توديعة للصيف ايس كريم ساندويش وايس كريم الاوريو

المقادير

• ظرفين كريما بنكهة الفانيليا
• علبتين قشطة
• فستق حلبي مجروش
• باكيت اوريو
• لصلصة التوفي علبة حليب مكثف محلى

الخطوات

السلام عليكم ورحمة الله وبركاته

وصفة البوظة البيتية من اسهل الوصفات وبنفس الوقت شهيه واقتصادية.

أولاً/ الكريما

بنخفق ظرفين الكريما بكوب حليب سائل بارد جداً والمضرب والجاط يلي بتستخدميهم حطيهم بالفريزر من قبل الشغل بساعة .

بنخفق الكريما حتى يتضاعف حجمها بنضيفلها علبتين القشطة وبنخفقعا معها. وبالاخر بنضيف فستق حلبي اختياري بس يكون مجروش مش كامل ولا مطحون.

ثانياً/ ترتيب صينية بوظة الساندويش

بنحتاج صينية او جاط مستطيل بنفرد فيها البسكويت السادة وجه حبة البسكويت يكون لتحت وبنصب فوقه خليط البوظة ، بعدين بنرتب طبقة بسكويت تانية فوق الخليط ويكون وجه البسكويته لفوق ويكونوا بنفس ترتيب طبقة البسكويت السفلية كل حبة مقابلها حبة.

وغطيها وجمديها بالفريزر راعي انها ماتكون مايله الصينية وثاني يوم قطعي قطع البسكويت كل حبة رح تطلع ساندويش بوظة شهي ورائع زينيها بصوص التوفي.

ثالثاً/ بوظة الاوريو

رح يزيد معك كمية من البوظة اطحني باكيت بسكويت اوريو ناعم وضيفيه للخليط وحركي بصير عندك بوظة بنكهة الاوريو، جمديها لثاني يوم وزينيها بحبات الاوريو او بصوص التوفي واستمتعي بالمذاق الرائع.

رابعاً/ صوص التوفي البيتي

بتحتاجي علبة حليب مكثف محلى علبة مغلقة بتحطيه في طنجرة صغيرة بتزيلي الورقة يلي عليه وبتغمريه بالمي وعالغاز لحتى يغلى بتوطي الفاز عالاخر لمدة ساعة ونصف بتطفي الغاز وبتطلعيها من المي وبتتركيها تبرد تماما، بتفتحي العلبة بتلاقي صوص توفي جاهز ومن اشهى مايكون .