محاشي متنوعة منها خاروف محشي ورق عنب

المقادير

• رح اكتب مقادير عامة:
• كل نصف كيلو دوالي بحاجة كيلو ارز متوسط الحبة
• كل راس ملفوف كبير او راسين صغار كيلو ارز
• للدولما بتحتاجي تشكيلة خضار لا تكثري منها بكفي ربع كيلو ورق العنب وراس ملفوف اصغر حجم ، اكمن جزرة عشرة فرضا ، و عشر حبات بطاطا وسط، 2 كيلو كوسا، بصلة وحدة كبيرة، عشر حبات بندورة ، عشر حبات فلفل صغار .
• حسب عدد الاشخاص بتقرري.
• بهارات المحاشي عموماً
• بهارات محاشي جاهزة او بهارات مشكلة
• بهارات دجاج او لحمة
• بهار الكاري
• كمون للي بحبه
• ورق غار مع اللحمة والدجاج يلي بقعر الطنجرة.
• ملح وفلفل وماجي

الخطوات

السلام عليكم ورحمة الله وبركاته

حبيت ابعت مجموعة من المحاشي المتنوعة في وصفة وحدة لانه الحشوات بتتشابه واذا في اختلاف بكون بسيط ورح انوّه عنه في الشرح، وكمان لإنه بعض الوصفات ما كان الها صور عندي الا صورة او صورتين فبعثتهم كلهم سوا،ان شاء الله الوصفة تنال اعجابكم.

أولاً/تجهيز ورق الملفوف وورق العنب

طبعا زي ما بتعرفوا اوراق الملفوف والعنب بدها سلق وفي ناس ما بيسلقوا ورق العنب برأيي لااازم ينسلق منه بينضف من الغبار وبقايا الاتربة ومنه لونه بيفتح ( مع انه لون الورق وجدت انه اله علاقه بنوع الشجرة) ومنه بيطرى لسهولة اللف.

بحب اضيف لمية السلق ملح ، ولمية الدوالي زيت زيتون بيعطيه لمعه حلوة.

ثانياً/ الحشوات

حشوة الدوالي

ارز متوسط او قصير الحبة منقوع عليه بهارات كاري وبهارات دجاج وبهارات زيادة حسب الرغبة وماجي وملح وفلفل وزيت ذرة وممكن بصل وثوم ناعم نكهته غير شكل واللحمة اختياري بس اذا استخدمتي لحمة قلبيها في زيت عالغاز مع بهارات عشان تتخلصي من زفارتها.

حشوة الملفوف

نفس حشوة الدوالي بالضبط بالاضافة لصلصة البندورة وفي ناس بحبو الكمون بالنسبة الي مابحبه وما بضيفه.

حشوة الدولمه

حشوة الدولمة مختلفة بالبهارات عن الحشوات السابقة لانها الها خلطة خاصة فيها بتعطيها طعم مميز ونكهه قوية وهيه بشتريها مخلوطة جاهزة مش متوفرة بكل الاماكن ، انا اشتريتها من محل كباتيلو وسط البلد حسب ما دلّوني اصدقاء من العراق مقيمين في الاردن.

ثالثاً/ لف المحاشي

بينلف الدوالي وبيترتب في طنجرة على قد كميته عشان تطلع معك قالب شكله حلو وبتترتب الحبات على شكل وردة هيك بتضمني انها ماتفرط لما تقلبيها.

في قاع الطنجرة شرحات بندورة وبصل وليمون.

بينلف الملفوف وبيترتب في طنجرة في قاعها بصل وثوم وشرحات ليمون وقطع ليّة اختياري.

في قعر الطنجرة للملفوف او الدوالي ممكن اضافة لحمة او دجاج بشرط تقليبهم وتشويحهم في زيت زيتون مع البهارات للتخلص من الزفارة قبل ترتيب المحاشي فوقهم.

رابعاً/ الدولمه

هيه تشكيلة من المحاشي بتتضمن دوالي وملفوف وكوسا وفلفل وجزر وبصل وبندورة وبطاطا ، طبعا بدك تقدري الكميات لاتكثري من كل نوع لانهم مع بعض كمية.

للأسف ما عندي صور لحشي الانواع اللي مش متعودين عليها مثل الجزر والبصل والبندورة بس رح احاول بالشرح اقرب الصورة قدر المستطاع

*الجزر*

عشان تحفريه لازم تسلقيه نصف سلقه وتبرديه بعدين بينحفر بسهولة .

*البصل*

بيتقشر وبنسلق لمدة خمس دقائق فقط وبس يبرد رح تلاقي البصلة طرية بتجرحيها بالسكين من جانب واحد بتوصلي جرح السكين لقلب البصلة فقط مابدنا نقطعها بالنص، وبتصيري تشيلي طبقة طبقة بحذر رح تلاحظي عندك بصل طري شبه كروي بتحشيه وبتلفيه من الجهه المجروحة، بصلة وحدة كبيرة بتكفي لانها طبقات كثار.

*البندورة*

بتفتحي البندورة من الاعلى بس مش للاخر خلي القمة بمثابة غطاء الها وبملعقة صغيرة فرغي قلب البندورة السائل والبذور واحشي مكانها الحشوة وغطيها وبتترتب واقفه بالطنجرة.

*البطاطا*

حفرها عادي مثل الكوسا.

*الفليفلة*

نفس البندورة بنقطع الغطاء وبنخليه معلق وبنشيل البذور بملعقة، بس ملاحظة عالفليفلة انا ما بحطها بالمحاشي لانه نكهتها بتطغى على كل المحاشي يعني بتاكلي دوالي طعمها فليفلة الكوسا طعمه فليفلة ، بس يلي بحبها حسب رغبته.

خامساً/ ترتيب الدولمه

بتترتب محاشي الدولمه من القاسي للطري يعني الخضار يلي بتاخد وقت مثل الدوالي والبطاطا والجزر تحت ومن فوق الباقي وبنراعي بالمحاشي يلي بتسقط حشوتها مثل البندورة والفليفلة انها تكون مرتبه قاعدة و بابها لفوق.

سادساً/ الخروف المحشي دوالي

بتحتاجي تجهزي الخروف بتجهيزات كتيرة،،،

رح انزل طريقته لوحدة لانه بده شغل كثير.

صراحة بعد ماكنت مبلشه اكتب طريقته حسيت انه مابيوسعه هون فقررت انزله لوحده مع انه ماعندي الا صورة وحدة اله باقي الصور راحوا ب فورمات التلفون.

سابعاً/ الطهي

لكل انواع المحاشي تغمر بالماء لحد المحاشي ما تكون يدوب ظاهرة من المي وبينضاف ماجي وزيت وبهارات وبتغلي نصف ساعة بعدها بنخفض الغاز على الاخر وبنتركها ساعتين تستوي براحتها، وبعد مانطفي الغاز بنخليها ترتاح ربع ساعة قبل التقديم وصحة وهنا.

رغم انه الملفوف مابده ساعتين عالغاز زي الدوالي بس بخليه ساعتين بطلع اكثر من رائع.

ملاحظة/

احيانا بنعمل ملفوف وبزيد معنا شوية حشوة ف بعملها على شوية ورق عنب بطنجرة صغيرة على قدها، الصورة يلي فيها ملفوف ودوالي كانت بسبب هيك زيادة حشوة عملت الدوالي لحال بس قدمته مع بعض.