كيكة زاكي
كيكة زاكي
المقادير
- مقادير الكيك
- 4 بيض
- 1 كوب زيت ذرة او زبدة
- 1 كوب حليب ثقيل
- 2م.ص فانيلا
- 2 كوب طحين ابيض
- نصف كوب كاكاو بودرة
- م.ص بيكربونات الصوديوم
- فستق حلبي للتزيين
- علبتين قشطة
- م.ص خل ابيض
- مقادير كريمة القشطة
- 4 ملاعق كبار سكر بودرة
- 2 م.ك كاكاو خام
- ظرف كريما جافه
- مقادير الجناش
- 2 كوب ماء
- 1 كوب حليب بودرة
- 1 كوب سكر عادي
- 3 ملاعق طحين
- 3 ملاعق كاكاو خام
- م.ك زبدة
الخطوات
كيكة الشوكولا مع بديل الجناش وبديل البيكينج باودر.
السلام عليكم ورحمة الله وبركاته
هالكيكة اهداء مني لأولادي لإنهم طلبوا مني كيكة زاكي ، قصدهم صورة زاكي الكيكة المثلثة هههه ، بس عملتها بدون كرزة، كيك الشوكولا من الذ الكيكات خاصة مع حشوة الكريما وجناش الشوكولا الرائع، تفضلوا الطريقة
أولاً/ خليط الكيك
نضرب 4 بيضات بمضرب البيض مع السكر والفانيلا لحتى ينفش ويفتح لون البيض بعدين بنضيف كاسة زيت ذرة وبنستمر بالخفق ، بنكون مجهزين المكونات الجافة الطحين والكاكاو والكربونة وناخلينهم مرتين، ومجهزين كاسة حليب ثقيل وبنصير نضيف طحين مرة وحليب مرة بنبدا بالطحين وبننتهي بالطحين لحتى تكمل الكمية بنضيف بالاخر ملعقة خل ابيض صغيرة بنمزجها مع الخليط منيح .
ملااحظة
الكربونة والخل بديل رائع ونااجح للبيكينج باودر لما تنقطعي وما تلاقي عندك.
ثانياً/ الخبز
بنحمي الفرن على حرارة 180 طول مدة الخلط بكون شغال الفرن يسخن ، بنفرغ خليط الكيك بصينيتين قياس 20 سم مبطنات بورق زبدة او زيت و رشة كاكاو بدل طحين عشان اللون.
وبندخلهم الفرن لمدة 35 دقيقة وبنختبر الاستواء كالعادة بعود خشبي، لا تحمريها مش بحاجة تحمير اصلا ما ببين لانها بنيه.
ثالثاً/ تجهيز كريمة القشطة
هذا النوع من الكريما سهل ولذيذ وقوامه ممتاز بتحطي علبتين قشطة عليهم 4 ملاعق سكر مطحون وملعقتين كاكاو خام وبتخفقي بالخفاقة ليمتزج تماما بتضيفي ظرف كريما جافه زي ماهي وبتخفقي بصير قوام الكريما جامد وطعمها لذيذ.
بتبرديها بالثلاجة ساعة. انتي جهزيها وحطيها بالثلاجة قبل ماتعملي الكيك احسن.
رابعاً/ تغليف الكيكة
لازم تبرد الكيكة 100% قبل تغليفها بالكريما لحتى ما تخرب معك وتسيح، بتحشي بين طبقتين الكيك كريما ومن برا بتغلفيها كمان وبتنعميها قدر المستطاع.
وعالثلاجة تبرد.
خامساً/ جناش الشوكولا
بتحطي في جاط 1 كوب حليب بودرة وكوب سكر و3 ملاعق طحين و3 ملاعق كاكاو و2 كوب ماء وبتخلطي منيح وبتصفي المزيج ، وبتدخليه الميكروويف دقيقتين كل مرة وبتحركي وبترجعي عالميكروويف دقيقتين لثلاث مرات مجموع الوقت 5 — 6 دقائق مابدنا اكثر من هيك عشان ماتجمد وتثقل الشوكولا بتضيفيلها ملعقة زبدة وبتحركيها لحتى تذوب تماما.
سادساً/ تغطية الجناش
هوه المفروض هالخطوة تنعمل على شبك بس ماعندي فعملت شبكة من اعواد الشوي على صينية عشان لما يسيل الجناش ما يروح هدر ونجمعه في صينية ونعيد استخدامه، بتحطي الكيكة على الشبك وبتصبي عليها الجناش لتتغلف تماما وبتزيتيها بالمكسرات المفضلة عندك وبتبرديها شوي.
سابعاً/ التقديم
قطعي الكيكة مثلثات وقدميها مع فنجان من القهوة ، او كأس من العصير للاطفال وصحة وهنا.
