كيكة باربي ملكة الحلويات الشعبية

المقادير

• 2 كيك فانيلا
• كريمة زبدة
• عجينة الفوندان

الخطوات

السلام عليكم ورحمة الله وبركاته

حبيت اقدملكم كيكة مميزة باستخدام عجينة الفوندان يلي الها استخدامات رائعة أهمها لتغطية الكيك وهون بترك لخيالك المجال تتخيلي قديه في اشكال وابداعات ممكن تعمليها بهالعجينة الرائعة ، وفرصة انك تفرحي اولادك واهل بيتك بكيكة راقيه وفريدة بشكلها وفريدة لانك انتي حطيتي فيها روحك ومحبتك الهم، يارب تعجبكم ،

رح تلاقوا كل التفاصيل والملاحظات المهمه لنجاح الكيكة.

أولاً/ الكيك

اعملي قالبين كيك فانيلا بطريقتك المعتادة بس بدنا القالبين يكونوا مفتوحين من الوسط ، لا تستغربوا رح تعرفوا ليش لاحقا.

ثانياً/ عملية القياس والنحت

حضري اللعبه اللي عندك ولفي عليها نايلون تغليف لحد الخصر بلاش تلامس الاكل افضل.

اقطعي الطبقة العلوية من قوالب الكيك اللي بتكون بارزه شوي بس احتفظي فيهم لا ترميهم رح نحتاجهم.

رتبي القالبين فوق بعض وثبتيهم بأعواد خشب قوية الخاصة بالشواء احسن شيء واحشي بينهم كريمة زبدة عشان يلزقوا ودخلي اللعبه بالوسط وقيسي عليها لازم الكيك يوصل للخصر واذا طلع اقل من الخصر زيدي من الكيك اللي قطعتيه .

بعد ما صار القياس تمام بلشي انحتي الكيك على شكل تنورة الفستان بسكين منشارية وبهدوء مابدها كثير نحت شكل قوالب الكيك بيساعدك لانهم انسيابيين.

ثالثاً/ كريمة الزبدة

شيلي اللعبه خلص يعطيها العافيه خلص دورها، وادهني كل الفستان بكريمة الزبدة منيح ودخليها الثلاجة تبرد ضرورية هالخطوة.

رابعاً/ مفاجأة داخل الكيك

في الفتحة اللي بالوسط املأيها للوسط دروبس ملون m&m او اي نوع بيشبهه عشان ينهار عند تقطيع الكيكة فيما بعد ، وطبعا فرحة الصغار فيهم لا توصف.

خامساً/ تلبيس اللعبة

افردي قطعة عجينة السكر الزهر الكبيرة افرديها بشكل دائري واسع ولا تبخلي بكمية العجينة بلاش يطلع الفستان قصير، وشيلي الدائرة المفرودة بحذر وحطيها فوق جسم الكيك وخليها تنزل رح تصير ثنيات مثل الفستان الحقيقي وزبطيها انتي ورتبي ثنياتها .

/ افتحي بالسكين من فوق عند فتحة السكاكر افتحي على شكل x ودخلي اللعبة بلطف وانتبهي انه فيه سكاكر ، نزلي اللعبه لخصرها.

سادساً/ بلوزة الفستان

بعجينة صغيرة بيضاء اعملي شكل مستطيل يتناسب مع حجم جسم اللعبة العلوي وافرزيه من الوسط على شكل v عشان يعطي شكل قصة القبة وملسيه بايدك ولفيه حول الجسم واقطعي الزيادة وثبتيه على اللعبة .

سابعاً/ تفاصيل على الفستان

بدنا نعمل شوية تفاصيل تجمّل الفستان مثل ورود صغيرة وقطع ملتويه زي الصور ، وفيونكه لخلف الفستان، حتى اسوارة وعقد عملتلها طلعوا حلوين.

نصيحة/

جهزي الورود والاشكال قبل بوقت واتركيهم بعلبه عشان يكونوا جاهزين للاستخدام.

ملاحظة/

في اماكن لااازم تستخدمي فيها ورود اجباري وهيه مكان التقاء البلوزة بالتنورة لانه بكون باين خط بينهم فبدنا نخفيه بنحط ورود ، وكمان على ذوقك وين بتشوفي بده وردة او اكسسوار حطي.

ثامناً/ غراء اللصق

الغراء اللي بنلصق فيه الورود والتفاصيل الصغيرة هوه عبارة عن سكر مطحون مع قطرات ماء فقط بتخلطيهم وبتستخدمي مثل الغراء بالضبط ، استعمليه بعود خشب عشان ما تتوسخ المناطق الثانيه.

يارب تكون عجبتكم هالكيكة ، وتدعموني بانكم تضيفوها للمفضلة. ولا تنسونا من صالح دعائكم ، بعتذر لانه ماتم تصوير مرحلة فرد العجينة وعمل الوردات لإنه كنت مستعجله بالشغل وماقدرت اصور في عزّ الانشغال.

*رح انزل طريقة عجينة الفوندان بكرة ان شاء الله*