تخليل الزيتون الأخضر

المقادير

• زيتون اخضر 5 كيلو
• ماء مفلتر
• ليمون
• فلفل حار
• ملح خشن خالي من اليود
• خل ابيض
• سكر

الخطوات

كبس الزيتون الأخضر

السلام عليكم ورحمة الله وبركاته

طبعا بلش موسم الزيتون وصار لازم نموّن للشتاء ، وملك المونة الزيتون بأنواعه ، رح اقدملكم وصفة كبس الزيتون الأخضر مجربة وبعملها كل سنة بنفس الطريقة ومازال عندي زيتون من السنة الماضيه مثل ماهو ماتغير نفس الطعم والقرشة حتى في عرق مرار طفيف وهوه يلي بالصورة بالصحن.

أولاً/ قطاف الزيتون

اقطفي الزيتون اذا كان عندك شجر او حتى اذا اشتريتي لازم تنقيه من الزيتون المسوّس او المضروب وتغسليه بالمي مرتين عشان نتخلص من الغبرة.

ثانياً/ دقّ الزيتون او تشطيبه

لازم ندق الزيتون ونتأكد انه انجرح من اي ناحيه مش مهم عشان يطلع المرار القوي منه ، او بتجرحيه بسكين زي مابدك.

ثالثاً/ نقع الزيتون

طبعا نقع الزيتون اختياري في ناس ما بينقعوه نهائيا وفي ناس بينقعوا وبغيروا المي وووووو، انا بنقعه يومين فقط بدون تغيير المي، لانه بنحبه في مرار يضل.

رابعاً/ محلول التخليل

وهون اهم خطوة بنحتاج مي تكون مفلترة او مي مغليه ومبرّدة عشان ما يصير ريم ابيض على وجه الزيتون واللي هوه فطريات ،

بنجهز محلول المي لكل كاسة ماء ملعقة كبيرة ممتلئة ملح خشن خالي من اليود، ولكل مرتبان 5 كيلو ملعقة سكر وملعقتين خل بنحطوا على المحلول.

خامساً/ التخليل

بنفرغ المي عن الزيتون المنقوع وبنفرغه بسدر او جاط كبير وبنضيف عليه ليمون شرائح وفليفلة مقطعه حارة وكوب كبير زيت زيتون وبنخلطهم سوا.

وبنعبيهم بمرتبانات بالحجم اللي بدكياه وبتضيفي المحلول للمرتبان ، رح يرجع الزيت يطوش على وجه المي ويحمي الزيتون من التأكسد مع الهواء، ولا تفتحي ابدا على الزيتون قبل شهر .

نصائح عامة/

1— اذا كان مرتبان ناقص وماتعبى زيتون حطي على وجهه قطعة نايلون تغليف غذائي خليها تلامس الزيتون مش على باب المرتبان.

2— الملح العادي فيه يود واليود بخلي الزيتون يطرى مع المدة ، فلازم ملح خشن خالي من اليود.

3— لون الزيتون توصلت الى انه لابد يتغير ويصير فاتح مهما عملنا شفت طرق كثير للاحتفاظ بلون الزيتون اخضر ، بس ما زبط منعا شيء دائما بفتح وبتغير، مع انه طعمه بضل لذيذ وبقرش.

4— حطي بالمرتبانات قبل تخليل الزيتون فيها ، شوية خل وامسحيه بالخل هوه والغطا لتعقيمه ونحمي الزيتون من التعفن، طبعا مع خطوة الماء المفلتر.