مقلوبة اللحمه بالباذنجان

المقادير

• 3 كيلو لحمه
• 3كاسات ارز حبه قصيره
• كاسه حبه طويله
• شعيريه حسب الرغبه
• باذنجان الكميه حسب الرغبه
• زيت للقلي
• حبتين بندوره
• بصله
• ملح
• فلفل اسود
• هيل
• ورق غار
• كركم
• قرفه
• كاري

الخطوات

بسم الله نبدا

يسعد اوقاتكم حبيباتي المقلوبه من الاكلات المحببه لدى الجميع واحنا بالعاده بنعمل المقلوبه بالداج بس كل فتره وفتره بنميل لتغيير النمط وبعملها باللحمه طبعا حسب نوع اللحمه اذا كانت اللحمه طيبه رح تكون المقلوبه من الذ ما يكون وما تتقيدي بالباذنجان بتقدري تحطي جزر بطاطا زهره بس انا لقيت الباذنجان البق شي للحمه

طبعا بنبلش بثلاث خطوات مع بعض طبعا بكون غاسله اللحمه منيح وبغممرها باامي بس تغلي بشيل الزفر وبحطلها ملح وفلفل وبهار وكاري وهيل ورق غار وعصفر وبضغطه لمدة نصف ساعه في هذا الوقت بكون نفعت الرز وقليت الباذنجان والشعيريه طبعا الشعيريه اختياري

بنبلش نطبق المقلوبه على بعضها

اول شي بغسل الرز كويس بضيفله الشعيريه والملح الفلفل الاسود والبهارات وبحركهم منيح وبرش بقاع الطنجره شوي من خلطة الرز وبضيف فوقها شرحات البندوره الطبقه التانيه اللحمه وبعدين الباذنجان واخر شي طبقة الارز وبصفي الشوربه وبغمر الرز وبخلي الشوربه مرتفعه بقدر عقدة الاصبع وبولع الغاز على العالي لمدة عشر دقايق وبعدين بوطيه وبغطي الطنجره الا ان تنضج وبقدمها مع السلطه واللبن والف صحه وهنا

طبعا القلوبه كلنا بنتقنها وكل واحد الو طريقته ورغباته وحلو انه نتبادل الخبرات ما بين بعض وهي طريقتي ان شاء الله تعجبكم ربي يسعدكم في الدنيا والاخره يا احلى وردات

استودعتكم لله الذي لا تضيع ودائعه