كده ؟

تنهد قائلا بابتسامة حنونة

اسر : ايات اكتر واحدة بتفهمني و بفهمها كنا زي التوأم رغم اننا دايماً كنا بعاد عن بعض بسبب سفري المستمر … بس كانت على طول متابعاني وانا كنت متابعها بكل طريقة

لينا بهدوء: و دلوقتى ؟

اسر بحزن : مفيش حاجة بتفضل على حالها.. بعد اللى حصل من خمس سنين مقدرتش انزل مصر و بعدنا عن بعض الفترة دي كلها …. اهلها اتوفو ومكنتش جنبها … هي اتغيرت وانا كمان اتغيرت

لينا بفرح خفي : يعنى خلاص استسلمت ؟

اسر : اكيد لا بس لازم الفترة دي اهدى شوية خصوصاً بسبب تعب طائف …… عايز المنافسة تكون شريفة المرة دي …. عايزه بصحته

لينا : ولو كان اختيارها انها تفضل معاه

اكفهر وجهه و اسودت عيناه ليهتف

اسر : لازم الاول اخد فرصتي كحبيب مش كأخ زي ماكنت بالنسبالها طول الفترة اللي فاتت ولو بعدها اختارته فمش هقدر اتدخل اكتر من كده

لينا : و طائف ؟

اسر : ماله ؟

لينا : لسة مصمم على الانتقام لو هى اختارته …. هتقدر تأذيها بأذيتك له

نظر اليها بدهشة …….. لم يفكر بالامر من تلك الناحية …. ليس لانه لم يتوقع ان ايات ستختار طائف بل لانه لم يتخيل انه حقاً يستطيع اذيته او قتله كما كان يهدد ….. ضغطه على الزناد وقتها و اصابته كانت لحظة جنون و تهور … يعلم انه ان كان بكامل وعيه لم تكن ستأتيه الجرأة لفعلها ………. اذاً حمداً لله ان شقيقته مازالت على قيد الحياة والا كان سيكره نفسه على عدم استطاعته الاخذ بثأرها

اسر : مش عارف …. مش عارف

مضى هذا اليوم بأحداثه ليأتى يوم جديد بأحداث اخرى

بشركة العمري

دلفت الى الداخل لتجده يقف مولياً اياها ظهره و يمسك الهاتف يحادث شخصاً ما …… انتبهت لتسمع حديثه بدقة

مازن : يعنى انت تمام دلوقتى ….. مانا قولتلك يابني بلاش تطلع دلوقتى من المستشفى …. يا طائف دي رصاصة و فى صدرك لولا لطف ربنا كنت ممكن لاقدر الله تروح فيها ………… طيب ياسيدي عيش براحتك ….. ماشي ماشي متقلقش .. يلا سلام

اغلق هاتفه ليلتفت من فوره فيجدها تقف بمكانها تنظر نحو ببراءة فيهتف بها

مازن بحدة : ايه يا ست سهام انتى هنا من امتى … وبعدين اخيراً شرفتينا بحضورك …. ممكن افهم مكنتيش على مكتبك الصبح ليه لما جيت ؟

سهام بتوتر : اصل …… اصل بصراحة كنت …. اه كنت فى الحمام

نظر نحوها بشك .. تبدو غريبة الاطوار بالفترة الاخيرة خصيصاً بعد غياب ايات المتكرر

مازن بجدية : طب من غير رغي كتير خدى الورق ده و ابعتيه لمحسن خليه يراجعه و بعد كده خليه يبعته للشركة الفرنسية

سهام : تمام يا افندم عن اذنك

مازن : اتفضلي

تخرج من الغرفة لتتنفس الصعداء فور وصولها لمكتبها فتجد هاتفها يرن بإلحاح لتلتقطه سريعاً تجيب

سهام بتوتر : الو ….. ايوة ياباشا …. لا لما دخلت كان بيتكلم فى التليفون ….. تقريباً مستر طائف …… لا كل اللى قاله انه مكنش ينفع يخرج من المستشفى …….. صمتت قليلاً تستمع اليه ليمتعض وجهها بعد ثوان وتجيب بضيق …. حاضر ياباشا …. حاضر هحاول ……. سلام

اغلقت هاتفها لتذفر فى ضيق قبل ان تهمس محدثة نفسها

سهام : كان مالي انا ومال الغلب ده لما نشوف بقى اخرتها ايه

بفيلا العمري

اثناء وجودها بمطبخ الفيلا تعد الطعام بهدوء وراحة بال فى حين كان هو بغرفة مكتبه يتابع اعماله على حاسوبه وجدت جرس الباب يعلن عن قدوم زائر .. ذفرت بضيق قبل ان تترك ما بيدها متوجهة لرؤية شخصه …… فور فتحها الباب قابلتها فتاة حسناء ممشوقة القوام ذو جمال تُحسد عليه …… تفحصتها ايات بدهشة وتعجب لتردف بعد فترة

ايات : ايوة اي خدمة ؟

……… : مش دي فيلا مستر طائف العمري

تغيرت نظرات ايات لتشوبها بعض الحدة لتهتف

ايات : ايوة مين حضرتك ؟

فور تفوه ايات بانه بالفعل منزل طائف اقتحمت الفتاة المكان ودلفت الى الداخل دون استئذان .. تنظر للارجاء باحثة عن شيء ما او ربما شخص

تبعتها ايات تنظر نحوها باستهجان لتهتف بها

ايات : تعالى هنا انتى فاكرة نفسك رايحة فين ؟

………. : امال هو فين ؟

عقدت ايات ساعديها امام صدرها لتهتف بحدة

ايات : هو مين ؟

…………. : طائف

ايات : و حضرتك تبقى مين عشان تسألي عليه ؟

طائف بدهشة : لينا ؟

التفتت الفتاة فور نطق طائف لاسمها لتتوجه نحوه سريعاً و على وجهها ابتسامة واسعة

لينا : طائف واحشنى جداً … حمد لله على السلامة

طائف : لينا …. الله يسلمك يارب…. يابنت الايه جيتي امتى ؟

لينا : ياااه من زمان … طونى مقالكش

طائف : ولا جاب سيرة الندل

تنحنحت ايات بضيق و حنق ليلتفتا اليها الاثنان وقد نسيا مشاركتها اياهم المكان ليردف هو

طائف : ايات اعرفك دي لينا .. صديقة ليا من زمان و شغالة مع طوني ….. لينا اعرفك دي ا………

لينا مقاطعة : ايات ….. اشهر من نار على علم مش محتاج تعرفني بيها

رفعت ايات احدى حاجبيها بتهكم واضعة احدى يديها بخصرها و رسمت ابتسامة ملتوية على شفتيها قائلة

ايات : تشرفنا

لينا بثقة : الشرف ليا

ثم وجهت حديثها نحو طائف

لينا : طائف محتاجين نتكلم سوا … ثم نظرت اتجاه ايات قائلة …… لوحدنا

نظر طائف نحوها ليومأ بتفهم فى حين كانت الاخرى ترجو ان لا يصرفها و يجعل تلك الحرباء تنتصر عليها فى تحدى لا تعرف هي نفسها اساسه لكن خاب املها حين سمعته يقول

طائف : ايات معلش ممكن تعمليلنا حاجة نشربها …. لو مكنش يتعبك

نظرت نحوه بجنون وغضب لتهتف بحدة

ايات : لا تعب ايه … تعبكم راحة …have fun

ثم تحركت سريعاً نحو المطبخ فى حين نظر هو نحو لينا قائلاً بجدية

طائف : اتفضلي اقعدى

اومأت بهدوء لتجلس على احدى الارائك و يجلس هو مقابلاً لها ليردف

طائف : خير بقى ؟

لينا : اخر حوار حصل بينك وبين اسر الناس عرفت بيه وعاملين مشاكل ……. واخيراً الكلام وصل لميشيل نفسه

طائف باهتمام : و بعدين

لينا : و بعدين ؟ هو طوني مبلغكش ولا ايه ؟

طائف بتساؤل :مقاليش ايه ؟

تنهدت لتردف

لينا : طائف.. ميشيل عايزك بنفسك فى باريس و اسر كمان

اومأ هو بهدوء ليردف

طائف : كنت متوقع طلبه ده … بقاله فترة هادى

لينا بحذر : بس مش كده و بس

طائف : ايه تاني ؟

لينا : هو طالب يشوف ايات كمان

انتفض واقفاً ليهتف بحدة

طائف : نعععم ….. مستحيل .. ينسي انه يلمحها حتى

هبت واقفة هى الاخرى لتنظر نحوه بثبات

لينا : انا كنت متوقعة رد فعلك و اظن طونى كمان عشان كده مرضاش يقولك …. طائف انا معاك انها مش صح انها تقابله بس ايه الحل ……… حاول تتصرف وتلاقي مبرر لرفضك طلبه ده لانه مش هيسكت ولا هيسمح بكلمة “لا” خصوصا الفترة دي

نظر نحوها بصمت ومازال بداخله يشتعل غضباً و قلقاً من مثل هذا الطلب الاخير

لينا: انا مضطرة امشي دلوقتى بس انجز يا طائف انا معطلاه لغاية دلوقتى بس بعد كده مش هعرف اساعدك

اومأ لها لتتحرك هى بعد ذلك للذهاب و تتركه وحيداً ينظر للفراغ

قاطع شروده ذاك صوتها الساخر

ايات : هى راحت فين ؟ ايه لحقتو تشبعو من بعض

نظر نحوها بدهشة

طائف : افندم ؟

ايات بغيرة : انت و السنيورة

تحرك نحوها ليقف امامها ينظر اليها ويرفع يداه يمسك بوجنتاها قائلاً بمرح

طائف : يويو يا قلبي انتى بتغيري يا بطة

ابعدت يداه لتنظر نحوه بغضب

ايات : بطل هزار الله يرحم ساعة ما كانت التكشيرة مش بتفارق وشك

نظر نحوها بحب ليمسك يداها بصمت و يجرها وراءه يجلسها على الاريكة ويجلس بجانبها ومازال كفها بيده

طائف بجدية اثارت قلقها : ايات خلينا نتكلم جد شوية

ايات بقلق : خير في ايه؟

طائف : ايات انتى واثقة من اختيارك …. اقصد انك تبقى معايا مهما حصل؟

ايات : طائف متقلقنيش فى ايه ؟

طائف باصرار : جاوبيني بس

اومأت بقوة

ايات : طبعاً متأكدة في ايه بقى ؟

طائف بتنهيدة : فاكرة فى المستشفى لما قولتلك انى هأجل اعترافي باللى انا حاسه ناحيتك لغاية لما اكون استاهلك فعلاً

اومات ليكمل

طائف : ايات المواضيع اتعقدت ولازم ناخد خطوة عشان نقدر نواجه اللى هيحصل

ايات : طائف بلاش مقدمات كتير وقول على طول فى ايه

نظر نحوها لحظات … صمت مريب عم المكان قبل ان يحدق بعيناها بقوة و يردف بثبات

طائف : ايات ….. احنا لازم نتجوز